Nehemiah 5:1-19
5 Áádóó diné índa bidaʼasdzą́ą́ éí yił bikʼisóó Jew dineʼé danilíinii yikʼijįʼ danilı̨́įgo yéego saad dahasłı̨́ı̨́ʼ.
2 Jó, łaʼ ádadííniid, Nihí, nihiyeʼké áádóó nihitsiʼké tʼóó adahoniiʼyóí; éí bąą tłʼoh naadą́ą́ʼ bá ninádahiijáah doo, áko daʼiidą́ąʼgo dahiniiʼnáa doo.
3 Náánáłaʼ éí ádadííniid, Doo nahałtingóó biniinaa nihidádaʼakʼeh índa nihichʼil naʼatłʼoʼii deílʼáhígíí áádóó danihikin bikʼé tłʼoh naadą́ą́ʼ nihaa dahidoojih biniyé ąąh nidahiiʼnííł.
4 Áádóó náánáłaʼ ałdóʼ ádadííniid, Nihidádaʼakʼeh índa nihichʼil naʼatłʼoʼii deílʼáhígíí bikʼé béeso éí aláahgo naatʼáanii bichʼįʼ nidahidiilyééł biniyé nihadaʼiisnil.
5 Áko laʼ nihikʼisóó tʼáá hoł tʼáá ahideiilkágí; nihaʼáłchíní ałdóʼ badaʼáłchíní tʼáá yił ahidaalkágí, áko laʼ nihiyeʼké índa nihitsiʼké hanaalteʼ danilı̨́ biniyé haa dahiiʼníiłgo nihitsiʼké łaʼ tʼáá íídą́ą́ʼ hanaalteʼ danilı̨́, áko tʼą́ą́ʼ náádahidiilnihgi doo bídaniilʼą́ą da, háálá nihidádaʼakʼeh yę́ę índa nihichʼil naʼatłʼoʼii deílʼá nítʼééʼ yę́ę diné náánáłaʼ bee bídahólnííh.
6 Áko hahóółʼáhígíí índa díí saad disétsʼą́ąʼgo tʼáá íiyisí bikʼee sháhóóchįįd.
7 Áádóó baa nitsísíkéezgo índa aląąjįʼ naazíinii áádóó naatʼáanii danilíinii dadítehgo ábidishní, Tʼááłáʼí nootínígo nihikʼisóó danilíinii ínáoltąʼí nidayiilé biniyé bidadoołkaal. Áádóó diné tʼóó ahayóí hachʼįʼ ninínil.
8 Áko áhodííniid, Nihikʼisóó Jew dineʼé danilíinii ałʼąą dineʼé bichʼįʼ nidabiʼdiizniiʼ yę́ę tʼáá bídaniilʼánígíí bikʼehgo tʼą́ą́ʼ náádahiilniiʼ. Daʼ ákoósh nihikʼisóó nihaa nidahidoonih? Éí doodago nihichʼįʼgo daatsʼí nidahidoonih? Áko tʼóó dadéesxéelgo tʼáadoo yee hadaodziihí da.
9 Áádóó ałdóʼ ádííniid, Kódaohtʼínígíí doo yáʼátʼéeh da; nihiDiyin God tsʼídá dadíínóhsingo deínóhkáah doo nítʼééʼ, háálá ałʼąą dineʼé nihiʼanaʼí danilíinii nihá nidahałtʼiʼ.
10 Shí áádóó shikʼisóó índa shá nidaalʼaʼí daatsʼí ałdóʼ béeso áádóó tłʼoh naadą́ą́ʼ bikʼé ínáoltąʼí nihaa dahaʼníił doo nítʼééʼ; baa nánihooshkąąh, haaʼíshąʼ ínáoltąʼí nahalyéhígíí nidadiiltʼih.
11 Díí baa nánihooshkąąh: tʼáá díí jı̨́ bidádaʼakʼeh, chʼil naʼatłʼoʼii deílʼáhígíí, áliv tsin deílʼáhígíí, dabikin índa dabibéeso, tłʼoh naadą́ą́ʼ, wáin, akʼah neeznádiin daníjaaʼígíí éí tʼááłáʼí shijaaʼ bíighahgo baa nídahididoohʼááł.
12 Nítʼééʼ ádadííniid, Baa nídahidiiʼnił, áádóó doo yikʼé nihichʼįʼ nidaʼdooléeł da; tʼáá ádííníniidígi ádadiiʼnííł. Áko náádaʼiiłniihii hágo bidííniidgo binááł ádee hadahoyééłdzííʼ, Díí bee nihootʼáanii bikʼehgo ádadiiʼnííł.
13 Shiʼééʼ ałdóʼ yígháadgo ádííniid, Diné tʼááłáʼí jinítínígo díí bee hadzoodzíʼígíí doo biʼjiilaaígíí haghandóó áádóó nijilnishdóó Diyin God kótʼéego hodooghałgo tʼáá ákohígo nijigháa doo. Nítʼééʼ áłah daazlı̨́ʼígíí tʼáá ałtso Bóhólníihii yaa dahaniihgo ádadííniid, Tʼáá ákótʼée doo. Áádóó diné yee ádee hadadeesdzíʼígíí yikʼeh ádaadzaa.
14 Nááʼáłdóʼ Júdah kéyahdi naatʼáanii áshiʼdiilyaadóó tʼáá éí aláahgo naatʼáanii Artazérksiiz nantʼáago naadiin náhááhdóó tádiindóó baʼaan naaki náháahjįʼ, naakitsʼáadah nááhaigo shí áádóó shikʼisóó bił aláahgo naatʼáanii bichʼiyąʼ tʼáadoo deiidą́ąʼ da.
15 Nidi tʼáá shítséedi naatʼáanii danilı̨́ı̨́ nítʼééʼ yę́ę diné yąąh hadeitsih nítʼééʼ, áádóó chʼiyáán índa wáin, béésh łigaii shékel wolyéii dízdiin dah hidiidloh óóltąʼgo nályééh átʼéego yitsʼą́ą́ʼ nídayiilááh nítʼééʼ; bá nidaalʼaʼí nidi diné yindantʼáá nítʼééʼ, nidi shí tʼáadoo ákósdzaa da, háálá Diyin God díínísin.
16 Tʼáá aaníí shí éí tsé yitłʼingo boʼoonishígíí tʼáá kʼéséłtʼiʼ; kéyah nidi tʼáadoo łaʼ nidahaalniiʼ da; shá nidaalʼaʼí éí tʼáá ałtso kweʼé tʼáá ahąąh deílníísh nítʼééʼ.
17 Áádóó ałdóʼ neeznádiindóó baʼaan ashdladiin Jew dineʼé áádóó naatʼáanii danilíinii índa ałʼąą dineʼé nihinaagóó kéédahatʼínígíí bitahdę́ę́ʼ łaʼ óóltąʼgo náʼáshdı̨́įhgi dah nídinibįįhgo nídaʼadı̨́ı̨́h nítʼééʼ.
18 Łaʼa jı̨́įjįʼ béégashii tʼááłáʼí áádóó dibé bitahaasdláʼígíí hastą́ągo dadooghał biniyé ninádaatsiʼgo hashtʼéédaalʼįįh nítʼééʼ, naatʼagii ałdóʼ shá hashtʼenálʼįįh nítʼééʼ, tʼáá neeznáá néílkááh bikʼeh éí wáin tʼáá ałʼąą ádaatʼéii hashtʼeʼnináʼnił nítʼééʼ; azhą́ díí tʼáá ałtso bee shiʼdoolzání nidi, naatʼáanii bichʼiyąʼ łaʼ wóshdę́ę́ʼ tʼáadoo dííniid da, háálá díí dineʼé tʼáá hojoobáʼígo deílníísh.
19 ShiDiyin God nílíinii, yáʼátʼéehgo díí dineʼé bá baa niséyáhígíí bikʼehgo yáʼátʼéehgo shaa nitsíníkees.
