Joshua 1:1-18
1 Mózes éí Bóhólníihii yá naalʼaʼí nilíinii daaztsą́ą́dóó bikʼijįʼ áhóótʼįįd; Bóhólníihii éí Nan biyeʼ Jáshowa joolyéii áyidííniid; éí Mózes yéeniʼ bá naalʼaʼí jílı̨́ı̨́ nítʼéeʼgo ííłní,
2 Mózes shinaalʼaʼí yę́ę daaztsą́; éí bąą nílááh, Jórdan tooh haʼnaagóó dohnééh; díí dineʼé tʼáá ałtso éí kéyahígíí baa dideeshʼáałgo Ízrel dineʼé bííʼ átʼé.
3 Tʼáá ałtsogóó kéyah bikááʼ deínóhkáah dooleełii nihaa diníʼą́; jó, Mózes tʼáá ákóbidííniid niʼ.
4 Honoojíídóó áádóó Dził Lébanandóó Yufréítiiz wolyéego ayóó átʼé tooh nílíníjįʼ áádóó Het dineʼé bikéyah tʼáá átʼéé nítʼééʼ nihikéyah doo, áko eʼeʼaahjigo ayóó átʼé tónteel siyínígíí bíighahgo nihihoodzo dooleeł.
5 Diné tsʼídá doo łaʼ nikʼeh dódleʼ átʼéégóó níyoołkáał dooleeł; Mózes bił honishłǫ́ yę́ęgi átʼéego nił honishłǫ́ǫ doo; tsʼídá doo chʼééh ná ádeeshtʼįįł da; tsʼídá doo yóóʼandideeshʼáał da.
6 Nidziilgo íʼdííʼnílzin áádóó chánah íʼdííʼnílzin, áko díí diné éí kéyah ííʼ dooleełii bá aháhidíízoh; éí dabizhéʼé yę́ę bichʼįʼ bee ádee hadeesdzíiʼgo baa diníʼą́ą niʼ.
7 Nidi nidziilgo íʼdííʼnílzin áádóó yéego chánah íʼdííʼnílzin, áko bee hazʼáanii tʼáá átʼé bikʼehgo ánítʼée dooígíí hazhóʼó ádaa nilzįįh; éí Mózes shá naalʼaʼí nichʼįʼ yee haadzííʼ; nishʼnáajigo, doodaiiʼ nishtłʼajigo doo dah didíínáał da, áko tʼáá yínááłgóó tʼáá ałtsoní yáʼátʼéehgo ná ááníił doo.
8 Díí naaltsoos biyiʼ bee hazʼáanii bee akʼeʼashchínígíí tsʼídá bee yáníłtiʼ doo, nidi hazhóʼó nabikʼítsíníłkeesgo iʼiiʼaahdóó niyiiłkaah dooleeł; kótʼéego hazhóʼó ádaa nilzįįhgo bee akʼeʼashchínígíí bikʼehgo tʼáá átʼé bikʼeh ánítʼée doo, áko yáʼátʼéehgo ná áhooníiłgo hinínáago ádiʼdíílnííł, índa baa nanináii tʼáá ałtso yáʼátʼéehgo łaʼ danileʼ doo.
9 Daʼ díísh doo bee nichʼįʼ haasdzíiʼ da? Nidziilgo íʼdííʼnílzin áádóó chánah íʼdííʼnílzin; tʼáadoo náníldzidí, doodaiiʼ tʼáadoo ádił nisindáhí, háálá Bóhólníihii niDiyin God éí tʼáá hidínááhgóó nił hólǫ́.
10 Áko Jáshowa éí diné aląąjįʼ naazíinii yichʼįʼ haadzíiʼgo ání,
11 Nihílááh, dah oonéłígíí bitahgóó dohkááh, áko bił chʼídahonohʼaahgo ádabidohní, Nihistʼeʼ hashtʼedaahłééh, háálá tááʼ yiską́ągo Jórdan tooh haʼnaagóó nídidoohnééł; kéyah nihííʼ ádadoohłíiłgo Bóhólníihii nihiDiyin God nihaidiníʼánígíí ádííʼ ádadoohłííł.
12 Áádóó Rúben dineʼé áádóó Géed dineʼé índa Manáseh dineʼé ałnííʼdóóígíí yichʼįʼ Jáshowa haadzíiʼgo ání,
13 Díí béédaałniih: éí Bóhólníihii yá naalʼaʼí Mózes yéeniʼ saad yee nihichʼįʼ haadzíiʼii kóníiniʼ, Bóhólníihii nihiDiyin God háádaałyı̨́įh doogi nihaa hodiníʼą́, áádóó díí kéyah nihaidiníʼą́.
14 Niheʼasdzą́ą́ áádóó nihadaʼáłchíní áádóó danihilı̨́ı̨́ʼ bíniʼdii tʼáá Mózes éí kéyah nihaidiníʼánígi Jórdan tooh wóshchʼishdi nidaakai doo, nidi nihí éí nihikʼisóó bilą́ąjįʼ dohkáahgo anaaʼ biniyé hashtʼeʼádadołnééh; ayóó átʼéego diné nidaahbaah danohłíinii, tʼáá ánółtso bíká adoohjah.
15 Bóhólníihii éí háádaałyı̨́įhgo ánihiilaaígi átʼéego nihikʼisóó háádaalyı̨́įhgo áyiilaajįʼ áádóó ałdóʼ kéyah ííʼ dooleełii Bóhólníihii nihiDiyin God beididooʼáłígíí ádííʼ ádayiilaajįʼ bíká adoohjah, ákohgo nihí kéyah bichʼįʼ nátʼą́ą́ʼ nídoohkahgo ádííʼ ádadoohłííł áádóó baa nihił dahózhǫ́ǫ doo; éí kéyah Jórdan tooh wóshchʼishdi haʼaʼaahjigo hazʼánígi nihaidiníʼą́.
16 Áádóó diné éí Jáshowa yichʼįʼ hadaasdzíiʼgo ádeiłní, Nihichʼįʼ bee háínídzíiʼii tʼáá ałtso bikʼeh ádadiiʼnííł, áádóó tʼáá nihíłʼáágóó nideiikai dooleeł.
17 Tʼáá ałtsojįʼ Mózes deísíníiltsʼą́ą́ʼ yę́ęgi átʼéego daníísíiltsʼą́ąʼ doo; Mózes yił hólǫ́ yę́ęgi átʼéego Bóhólníihii niDiyin God éí nił hólǫ́ǫ doo.
18 Tʼáá háiida nibikʼeh óʼooʼníiłii yikʼijįʼ yisteeʼii áádóó nizaad bee bichʼįʼ hahídziihii tʼáá ałtso doo yiyíistsʼą́ąʼii bidiʼyoolyééł. Nidi nidziilgo íʼdílnééh áádóó chánah íʼdílnééh.
