John 20:1-31
20 Áádóó Damı̨́įgo abínígo tʼah chahałheełgo, Mary Mágdaliin tséníʼootséelgi jiníyáá nítʼééʼ tsé dáádeelmááz nítʼéʼígíí nahjįʼ eelmáazgo jiiłtsą́.
2 Áko dashdiilwodgo, Sáíman Peter áádóó łaʼ íhoołʼaahii, Jesus ayóóʼábóʼnínígíí, baa jílwodgo ábizhdííniid, Tséníʼootsééldóó Bóhólníihii nihitsʼą́ą́ʼ yóóʼadeistı̨́ı̨́ lá, áko nideistı̨́įdi doo nihił béédahózin da.
3 Tʼáá áko Peter áádóó łaʼ íhoołʼaahígíí kintahdę́ę́ʼ bił chʼíʼahizhneelchą́ąʼgo, tséníʼootséélgóó bił dah ahizhdíníilchą́ą́ʼ.
4 Tʼáá ájíłah ákǫ́ǫ́ ahizhneelchą́ą́ʼ, nidi łaʼ íhoołʼaahígíí Peter yaa diilwodgo tséníʼootséeldi áłtsé yílwod,
5 áko yaa ádzaago ákóneʼé déezʼı̨́ı̨́ʼ, nítʼééʼ naʼatʼą́hí łigaii ditsʼidígíí tʼéí ákóneʼé sinilgo yiyiiłtsą́, nidi tʼáadoo yah ííyáa da.
6 Áádóó Sáíman Peter akéédę́ę́ʼ yílwodgo, tséníʼootséél góneʼ yah ííyá, áádóó ákwii naʼatʼą́hí łigaii ditsʼidígíí tʼéiyá sinilgo yiyiiłtsą́,
7 índa bee ádítʼoodí, hatsiitsʼiin bikʼídeesdiz nítʼéʼígíí, éí doo naʼatʼą́hí łigaii ditsʼidígíí sinilígíí bił sinil da, nidi tʼáá sahdii yisdisgo siłtsooz.
8 Áádóó łaʼ íhoołʼaahii átsé tséníʼootséeldi yílwodígíí ałdóʼ ákóneʼ yah ííyá, áko yiyiiłtsą́ągo oosdląąd,
9 háálá dadziztsą́ą́dę́ę́ʼ náázhdidoodáałgo Diyin God bizaad bee akʼeʼashchı̨́įgo yaa halneʼígíí tʼah doo yikʼidaʼdiitįįh da.
10 Áádóó íhoołʼaahii bighangóó anáátʼáázh.
Jesus éí Mary Mágdaliin yichʼįʼ yitʼíní íʼdiilyaa (Mt. 28:9,10; Mk. 16:9-11)
11 Nidi tséníʼootséél bichʼéédą́ąʼgi Mary jichago dzizı̨́, tʼáá jichago yaa ádziidzaago tséníʼootséél góneʼ jidééʼı̨́ı̨́ʼ,
12 áko diyingo naalʼaʼí naaki łigaigo hadítʼéé léiʼ, Jesus bitsʼíís sitı̨́ı̨́ nítʼéʼígi sikéego jiiłtsą́, łaʼ dzinéesʼą́ą́ nítʼéʼígi sidá, łaʼ dzidéesʼeez nítʼéʼígi.
13 Áko éí áhodííniid, Asdzání, haʼátʼíishąʼ baa nicha? Nítʼééʼ ábizhdííniid, Jó, shiBóhólníihii shitsʼą́ą́ʼ yóóʼadeistı̨́ı̨́ lá, áko nideistı̨́įdi doo shił bééhózin da.
14 Kótʼéego hadzoodzíiʼgo tʼą́ąʼjįʼ níjiiyá, nítʼééʼ Jesus sizı̨́įgo jiiłtsą́, nidi Jesus átʼı̨́įgo tʼáadoo bééhodzoosįįd da.
15 Jesus áhodííniid, Asdzání, haʼátʼíishąʼ baa nicha? Háishąʼ hanítá? Mary jinootʼáaʼgo ákweʼé hazʼánígíí yaa áhályáanii átʼı̨́ jinízingo ábizhdííniid, Kwáʼásiní, yóóʼahwííníłtı̨́ı̨́ ládą́ą́ʼ nihwííníłtı̨́įdi bee shił hólneʼ, áko tʼáá shí dahodideeshtééł.
16 Nítʼééʼ Jesus áhodííniid, Mary. Áko níjiiyáago Hííbrew kʼehjígo ábizhdííniid, Rabónai! Éí Naʼnitiní jiníigo óolyé.
17 Jesus áhodííniid, Tʼáadoo shíínítąʼí, háálá tʼah doo shiTaaʼ bichʼįʼ nídíshdáah da, nidi nílááh, shikʼisóó bichʼįʼ dínáahgo, ShiTaaʼ, tʼáá éí nihí ałdóʼ nihiTaaʼ bichʼįʼ nihéénísdzá, shiDiyin, tʼáá éí nihí ałdóʼ nihiDiyin bichʼįʼ nihéénísdzá, shá bididííniił.
18 Áádóó Mary Mágdaliin éí ídahoołʼaahii bichʼįʼ jílwodgo ábizhdííniid, Bóhólníihii néiłtsą́. Áádóó yee hachʼįʼ hahaasdzíʼígíí baa hojoolneʼ.
Jesus bídahoołʼaahii yichʼįʼ yitʼíní íʼdiilyaa (Mt. 28:16-20; Mk. 16:14-18; Lk. 24:36-49)
19 Tʼáá éí bijı̨́ iʼííʼą́ągo, Damı̨́įgo, ídahoołʼaahii éí Jew dineʼé yéédaaldzidgo biniinaa naháaztání góneʼ ádá daʼdeeskaal, nítʼééʼ Jesus baa honíleʼgo biníiʼgi yiizįʼgo ábidííniid, Nihił dahózhǫ́ǫ leʼ.
20 Kózhdííniidgo, hálaʼ índa hooshkʼiizh há deinééłʼı̨́ı̨́ʼ. Áko ídahoołʼaahii Bóhólníihii dayiiłtsą́ągo bił dahóózhǫǫd.
21 Nítʼééʼ Jesus ánááhodooʼniid, Nihił dahózhǫ́ǫ leʼ. Tʼáá shiTaaʼ shiníłʼaʼígi átʼéego, shí ałdóʼ danihideeshʼaał.
22 Áko díí yee haadzíiʼgo hayołgo áhodííniid, Níłchʼi Diyinii nihee dahóleʼ.
23 Tʼáá háiida bibąąhági átʼéii bá yóóʼanídahidohʼaahígíí, éí bá yóóʼanídahideestʼą́, índa tʼáá háiida bibąąhági átʼéii doo bá yóóʼanídahidohʼaahígíí, éí doo bá yóóʼanídahideestʼą́ą da.
Jesus áádóó Thomas
24 Nidi Thomas, naakitsʼáadahígíí łaʼ, Naakií hodiʼnínígíí, Jesus níyáago doo ajítah da.
25 Áko łaʼ ídahoołʼaahígíí ádahodííniid, Nihí Bóhólníihii daníilʼı̨́ı̨́ʼ. Nidi ájíní, Hálátłʼááh góneʼ bił oʼoolkaal nítʼéʼígíí doo nééłʼı̨́ı̨́ʼgóó, áádóó hoł oʼoolkaal nítʼéʼí góneʼ shílaʼ doo íítsigóó índa hooshkʼiizh góneʼ doo adeeshniiʼgóó, shí doo iideeshdląął da.
26 Áádóó tseebííską́ągo hódahoołʼaahii kin góneʼ ninááháaztą́, áko Thomas ałdóʼ ákweʼé ajítah. Tʼáá ákótʼéego ádá náádaʼdeeskaal, nidi Jesus haa honíleʼgo haníiʼgi yiizįʼgo áhodííniid, Nihił dahózhǫ́ǫ leʼ.
27 Thomas áyidííniid, Kweʼé shílaʼ bidinílchíidgo níníłʼı̨́, áádóó kʼídílchíidgo shooshkʼiizh góneʼ adílnííh, áko tʼáadoo doo iinídlání, nidi iinídlą́.
28 Thomas éí Jesus áyidííniid, ShiBóhólníihii áádóó shiDiyin God!
29 Nítʼééʼ Jesus ánáábidooʼniid, Thomas, shiiniłtsánígíí bąą shiisínídląąd. Doo dashiiłtséeh da nidi dashoodlą́ągo shaa dadzólíii éí bikʼidahojidlí.
Díidí biniyé naaltsoos bee akʼeʼashchı̨́
30 Áádóó náánáłaʼ Diyin God bibee adziilii bee béédahózinii tʼóó ahayóí Jesus hódahoołʼaahii binááł tʼáá aaníí baa nijiyáhígíí éí díí naaltsoos doo bikʼinídaháasdzo da,
31 nidi Jesus éí Christ, Diyin God biYeʼ nilı̨́įgo deidoohdląąłígíí biniyé díidíígíí bikʼinídaháasdzo, áko éí deinohdlą́ągo baa dadzíínóhłíigo bízhiʼ biniitʼaa iiná nihee dahólǫ́ǫ dooleeł.
