Hosea 8:1-14
8 Deenástsʼaaʼ bideeʼ bee íʼdílzoołí ázanitsééh. Atsági átʼéego anaʼí éí Diyin God bikin biiʼ sohodizin yikʼi hwiidooleeł, háálá shibee ahaʼdeetʼáanii kʼídeiztiʼ áádóó shibee hazʼáanii doo ákǫ́ǫ́ ádayííłʼįįd da.
2 Kʼad nídashookąąhgo ádashiłní, ShiDiyin God, Ízrel dineʼé niidlíinii néédahoniilzin.
3 Ízrel dineʼé éí yáʼádaatʼéehii tʼóó yóóʼadayiiłkaad, áko anaʼí nilíinii baatįįh doonééł.
4 Aláahgo naatʼáanii łaʼ nideiznil, nidi éí doo shí shikʼehgo da; naatʼáanii nideiznil lá, nidi éí doo bee lą́ aséłı̨́įʼ da. Edaʼalyaii béésh łigaii índa óola yee ádá ádayiilaa, áko tʼáá éí biniinaa ádabidiʼdooldįįł.
5 Samériya dineʼé nohłíinii, béégashii yáázh beʼelyaii ádaahłaaígíí doo nihá nisxin da; tʼáá íiyisí bikʼee sháháchįʼ; haa nízáadishąʼ índa hashtʼeʼninádoohkah?
6 Ízrel dineʼé yinaashnishgo áyiilaii éí doo Diyin God átʼée da; Samériyagi béégashii yáázh beʼelyaii éí kóníshéhígo didoolzéí.
7 Níyol kʼedazdeezláago náátsʼóʼoołdísii áłah áńdazhdoodlííł; akaz tʼáadoo bineestʼąʼ dahazlı̨́įʼii tłʼoh naadą́ą́ʼ bąąh ádin doo áádóó azhą́ tłʼoh naadą́ą́ʼ áłchʼı̨́ı̨́dí nidi, déʼéyóní éí yaa nahodikai doo.
8 Ízrel dineʼé baa nahodeesdeeʼ; ałʼąą dineʼé bitahgóó doo chonídaotʼı̨́ı̨́ átʼéii daazlı̨́ı̨́ʼ.
9 Télii ałchinii tʼáá sáhí yóóʼeelwod nahalingo Asíriyagóó yóóʼaheeskai. Íífreiyim éí adeenáago yił ałchʼįʼ dah daalwoʼ dooleełii yooskan.
10 Azhą́ ałʼąą dineʼé bitahdóó bíká adoojahii dayoozkan nidi, kʼad áłah áhodeeshłííł áádóó bídahólníihii binanitʼaʼí nilíinii hade ádahósingo biniinaa ájíłchʼı̨́ı̨́dí jooleeł.
11 Íífreiyim éí ádił niʼiilzííh biniyé bikááʼ nááʼiiniihí tʼóó ahayóí áyiilaago éí bikááʼ nááʼiiniihí bee ádił niʼiilzíihii daazlı̨́ı̨́ʼ.
12 Shibee hazʼáanii ląʼí há bee akʼeshíłchı̨́į nidi, doo bééhózinii átʼéego yaa nitsíkees.
13 Atsįʼ nááhániihii shichʼįʼ náádayiiłniih yę́ę deiyą́; nidi Bóhólníihii doo yaa bił hózhǫ́ǫ da; kʼad lą́ą doo ákwii ádajíítʼįįdii yénálniiʼgo ádił nidaʼiisíʼígíí biniinaa atíhodiʼdoolníiłgo Ííjip kéyahgóó nihéézhdookah.
14 Háálá Ízrel Ábiilaii yaa yooznahgo kin ayóó átʼéii ádayiilaa; Júdah éí tʼóó ahayóí kin hadaasʼá binídaʼastłʼingo ádayiilaa. Nidi hakin hadaasʼáii bikʼijįʼ kǫʼ bidadideeshnoł, índa hakin ayóó ádaatʼéii ałtso adahididookʼą́ą́ł.
