Numbers 29:1-40
29 Áádóó tsostsʼid nídízídígíí binih łaʼa jı̨́ı̨́ góneʼ dahodíínóhsingo áłah náhdleeh doo, índa doo nidaołnish da doo. Éí bijı̨́ dilní bee naʼaʼné nihá néiitʼaah doo.
2 Áko náádaʼayołniihgo didlidgo nááhániihii Bóhólníihii bichʼįʼ łikání halchingo náádahidoołnihígíí éí dóola yázhí tʼááłáʼígo, deenástsʼaaʼ tʼááłáʼígo índa dibé yázhí dabikąʼii tsostsʼidgo łaʼ béédááhaii hadaałtʼéii,
3 áádóó akʼáán nááhániihii átʼéego ómer bee íʼneelʼąąhí bee akʼáán táadi haaką́ągo akʼah bił ałtahgo dóola yázhí bóóltąʼgo, akʼáán naakidi haaką́ągo deenástsʼaaʼ bóóltąʼgo,
4 índa akʼáán tʼááłáhídi hahakaahgo dibé yázhí tsostsʼidígíí bikʼeh nítı̨́įgo bił náádahołniih doo,
5 áádóó tłʼízíchǫǫh tʼááłáʼígo éí ádił niʼiidzííhjí nááhániihii átʼéego éí bee nihá kʼééhoodǫǫł doo.
6 Díí éí dah néitı̨́įhgo didlidgo nááhániihii índa akʼáán nááhániihii bóóltąʼgo áádóó tʼáá ákwíí jı̨́ didlidgo nááhániihii éí akʼáán nááhániihii áádóó yanáadziʼgo nááhániihii bił ahóóltąʼgo ádaʼałʼínígíí bikʼehgo Bóhólníihii bichʼįʼ didlidgo łikání halchingo náádahołniih doo.
7 Áádóó tsostsʼid nídízídígíí binih neeznáá jı̨́ı̨́ góneʼ dahodíínóhsingo áłah náhdleeh, áádóó doo adą́ą́góó nihiiʼ naazíinii dahodísingo sohodizin áńʼdaałʼįįh doo, índa ákóneʼ tʼáá haʼátʼéegoda doo nidoołnish da.
8 Nidi náádaʼayołniihgo didlidgo nááhániihii Bóhólníihii bichʼįʼ didlidgo łikání halchingo náádahidoołnihii éí náádahołniih dooígíí, éí dóola yázhí tʼááłáʼígo, deenástsʼaaʼ tʼááłáʼígo índa dibé yázhí tsostsʼidgo dabikąʼii łaʼ béédááhaii hadaałtʼéii,
9 áádóó akʼáán nááhániihii átʼéego ómer bee íʼneelʼąąhí bee akʼáán táadi haaką́ągo akʼah bił ałtahgo dóola yázhí bóóltąʼgo, akʼáán naakidi haaką́ągo deenástsʼaaʼ bóóltąʼgo,
10 índa akʼáán tʼááłáhídi hahakaahgo dibé yázhí tsostsʼidígíí bikʼeh nítı̨́įgo bił náádahołniih doo,
11 áko tłʼízíchǫǫh tʼááłáʼígo ádił niʼiidzííhjí nááhániihii átʼéego áádóó ałdóʼ ádił niʼiidzííhjí nááhániihii bee á kʼééhoodǫǫłii łaʼ ínáánáoltąʼgo áádóó nááʼáłdóʼ áłahjįʼ didlidgo nááhániihii, éí akʼáán nááhániihii áádóó yanáadziʼgo nááhániihii bił ahóóltąʼgo náádahołniih doo.
12 Tsostsʼid nídízídígíí binih ashdlaʼáadah jı̨́ı̨́ góneʼ dahodíínóhsingo áłah náhdleehgo, ákóneʼ tsʼídá doo nidoołnish da, áko Bóhólníihii bichʼįʼ tsostsʼid jı̨́ dahodíínóhsingo áłah náhdleeh doo.
13 Áko didlidgo nááhániihii átʼéego éí dóola yázhí tááʼtsʼáadahgo, deenástsʼaaʼ naakigo, dibé yázhí dı̨́ı̨́ʼtsʼáadahgo dabikąʼii łaʼ béédááhaii hadaałtʼéii, díí Bóhólníihii bichʼįʼ didlidgo łikání halchingo náádahołniih doo.
14 Áádóó akʼáán nááhániihii átʼéego ómer bee íʼneelʼąąhí bee akʼáán táadi haaką́ągo akʼah bił ałtahgo dóola yázhí tááʼtsʼáadahígíí bikʼeh nítı̨́įgo áádóó naakidi haaką́ągo deenástsʼaaʼ łaʼ bóóltąʼgo bił náádahołniih doo,
15 índa akʼáán tʼááłáhídi hahakaahgo dibé yázhí dı̨́ı̨́ʼtsʼáadahígíí bikʼeh nítı̨́įgo bił náádahołniih doo,
16 áádóó tłʼízíchǫǫh tʼááłáʼígo ádił niʼiidzííhjí nááhániihii átʼéego áłahjįʼ didlidgo nááhániihii éí akʼáán nááhániihii áádóó yanáadziʼgo nááhániihii bił ahóóltąʼgo náádahołniih doo.
17 Naaki yiłkaah bijı̨́ dóola yázhí naakitsʼáadahgo, deenástsʼaaʼ naakigo índa dibé yázhí dı̨́ı̨́ʼtsʼáadahgo dabikąʼii łaʼ béédááhaii hadaałtʼéii náádahołniih doo,
18 áádóó akʼáán nááhániihii índa yanáadziʼgo nááhániihii átʼéego dóola yázhí áádóó deenástsʼaaʼ índa dibé yázhí ánéeltʼeʼígíí índa ádaʼałʼínígíí bikʼehgo bił náádahołniih doo,
19 índa tłʼízíchǫǫh tʼááłáʼígo éí ádił niʼiidzííhjí nááhániihii átʼéego, éí áłahjįʼ didlidgo nááhániihii áádóó akʼáán nááhániihii índa yanáadziʼgo nááhániihii bił ahóóltąʼgo náádahołniih doo.
20 Áádóó tááʼ yiłkaah bijı̨́ dóola yázhí łaʼtsʼáadahgo, deenástsʼaaʼ naakigo índa dibé yázhí dı̨́ı̨́ʼtsʼáadahgo dabikąʼii łaʼ béédááhaii hadaałtʼéii náádahołniih doo,
21 áádóó akʼáán nááhániihii índa yanáadziʼgo nááhániihii átʼéego dóola yázhí áádóó deenástsʼaaʼ índa dibé yázhí ánéeltʼeʼígíí áádóó ádaʼałʼínígíí bikʼehgo bił náádahołniih doo,
22 áádóó tłʼízíchǫǫh tʼááłáʼígo éí ádił niʼiidzííhjí nááhániihii átʼéego áłahjįʼ didlidgo nááhániihii áádóó akʼáán nááhániihii índa yanáadziʼgo nááhániihii óóltąʼgo náádahołniih doo.
23 Índa dı̨́ı̨́ʼ yiłkaah bijı̨́ dóola yázhí neeznáá, deenástsʼaaʼ naaki índa dibé yázhí dı̨́ı̨́ʼtsʼáadahgo dabikąʼii łaʼ béédááhaii hadaałtʼéii náádahołniih doo,
24 áádóó akʼáán nááhániihii áádóó yanáadziʼgo nááhániihii átʼéego dóola yázhí áádóó deenástsʼaaʼ índa dibé yázhí ánéeltʼeʼígíí áádóó ádaʼałʼínígíí bikʼehgo bił náádahołniih doo,
25 áádóó tłʼízíchǫǫh tʼááłáʼígo ádił niʼiidzííhjí nááhániihii átʼéego áłahjįʼ didlidgo nááhániihii áádóó akʼáán nááhániihii índa yanáadziʼgo nááhániihii óóltąʼgo náádahołniih doo.
26 Índa ashdlaʼ yiłkaah bijı̨́ dóola yázhí náhástʼéigo, deenástsʼaaʼ naakigo índa dibé yázhí dı̨́ı̨́ʼtsʼáadahgo dabikąʼii łaʼ béédááhaii hadaałtʼéii náádahołniih doo,
27 áádóó akʼáán nááhániihii áádóó yanáadziʼgo nááhániihii átʼéego dóola yázhí áádóó deenástsʼaaʼ índa dibé yázhí ánéeltʼeʼígíí áádóó ádaʼałʼínígíí bikʼehgo bił náádahołniih doo,
28 áádóó tłʼízíchǫǫh tʼááłáʼígo ádił niʼiidzííhjí nááhániihii átʼéego áłahjįʼ didlidgo nááhániihii áádóó akʼáán nááhániihii índa yanáadziʼgo nááhániihii óóltąʼgo náádahołniih doo.
29 Índa hastą́ą́h yiłkaah bijı̨́ dóola yázhí tseebíigo, deenástsʼaaʼ naakigo índa dibé yázhí dı̨́ı̨́ʼtsʼáadahgo dabikąʼii łaʼ béédááhaii hadaałtʼéii náádahołniih doo,
30 áádóó akʼáán nááhániihii áádóó yanáadziʼgo nááhániihii átʼéego dóola yázhí áádóó deenástsʼaaʼ índa dibé yázhí ánéeltʼeʼígíí áádóó ádaʼałʼínígíí bikʼehgo bił náádahołniih doo,
31 áádóó tłʼízíchǫǫh tʼááłáʼígo éí ádił niʼiidzííhjí nááhániihii átʼéego áłahjįʼ didlidgo nááhániihii áádóó akʼáán nááhániihii índa yanáadziʼgo nááhániihii óóltąʼgo náádahołniih doo.
32 Tsostsʼid yiłkaah bijı̨́ dóola yázhí tsostsʼidgo, deenástsʼaaʼ naakigo índa dibé yázhí dı̨́ı̨́ʼtsʼáadahgo dabikąʼii łaʼ béédááhaii hadaałtʼéii náádahołniih doo,
33 éí akʼáán nááhániihii áádóó yanáadziʼgo nááhániihii átʼéego dóola yázhí áádóó deenástsʼaaʼ índa dibé yázhí ánéeltʼeʼígíí áádóó ádaʼałʼínígíí bikʼehgo bił náádahołniih doo,
34 áádóó tłʼízíchǫǫh tʼááłáʼígo ádił niʼiidzííhjí nááhániihii átʼéego áłahjįʼ didlidgo nááhániihii áádóó akʼáán nááhániihii índa yanáadziʼgo nááhániihii óóltąʼgo náádahołniih doo.
35 Tseebíí yiłkaah bijı̨́ı̨́ góneʼ dahodíínóhsingo áłah náhdleeh; ákóneʼ doo nidoołnish da,
36 nidi náádaʼayołniihgo didlidgo nááhániihii, éí náádahidoonihii didlidgo łikání halchingo Bóhólníihii bichʼįʼ náádahołniih dooígíí dóola yázhí tʼááłáʼígo, deenástsʼaaʼ tʼááłáʼígo índa dibé yázhí tsostsʼidgo dabikąʼii łaʼ béédááhaii hadaałtʼéii,
37 áádóó akʼáán nááhániihii áádóó yanáadziʼgo nááhániihii átʼéego dóola yázhí áádóó deenástsʼaaʼ índa dibé yázhí ánéeltʼeʼígíí áádóó ádaʼałʼínígíí bikʼehgo bił náádahołniih doo,
38 áádóó tłʼízíchǫǫh tʼááłáʼígo ádił niʼiidzííhjí nááhániihii átʼéego áłahjįʼ didlidgo nááhániihii áádóó akʼáán nááhániihii índa yanáadziʼgo nááhániihii óóltąʼgo náádahołniih doo.
39 Díí éí dahodíínóhsingo áłah náhdleeh bee nidahootʼaah góneʼ Bóhólníihii bichʼįʼ náádahołniih dooleeł, éí ádee haohdzíiʼgo nááhidoołnihii áádóó tʼáá nihí ádeinohsingo nááhidoołnihii áádóó didlidgo nááhidoołnihii áádóó akʼáán nááhidoołnihii áádóó yanáadziʼgo nááhidoołnihii índa hózhǫ́ǫ́jí nááhidoołnihii óóltąʼgo náádahołniih doo.
40 Áko Mózes éí Ízrel dineʼé bił hojilneʼgo Bóhólníihii yee áhodííniidígíí tʼáá átʼé baa hojoolneʼ.
