Jeremiah 39:1-18
39 Zedekáíyah éí Júdah dineʼé aláahgo yinantʼáago náhástʼéí náhááh góneʼ áádóó neeznáá nídízííd binih Bábilan dineʼé aláahgo yinanitʼaʼí Nébukadnézzar áádóó bisiláo tʼáá dah yinééł nítʼééʼ yił nínáago Jerúsalem yaatįįh yikaigo yináshzhiizh.
2 Zedekáíyah nantʼáago łaʼtsʼáadah náhááh góneʼ áádóó dı̨́ı̨́ʼ nídízííd binih índa náhástʼéí jı̨́ı̨́ góneʼ kin haalʼáago tsé binaago ahénátłʼinii łahgo yighádaʼaznil.
3 Bábilan dineʼé aláahgo binanitʼaʼí éí naatʼáanii biyaa sinilígíí yah aakaigo ataʼgi dańʼdítı̨́hígi dineezbin; éí kódaolyé: Néíyergal-sharíízer áádóó Sámgar-nííbo, Sársiikim, Rábsaris nilíinii, Néíyergal-sharíízer, éí Rábmag nilíinii áádóó ałdóʼ Bábilan dineʼé aláahgo binanitʼaʼí naatʼáanii biyaa sinilígíí náádaałaʼ yił dineezbin.
4 Ákohgo Júdah dineʼé aláahgo binanitʼaʼí Zedekáíyah áádóó diné nidaabaahii tʼáá ałtso díí dayiiłtsą́ągo tłʼéeʼgo kin haalʼáádóó dah díníidzood. Aláahgo naatʼáanii bidáʼákʼeh hayázhí bíighahgóó áádóó naaki tʼáá áyídígóó ahąąh ítłʼingo bidáńʼdítı̨́ı̨́h góneʼ índa dzígai bichʼįʼgo nídiijééʼ.
5 Nidi Kaldíya dineʼé bisiláo dabidínéeshchą́ąʼgo Jériko binaagi dzígaidi Zedekáíyah yił dadeezdéél, áko dahoołtsoodgo Héímath kéyahdi Ríblah kin haalʼáagi Bábilan dineʼé aláahgo binanitʼaʼí Nébukadnézzar yaa dahazlóozgo ákwii há nihoníʼą́.
6 Ákohgo Ríblahdi Bábilan dineʼé aláahgo binanitʼaʼí éí Zedekáíyah hanááł hayeʼké dayííghą́ą́ʼ, áádóó Bábilan dineʼé aláahgo binanitʼaʼí ałdóʼ Júdah dineʼé naatʼáanii danilíinii tʼáá ałtso neistseed.
7 Áádóó ałdóʼ Zedekáíyah binááʼ hayíʼííshiizhgo Bábilan kéyahgóó doodlóós biniyé béésh daʼahólzhaʼí yee yeʼeztłʼǫ́.
8 Kaldíya dineʼé éí aláahgo naatʼáanii bighan índa bidineʼé tʼáá ałtso dabighan adeideeskʼą́ą́ʼ áádóó Jerúsalem binaa ahéédaʼastłʼinii éí tsʼídá ałtso naaʼadayiiskaad.
9 Siláo binanitʼaʼí nilíinii Nébuzarʼéídan éí kin haalʼáagi diné tʼáá ákǫ́ǫ́ daadziihii áádóó diné áádahoostʼįįdgo baa dahaaskai yę́ę tʼáá óóltąʼgo yisnááh danilı̨́įgo Bábilangóó iinííłkaad.
10 Siláo binanitʼaʼí Nébuzarʼéídan éí diné badahojoobáʼíii tʼáadoo leʼé bee ádaadinígíí Júdah kéyahgi tʼáá ákǫ́ǫ́ kéédahatʼı̨́įgo áyiilaa áádóó chʼil naʼatłʼoʼii deílʼáii índa dádaʼakʼeh yitaideezʼą́.
Nébukadnézzar éí Jeremáíyah yaa áhályą́
11 Bábilan dineʼé aláahgo binanitʼaʼí Nébukadnézzar éí Jeremáíyah kódadoohłííł, níigo siláo binanitʼaʼí Nébuzarʼéídan yichʼįʼ haadzííʼ,
12 Nídadidohłóosgo yáʼátʼéehgo baa ádahołyą́ą doo áádóó doo haada dadoohłíił da. Kótʼéego shá ádaohłééh, nihiłníigo tʼáá ákótʼéego bá ádadoohłííł.
13 Áko siláo binanitʼaʼí Nébuzarʼéídan áádóó Nébushásban, Rábsaris nilíinii índa Néíyergal-sharíízar, Rábmag* nilíinii áádóó Bábilan dineʼé aláahgo binanitʼaʼí naatʼáanii biyaa sinilígíí tʼáá ałtso
14 éí ákǫ́ǫ́ siláo dayííłʼaadgo Jeremáíyah awáalyaadę́ę́ʼ yił chʼéédaaskaigo Shéífan biyeʼ Aháíkam biyeʼ Gedaláíyah éí hooghangóó hoł nídootʼashgo baa hoʼdiszįįd, áko diné bitahgi kééhojitʼı̨́ı̨́ nítʼééʼ.
Ííbed-míílek yisdándiʼdooltééł biʼdooʼniid
15 Jeremáíyah awáalyaa dzizdá yę́ędą́ą́ʼ Bóhólníihii hachʼįʼ haadzíiʼgo kóní,
16 Nílááh, Iithiyópiya dineʼé nilíinii Ííbed-míílek bichʼįʼ dínáahgo kóbidiní, Ízrel dineʼé biDiyin God tʼáá ałtsoní bee Bóhólníihii kóní, Jó, díí kin haalʼá bikʼijįʼ haasdzíiʼii éí doo yáʼáshónígi ádoolníiłii éí jínígíí biyiʼ tʼáá ninááł bohodoolnííł. Yáʼátʼéhígi ádoolníiłii éí doo bohodoolníił da.
17 Bóhólníihii kóní, Nidi éí jínígíí biyiʼ nił yisdádeeshʼash áádóó diné béédanildzidii doo baa nidideeshʼáał da.
18 Tsʼídá tʼáá aaníí nił yisdádeeshʼash áádóó diltłish doo bee nidiʼyoolyéeł da, nidi, Shaa jiisíníliʼígíí bee neʼiinaʼ doodzih, ní Bóhólníihii.
Footnotes
^ Rábsaris índa Rábmag éí aláahgo naatʼáanii bindaalʼaʼí binanitʼaʼí łaʼ bee wójíigo óolyé.
