Judges 20:1-48
20 Ákohgo Dan kin haalʼáádóó Bíyer-shííba kin shijaaʼjįʼ Ízrel dineʼé tʼáá ałtso nidahaaskaigo Gíliyad kéyah nahósʼaʼdę́ę́ʼ ałdóʼ tʼáá yił niheeskaigo éí Mízpeh kin haalʼáagi tʼáá łaʼ bizhiʼee Bóhólníihii yaa áłah silı̨́ı̨́ʼ.
2 Áko diné tʼáá ałtso bitsʼą́ą́dóó ayóogo bídahólníihii éí Ízrel dadineʼé tʼáá ałtso bitsʼą́ą́dóó ádaatʼı̨́įgo Diyin God bidineʼé danilı̨́įgo tʼáá bí tʼááłáhígi áłah nilı̨́ı̨́ nítʼééʼ; diltłish yee nidaabaahii dı̨́įdi neeznádiindi mííl.
3 (Nítʼééʼ Ízrel dineʼé dajílíinii Mízpeh kin haalʼáágóó adziiskaígíí Bénjamin dineʼé haa dahodiiztsʼą́ą́ʼ.) Áko Ízrel dineʼé ádaaní, Haash yitʼéego díí doo yáʼáshónígi áhóótʼįįdígíí hazhóʼó bee nihił dahodoołnih.
4 Áko Líívai dineʼé beʼasdzą́ą́ bąąh seesyíinii áhodííniid, Gíbiyah kin haalʼáagi Bénjamin bikéyahgi níyáago ákwii sheʼasdzą́ą́ nishʼíní bił shiiłkaah nítʼééʼ.
5 Áko tʼáá éí bitłʼééʼ Gíbiyah dineʼé shaatįįh yikai áádóó kin binaadę́ę́ʼ shináztʼiʼgo shidaʼniiłhı̨́ı̨́ nítʼééʼ. Áko sheʼasdzą́ą́ nishʼíní yę́ę nídayiʼiyííłnáadgo daaztsą́.
6 Áko sheʼasdzą́ą́ nishʼíní yę́ę nídiiłtı̨́įgo nihoyéłgizhgo Ízrel dineʼé kéyah yiiʼ kéédahatʼı̨́ı̨́góó ałtso ádahaashjaaʼ, háálá Ízrel dineʼé bitahgi tʼóó baaʼihígi ádahatʼı̨́ índa doo hashkał baa naʼasdeeʼ.
7 Jó, tʼáá ánóhtʼé Ízrel dineʼé danohłı̨́; kótʼé dashidohníinii áádóó kótʼé haʼníinii, chʼídadoohʼááł.
8 Áko diné tʼáá ałtso tʼáá łaʼ bizhiʼee nídiijéeʼgo ádaaní, Nihí doo łaʼ níbaalgóó, doodaiiʼ hooghangóó nídiidáał da.
9 Nidi Gíbiyah dineʼé kʼad kódahodiilníił ni: yááʼiiltʼeʼ bikʼehgo bichʼįʼ hidiikah.
10 Áko Ízrel dineʼé bitahgóó tʼáá átʼé diné neeznádiingo neeznájíltʼéego bitsʼádahodiiʼnił, áádóó tʼááłáhídi míilgo neeznádiingo bitsʼádahodiiʼnił, índa neeznáadi mííl ázhnéelą́ąʼgo tʼááłáhídi mííl ázhnéelą́ąʼgo bitsʼádahodiiʼniłgo bidookįįłii diné bá ákǫ́ǫ́ adajiijáahgo áká aníjíjah doo. Áko Bénjamin bikéyahgi Gíbiyah kin haalʼáajįʼ joonéełgo Ízrel dineʼé bitahgi doo hóshkał yaa naaskaii tʼáá ałtso bikʼehgo kʼéédazhdidoodlííł.
11 Ákohgo Ízrel dineʼé tʼáá ałtso kin haalʼáhígíí yaatįįh nákah; tʼááłáʼí ídlínígi átʼéego tʼáá łaʼ bizhiʼee ákódaatʼı̨́.
12 Áko Ízrel dineʼé danilíinii éí Bénjamin dineʼé bitahgóó diné łaʼ adayiisʼaʼgo ádaaní, Díísh haʼátʼíí doo yáʼádaashóonii nihitahgi baa nidaʼaldeeh?
13 Éí bąą kʼad Gíbiyah kin haalʼáagi diné doo yáʼádaashóonii nihaa dadinohʼaahgo tʼóó nidadiiltsxił índa Ízrel dineʼé bitsʼą́ąjįʼ doo yáʼádaatʼéehii kódadiilnííł. Nidi Bénjamin dineʼé éí Ízrel dineʼé bikʼisóó danilı̨́į nidi doo dayíistsʼą́ąʼ da.
14 Áko Bénjamin dineʼé danilíinii éí Gíbiyah kin haalʼáajįʼ Ízrel dineʼé yichʼįʼ anaaʼ dahodoołeeł biniyé bikin hadaasʼáádę́ę́ʼ chʼídahaazhjééʼ.
15 Áko íídą́ą́ʼ Bénjamin dineʼé bikin hadaasʼáádóó naadiin hastą́ądi mííl ánéelą́ąʼgo diltłish yee nidaabaahii niiʼnil, áádóó ałdóʼ Gíbiyah kin haalʼáagi kéédahatʼínígíí tsostsʼidi neeznádiin óóltąʼgo diné nideiznil.
16 Diné tʼáá átʼé bitahdę́ę́ʼ nishtłʼají yee daʼditłʼı̨́hígíí tsostsʼidi neeznádiingo tʼáá łáʼí nítínígo bee aditłʼı̨́ı̨́h bee tsiighá áníłtsááz bíighahgo nidi doo nideisįʼígíí nideiznil.
17 Áko Bénjamin dineʼé danilíinii tʼáágéedgo Ízrel dineʼé tʼéiyágo dı̨́įdi neeznádiindi mííl ánéelą́ąʼgo diltłish yee nidaabaahii niiʼnil; díí diné tʼáá ałtso anadaʼałʼíinii danilı̨́.
18 Áko Ízrel dineʼé dah diikaigo Béthel* hazʼánígóó eekai, áádóó Diyin God nideídíłkidgo haash yitʼéego dooleeł, deidííniid. Nihí háidíígíishąʼ átsé Bénjamin dineʼé yichʼįʼ anaaʼ ádahodoolííł? Nítʼééʼ Bóhólníihii áhodííniid, Júdah dineʼé átsé.
19 Ákohgo Ízrel dineʼé tʼah abínídą́ą́ʼ nídiijéeʼgo, Gíbiyah dineʼé yikʼiidoojah biniyé niníná.
20 Áko Ízrel dineʼé éí Bénjamin dineʼé bichʼįʼ anaaʼ biniyé dah náádiiʼná áádóó Gíbiyah kin haalʼáagi Ízrel dineʼé hachʼįʼ ałkééʼ nináʼahiʼniłgo hakʼi néijah nítʼééʼ.
21 Éí bijı̨́ Gíbiyah kin haalʼáádóó Bénjamin dineʼé chʼínínáago Ízrel dineʼé naadiin naakidi mííl nideistseed.
22 Nidi Ízrel dineʼé danilíinii tʼáá bí chánah ádaʼahólzingo átsé hachʼįʼ anaaʼ dahasłı̨́ʼígi átʼéego hatʼááh nájah nítʼééʼ.
23 Áko Ízrel dineʼé ákóde anááhaaskaigo Bóhólníihii yinááł daachago iʼííʼą́. Áko haash yitʼéego dooleeł Bóhólníihii deidííniid, Bénjamin dineʼé nihikʼisóó danilíiniísh bitʼááh náádiijahgo bichʼįʼ anaaʼ ánáádahodiilnííł? Áko Bóhólníihii áhodííniid, Nílááh, bikʼi náánáohjeeh.
24 Ákohgo naaki jı̨́ aleeh góneʼ Ízrel dineʼé éí Bénjamin dineʼé bitʼááh náájííjééʼ.
25 Áko naaki jı̨́ aleeh góneʼ Gíbiyah kin haalʼáádóó Bénjamin dineʼé hachʼįʼ anaaʼ dahasłı̨́ı̨́ʼ, áko tseebíítsʼáadahdi mííl Ízrel dineʼé diltłish yee nidaabaahii nináádeistseed.
26 Ákohgo Ízrel dineʼé tʼáá ałtso, siláo danilínígíí tʼáá átʼé, Béthel hazʼánígóó aheeskaigo áadi Bóhólníihii yinááł daachago áádóó shá bíighah tʼáadoo daʼayání iʼííʼą́, índa didlidgo náádahaniihii áádóó hózhǫ́ǫ́jí náádahaniihii Bóhólníihii yichʼįʼ náádayiisniiʼ.
27 Áko Ízrel dineʼé danilíinii Bóhólníihii bíndabízhdééłkid, (áko éí yoołkááł yę́ędą́ą́ʼ Diyin God bitsitsʼaaʼ dílzinii éí bee ahaʼdeetʼáanii biiʼ sinilii ákwii siʼą́
28 áádóó éí yoołkááł bítséédą́ą́ʼ Éran biyeʼ Eliyéízar nilíinii éí hayeʼ Fíniyas naalʼaʼ nítʼééʼ,) Ízrel dineʼé ádaaní, Nihikʼisóó Bénjamin dineʼé danilíinii bichʼįʼ nááhidiikahgoósh bichʼįʼ anaaʼ ánáádahodiilnííł, doodaiiʼ daatsʼí tʼóó bikʼi diikááh? Áko Bóhólníihii ánááhodooʼniid, Nílááh, ákóde bichʼįʼ nááhidohkááh, háálá yiską́ągo nihílákʼee hodideeshʼááł.
29 Ákohgo Ízrel dineʼé éí Gíbiyah kin haalʼáii binaagóó diné aa héeshjéeʼgo ádayiilaa.
30 Áko tágí jı̨́ aleeh góneʼ Ízrel dineʼé dah náádiikaigo Bénjamin dineʼé yikʼi náánéijééʼ áádóó tʼáá átsé ádaadzaa yę́ęgi átʼéego Gíbiyah kin haalʼáii yaa ninááhaakai.
31 Áko Bénjamin dineʼé chʼínáánáʼnáago hakʼi náánéijééʼ áádóó kin haalʼáhígíí bitsʼą́ąjigo yóóʼadahoneezʼaaʼ. Índa tʼáá átsé nidahastseed yę́ęgi átʼéego halgaigóó áádóó daʼnítiingóó, łaʼ éí Béthel hazʼánígóó atiin áádóó łaʼ éí Gíbiyah kin haalʼáágóó atiin ákǫ́ǫ́ dahoníłtseedgo Ízrel dineʼé tʼáá tádiiní nideistseed.
32 Áko Bénjamin dineʼé ádadííniid, Átséédą́ą́ʼ yę́ęgi átʼéego yóóʼadahineezhchą́ą́ʼ. Nidi Ízrel dineʼé ádaaní, Kin haalʼáádóó daʼnítiingóó yóóʼadahodíníitʼah biniyé dadíníichééł.
33 Áko Ízrel dineʼé tʼáá ałtso aa héeshjééʼ yę́ędóó nídiijéeʼgo Béíyal-téímar hazʼánígi anaaʼ biniyé ałkééʼ nináádaʼahíʼnil áádóó Gíbiyah binaagóó chʼiltahdóó Ízrel dineʼé aa héeshjéeʼii chʼéheezhjééʼ.
34 Áko neeznáadi míilgo Ízrel dineʼé bitsʼą́ą́dóó nídiiʼnilii tʼáá ałtso Gíbiyah kin haalʼáagi akʼi náánéijééʼ, índa tʼáá íiyisí ałkʼiijééʼ, nidi Bénjamin dineʼé éí doo yáʼátʼéehii baa honíleʼígíí doo bił béédahózin da.
35 Áko Ízrel dineʼé dabinááł Bóhólníihii éí Bénjamin dineʼé yikʼeh deesdlı̨́ı̨́ʼ, áádóó éí bijı̨́ Ízrel dineʼé danilíinii éí Bénjamin dineʼé naadiin ashdladi mííldóó baʼaan tʼááłáhídi neeznádiingo nideistseed. Díí diné tʼáá ałtso diltłish yee nidaabaahii danilı̨́ı̨́ nítʼééʼ.
36 Áko Bénjamin dineʼé éí hakʼeh dahodeesdlı̨́įʼgo baa ákodazniizı̨́ı̨́ʼ. Ízrel dineʼé éí Bénjamin dineʼé yá dahoołʼaʼgo Ízrel dineʼé héeshjéeʼii yadaʼólíigo Gíbiyah kin haalʼáagi akʼeh dadeesdlı̨́ı̨́ʼ.
37 Áko diné héeshjéeʼii hatsin bee íʼdílzoołí Gíbiyahgi kin haalʼáhígíí yaatįįh híjééʼ, áádóó diné aa héeshjéeʼii kin haalʼáagi kéédahatʼíinii ałtso diltłish yee dayííghą́ą́ʼ.
38 Áko Ízrel dineʼé áádóó nahdę́ę́ʼ aa héeshjéeʼii éí kin haalʼáádóó ayóó ánéelą́ąʼgo łid hahagháahgo, ííshją́ą́ éí bee ééhózin doo, daʼahidooʼniid.
39 Áko Ízrel dineʼé yóóʼiijeehgo Bénjamin dineʼé hakʼiijéeʼgo Ízrel dineʼé tádiin yiltʼéego nideistseed, áko ádaaní, Tʼáá aaníí átséédą́ą́ʼ anaaʼ hazlı̨́ʼígi átʼéego nihinááł bikʼeh dahodidleeh.
40 Nidi kin haalʼáhídóó łid hahagháahgo hakééʼdę́ę́ʼ Bénjamin dineʼé tʼą́ą́ʼ nídadéétʼı̨́ı̨́ʼ nítʼééʼ; shoo, kin haalʼáhídóó yótʼááhgóó łid hahagháahgo dayiiłtsą́.
41 Ákohgo Ízrel dineʼé nátʼą́ą́ʼ hakʼi néijéeʼgo Bénjamin dineʼé tʼáá íiyisí tʼóó bił dahóóyéeʼgo nídaasdzííd, háálá doo yáʼátʼéehii bikʼi hooleʼgo yaa ákodaniizı̨́ı̨́ʼ.
42 Éí bąą Ízrel dineʼé dabinááł tʼą́ą́ʼ dah nídiijéeʼgo honoojíijigo dah diijééʼ, nidi anaaʼ dahółóonii tʼáá hoł naneesdaaʼ, áádóó kin hadaasʼáádóó hachʼįʼ nídiijéeʼgo biníiʼgi ałtso ádahasdįįd.
43 Bénjamin dineʼé yináztʼiʼgo áádóó tʼáadoo ádahodiilzéhí deinéełkaadgo Gíbiyah kin haalʼá binaashii haʼaʼaahjigo ałtso nidahastsxeed.
44 Bénjamin dineʼé tseebíítsʼáadahdi míilgo nabízdįįd; éí tʼáá ałtso diné doo nídanilyéesii danilı̨́ı̨́ nítʼééʼ.
45 Áádóó daadziihígíí naanídahaazhjéeʼgo honoojíígóó Ríman tsé siʼánígóó hasih hazʼą́ą́góó aheezhjééʼ. Áko ashdladi mííl ánéelą́ąʼgo atiingóó dajííghą́ą́ʼ índa Gídam bichʼįʼ tʼáá hazʼą́ądi bídadzizbaaʼgo nibíjiizhjéeʼii naakidi mííl ánéelą́ąʼgo dajííghą́ą́ʼ.
46 Ákohgo éí bijı̨́ Bénjamin dineʼé naadiin ashdladi míilgo diltłish yee nidaabaahii ałtso nabízdįįd; éí tʼáá ałtso diné doo nídanilyéesii danilı̨́ı̨́ nítʼééʼ.
47 Nidi hastą́ądi neeznádiin ánéelą́ąʼgo éí tʼáá honoojíígóó Ríman tsé siʼání bighą́ąʼjįʼ hasih nahazʼą́ąjįʼ yóóʼaheezhjéeʼgo áadi dı̨́ı̨́ʼ bee nídadeezid lá.
48 Áko Ízrel dineʼé éí Bénjamin dineʼé baatįįh náájookaigo diltłish bee nabínáádadzisdįįd; diné danilíinii áádóó naaldlooshiida índa tʼáá átʼé tʼáá shódadzoostʼeʼígi nabídadzisdįįd. Áko kin hadaasʼáágóó tʼáá bikʼídajiikáhígíí adahizdeeskʼą́ą́ʼ.
Footnotes
^ Béthel jiníigo éí Hííbrew kʼehjígo, Diyin God bikin biiʼ sohodizin, jiníigo óolyé.
