Isaiah 32:1-20
32 Jó, aláahgo naatʼáanii tʼáá ákogi átʼéego nantʼáa doo, áádóó naatʼáanii danilíinii doo haada yitʼéégóó bídahólnííh.
2 Áádóó diné łaʼ níyol bitsʼąą índa níyoltsoh bitsʼąą bineʼ aʼniichéehii nahalin doo, áádóó kéyah hóółtseigi tooh danílíinii nahalin, índa kéyah náhodínéesdzáagi tsé bee bichahaʼohígíí nahalin doo.
3 Áádóó daʼooʼínígíí dabinááʼ doo ádaadįįł da doo áádóó dadiitsʼaʼígíí bijaaʼ yee daʼíistsʼą́ąʼ doo.
4 Doo dahóyą́ą́góó tsı̨́ı̨́ł ádaʼdilʼíinii bijéí yee ił ééhózin yikʼidadiʼdootı̨́ı̨́ł, áádóó ałtʼadandzihii éí tʼáá bééhózínígo hadadoodzihii yee hashtʼeʼádadoolzin doo.
5 Doo áhályáanii doo diné ílíiniigóó náábiʼdídóojiił da índa tʼóó áhodiilgisii éí bił hadleeʼ doo náábididooʼniił da.
6 Jó, diné doo áhályánígíí éí saad doo yáʼátʼéehii yee yáłtiʼ áádóó doo ákwii átʼéii áyoolííł, áko doo Diyin God kʼehgo áánííłgóó yikʼijįʼ doo yáʼáshǫ́ǫ́góó yáłtiʼ áádóó diné biiʼ naazíinii dichin danilíinii doo hwiih danilı̨́ı̨́góó áyósingo índa dibááʼ danilíinii tó biʼoh dahiniłnéehgo áyósingo bijéí biyiʼdi doo yáʼátʼééhgóó nahaʼá.
7 Tʼóó áhodiilgisii yee ááníłígíí ałdóʼ doo yáʼáshǫ́ǫ da; azhą́ joobaʼ nahasʼáanii tʼáá ákogi átʼéego yádaałtiʼ nidi, badahojoobáʼíii woochʼííd yee íidoołdįįłgo yinahaʼá.
Jerúsalemgi sáanii tʼahídą́ą́ʼ bee iʼílniiʼii
8 Nidi diné ílíinii éí yáʼádaatʼéehii yinahaʼá áádóó yáʼádaatʼéehii yee sizı̨́.
9 Sáanii danohłíinii, doo hodítéehii dahinohnáanii dahidohnááh; atsiʼké doo bił ádahootʼéhí danohłíinii, shiinééʼ dadoohtsʼı̨́ı̨́h áádóó shizaad deísółtsʼą́ą́ʼ.
10 Sáanii doo bił ádahootʼéhí danohłíinii, nááhaidóó tʼáá díkwíí yiską́ąjįʼ nihichʼįʼ nidahwiiʼnáa doo, háálá chʼil naʼatłʼoʼii doo bąąh naʼntʼąʼ da doo, áádóó doo bąąh náʼóbeeh da doo.
11 Sáanii danohłíinii, doo hodítéehii dahinohnáanii, nihitah dahoditłid leʼ; doo bił ádahootʼéhí danohłíinii, yínííł danohłı̨́į leʼ; nihiʼééʼ hadahidoohníiłgo tʼáá dałinohchíʼígo tłʼoh azis bił áká daołzis.
12 Nihiyid nidanołtsʼingo dáʼákʼeh hózhóní yę́ę áádóó chʼil naʼatłʼoʼii bineestʼąʼ yę́ę bąąh danihíniʼgo atínídadinohdleeh.
13 Shidineʼé bikéyah bikááʼ chʼil deeníní áádóó chʼil daʼdishahii hadadínóotʼı̨́įłii, tʼáá aaníí, kin biiʼ ił hózhǫ́ yę́ę índa ił hózhǫ́ǫgo kin haalʼá yę́ę bąąh danihíniʼgo atínídadinohdleeh,
14 háálá aláahgo naatʼáanii dabighan yóóʼadidootʼááł; kin haalʼáagi kéédahatʼíinii yóóʼahidoonééł; bineʼ naʼadziʼii bá nahazʼánígóó áádóó kin yadaaʼáhígóó hoolʼáágóó naaldlooshii dabighan doo; ákwii télii ałchinii bił dahózhǫ́ǫ doo índa dibé daʼałchozh doo.
15 Yáʼąąshdę́ę́ʼ Níłchʼi Diyinii nihikʼijįʼ biʼílniiʼjįʼ áádóó honoojíidi aneestʼąʼ tʼóó ahayóí silı̨́įʼjįʼ índa kéyah bikááʼ nidaʼntʼąʼígíí éí tsin bee hodíłchʼil nahalingo baa nitsáhákees silı̨́įʼjįʼ éí ákóhootʼée doo.
16 Ákohgo honoojíidi doo haada yitʼéii hólǫ́ǫ doo áádóó kéyah bikááʼ nidaʼntʼąʼígi tʼáá ákogi átʼéii hólǫ́ǫ doo.
17 Áádóó tʼáá ákogi átʼéii éí bee hashtʼehodítʼée doo índa tʼáá ákogi átʼéii bee ił hodéezyéél áádóó hoł tʼáá aaníigo átʼéii iidééłní.
18 Áko shidineʼé hashtʼehodítʼéego hazʼą́ągi áádóó hasih hazʼą́ągi índa hodéezyéelgo hááʼáyı̨́įhgi kéédahatʼı̨́į doo;
19 tsin bee hodíłchʼilgi níló nááłtą́ągo wóyahgo hazʼánígi kin haalʼáii aʼohgo dooleeł.
20 Tʼáá ałtsogóó tábąąhgi kʼéédaʼdoohdléhígíí áádóó béégashii áádóó télii béédaʼołnihígíí nihikʼidahojidlí.
