Isaiah 9:1-21
9 Azhą́ ákótʼée nidi, éí yínííł nilı̨́ı̨́ nítʼééʼ yę́ę chahałheeł bá ádin doo. Átsé hoolzhiizhígíí biyiʼ Zébyulan kéyahgi áádóó Náftalai kéyahgi dineʼé doo dabidiʼnidzingóó áyiilaa, nidi akéédę́ę́ʼ hoolzhishígíí biyiʼ beʼekʼid bichʼįʼgo tooh Jórdan biláahdi Gálilii kéyahgi ałʼąą dineʼé kéédahatʼínígi ayóó áhonóolningo íidoolííł.
2 Diné éí chahałheeł yiiʼ dayíkááh yę́ę ayóó átʼéego adinídíingo dayiiłtsą́; kéyahgóó anoonééł bichahaʼohgi kéédahatʼínígíí ayóó átʼéego bił chʼídaʼdeezdláád.
3 Nidineʼé ayóó átʼéego kʼeeʼąą yilzhishgo ádíílííł; bibee ił hózhóonii kʼeeʼąą nídoolzhish; agizh yaa bił dahózhónígi átʼéego índa diné danilíinii naalyeʼé ałtsʼádadiʼnilígi átʼéego ninááł bił nidahoozhǫǫh doo.
4 Háálá azéédéetı̨́hí bee bichʼįʼ nidahoʼdiilná yę́ę áádóó biwosgi gish sitánígíí índa tsihał bee bide ádahólzin yę́ę bitsʼą́ą́ʼ dahínítiʼ; éí Mídiyan dineʼé abiʼdoolʼįįdígi átʼéego áhoodzaa.
5 Jó, hahóóʼáagi siláo dabikénééz índa dabiʼéétsoh dił bikʼi daashchxiiʼgo bee dahakǫʼ doo biniyé átʼée doo.
6 Háálá awééʼ nihá biʼdizhchı̨́, ayeʼ nihaíltı̨́; naatʼáanii yee hooʼáałii biwos bąąh siláa doo, áádóó bízhiʼ éí Ayóóʼátʼéego Kótʼé Níinii, Diyin God Ayóóʼábóodziilii, Hoolʼáágóó aTaaʼ Nilíinii, Hózhǫ́ǫ́jí Yinantʼáii, bidiʼníi doo.
7 David bibikááʼdóó nahatʼáii índa bee bóhólníihgo bił hazʼáanii éí kodóó índa ahoolʼáágóó tsʼídá tʼáá óʼóleʼ góneʼ átʼéii áádóó tʼáá ákogi átʼéii chánahgo áádóó bidziilgo íidoolíiłgo bibee hootʼáałii índída bibee ashtʼehodítʼéii tsʼídá doo bá nihonítʼiʼgóó kʼeeʼąą yilzhish dooleeł. Tʼáá ałtsoní bee Bóhólníihii tʼáá íiyisí bóhoneedlı̨́įgo díí yiʼdoolííł.
Bóhólníihii éí Ízrel bichʼįʼ tʼóó báhádzidgo báháchįʼ
8 Bóhólníihii éí Jéíkab yichʼįʼ haneʼ áyiilaa, áádóó Ízrel dineʼé yikʼi hooleʼ.
9 Áko diné tʼáá ałtso bił béédahózin dooleeł; Íífreiyim dineʼé áádóó Samériyagi kéédahatʼínígíí éí ádaa deidzódlíigo áádóó bijéí dáátłʼisgo ádaaní,
10 Hashtłʼish dááltłʼisígíí naaʼadahaasdááz, nidi tsé hashtʼedaalyaago bee kin ninádadiitʼááł; síkamor tsin naazkaadígíí yaa nidahaastiʼ, nidi deílʼá yę́ęgi gadtsoh anídahidiitsih.
11 Éí bąągo Bóhólníihii éí aláahgo naatʼáanii Ríízin bitsʼą́ą́dóó anaʼí danilíinii hakʼijįʼ danilı̨́įgo áádóó hwedaʼanaʼí hoł háádahoniłchxaʼgo íidoolííł;
12 Síriya dineʼé alą́ąjįʼ áádóó Filístiya dineʼé éí akéédę́ę́ʼ hookahgo, áko éí bizééʼ ąą átʼéego Ízrel dineʼé adeidoomał. Azhą́ díí tʼáá ałtsojįʼ kóhoolaa nidi, tʼah hachʼįʼ báháchįʼgo hakʼijįʼ kʼídéesʼniiʼ.
13 Diné atíjiilaaígíí tʼáadoo hachʼįʼ nináhaaskai da, doodaiiʼ tʼáá ałtsoní bee Bóhólníihii tʼáadoo háádeineeztą́ąʼ da.
14 Éí bąągo łaʼa jı̨́įjįʼ Bóhólníihii éí Ízrel bitsiitsʼiin áádóó bitseeʼ, índa tsin páam bitsʼádaozʼaʼ áádóó lókʼaatsoh nahjįʼ kwíidoolííł.
15 Aląąjįʼ sizíinii ił nilíinii éí atsiitsʼiin nilı̨́, áádóó halneʼii biyoochʼíidgo naʼnitinii éí atseeʼ nilı̨́.
16 Jó, díí diné bá aląąjįʼ naazíinii yóóʼadabiiʼéésh, áádóó adabiʼdiishtʼeezhígíí ałtso ábiʼdisdįįd.
17 Éí bąągo bidinééh danilíinii éí Bóhólníihii doo hąą bił hózhǫ́ǫ da dooleeł, áádóó áłchíní dabizhéʼé ádaadinii áádóó asdzání bąąh ádahasdįįdii doo yaa aʼáhí dínóozįįł da, háálá tʼááłáʼí jinítínígo tʼóó ádahozhdilʼı̨́ áádóó doo yáʼátʼéhígi ádajitʼı̨́ índa tʼáá ádzaagóó yádajiłtiʼ. Azhą́ díí tʼáá ałtsojįʼ kóhoolaa nidi, tʼah hachʼįʼ báháchįʼgo hakʼijįʼ kʼídéesʼniiʼ.
18 Jó, doo yáʼádaashóonii kǫʼ nahalingo dookʼą́ął łeh; chʼil ahoshí áádóó chʼil deeníní iidiyiiłkʼą́ą́h; dahodíłchʼilgóó yidahodinilgo łid hahaghááh.
19 Tʼáá ałtsoní bee Bóhólníihii tʼóó báhádzidgo báháchįįhgo atíʼéłʼíinii bee kéyahgi nahodeezkʼą́ą́ʼ; diné éí chizh nahalingo bee hodookʼą́ął doo; diné yił hááʼáázh doo yaa hą́ą́h dínóozįįłí da.
20 Łaʼda nishʼnáájígo tʼáadoo leʼé yąąh dah neeshjı̨́įdgo, nidi tʼóó dichin bidíʼnóołhééł, áádóó nishtłʼajígo yee ííyą́ąʼ nidi, doo hwiih nilı̨́į da doo; diné tʼááłáʼí jinítínígo tʼáá hó hagaan nijílghał doo.
21 Manáseh éí Íífreiyim yikʼijįʼ nilı̨́į doo; Íífreiyim éí Manáseh yikʼijįʼ nilı̨́į doo, áádóó tʼáá łaʼ bizhiʼee Júdah dineʼé yikʼijįʼ nídidootʼash. Azhą́ díí tʼáá ałtsojįʼ kóhoolaa nidi, tʼah hachʼįʼ báháchįʼgo hakʼijįʼ kʼídéesʼniiʼ.
