Isaiah 48:1-22
48 Jéíkab dineʼé, Ízrel nidiʼníinii, éí Júdah dineʼé bishchíinii, índa Bóhólníihii bízhiʼ bee ádee hadíínídzíʼígíí áádóó doo tʼáá aaníígóó doo nidi tʼáá ákogi átʼéégóó Ízrel dineʼé biDiyin God bízhiʼ bee yínízhíhígíí, díí yísíníłtsʼą́ą́ʼ.
2 Jó, éí hodiyingo kin haalʼáii* bee ádííníjí áádóó Ízrel dineʼé biDiyin God baa jííníshłí, diní; éí tʼáá ałtsoní bee Bóhólníihii bidiʼní.
3 Chʼóóshdą́ąʼdi ádahóótʼįįdii bee nił hweeshneʼ; éí bee hahásdzíiʼgo yitʼíní ádaashłaa índa tʼáá hooshchʼįʼ ádaashłaago bidahoolyaa.
4 Shił bééhózingo nanchǫʼ áádóó nikʼos éí béésh nitłʼizii nahalingo ayóó íídóotsʼid índa nítááʼ éí béésh łitsoii nahalin.
5 Éí bąą, Eʼelyaii danihíhígíí áátʼįįd índa tsin naaskʼęęʼii áádóó doolyı̨́įʼgo eʼelyaii éí haadzíiʼgo bohoolyaa, doo dadidoohniił daígíí biniyé tʼáá bítséedi tʼáá náshiinídą́ąʼdii bee nihichʼįʼ haasdzííʼ áádóó nihichʼįʼ yitʼíní áshłaa.
6 Shoo, díí tʼáá ałtso disínítsʼą́ą́ʼ áádóó yiniłtsą́; daʼ doósh baa hodíílnih da? Nidanilʼingo doo nił béédahózin da yę́ę ániidí danilíinii kʼad kodóó nichʼįʼ yitʼíní ádaashłaa.
7 Kʼad índa ádaalyaago doo tʼáá náshiinídą́ąʼdii da; díí jı̨́įjįʼ nidi tʼah doo diitsʼı̨́įh da, áko, Shił bééhózin, jóʼakon, doo didííniił da.
8 Tʼáá aaníí, tʼah doo diitsʼı̨́įh da nítʼééʼ; tʼáá aaníí, doo nił bééhózin da nítʼééʼ; tʼáá aaníí, doo adinitsʼaʼdą́ą́ʼ díí shił bééhózin: doo nazhdíʼnóodlíʼígi ánítʼée doo, áádóó tʼáá niʼdizhchı̨́ı̨́dę́ę́ʼ bee hazʼáanii yiyiitíihii yinílyéé nítʼééʼ.
9 Shízhiʼ biniinaa sháháchįʼígíí átsé nahjįʼ kóshłaa, áádóó shaa haʼniihígíí biniyé ná tʼą́ą́ʼ kwíínísin, áko doo ándeeshdįįł da.
10 Jó, ąąh nándííłhı̨́ı̨́ʼ, béésh łigaiigi átʼéego éí dooda, nidi déédíljah góneʼ achʼįʼ nahwiiʼná nibééhwiizįįhígíí bee nínítą́ą́ʼ.*
11 Shí shąą, tʼáá shí shąą ákódeeshnííł. Haʼátʼíísh biniyé shízhiʼ tʼóó baaʼihgo óolzin doo? Bee shaa haʼniihii doo łaʼ baa dideeshʼáał da.
Bóhólníihii éí Ízrel dineʼé yikʼé nináʼdoodlééł
12 Jéíkab nílíinii, Ízrel bee níízhiʼii, shíísíníłtsʼą́ą́ʼ; shí éí áshtʼı̨́; shí áłtséhígíí nishłı̨́; shí ałdóʼ akéédę́ʼígíí nishłı̨́.
13 Shílaʼ bee nahasdzáán bítsé siláii ninílá, áádóó shílaʼ nishʼnáájíígíí bee yádiłhił kʼídasíłtsʼǫ́ǫ́d; bichʼįʼ ádííniidgo tʼáá łahjįʼ deiizįʼ.
14 Tʼáá ánółtso ahanihohkáahgo daʼdoohtsʼı̨́ı̨́h; edaʼalyaii bitahdóó háísh díí yaa hoolneʼ? Bóhólníihii ayóóʼáyóʼnínígíí éí Bábilan dineʼé tʼáá óoshłeʼ nízinígi íidoolíiłgo bidziil yee Kaldíya dineʼé yichʼįʼ dooldził.
15 Shí, tʼáá shí haasdzííʼ; tʼáá aaníí, hágo bidííniidgo bá áhootʼéégóó bił níʼáázh, áko yáʼátʼéehgo óʼoolíił doo.
16 Áháníjįʼ shichʼįʼ ninohkáahgo díí dadoohtsʼı̨́ı̨́h; hahoolzhiizhdę́ę́ʼ doo nanilʼingóó nihichʼįʼ haasdzíiʼ da; áhóótʼįįdę́ę́ʼ ákwii honishłǫ́, áko kʼad Bóhólníihii Diyin God áádóó biNíłchʼi Diyinii yił shííłʼaad.
Bóhólníihii bidineʼé yá nahazʼánígíí
17 Bóhólníihii, nikʼénináʼídláii Ízrel dineʼé biDiyin nilíinii ání, Shí Bóhólníihii niDiyin God nishłíinii éí ná yáʼátʼéehii áádóó ná honítʼiʼgóó yínááł dooleełgo yínaniniłtinii nishłı̨́.
18 Shibikʼeh óʼooʼníiłii yíníłtsʼą́ąʼ doo nítʼééʼ nisin! Ákwíindzaago tooh nílı̨́ nahalingo nił hashtʼehodítʼée doo nítʼééʼ índa tónteel yilkʼooł nahalingo nitʼáá ákogi átʼéii nee hólǫ́ǫ doo nítʼééʼ;
19 séigi átʼéego naʼáłchíní tʼóó ahayói doo nítʼééʼ, índa tʼáá éí tsé yázhígi átʼéego nitsʼą́ą́dóó náás oochíłígíí hólǫ́ǫ doo nítʼééʼ; shidáahgi nízhiʼ doo nahjįʼ kódoolníił da, doo nidi ádooldįįł da nítʼééʼ.
20 Bábilan kin haalʼáádóó chʼínóhnééh; Kaldíya dineʼé bitsʼąą dadínóhchééh; nihił dahózhǫ́ǫgo dadołwosh; díí baa dahołneʼgo nahasdzáán nidaneesʼą́ąjįʼ baa chʼídahoyohʼaah; kódadohní, Bóhólníihii bá naalʼaʼí Jéíkab yikʼénináʼídlá.
21 Áádóó halgai góneʼ yooʼishgo doo dibááʼ daazlı̨́įʼ da; tsé biyiʼdóó tó háálı̨́įgo yá áyiilaa; tsé yiskʼisgo áyiilaago áádę́ę́ʼ tó hadzííłhaal.
22 Bóhólníihii ání, Doo yáʼádaashóonii hashtʼehodítʼé bá ádin.
