Numbers 26:1-65
26 Áko nahasniiʼ yę́ędóó bikʼijįʼ Bóhólníihii éí Mózes áádóó nááʼiiłniihii Éran biyeʼ Eliyéízar yichʼįʼ haadzíiʼgo ání,
2 Ízrel dineʼé dabizhéʼé yę́ę baʼáłchíní náás ahoolchíiłii tʼáá ałtso bikʼehgo naadiindóó yówehgo béédááhaii anaʼalʼı̨́ yídaneelʼáanii tʼáá ałtso Ízrel dineʼé bitahgi yídóoł tah.
3 Áádóó Mózes índa nááʼiiłniihii Eliyéízar éí Móʼab kéyah dadzígaigi Jórdan tooh nílíní bíighahgi Jériko binaashiijí hachʼįʼ hahaasdzíiʼgo ání,
4 Diné deínółtaʼ; éí naadiindóó yówehgo béédááhaii Bóhólníihii éí Mózes índa Ízrel dineʼé yichʼįʼ yee haadzíiʼii átʼé. Ííjip kéyahdę́ę́ʼ chʼínáʼnánígíí:
5 Éí Rúben, Ízrel dineʼé alą́ąjįʼ bá yizhchínígíí: Rúben biyeʼ Héínak baʼáłchíní Héínak dineʼé danilı̨́. Rúben biyeʼ Pállu baʼáłchíní Pállu dineʼé danilı̨́.
6 Rúben biyeʼ Hézran baʼáłchíní Hézran dineʼé danilı̨́. Rúben biyeʼ Kármii baʼáłchíní Kármii dineʼé danilı̨́.
7 Díí éí Rúben dineʼé badaʼáłchíní náás ahoolchíiłii ádaatʼı̨́. Áko éí dízdiindóó baʼaan tádiindi mííldóó baʼaan tsostsʼidi neeznádiindóó baʼaan tádiingo ánéelą́ą́ʼ.
8 Áádóó Pállu biyeʼ Iiláíyab wolyé.
9 Índa Iiláíyab biyeʼké Némuʼel, Déíthan índa Abáíram dabidiʼní. Díí dah oonééł bitahdóó Déíthan áádóó Abáíram néidiinilígíí éí Kórah yiłgo Mózes áádóó Éran yighadaʼditʼáahgo Bóhólníihii yichʼįʼ nidaalteeh yę́ę ádaatʼı̨́.
10 Áko éí niʼ ąą áhoodzaago Kórah tʼáá hoł ahoʼdoolnaʼgo ádadzisdįįd, índa naakidi neeznádiindóó baʼaan ashdladiingo ázhnéelą́ąʼgo kǫʼ ahodííłkʼą́ą́ʼ. Áko éí bee ééhózinii dadzizlı̨́ı̨́ʼ.
11 Kórah baʼáłchíní tʼéiyá tʼáadoo ábiʼdisdįįd da.
12 Díí Símiyan biyeʼké badaʼáłchíní náás ahideeshchínígíí ádaatʼı̨́: Símiyan biyeʼ Némuʼel baʼáłchíní Némuʼel dineʼé danilı̨́. Símiyan biyeʼ Jéímin baʼáłchíní Jéímin dineʼé danilı̨́. Símiyan biyeʼ Jéíkin baʼáłchíní Jéíkin dineʼé danilı̨́.
13 Símiyan biyeʼ Zíírah baʼáłchíní Zíírah dineʼé danilı̨́. Símiyan biyeʼ Shéíyal baʼáłchíní Shéíyal dineʼé danilı̨́.
14 Díí éí Símiyan dineʼé badaʼáłchíní náás ahoolchíiłii ádaatʼı̨́; éí naadiin naakidi mííldóó baʼaan naakidi neeznádiingo ánéelą́ą́ʼ.
15 Díí Géed biyeʼké badaʼáłchíní náás ahideeshchínígíí ádaatʼı̨́: Géed biyeʼ Zíífan baʼáłchíní Zíífan dineʼé danilı̨́. Géed biyeʼ Hágai baʼáłchíní Hágai dineʼé danilı̨́. Géed biyeʼ Shúnai baʼáłchíní Shúnai dineʼé danilı̨́.
16 Géed biyeʼ Áznai baʼáłchíní Áznai dineʼé danilı̨́.
17 Géed biyeʼ Éírad baʼáłchíní Éírad dineʼé danilı̨́. Géed biyeʼ Aríílai baʼáłchíní Aríílai dineʼé danilı̨́.
18 Díí éí Géed dineʼé badaʼáłchíní náás ahoolchíiłii ádaatʼı̨́; éí dízdiindi mííldóó baʼaan ashdladi neeznádiingo ánéelą́ą́ʼ.
19 Díí Júdah biyeʼké Er áádóó Ónan wolyé: áko Er áádóó Ónan éí Kéínan kéyahdi jineezná.
20 Áádóó díí Júdah biyeʼké náánáłaʼ badaʼáłchíní náás ahideeshchínígíí ádaatʼı̨́: Júdah biyeʼ Shíílah baʼáłchíní Shíílah dineʼé danilı̨́. Júdah biyeʼ Píírez baʼáłchíní Píírez dineʼé danilı̨́. Júdah biyeʼ Zíírah baʼáłchíní Zíírah dineʼé danilı̨́.
21 Áádóó Píírez biyeʼké Hézran áádóó Héímal wolyé. Hézran baʼáłchíní Hézran dineʼé danilı̨́. Héímal baʼáłchíní Héímal dineʼé danilı̨́.
22 Díí éí Júdah dineʼé badaʼáłchíní náás ahoolchíiłii ádaatʼı̨́; éí tsostsʼidiindóó baʼaan hastą́ądi mííldóó baʼaan ashdladi neeznádiingo ánéelą́ą́ʼ.
23 Díí Ísakar biyeʼké badaʼáłchíní náás ahideeshchínígíí ádaatʼı̨́: Ísakar biyeʼ Tóla baʼáłchíní Tóla dineʼé danilı̨́. Ísakar biyeʼ Púwa baʼáłchíní Púwa dineʼé danilı̨́.
24 Ísakar biyeʼ Jéíshab baʼáłchíní Jéíshab dineʼé danilı̨́. Ísakar biyeʼ Shímran baʼáłchíní Shímran dineʼé danilı̨́.
25 Díí éí Ísakar dineʼé badaʼáłchíní náás ahoolchíiłii ádaatʼı̨́; éí hastą́diindóó baʼaan dı̨́įdi mííldóó baʼaan táadi neeznádiingo ánéelą́ą́ʼ.
26 Díí Zébyulan biyeʼké badaʼáłchíní náás ahideeshchínígíí ádaatʼı̨́: Zébyulan biyeʼ Sííred baʼáłchíní Sííred dineʼé danilı̨́. Zébyulan biyeʼ Íílan baʼáłchíní Íílan dineʼé danilı̨́. Zébyulan biyeʼ Jáliiyel baʼáłchíní Jáliiyel dineʼé danilı̨́.
27 Díí éí Zébyulan dineʼé badaʼáłchíní náás ahoolchíiłii ádaatʼı̨́; éí hastą́diindi mííldóó baʼaan ashdladi neeznádiingo ánéelą́ą́ʼ lá.
28 Áádóó díí Jóseph biyeʼké Manáseh áádóó Íífreiyim wolyéii badaʼáłchíní náás ahideeshchínígíí ádaatʼı̨́:
29 díí Manáseh biyeʼké badaʼáłchíní náás ahoolchíiłii ádaatʼı̨́: Manáseh biyeʼ Méíkir baʼáłchíní Méíkir dineʼé danilı̨́. Áko Méíkir éí Gíliyad yizhéʼé nilı̨́. Gíliyad baʼáłchíní Gíliyad dineʼé danilı̨́.
30 Díí Gíliyad dabiyeʼké badaʼáłchíní náás ahoolchíiłii ádaatʼı̨́: Gíliyad biyeʼ Jeyíízer baʼáłchíní Jeyíízer dineʼé danilı̨́. Gíliyad biyeʼ Híílek baʼáłchíní Híílek dineʼé danilı̨́,
31 áádóó Gíliyad biyeʼ Ásriyel baʼáłchíní Ásriyel dineʼé danilı̨́. Gíliyad biyeʼ Shííkem baʼáłchíní Shííkem dineʼé danilı̨́,
32 índa Gíliyad biyeʼ Shiimáída baʼáłchíní Shiimáída dineʼé danilı̨́. Gíliyad biyeʼ Híífer baʼáłchíní Híífer dineʼé danilı̨́.
33 Áko Híífer biyeʼ Ziilófehad tʼáadoo biyeʼké hazlı̨́įʼ da, nidi hatsiʼké tʼéí hólǫ́. Díí Ziilófehad bitsiʼké kódaolyé: Mála, Nóah, Hágla, Mílka índa Térza.
34 Díí éí Manáseh dineʼé badaʼáłchíní náás ahoolchíiłii ádaatʼı̨́; éí ashdladiindóó baʼaan naakidi mííldóó baʼaan tsostsʼidi neeznádiingo ánéelą́ą́ʼ.
35 Díí Íífreiyim biyeʼké badaʼáłchíní náás ahideeshchínígíí ádaatʼı̨́: Íífreiyim biyeʼ Shuthíílah baʼáłchíní Shuthíílah dineʼé danilı̨́. Íífreiyim biyeʼ Bííker baʼáłchíní Bííker dineʼé danilı̨́. Íífreiyim biyeʼ Téíhan baʼáłchíní Téíhan dineʼé danilı̨́.
36 Áko díí Shuthíílah biyeʼké badaʼáłchíní náás ahoolchíiłii ádaatʼı̨́: Shuthíílah biyeʼ Ííran baʼáłchíní Ííran dineʼé danilı̨́.
37 Díí éí Íífreiyim biyeʼké badaʼáłchíní náás ahoolchíiłii ádaatʼı̨́; éí tádiindóó baʼaan naakidi mííldóó baʼaan ashdladi neeznádiingo ánéelą́ą́ʼ. Áko díí éí Jóseph biyeʼké badaʼáłchíní náás ahideeshchínígíí ádaatʼı̨́.
38 Díí Bénjamin biyeʼké badaʼáłchíní náás ahideeshchínígíí ádaatʼı̨́: Bénjamin biyeʼ Bííla baʼáłchíní Bííla dineʼé danilı̨́. Bénjamin biyeʼ Áshbel baʼáłchíní Áshbel dineʼé danilı̨́. Bénjamin biyeʼ Aháíram baʼáłchíní Aháíram dineʼé danilı̨́.
39 Bénjamin biyeʼ Shúfam baʼáłchíní Shúfam dineʼé danilı̨́. Bénjamin biyeʼ Húfam baʼáłchíní Húfam dineʼé danilı̨́.
40 Áádóó Bííla biyeʼké Ard áádóó Néíyaman wolyé. Bííla biyeʼ Ard baʼáłchíní Ard dineʼé danilı̨́. Bííla biyeʼ Néíyaman baʼáłchíní Néíyaman dineʼé danilı̨́.
41 Díí éí Bénjamin dineʼé badaʼáłchíní náás ahoolchíiłii ádaatʼı̨́; éí dízdiindóó baʼaan ashdladi mííldóó baʼaan hastą́ądi neeznádiingo ánéelą́ą́ʼ.
42 Díí éí Dan biyeʼké badaʼáłchíní náás ahideeshchínígíí ádaatʼı̨́: Dan biyeʼ Shúham baʼáłchíní Shúham dineʼé danilı̨́. Díí éí Dan badaʼáłchíní náás ahoolchíiłii ádaatʼı̨́.
43 Shúham dineʼé badaʼáłchíní tʼáá ałtso hastą́diindóó baʼaan dı̨́įdi mííldóó baʼaan dı̨́įdi neeznádiingo ánéelą́ą́ʼ.
44 Díí Ásher biyeʼké badaʼáłchíní náás ahideeshchínígíí ádaatʼı̨́: Ásher biyeʼ Jímna baʼáłchíní Jímna dineʼé danilı̨́. Ásher biyeʼ Jésowai baʼáłchíní Jésowai dineʼé danilı̨́. Ásher biyeʼ Biiráíyah baʼáłchíní Biiráíyah dineʼé danilı̨́.
45 Biiráíyah biyeʼké łaʼ: Biiráíyah biyeʼ Hííber baʼáłchíní Hííber dineʼé danilı̨́. Biiráíyah biyeʼ Málkiyel baʼáłchíní Málkiyel dineʼé danilı̨́.
46 Ásher bitsiʼ éí Sárah wolyé.
47 Díí éí Ásher dineʼé badaʼáłchíní náás ahoolchíiłii ádaatʼı̨́; éí ashdladiindóó baʼaan táadi mííldóó baʼaan dı̨́įdi neeznádiingo ánéelą́ą́ʼ.
48 Díí Náftalai biyeʼké badaʼáłchíní náás ahideeshchínígíí ádaatʼı̨́: Náftalai biyeʼ Jáhziyel baʼáłchíní Jáhziyel dineʼé danilı̨́. Náftalai biyeʼ Gúnai baʼáłchíní Gúnai dineʼé danilı̨́.
49 Náftalai biyeʼ Jíízer baʼáłchíní Jíízer dineʼé danilı̨́. Náftalai biyeʼ Shíllem baʼáłchíní Shíllem dineʼé danilı̨́.
50 Díí éí Náftalai dineʼé badaʼáłchíní náás ahoolchíiłii ádaatʼı̨́; éí dízdiindóó baʼaan ashdladi mííldóó baʼaan dı̨́įdi neeznádiingo ánéelą́ą́ʼ.
51 Díí éí Ízrel dineʼé dabiʼdééltaʼígíí ádaatʼı̨́: éí hastą́ądi neeznádiindóó baʼaan tʼááłáhídi mííldóó baʼaan tsostsʼidi neeznádiindóó baʼaan tádiingo ánéelą́ą́ʼ.
Yááʼiiltʼeʼ bikʼehgo kéyah ahádaasdzo
52 Bóhólníihii éí Mózes ííłní,
53 Díí daházhiʼígíí bikʼehgo kéyah daahó dooleełígíí há ahádadíízoh.
54 Dabidineʼé ląʼí daaltʼéhígíí éí kéyah bí dadooleełii dahótsaago bitaa dadidííʼaał, áádóó dabidineʼé ádaałchʼı̨́dígíí éí kéyah bí dadooleełii ádahoołtsʼísígo bitaa dadidííʼaał. Áko dabidineʼé tʼáá ałtso ádanéelą́ʼígíí dabikʼehgo kéyah daabí dadooleełígíí bitaa dadidííʼaał.
55 Nidi kéyah éí yááʼiiltʼeʼ bikʼehgo ahádahidoodzoh; dahazhéʼé yę́ę bitsʼą́ą́dóó hodineʼé dabízhiʼígíí bikʼehgo daahóóʼ dadooleeł.
56 Áko yááʼiiltʼeʼ bikʼehgo kéyah daahóóʼ dadooleełii dajiląʼígíí áádóó ádajíłchʼı̨́dígíí há ałtsʼádahidíízoh.
Líívai dineʼé
57 Áádóó díí Líívai dineʼé badaʼáłchíní náás ahideeshchínígíí dabiʼdééltaʼ: Líívai biyeʼ Gérshan baʼáłchíní Gérshan dineʼé danilı̨́. Líívai biyeʼ Kóhath baʼáłchíní Kóhath dineʼé danilı̨́. Líívai biyeʼ Miirárai baʼáłchíní Miirárai dineʼé danilı̨́.
58 Díí ałdóʼ Líívai dineʼé badaʼáłchíní náás ahoolchíiłii ádaatʼı̨́: Líbnai dineʼé, Hííbran dineʼé, Málai dineʼé, Múshai dineʼé índa Kórah dineʼé ádaatʼı̨́. Áádóó Kóhath éí Ámram bá yizhchı̨́.
59 Áko Ámram beʼasdzą́ą́ éí Jákebed wolyé; éí Líívai bitsiʼ, áko éí Ííjip kéyahdi hamá Líívai yá hashchı̨́, áko Éran áádóó Mózes índa bilah Míriyam éí Ámram bá nijiishchı̨́.
60 Áádóó Néídab, Abáíhu, Eliyéízar índa Íthamar éí Éran bá niheezhchı̨́.
61 Nidi Bóhólníihii binááł Néídab áádóó Abáíhu éí kǫʼ doo dílzingóó náádziisniiʼígíí biniinaa tʼáá ákǫ́ǫ́ dzineezná.
62 Díí Líívai dineʼé dayééltaʼígíí éí naadiin táadi mííl; éí tʼáá átʼé ashiiké tʼááłáʼí bee nídadeezidóó yówehgoígíí; éí doo Ízrel dineʼé bił dabiʼdééltaʼ da, háálá Ízrel dineʼé bitahgi kéyah daahóóʼ dadooleełii doo łaʼ haa dadeestʼą́ą da.
Kéíleb áádóó Jáshowa tʼéiyá chʼééʼáázh
63 Díí dahoʼdééltaʼígíí éí Móʼab kéyah dzígai Jórdan tooh nílíní bíighahgi Jériko binaashiijí Ízrel dineʼé dajílíinii Mózes áádóó nááʼiiłniihii Eliyéízar hóółtaʼ.
64 Áko Mózes áádóó nááʼiiłniihii Éran éí Dził Sáínai honoojíigi Ízrel dineʼé yiyííłtaʼ yę́ędą́ą́ʼ éí díí dayééltaʼígíí bitahdóó doo łaʼ hoł daʼééltaʼ da nítʼééʼ.
65 Háálá éí Bóhólníihii hainítʼı̨́įgo ádííniid, Tʼáá aaníí honoojítahgi dazhdínóonééł. Áko íídą́ą́ʼ dinéhígíí doo łaʼ chʼééyáa da; tʼáá hazhóʼó Jiifáneh biyeʼ Kéíleb áádóó Nan biyeʼ Jáshowa tʼéiyá chʼééʼáázh.
