Isaiah 55:1-13
55 Shoo, tʼááłáʼí nootínígo dibááʼ danohłíinii, hágo tó hólǫ́ǫjįʼ ahohkááh, áádóó nihibéeso ádaadinii, hágo kweʼé nidaʼiyołniih áádóó daʼohsą́; hágo, tʼáá aaníí, béeso tʼáágééd índa doo bą́ą́h ílínígóó wáin áádóó abeʼ nidahołniih.
2 Haʼátʼíísh biniyé doo bááh nilíinii nihibéeso bikʼé nidahohłé áádóó doo bee hwiih ídlíinii bikʼé nidaołnish? Haleebee dashíínółtsʼą́ąʼgo yáʼádaatʼéehii daohsą́ áádóó nihiiʼ naazíinii ádaʼazįįd yee hwiih danilı̨́įgo bił dahózhǫ́ǫ doo.
3 Shichʼįʼ dah dínóotʼaahgo shaa nohkááh, daʼíísínółtsʼą́ą́ʼ, áko índa nihiiʼ naazíinii dahináa doo, áádóó hoolʼáágóó bidziilgo nihił ahaʼdideeshtʼáałii tʼáá éí ajoobaʼ doo nidootʼihii David baa deetʼáanii ádeeshłííł.
4 Jó, dadineʼé yił halneʼ doo índa yá sizı̨́įgo áádóó yinanitʼaʼí nilı̨́į doo biniyé baa diníʼą́.
5 Jó, dineʼé łaʼ doo béédahonohsinii hágo dabididohniił, áádóó dadineʼé doo nihéédahósinii Bóhólníihii nihiDiyin God áádóó Ízrel dineʼé biDiyin nilíinii binahjįʼ nihaa hidookah, háálá éí ayóó ádanohtʼéego ánihiilaa.
6 Tʼah nihá ashjaʼósindą́ą́ʼ Bóhólníihii hádaohtʼı̨́; tʼah kǫ́ǫ́ hólǫ́ǫ́dą́ą́ʼ nídaohkąąh.
7 Diné doo yáʼáshóonii yee átʼéii bíniʼdii yóóʼiidiʼaah, áádóó diné doo ákwii átʼéii éí yaa nitsíkeesii bíniʼdii yóóʼiidiʼaah, áko Bóhólníihii yichʼįʼ dah nídiidáahgo baa aʼááh dínóozįįł, áádóó nihiDiyin God yichʼįʼ dah nídiidzáago bił hadleeʼgo haʼátʼeʼ há yóóʼanéididooʼááł.
8 Háálá bee nitséskeesii éí doo bił aheełtʼéego bee nitsídaohkees da, índa ádanohtʼéii éí áníshtʼéii doo bił aheełtʼée da, ní Bóhólníihii.
9 Háálá yádiłhił éí nahasdzáán biláahdi hólónígi átʼéego áníshtʼéii éí ádanohtʼéii biláahgo átʼé, índa bee nitséskeesii éí bee nitsídaohkeesii biláahgo átʼé.
10 Jó, yádiłhił biyiʼdę́ę́ʼ nahałtingo áádóó yas nandéehgo doo tʼą́ą́ʼ kónáʼnéeh da, nidi nahasdzáán néíłtłeehgo bikááʼ chʼil hááhinootʼı̨́ı̨́ł áádóó bílátah daʼiigahgo éí kʼéédaʼdidléehii álástsiiʼ bee dahodooleeł, áádóó daʼayáanii chʼiyáán bee dahodooleeł;
11 shizaad shizééʼdóó hahwiileehígíí éí ákótʼé; doo tʼáadoo biniyéhígóó shichʼįʼ tʼą́ą́ʼ kónídooʼníił da, nidi tʼáá shił hóshónígíí łaʼyidoolííł áádóó tʼáá biniyé bee haasdzíʼíjigo éí yáʼátʼéehgo ádoonííł.
12 Jó, nihił dahózhǫ́ǫgo chʼídoohkah, áádóó hashtʼehodítʼé bił chʼínihiʼdidootʼish; dził áádóó dah daaskʼidii nihinááł adahodíʼnóotał, índa kéyah bikááʼ tsin tʼáá ałtso ahídaakad doo.
13 Chʼil dadeeníinii bitsáskʼehgi chʼó hadadínóotʼı̨́ı̨́ł, áádóó chʼil daʼdishahii bitsáskʼehgi tsin mértal sikaadii hadadínóotʼı̨́ı̨́ł, áko índa Bóhólníihii bízhiʼ biʼdójíigo éí hoolʼáágóó bee ééhózinii nilı̨́įgo doo nahjįʼ kódoolnííłgóó ádoolnííł.
