John 8:1-59
8 Jesus tʼéiyá Dził Álivz bighą́ą́ʼgóó dashdiiyá.
2 Áádóó tʼáá íiyisí tʼah abínígo kin biiʼ sohodizin bił hazʼą́ą́ góneʼ yah anáádzoodzáago, diné tʼáá ałtso haa áłah silı̨́ı̨́ʼ, áko dzineezdáago nazneeztą́ą́ʼ.
3 Nítʼééʼ bee hazʼáanii yíndaʼniłtinii índa Férisii danilíinii asdzání łaʼ adiléé lágo yikʼídaaskaigo Jesus yaa deizlóóz, áko diné biníiʼgi dah hoosįʼgo,
4 Jesus ádeidííniid, Naʼnitiní, díí asdzání adiléé lágo habiʼdeelʼı̨́ı̨́ʼ.
5 Ákódaatʼínígíí bił nidadziilneʼ doo biniyé bee hazʼáanii biyiʼ Mózes yee haadzíiʼ niʼ. Nidi nishąʼ haʼátʼéego bá hadíídzih?
6 Díí hákadaʼiiłhilgo binahjįʼ hakʼi dahodidooʼááł biniyé ádahodííniid. Nidi Jesus yaa ádziidzaago doo baa náʼáhozhdíltʼı̨́ı̨́góó hálaʼ bee łeeshtahgi niʼdzizoh.
7 Áko tʼah nidahódíłkidgo, de ádziidzaago ábizhdííniid, Tʼáá háiida nihitahgi tsʼídá tʼah doo ádił iisiihii éí hániʼdii átsé tsé bee díí asdzání nízhdidoołniił.
8 Áko yaa ánáádziidzaago hálaʼ bee łeeshtahgi ninááʼdzízoh.
9 Nidi asdzání yikʼi dahodiiʼánígíí éidíígíí deidiiztsʼą́ąʼgo, ádił nidaʼiisíiʼii yee ádaa ákodaniidzı̨́įʼgo tʼááłáʼí nítínígo tʼáá ałkééʼ chʼéheeskai, aląąjįʼ nidaakaígíí átsé, akéédę́ę́ʼ nidaakaígíí bee nihoolzhiizh, áko Jesus tʼáá sáhí dzizlı̨́įʼgo, asdzání tʼéí hadááhdę́ę́ʼ sizı̨́.
10 Áádóó Jesus de ádzaago éí asdzání yikʼi nághalgo áyidííniid, Asdzání, nikʼi dahodiiʼah yę́ęshąʼ háájí? Daʼ dinéésh doo łaʼ atínidiʼdoolníiłgo yee ná haadzíiʼ da?
11 Áko ábijiní, Doo łaʼ da, Bóhólníihii. Nítʼééʼ Jesus ánááhodooʼniid, Shí ałdóʼ nidiʼyoolyéełgo doo bee ná hadeesdzih da; nílááh náádááł, tʼáadoo bąąhági ánáánítʼíní.]
Jesus éí nihokááʼ dineʼé bá adizhníłdíín
12 Nítʼééʼ Jesus éí diné yichʼįʼ hanáánáádzíiʼgo áyidííniid, Nihokááʼ dineʼé bá adinídíín nishłı̨́; tʼáá háiida shikééʼ joogáłígíí éí doo chahałheełgóó nináájídáa da doo, nidi iiná bee adinídíinii hwee hólǫ́ǫ dooleeł.
13 Éí bąą Férisii danilíinii ádahodííniid, Tʼáá ni ádaa hólneʼ, áko hólneʼígíí doo tʼáá aaníi da.
14 Jesus ánááhodooʼniid, Azhą́ shı̨́ı̨́ tʼáá shí ádaa hashneʼ nidi, hashneʼígíí éí tʼáá aaníí, háálá níyáádę́ę́ʼ índa déyáágóó shił bééhózin, nidi nihí éí níyáádę́ę́ʼ índa déyáágóó doo nihił béédahózin da.
15 Nihí atsʼíís kʼehgo tʼéiyá ándahoyohʼaah, shí éí diné doo łaʼ bá nihwiishʼaah da.
16 Ákondi ánihwiishʼaah ládą́ą́ʼ, bee ánihwiishʼaahii éí tʼáá aaníí, háálá doo tʼáá sáhí ánihwiishʼaah da, nidi shí áádóó aTaaʼ shiníłʼaʼii biłgo tʼéiyá.
17 Bee nihá nahazʼáanii biyiʼdóó bee akʼeʼashchı̨́, diné nidiltʼéego ooʼíinii nilı̨́įgo aheełtʼéego halneʼgo éí tʼáá aaníí;
18 shí tʼáá shí ádaa hashneʼ, áádóó aTaaʼ shiníłʼaʼii ałdóʼ shaa halneʼ.
19 Áko ádahodííniid, Háadishąʼ niTaaʼ? Jesus ánáádooʼniid, Shí nidi doo shéédahonohsin da, shiTaaʼ ałdóʼ doo béédahonohsin da; shéédahonohsingo tʼéiyá shiTaaʼ ałdóʼ béédahonohsin doo nítʼééʼ.
20 Kin biiʼ sohodizin bił hazʼą́ą́ góneʼ béeso ahiʼníiłgi naʼnitingo díí saadígíí Jesus yee haadzííʼ, nidi łaʼda doo hoołtsoodí da, háálá tʼah doo áajįʼ há ahalzhíish da.
Déyáágóó doo dadohkááh átʼée da
21 Jesus ánááhodooʼniid, Shí kʼad dah diishááh, áko nihí hadashinohtáa dooleeł, ákondi tʼáá ádił daʼíínółzíihgo dadínóohnééł; déyáágóó doo dadohkááh átʼée da.
22 Áko Jew dineʼé ádadííniid, Daʼ ázhdiyoolyééłísh, háálá, Déyáágóó doo dadohkááh átʼée da, jiní?
23 Áádóó ábizhdííniid, Nihí nihokááʼdóó nidaahkai, shí tʼéiyá wótʼááhdę́ę́ʼ naashá; nihí nahasdzáán bitsʼą́ą́dóó dahosoolı̨́ı̨́ʼ, shí doo nahasdzáán bitsʼą́ą́dóó hosélı̨́įʼ da.
24 Éí bąą ánihidííniid niʼ, Tʼáá ádił daʼíínółzíihgo dadínóohnééł, háálá shí Christ áshtʼı̨́įgo doo deinohdlą́ą́góogo tʼáá ádił daʼíínółzíihgo dadínóohnééł.
25 Áko ádahodííniid, Háishąʼ ánítʼı̨́? Jesus ánááhodooʼniid, Tsʼídá átséédą́ą́ʼ nihił hweeshneʼígíí tʼáá éí áshtʼı̨́.
26 Ląʼígóó bee nihichʼįʼ hahideesdzihii áádóó bee nihaa nídéeshtʼįįłii hólǫ́, nidi shiníłʼaʼígíí éí tʼáá aaníinii nilı̨́, áko bitsʼą́ą́dóó disétsʼą́ąʼii nihokááʼ dineʼé bee bił hashneʼ.
27 ATaaʼ baa yájíłtiʼgo tʼáadoo yikʼidaʼdiitą́ą da.
28 Áko Jesus áhodííniid, Diné Silı̨́įʼii dah dahidoołtʼeʼgo índa, shí tʼáá éí áshtʼı̨́įgo nihił béédahodoozįįł, áádóó doo tʼáá shí shóhólníihgo haʼátʼíhída baa naasháa da, nidi shiTaaʼ yee nashineeztą́ʼígi átʼéego díí bee yáshtiʼ.
29 Shiníłʼaʼígíí éí shił hólǫ́; aTaaʼ doo tʼáá shízhání shiʼníłniiʼ da, háálá bił hóshónígíí tʼéí tʼáá áłahjįʼ baa naashá.
30 Díí saad bee hadzoodzíiʼgo ląʼí dahoosdląąd.
Tʼáá aaníinii nihéédeididoochił
31 Áko Jesus éí Jew dineʼé dahoosdląądígíí ábizhdííniid, Shizaad bikʼeh wohkahgo tʼéiyá tʼáá aaníí shídahoołʼaahii dadoohłeeł,
32 áko tʼáá aaníinii nihił béédahodoozįįł, índa tʼáá aaníinii nihéédeididoochił.
33 Áádóó ánáádahodooʼniid, Nihí Éíbraham bitsʼą́ą́dóó daʼahílchíihii daniidlı̨́, áko tsʼídá tʼáadoo diné łaʼ binaalteʼ dasiidlı̨́įʼ da. Ákoshąʼ haʼátʼéego, Nihéédadidoochił, diní?
34 Nítʼééʼ Jesus ánááhodooʼniid, Tʼáá aaníí, tʼáá aaníígóó ánihidishní, Tʼáá háiida bąąhági ááníiłii tʼáá éí bąąhági átʼéii binaalteʼ jílı̨́.
35 Jó, naalteʼ doo hoolʼáágóó aʼałkʼee sidáa da, nidi aYeʼ tʼéiyá hoolʼáágóó hólǫ́.
36 Éí bąą aYeʼ nihéédeideezhchidgo, tʼáá aaníí nihéédadeeshchid doo.
37 Éíbraham bitsʼą́ą́dóó daʼahílchíihii danohłı̨́įgo shił bééhózin, ákondi dahodiyiilyééł dashíínóhʼní, háálá shizaad nihiyiʼdi doo bá nahosoołʼą́ą da.
38 ShiTaaʼ bił honishłǫ́ǫ́dą́ą́ʼ yiiłtsánígíí tʼáá éí bee yáshtiʼ, nihí ałdóʼ danihizhéʼé bitsʼą́ą́dóó dasidootsʼą́ʼígíí tʼéí baohkah.
Níłchʼi bidaʼiiníziinii binanitʼaʼí danihizhéʼé átʼé
39 Áko hanáádaasdzíiʼgo ádahodííniid, Éíbraham éí danihizhéʼé nítʼééʼ. Jesus ánááhodooʼniid, Éíbraham baʼáłchíní danohłı̨́įgo laʼ, Éíbraham yaa naayáhígíí baa naahkai doo nítʼééʼ.
40 Diyin God bitsʼą́ą́dę́ę́ʼ tʼáá aaníinii disétsʼą́ʼígíí tʼéiyá bee nihił hweeshneʼ, nidi kʼad dahodiyiilyééł dashíínóhʼní. Éíbraham éí doo ákódzaa da.
41 Nihí nihizhéʼé yaa naagháhígíí baa nidaahkai. Áko ádahodííniid, Nihí doo adilyé bee danihiʼdizhchı̨́į da,* áko nihiTaaʼ tʼááłáʼí, éí Diyin God.
42 Nítʼééʼ Jesus áhodííniid, Diyin God nihiTaaʼgo laʼ, ayóóʼádashíínóhʼníi doo nítʼééʼ, háálá Diyin God bitsʼą́ą́dę́ę́ʼ níyá; doo tʼáá shíniikʼeh níyáa da, nidi bí shiníłʼaʼ.
43 Haitʼéegoshąʼ yáshtiʼígíí doo bikʼidaʼdoohtįįh da? Jó, tʼáá íiyisí doo tʼáá kʼad shizaad dasidootsʼą́ąʼ daígíí bee átʼé.
44 Níłchʼi bidaʼiiníziinii binanitʼaʼí danihizhéʼé átʼé, éí bitsʼą́ą́dę́ę́ʼ dahosoolı̨́ı̨́ʼ, éí nihizhéʼé nilíinii laanaa nízinígíí tʼéí bidaʼołʼı̨́. Éíyeeʼ hodeeyáádę́ę́ʼ diné neiłtseedii nilı̨́, áko tʼáá aaníinii doo ádíidééltʼiʼ da, háálá tʼáá aaníinii biiʼ ádin. Biyoochʼíidgo tʼáá bí átʼéii yee ádaa yáltiʼ, háálá biyoochʼíidii nilı̨́, áádóó woochʼííd yizhéʼé nilı̨́.
45 Nidi tʼáá aaníinii bee nihił hashneʼgo bąą, doo dashoohdlą́ą da.
46 Nihitahdóoshąʼ háí bąąhági átʼéii yee shikʼíhodooʼah? Tʼáá aaníinii bee nihił nahashneʼgo, haitʼéegoshąʼ doo dashiinohdlą́ą da?
47 Tʼáá háiida Diyin God bitsʼą́ą́dę́ę́ʼ ájítʼínígíí éí Diyin God bizaad jidiitsʼaʼ, nidi nihí doo dayíísółtsʼą́ąʼ da, háálá doo Diyin God bitsʼą́ą́dę́ę́ʼ ádaahtʼı̨́į da.
Éíbraham tʼáá bítséedi honishłǫ́
48 Áko Jew dineʼé ánáádahodooʼniid, Samériya dineʼé łaʼ nílı̨́įgo, níłchʼi biʼiiníziinii niyiʼdi hólǫ́, dandiiʼnínígíí daʼ éísh doo tʼáá aaníígóó ádandiiʼníi da?
49 Jesus ánáádooʼniid, Shí doo níłchʼi biʼiiníziinii shiyiʼdi hólǫ́ǫ da, nidi shí shiTaaʼ shił nilı̨́įgo íínísin, áko nihí doo nihił danishłı̨́į da.
50 Ákondi tʼáá shí bee ayóó áníshtʼée dooleełii doo háshtʼı̨́į da; tʼáá łashdiltʼéhí tʼéí bee ayóó áníshtʼéii hoł nilı̨́įgo hájítʼı̨́, áko éí á nihojiiʼaah doo.
51 Tʼáá aaníí, tʼáá aaníígóó ánihidishní, Tʼáá háiida shizaad bikʼeh hojíłʼı̨́įgo, éí doo dazdootsaał da.
52 Áko Jew dineʼé ánáádahodooʼniid, Kʼad lą́ą, níłchʼi biʼiiníziinii niyiʼdi hólǫ́ǫgo nihił béédahoozin. Éíbraham daaztsą́, Diyin God yá dahalneʼii nítʼéʼígíí ałdóʼ daneezná, nidi ádíní, Tʼáá háiida shizaad bikʼeh hojíłʼı̨́įgo, éí doo dazdootsaał da.
53 Daʼ niísh nihizhéʼé Éíbraham yę́ę biláahgo ayóó ánítʼé? Éí daaztsą́, Diyin God yá dahalneʼii nítʼéʼígíí ałdóʼ daneezná! Ákoshąʼ háí íʼdílʼı̨́?
54 Nítʼééʼ Jesus ánáádooʼniid, Tʼáá shí tsʼídá ayóó áníshtʼé íʼdíshnéehgo tsʼídá ayóó áníshtʼé íʼdíshnéhígíí éí tʼáadoo shá nídoodleełí da, nidi shiTaaʼ ayóó áníshtʼéego áshósinígíí, Éí nihí nihiDiyin God, dadohní.
55 Nidi nihí doo hwéédahonohsin da; shí hwééhasin. Doo hwééhasin da, dishníigo, tʼáá nihígi áníshtʼéego shiyoochʼíid doo nítʼééʼ, nidi hwééhasingo hazaad bikʼeh honishʼı̨́.
56 Éíbraham nihizhéʼé yę́ę sheidoołkáłígíí yiidoołtséełgo yąą bił hózhǫ́ǫ́ nítʼééʼ, áko yiyiiłtsą́ągo bił hóózhǫǫd.
57 Jew dineʼé ánáádahodooʼniid, Tʼah doo ashdladiin nináháah da, daʼ ákoósh Éíbraham yiniłtsą́?
58 Jesus ánááhodooʼniid, Tʼáá aaníí, tʼáá aaníígóó ánihidishní, Éíbraham tʼáá bítséedi honishłǫ́.
59 Ákohgo dahwíídínóołniił biniyé tsé nídayiizlááʼ, nidi Jesus éí [diné bitahgóó chʼízhníyáago] bitsʼąą nízhdeestʼı̨́ı̨́ʼ, áko kin biiʼ sohodizin bił hazʼánígíí biyiʼdóó chʼízhníyá.
Footnotes
^ Nihí doo wotashkiʼ daniidlı̨́į da, jiníigo óolyé.
