Leviticus 7:1-38
7 Díí doo ákǫ́ǫ́ ájíítʼįįdjí nááhániihii bee hazʼáanii átʼé: éí tsʼídá aláahgo dílzinii átʼé.
2 Didlidgo nááhániihii nidadziłtseedígi éí doo ákǫ́ǫ́ ájíítʼįįdjí nááhániihii nidadziłtseed doo, áádóó bidiłígíí éí bikááʼ nááʼiiniihí bikáaʼgi yikʼínídeiłkaʼ doo.
3 Áádóó bikʼah tʼáá átʼé néidiyoołnih; bitseeʼ neeskʼahígíí índa bitsą́ siláí akʼah daabąąhígíí,
4 bitsą́ áshkʼazhí tʼáá áłah áádóó bikʼah tʼáá bąąhgo éí atságah bidiitʼiʼígíí índa azid bíighahgi akʼahígíí éí atsą́ áshkʼazhí tʼáá bił haidoonił.
5 Áko nááʼiiłniihii éí bikááʼ nááʼiiniihí yikáaʼjįʼ didlidgo nááhániihii átʼéego Bóhólníihii yichʼįʼ néidiyoołnih; éí doo ákǫ́ǫ́ ájíítʼįįdjí nááhániihii átʼée doo.
6 Diné nááʼiiłniihii danilínígíí tʼáá ałtso éí atsįʼígíí nídeidı̨́įh doo; hodiyingo hazʼą́ągi nídeidı̨́įh doo; tsʼídá aláahgo dílzinii átʼé.
7 Ádił niʼiidzííhjí nááhániihiigi átʼéii átʼéego doo ákǫ́ǫ́ ájíítʼįįdjí nááhániihii nááyiiłniih doo. Éí tʼáá áłah tʼááłáʼí bee hazʼáanii bá átʼé. Nááʼiiłniihii éí bee kʼééhoodǫǫłgo nááyiiłniihígíí éí tʼáá bí doo.
8 Áko nááʼiiłniihii éí tʼáá háiida bá didlidgo nááyiisniiʼígíí éí nááyiisniiʼígíí bikágí tʼáá bí dooleeł.
9 Áádóó akʼáán náádahaniihii tʼáá ałtso éí bááh bighan góneʼ bááh ályaaígíí áádóó tʼáá ałtso ásaaʼ ditání bee bááh ályaaígíí índa tseeʼí bee łeesʼáán ályaaígíí éí nááʼiiłniihii yiʼoh nááʼiisniiʼígíí tʼáá bí dooleeł.
10 Akʼáán náádahaniihii tʼáá ałtso akʼah bił ałtahgo, doodaiiʼ akʼáán tʼáá bízhání éí Éran biyeʼké tʼáá ałtso aheełtʼéego daabí doo.
11 Díí hózhǫ́ǫ́jí nááhidoonihii bee hazʼáanii átʼé: éí Bóhólníihii yichʼįʼ nááyiiłniih doo.
12 Ahééh nízingo nááʼiiłniihgo éí ahééh nízingo nááhániihii díí yił néidiyoołnih: dííkʼǫsh tʼáágééd bááh éí akʼah bił ałtahgo ályaii áádóó dííkʼǫsh tʼáágééd bááh dáʼákaʼí éí akʼah bąąh ályaii índa akʼáán dibahí akʼah bił ałtah bee bááh ályaago sitʼéii.
13 Díí bááh éí dííkʼǫsh bił bááh ályaii óóltąʼgo nááhidoonihii ahééh hwiindzingo hózhǫ́ǫ́jí binááhániihii yił néidiyoołnih.
14 Áádóó bááh náádahidoonihii bitsʼą́ą́dóó tʼáá daałáʼígo Bóhólníihii bichʼįʼ bił dah nídiʼdiilnihgo nááhániihii náájiiłʼniih doo; nááʼiiłniihii éí hózhǫ́ǫ́jí nááhaazniiʼii bidił akʼíistahígíí díí bááh bił dah nídiʼdiilnihígíí éí bííʼ neheleeh.
15 Atsįʼ náádahaniihii hózhǫ́ǫ́jí nááhaazniiʼii ahééh nízingo nááyiisniiʼígíí tʼáá nááyiisniiʼ bijı̨́ doodı̨́ı̨́ł; hoosʼįįdjįʼ doo łaʼ tʼáá áázdoohsįįł da.
16 Nidi bí nááyiisniiʼígíí éí yee ádee haadzíiʼii átʼéego, doodaiiʼ tʼáá bí ninéidiníʼą́ągo nááyiisniiʼii átʼéego tʼáá nááyiisniiʼ bijı̨́ doodı̨́ı̨́ł, áádóó bííʼohígíí biiskání ałdóʼ doodı̨́ı̨́ł.
17 Nidi tááʼ yiską́ągo atsįʼ didlidgo nááhaazniiʼii biʼoh nidaʼiisdą́ʼígíí didoodlił.
18 Atsįʼ náádahidoonihii hózhǫ́ǫ́jí há nááhániihii náájiisniiʼígíí łaʼ tááʼ yiską́ąjįʼ bííʼohígíí tʼáá dajiyą́ągo nááhaazʼniiʼii tʼáá bił doo há dínóodzįįł da, doo nidi há bił íídóoltah da; éí doo haldinígi áhoodzaii átʼée doo; łaʼ jííyą́ąʼgo bee doo ákwii ájíítʼįįdígíí bee hohodiitʼiʼgo nijigháa doo.
19 Áádóó atsįʼ haʼátʼíhída baaʼihii yíhidééʼnáaʼgo éí doo doodı̨́įł da; éí didoodlił, nidi tʼáá ádzíłtso ádąąh dahojildéhígíí tʼéí atsįʼ yáʼátʼéehii dajiyą́ą doo.
20 Nidi łaʼ doo hoʼdíídeeʼii éí atsįʼ nááhidoonihii hózhǫ́ǫ́jí nááhaazniiʼii Bóhólníihii bíhígíí jííyą́ąʼgo hodineʼé bitsʼą́ąjįʼ hodiʼyoolyééł.
21 Nááʼáłdóʼ łaʼ tʼáá haʼátʼíhída baaʼihii bíhizhdééʼnáaʼgo éí diné bííłchxǫʼii, doodaiiʼ naaldlooshii yíchxǫʼii, doodaiiʼ haʼátʼíhída yíchxǫʼgo baaʼihiigi ádaatʼéii yénáyáago éí atsįʼ náádahidoonihii hózhǫ́ǫ́jí nááhaazniiʼii Bóhólníihii bíhígíí jííyą́ąʼgo hodineʼé bitsʼą́ąjįʼ hodiʼyoolyééł.
22 Áádóó Bóhólníihii éí Mózes ííłní,
23 Ízrel dineʼé bichʼįʼ handziihgo ábidiní, Béégashii, doodaiiʼ dibé, doodaiiʼ tłʼízí bikʼah tʼááká daoyą́ą́ʼ lágo.
24 Naaldlooshii tʼáá bíniʼdii daaztsáanii índa naaldlooshii ałchinii nibiisdláadii bikʼah tʼáá haʼátʼíhída biniyé chodaołʼı̨́į doo, nidi tsʼídá tʼááká daoyą́ą́ʼ lágo.
25 Tʼáá háiida naaldlooshii bikʼahígíí jííyą́ąʼgo, jó, akʼah náádahaniihii Bóhólníihii yichʼįʼ náádayiiłniih łeh; éí akʼah jííyą́ʼígíí hodineʼé bitsʼą́ąjįʼ hodiʼyoolyééł.
26 Nááʼáłdóʼ tsídii, doodaiiʼ naaldlooshii dabidiłígíí kéédahohtʼı̨́įgi tʼááká daoyą́ą́ʼ lágo.
27 Tʼáá háiida éí tʼáá haʼátʼíhída bidił jííyą́ąʼgo éí hodineʼé bitsʼą́ąjįʼ hodiʼyoolyééł.
28 Áádóó Bóhólníihii éí Mózes ííłní,
29 Ízrel dineʼé bichʼįʼ handziihgo ábidiní, Tʼáá háiida éí náádahaniihii hózhǫ́ǫ́jí nááhániihii átʼéego Bóhólníihii bichʼįʼ náájiiłniihgo éí nááhániihii łaʼ Bóhólníihii baazhdidooʼáałgo hózhǫ́ǫ́jí nááhániihii átʼéego náájiiłniih doo.
30 Bóhólníihii bichʼįʼ didlidgo náájiiłniihígíí tʼáá hó níjíjih doo; akʼah éí ajéítsʼiin bił níjíjih doo; áko náásee bił nídiʼdilnihgo nááhániihii Bóhólníihii binááł náájiiłniih doo.
31 Áko nááʼiiłniihii éí akʼahígíí bikááʼ nááʼiiniihí yikáaʼjįʼ néidiłiʼ doo, nidi ajéítsʼiinígíí éí Éran áádóó biyeʼké daabí doo.
32 Ajáád nishʼnáájíígíí éí nááʼiiłniihii baa nánítı̨́ı̨́h; éí bił dah nídiʼdiilnihgo nááhidoonihii hózhǫ́ǫ́jí nááhániihii átʼée doo.
33 Éran biyeʼké łaʼ náádiʼyoołnihgo éí hózhǫ́ǫ́jí nááhániihii bidił áádóó bikʼah nááyiiłniihgo éí ajáád nishʼnáájíígíí tʼáá bí doo.
34 Jó, ajéítsʼiin náásee bił nídiʼdilnihígíí áádóó ajáád bił dah nídiʼdiilnihígíí éí hózhǫ́ǫ́jí nááhániihii łahdóó átʼéego Ízrel dineʼé bitsʼą́ą́ʼ náádiishʼniłgo, nááʼiiłniihii Éran áádóó biyeʼké baa nídíshʼáahgo éí bee nihoníʼą́ągo ahóyéelʼáágóó Ízrel dineʼé bitahgi ákótʼée doo.
35 Éran áádóó biyeʼké akʼah hakʼi yadaadziidgo dahoʼdoolzı̨́įʼii baa hiditʼaahígi átʼéego Bóhólníihii bichʼįʼ didlidgo náádahaniihii bitsʼą́ą́dóóígíí nááyiisniiʼígíí bijı̨́ı̨́dą́ą́ʼ Bóhólníihii bá nidajilʼaʼgo nááʼiiłniihii dajílı̨́į doo.
36 Éí Bóhólníihii yee haadzíiʼii bikʼehgo Ízrel dineʼé baa deideezʼą́ągo akʼah yee hóósı̨́įʼgo nihonínil bijı̨́ı̨́dą́ą́ʼ yee nihoníʼą́ągo ahóyéelʼáágóó náás ahijoolchíił doo.
37 Éí lá bee hazʼáanii átʼé ni: didlidgo nááhániihii, akʼáán nááhániihii, ádił niʼiidzííhjí nááhániihii, doo ákǫ́ǫ́ ájíítʼįįdjí nááhániihii, diyingo bitsʼąą hastiʼgo nááhániihii, áádóó nááhidoonihii hózhǫ́ǫ́jí nááhániihii ádaatʼé.
38 Díí kótʼéego Dził Sáínaigi Bóhólníihii éí Mózes yichʼįʼ yee haadzííʼ; tʼáá éí bijı̨́ Ízrel dineʼé bichʼįʼ hadzoodzíiʼgo Sáínai honoojíigi Bóhólníihii yichʼįʼ náádaʼiiłniih doo.
