Isaiah 62:1-12
62 Záíyan biniinaa doo díníshhéel da doo, índa Jerúsalem biniinaa doo hanáshyı̨́įh da doo; tʼáá ákogi átʼéii bee iʼdíídláadgo bee yisdáʼiildéehii honooyééł diltłiʼ nahalin silı̨́įʼjįʼ ákódeeshnííł.
2 Áádóó ałʼąą dineʼé nitʼáá ákogi átʼéii, índa aláahgo naatʼáanii danilíinii bee ayóó ánítʼéii deidoołtsééł; yízhí ániidíii bee nidíʼdóojiił; éí Bóhólníihii yee hadoodzih.
3 Bóhólníihii bílákʼeegi naatʼá chʼah bee atsʼádiʼnílíidii nílı̨́į doo, áádóó Diyin God bílákʼeegi chʼah aláahgo nizhóníii nílı̨́į doo.
4 Yóóʼabiʼdootʼáanii, doo náándiʼdooʼniił da áádóó nikéyah éí, Doo Naagháhí Da, Doo Náábidiʼdooʼniił Da, nidi Héfzibah* nidiʼníi doo índa nikéyah Biyúlah* bidiʼníi doo, háálá Bóhólníihii naa bił hózhǫ́ áádóó nikéyah bichʼooní hodooleeł.
5 Áko tʼáá dinééh nilíinii tʼáá chʼikę́ę́h yił ahayítʼaashígi átʼéego naʼáłchíní naa dahakáah doo, áádóó iiyehii éí asdzání bá iigehii yaa bił nihoozhǫǫhígi átʼéego niDiyin God naa bił nihoozhǫǫh doo.
6 Jerúsalem nílíinii, ninaa ditą́ągo ahéédaʼastłʼinígíí bikááʼdóó diné hadaʼasíidii ninínilgo jı̨́įgo áádóó tłʼéeʼgo doo dadéesxéel da doo; Bóhólníihii nídaohkąąhii danohłíinii, tʼáadoo dadínółhélí,
7 áádóó tʼáadoo bił hodéezyélí adeínóhsin; nahasdzáán bikááʼgóó Jerúsalem bohoníłdzilgo áádóó baa haʼniih áyiilaajįʼ ákódaohtʼı̨́.
8 Bóhólníihii bílaʼ nishʼnáájígo yee dah didiilniiʼgo áádóó bibee adziil yee ádee hadoodzíiʼgo ání, Tʼáá aaníí, nitłʼoh naadą́ą́ʼ doo niʼanaʼí bichʼiyąʼ bá ánáádeeshdlíił da índa déʼéyóní biyeʼké niwáin binishínílnishii doo náádeidoodlı̨́įł da,
9 nidi áłah ádaʼiilaaígíí éí daʼdooyı̨́įłgo Bóhólníihii yaa dahaniih doo, áádóó ahandaʼiizhjaaʼígíí éí shihodiyin hazʼą́ągi deidlą́ą doo.
10 Yah adaʼiiztiin góneʼ chʼíhóhkááh, chʼíhóhkááh; diné bá atiin hashtʼedahohłééh; tsé nahjįʼ hadahohníiłgo hodilkǫǫhgo atiin ádaohłééh, ádaohłééh; dah naʼatʼaʼí diné bá de ádaahłééh.
11 Jó, Bóhólníihii éí nahasdzáán nidaneesʼą́ąjįʼ yaa hoolneʼgo ání, Dził Záíyan bichʼéʼé ádabidohní, Shoo, bee yisdádíínáałii baa hoolzhiizh; jó, niidooléełii bił hólǫ́, áádóó binaanish bilą́ąjįʼ hólǫ́.
12 Áko kódabiłníi doo, Diyin dineʼé éí Bóhólníihii bikʼé nináʼídláii, áádóó, Haʼneestą́ąʼii, tʼáá éí kin haalʼáii doo yóóʼadootʼáanii, daniłníi doo.
Footnotes
^ Héfzibah, jiníigo éí, Baa shił hózhǫ́, jiníigo óolyé.
^ Biyúlah, jiníigo éí, Ahaa jítʼáázh, jiníigo óolyé.
