Isaiah 8:1-22
8 Ákohgo Bóhólníihii áshidííniid, Naaltsoos yisdisii nitsaaígíí nídiiʼaahgo bikʼeʼíłchí, Haneetehee naalyeʼé, naalyeʼé tsı̨́įłgo yisná.
2 Nááʼiiłniihii nilíinii Yuráíyah áádóó Jiiberiikáíyah biyeʼ Zekaráíyah éí shá ooʼíinii nilı̨́į doo biniyé nídiinil.
3 Sheʼasdzą́ą́ baa níyá, áádóó iʼniiltsąądgo ashkii yishchı̨́. Áko Bóhólníihii áshidííniid, Meihiir-shéíleil-héísh-baz* bee yidíízhiił.
4 Háálá awééʼ éí, Shizhéʼé, doodaiiʼ, Shimá, níi dooígíí tʼah doo bił bééhoozįįhgóó Asíriya dineʼé aláahgo binanitʼaʼí binááł Damáskas kin haalʼáagi daʼílíinii áádóó Samériya kin haalʼáagi naalyeʼé ałtso adeidiyooyééł.
5 Bóhólníihii ánááshidooʼniidgo ání,
6 Díí dineʼé éí Silówamgi tó hazhóʼógo hadaazlínígíí doo deinízingóó, áádóó Ríízin índa Remaláíyah biyeʼ yaa bił nidahoozhǫǫhgo
7 éí bąą kʼad jóʼakon, Bóhólníihii éí tooh nílínígíí bidziilgo áádóó tʼóó ahayóigo hakʼijįʼ kwíidoolííł; éí Asíriya dineʼé aláahgo binanitʼaʼí áádóó yee ayóó átʼéii átʼé, áádóó bitooh yílzéeʼgo nílíinii ałtso wóʼądahizdoołhał
8 índa Júdah kéyahgóó adahizdoołhałgo tó de anoolʼąąłgo akʼosgo dínóolʼąął, áko Imányowel nílíinii, nikéyahgi tʼáá átʼé bitʼaʼ yikʼíidoołtih.
9 Dineʼé danohłíinii, tʼáá nihí wołí bee ádaahtʼı̨́įgo áádóó kódaníshéhégo ałtso nidahidoołtǫǫł; kéyah nidahoneesʼą́ą́dę́ę́ʼ nidaahkaígíí daʼíísínółtsʼą́ą́ʼ: tʼáá nihí áká dasoołzaazgo kódaníshéhégo ałtso nidahidoołtǫǫł; tʼáá nihí áká dasoołzaazgo kódaníshéhégo ałtso nidahidoołtǫǫł.
10 Ahíidohkahgo baa nídaahtʼı̨́į nidi, tʼáadoo nídoodleełí da; yádaałtiʼ nidi, doo bihodoolníił da, háálá Diyin God éí nihił hólǫ́.
Bóhólníihii éí bitsʼąą sínítiʼii átʼée leʼ
11 Jó, Bóhólníihii ayóó átʼéego bidziilii shichʼįʼ haadzíiʼgo díí diné ádaatʼínígíí tʼáadoo ákótʼéego nanináhí, shidííniidgo ání,
12 Nihiyaʼiidleeh, daanínígíí ni tʼáadoo ákódíníní, nidi yikʼee bił daayéʼígíí tʼáadoo bikʼee nił yéʼí, doodaiiʼ tʼáadoo náníldzidí.
13 Tʼáá ałtsoní bee Bóhólníihii tʼéí díínísin; bíniʼdii tʼáá bí tʼéí bikʼee nił yééʼ índa bíniʼdii tʼáá bí tʼéí bééníldzid.
14 Áko bineʼ aʼniichéehii nilı̨́į dooleeł, ákondi Ízrel dineʼé tʼáá áłah bichʼįʼ tsé yiniinaa dahidigeehii índa tsé yiniinaa ádił ayoolzihii átʼée doo. Áádóó Jerúsalemgi kéédahatʼínígíí bichʼįʼ tłʼóół naneesdiz áádóó łoh nidooʼnił.
15 Tʼóó ahayóí dahidigeehgo naa ahindéehgo kʼídaʼastǫʼ doo, áádóó łoh yiih dahaaskaigo yisnááh daazlı̨́įʼ doo.
16 Bee akʼeʼashchíinii bee bééhániihii bééʼítłʼó; shídahoołʼaahii bitahgóó bee hazʼáanii bidádiʼníłjeeh.
17 Bóhólníihii nayíníshłíigo éí Jéíkab baʼáłchíní ahoolchíiłii yitsʼąą biniiʼ neiniłʼinii bíká díníshʼı̨́įʼ doo.
18 Shoo, tʼáá ałtsoní bee Bóhólníihii Dził Záíyan bighą́ąʼdi kééhatʼíinii éí shí áádóó áłchíní sheinínilígíí Ízrel dineʼé bitahgi bee éédahózinii áádóó tʼóó bikʼedaʼayóii daniidlı̨́.
19 Áko ádanihidííniidgo, Chʼı̨́įdii yádabiiłtiʼii áádóó níłchʼi biʼiiníziinii biyiʼdóó yádaałtiʼii éí tsídii ánínígi átʼéego áádóó tʼáá ádíyiʼígóó biiʼ nahodiʼniʼii hádaahtʼı̨́į doo. Daʼ dineʼéésh biDiyin God nideídíłkid dooleeł nítʼééʼ? Daʼ dahináanii bá daneeznáanii bichʼįʼ nidaʼídíłkidgoósh yáʼátʼééh?
20 Bee hazʼáanii áádóó yee haadzíiʼii baa ákodanohsin; díí saadígíí doo yikʼehgo yádaałtiʼgóogo, adinídíín biiʼ ádaadingo biniinaa ákódaaní.
21 Bichʼįʼ nidahwiiʼnáago áádóó dichin danilı̨́įgo kéyahgóó chʼééh nidaakai doo. Áádóó ákódzaago dichin biʼniighą́ąʼgo ádá dahodoolchįįłgo aláahgo binanitʼaʼí áádóó biDiyin God dayódziih doo índa yótʼááhgóó chʼééh dadéezʼı̨́įʼ doo.
22 Áko nahasdzáán yichʼįʼ dadéezʼı̨́ı̨́ʼ áádóó shoo, achʼįʼ nahwiiʼná índa chahałheeł, yínííł bikʼeʼíyéeʼii bee chahałheełgo dayiiłtsą́. Áko éí ayóó átʼéego chahałheełígíí biyiʼ góneʼ abidíʼnóolkał.
Footnotes
^ Meihiir-shéíleil-héísh-baz éí haneetehee binaalyeʼé áádóó tsı̨́įłgo naalyeʼé yisnáanii ááhyiłní.
