James 1:1-27
1 Shí James, Diyin God índa Bóhólníihii Jesus Christ yá naalʼaʼí nishłíinii, naakitsʼáadahgo Ízrel dineʼé danohłíinii tadanihidiʼnooskaadígíí nihichʼįʼ naaltsoos áshłéehgo kʼé nihidishní.
Hweʼoodląʼ áádóó bee hódzáanii
2 Shikʼisóó danohłíinii, ałʼąą átʼéego nanihídahodiʼnitaahgo, baa hózhǫ́ǫgo baa nitsídaahkees,
3 háálá niheʼoodląʼ nabídahonitaahígíí bee nízaadgóó haʼjólní áhoołʼįįhgo nihił béédahózin.
4 Áko bíniʼdii haʼahóní nihinaalnishgo ałtso łaʼyilééh, ákótʼéego niheʼoodląʼ bee tsʼídá tʼáá ákóneʼ ádanohtʼéego índa tʼáadoo bee nihichʼįʼ anáhóótʼiʼígóó dahinohnáa doo.
5 Nihí łaʼ bee hódzáanii bídin nohłı̨́įgo Diyin God bíídóohkił, éí bił hadleeʼgo índa doo akʼíháʼááhgóó tʼáá ałtso aidiiʼaah, áko honohsą́ągo ánihidoolííł.
6 Nidi tsʼídá tʼáadoo nihił naaki nilíní iinohdlą́ągo yídóohkił, áko doo nihił naanááyoł nidahonohłin da doo. Háálá hoł naaki nilínígíí níyol yááhoołgohgo tónteel yilkʼoołígíí nahojílin.
7 Diné ákójítʼéii éí tʼáadoo leʼé Bóhólníihii bitsʼą́ą́dę́ę́ʼ nídideeshłééł tʼáadoo jiníziní nijigháa doo.
8 Diné naakigo nitsídzíkeesii éí tʼáá ałtsojįʼ doo bééhózingóó nijighá.
Badahojoobáʼíii índa daʼatʼíinii
9 Akʼis hojoobaʼ átʼéii bohónéedzą́ ábiʼdiilyaago yaa bił hózhǫ́ǫ leʼ,
10 áádóó akʼis atʼíinii bahojoobáʼí ábiʼdiilyaago yaa bił hózhǫ́ǫ leʼ, háálá ajitʼíinii chʼilátah hózhóón niiłnahígi átʼéego ahwíidoołkááł.
11 Jó, hadoh bił hááʼátʼáahgo chʼil néízis, áádóó chʼilátah hózhóonii ninádahinidah, áko doo tʼáá nizhónígo ahoolʼáa da. Tʼáá éigi átʼéego diné ajitʼíinii tʼáá joolnishgo ahwíidoołkááł.
Achʼįʼ nahwiiʼná índa naʼíhonitaah
12 Diné nabóhonitaahgo haʼólnínígíí bikʼihojidlí, háálá naʼíhonitaah bikʼesdeesdlı̨́įʼgo bééhoozingo iináájí naatʼá chʼah Diyin God haididooʼááł, éí Bóhólníihii ayóóʼádabóʼníinii bííʼ dooleełgo yee yichʼįʼ haadzííʼ.
13 Nahóhodiʼnitaahgo, Diyin God nashínítaah, doo jiníi da, háálá Diyin God éí nichxǫ́ʼíii doo yee naʼínítaah da, áádóó tʼáá bí diné doo łaʼ nayínítaah da.
14 Nidi diné tʼááłáʼí jinítínígo nahóhodiʼnitaahgo tʼáá hó bidázhnoolníinii hodíníʼah áádóó nichxǫ́ʼíii yiih honiʼah.
15 Áko bąąhági átʼéego adáhonooní iʼniiltsąąhgo bąąhági átʼéii yiłchííh, áádóó bąąhági átʼéii niniséehgo aniné nádleeh.
16 Shikʼisóó ayóóʼánihóshʼníinii, nihidaʼdódleeh lágo.
17 Yáʼádaatʼéehii índa tsʼídá tʼáá ákóneʼ ádaatʼéii tʼáá ałtso yáʼąąshdę́ę́ʼ aTaaʼ bee daʼdiʼnídíín áyiilaii bitsʼą́ą́dę́ę́ʼ nihaa hiditʼaah. Diyin God doo łahgo óonééh átʼée da, doo chahaʼoh náhoodleełígi átʼée da.
18 Tʼáá bí íinízingo haneʼ tʼáá aaníinii bee nínáádanihiʼdizhchı̨́,* jó, nihí alą́ąjįʼ baʼáłchíní nídasiidlı̨́ı̨́ʼ.
Saad jidiitsʼaʼgo bikʼeh hojíłʼı̨́
19 Éí bąą, shikʼisóó ayóóʼánihóshʼníinii, diné tʼááłáʼí jinítínígo hazhóʼó ajíistsʼą́ąʼ doo, nidi tąądee háádziidziih doo, tąądee hánáháchįįh doo.
20 Háálá Diyin God tsʼídá tʼáá ákogi átʼéego yinahaʼáhígíí éí diné biʼáháchįʼ doo yee łaʼyidoolíił da.
21 Éí bąą badaaʼihii índa bąąhági átʼéego nitsáhákees kʼeeʼąą dadínéesʼąądii tʼáá ałtso yóóʼadahidohʼaah áádóó aʼohgo ádaʼdíínółzingo Diyin God bizaad ayiʼdi kʼididoolyéełii nídadoohłé, éí nihiiʼ naazíinii yisdáyiiníiłgo yíneelʼą́.
22 Diyin God bizaad bikʼeh dahonołʼı̨́, tʼáadoo tʼóó dadoohtsʼaʼgo ádinidaʼohdloʼí.
23 Háálá tʼáá háiida tʼóó bizaad jidiitsʼaʼgo doo bikʼeh hojíłʼínígíí éí diné kótʼéii nahojílin, diné biiʼ adéestʼı̨́ı̨́ʼ yiiʼ hazhóʼó ádinílʼįįh,
24 nidi ádinílʼįįhgo áádóó dah diigháahgo ánoolninii tʼóó yaa yoonah.
25 Nidi tʼáá háiida Diyin God yee hasʼáanii hadaałtʼéii diné yéédiyiichíidii hazhóʼó yiiʼ déezʼı̨́įʼgo yíhoołʼaahígíí, éí haʼátʼíhída yaa naagháago Diyin God bikʼizhdoodliił, háálá yidiitsʼaʼii doo yaa yoonééhgóó yikʼeh hółʼı̨́įgo átʼı̨́.
26 Diné tʼáá háiida shinahaghaʼ hólǫ́ jinízingo, yájíłtiʼgi doo baa áhojilyą́ą́góó tʼóó ádinijidloʼgo ájítʼı̨́, éí dinéhígíí hanahaghaʼ tʼáadoo nánídlíní da.
27 Áłchíní bizhéʼé ádaadinii índa sáanii bąąh ádahasdįįdii bichʼįʼ nidahwiiʼnáago bíká aníjílwoʼígíí, índa nihokáaʼgi bąąhági átʼéii ádąąh jitʼínígíí éí Diyin God aTaaʼ nilíinii binááł nahadlá tʼáá aaníinii índa tʼáá ákogi átʼéii átʼé.
Footnotes
^ Tsʼísee kʼehgo oochíłígíí éí doo ááhyiłníi da, nidi Diyin God bitsʼą́ą́dóó níłchʼi kʼehgo oochíłígíí éí ááhyiłní.
