Numbers 3:1-51
3 Éran áádóó Mózes bitsʼą́ą́dóó yichíiłii kódaolyé; Dził Sáínaigi Bóhólníihii éí Mózes yił ałchʼįʼ haadzííʼ yę́ędą́ą́ʼ nidaakai.
2 Éran biyeʼké kódaolyé: Néídab éí alą́ąjįʼ yizhchı̨́, áádóó Abáíhu, áádóó Eliyéízer índa Íthamar.
3 Díí Éran hayeʼké kódaolyé: éí náádaʼiiłniihii akʼah bikʼi yadaadziidgo bee dabiʼdoolzı̨́įʼii, nidaalʼaʼgo nááʼiiłniihii danilı̨́į doo.
4 Nidi Néídab áádóó Abáíhu éí Bóhólníihii binááł dzineezná; jó, Bóhólníihii binááł kǫʼ doo dílzinii náájiisniiʼígíí Dził Sáínai honoojíidi ákójíítʼįįd; éí haʼáłchíní doo hólǫ́ǫ da nítʼééʼ, áádóó Eliyéízar índa Íthamar naalʼaʼgo bizhéʼé Éran binááł nááʼiiłniihii nilı̨́ı̨́ nítʼééʼ.
5 Áko Bóhólníihii éí Mózes yichʼįʼ haadzíiʼgo ání,
6 Líívai dineʼé áháníjįʼ niníʼéésh; éí nááʼiiłniihii Éran yá nidaalʼaʼ doo biniyé baa níʼéésh.
7 Áádóó bí índa dah oonééł tʼáá ałtso bá níbaal biiʼ dahozdísinii siʼánígi honaanish ádadzósin doo.
8 Áko níbaal biiʼ dahozdísingi biiʼ chodaoʼíinii tʼáá átʼé baa ádahojilyą́ą doo áádóó Ízrel dineʼé bá honaanish ádadzósingo níbaal biiʼ hodílzinii siʼánígi nidaalʼaʼ doo.
9 Kótʼéego Líívai dineʼé éí Éran índa biyeʼké baa díínił; éí Ízrel dineʼé bitsʼą́ą́dóó tʼáá naazı̨́ı̨́ nítʼééʼ baa haʼnííł.
10 Áádóó Éran índa biyeʼké atsʼádíínił, áko éí nááʼiiłniihii binaanishígíí hondaanish doo, nidi doo nááʼiiłniihii nilíinii áajįʼ eelwodígíí bidiʼyoolyééł.
11 Áádóó Bóhólníihii éí Mózes yichʼįʼ haadzíiʼgo ání,
12 Jó, shí Ízrel dineʼé bitahgóó alą́ąjįʼ nidahaazhchínígíí tʼáá ałtso bitsáskʼehgi Líívai dineʼé nídiinil; éí bąą Líívai dineʼé éí shí dooleeł,
13 háálá alą́ąjįʼ daazhchíinii tʼáá ałtso shí; Ííjip kéyahdi alą́ąjįʼ daazhchíinii tʼáá ałtso niséłtseed bijı̨́ı̨́dą́ą́ʼ éí Ízrel dineʼé bitahgóó alą́ąjįʼ daazhchíinii tʼáá ałtso éí diné índa naaldlooshii ádá dinisingo atsʼánínil; éí daashííʼ dooleeł; jó, shí Bóhólníihii nishłı̨́.
14 Áko Bóhólníihii éí Mózes yichʼįʼ haadzíiʼgo Sáínai honoojíidi áháłní,
15 Líívai dineʼé yíníłtaʼ; éí dabizhéʼé yę́ę baʼáłchíní ahoolchíiłii áádóó ahiiʼ hááʼahoolchíiłii bikʼehgo ashiiké tʼááłáʼí bee nídadeezidóó yówehgo béédááhaii tʼáá ałtso deídííłtah.
16 Áko Mózes éí diné jííłtaʼ; Bóhólníihii saad yee haadzíʼígíí biʼjiilaa; jó, tʼáá ákózhdoolíiłgo hachʼįʼ bee haʼoodzííʼ.
17 Áko díí Líívai biyeʼké kódaolyé: Gérshan, Kóhath índa Miirárai.
18 Díí Gérshan biyeʼké baʼáłchíní ahoolchíiłii bikʼehgo kóolyé: Líbnai áádóó Shímiyai.
19 Áádóó díí Kóhath biyeʼké badaʼáłchíní daʼahílchíihii bikʼehgo kódaolyé: Ámram, Ízxar, Hííbran índa Azáíyel.
20 Áádóó Miirárai biyeʼké baʼáłchíní ahoolchíiłii bikʼehgo kóolyé: Málai índa Múshai. Díí éí Líívai dineʼé dabizhéʼé yę́ę badaʼáłchíní daʼahílchíihii ádaatʼı̨́.
21 Gérshan bitsʼą́ą́dóó Líbnai dineʼé áádóó Shímiyai dineʼé ahidideeshchı̨́; díí Gérshan dineʼé badaʼáłchíní ádaatʼı̨́.
22 Díí éí bitsʼą́ą́dóó ashiiké dayééltaʼígíí tʼáá ałtso tʼááłáʼí bee nídadeezidóó yówehgo béédááhaii dabiʼdééltaʼgo tsostsʼidi mííldóó baʼaan ashdladi neeznádiingo ánéelą́ą́ʼ.
23 Gérshan dineʼé badaʼáłchíní éí níbaal biiʼ hodílzinii bineʼjí eʼeʼaahdę́ęʼgo ninádaaʼnéeh doo.
24 Áko Gérshan dineʼé nilíinii bizhéʼé éí baʼáłchíní yá aląąjįʼ sizínígíí Léíyel biyeʼ Iiláíyasaf wolyé.
25 Áko Gérshan biyeʼké daʼahílchíihii éí níbaal biiʼ dahozdísinii tʼáá éí níbaal áádóó bikʼí náltihígíí índa éí níbaal bichʼéʼétiingi dáádiníbaalígíí yaa ádahalyą́ą doo,
26 áádóó níbaal biiʼ hodílzinii índa bikááʼ nááʼiiniihí binaa hazʼánígi daníbaalígíí índa bichʼéʼétiingi dáádiníbaalígíí áádóó bitłʼóolda índa binaʼanishgi tʼáá átʼé yaa ádahalyą́ą doo.
27 Áádóó Kóhath bitsʼą́ą́dóó Ámram dineʼé, Ízxar dineʼé áádóó Hííbran dineʼé índa Azáíyel dineʼé ahidideeshchı̨́; díí Kóhath dineʼé badaʼáłchíní ádaatʼı̨́.
28 Díí éí bitsʼą́ą́dóó ashiiké dayééltaʼígíí tʼáá ałtso tʼááłáʼí bee nídadeezidóó yówehgo béédááhaii dabiʼdééltaʼgo tseebíidi mííldóó baʼaan hastą́ądi neeznádiingo ánéelą́ą́ʼ; éí hodiyingo hazʼą́ą́ góneʼ nidaalnish doo.
29 Kóhath baʼáłchíní daʼahílchíihii éí níbaal biiʼ hodílzinii shádiʼááhjígo ninádaaʼnéeh doo.
30 Kóhath dineʼé nilíinii éí bizhéʼé baʼáłchíní daʼahílchíihii yá aląąjįʼ sizínígíí Azáíyel biyeʼ Iilízafan wolyé.
31 Áko tsitsʼaaʼ dílzinii, bikááʼ adání, bee hoolʼiní bá yadaaʼáhí índa naakigo bikááʼ nááʼiiniihígíí áádóó hodiyingo hazʼą́ą́ góneʼ chodaoʼíinii náádaʼiiłniihii chonídayoolʼįįhígíí, áádóó ataʼnaníbaalígíí índa tʼáá átʼé ákwii bindaʼanishii bindajilʼaʼ doo.
32 Áko nááʼiiłniihii Éran biyeʼ Eliyéízar éí Líívai dineʼé aląąjįʼ naazíinii yinanitʼaʼí nilı̨́ áádóó hodiyingo hazʼą́ą́ góneʼ yaa ádahalyánígíí bee hóhólníih doo.
33 Áádóó Miirárai bitsʼą́ą́dóó Málai dineʼé índa Múshai dineʼé ahidideeshchı̨́; díí Miirárai dineʼé badaʼáłchíní ádaatʼı̨́.
34 Éí bitsʼą́ą́dóó ashiiké dayééltaʼígíí tʼáá ałtso tʼááłáʼí bee nídadeezidóó yówehgo béédááhaii dabiʼdééltaʼgo hastą́ądi mííldóó baʼaan naakidi neeznádiingo ánéelą́ą́ʼ.
35 Áádóó Miirárai dineʼé nilíinii bizhéʼé éí baʼáłchíní daʼahílchíihii yá aląąjįʼ sizínígíí Ábiheil biyeʼ Zúriyel wolyé; díí éí níbaal biiʼ hodílzinii náhookǫsjígo ninádaaʼnéeh doo.
36 Áko Miirárai baʼáłchíní ahoolchíiłii éí níbaal biiʼ hodílzinii bá tsin neheeshjííʼ ahééneelkálígíí áádóó tsin níyizii naaniigo bąąh daníʼáhígíí áádóó bíyah daniiʼáii áádóó bitłʼááh naaznilgo tʼááłáhíjí biih dahasdzánígíí áádóó bił chodaoʼíinii índa ákwii bininádaʼanishígíí tʼáá átʼé bee hódahoʼdoosʼníiʼgo bindajilʼaʼ doo.
37 Índa binaa hazʼánígíí bá ííyah daniiʼáii áádóó bitłʼááh naaznilgo tʼááłáhíjí biih dahasdzánígíí áádóó bá anídaalkałígíí índa dabitłʼóolda bee hódahoʼdoosʼníiʼgo baa ádahojilyą́ą doo.
38 Nidi níbaal biiʼ hodílzinii bidááhdóó haʼaʼaahjigo ninádaaʼnéhígíí tʼáá níbaal biiʼ dahozdísinii siʼánígíí hááʼátʼááh bichʼijígo éí Mózes áádóó Éran índa biyeʼké ninádaaʼnéeh doo; éí hodiyingo hazʼą́ą́ góneʼ honaanish ádadzósinii Ízrel dineʼé bá baa ádahojilyą́ą doo; doo nááʼiiłniihii nilíinii áajįʼ eelwodígíí bidiʼyoolyééł.
39 Áko Líívai dineʼé dayééltaʼígíí éí Mózes áádóó Éran hachʼįʼ Bóhólníihii yee haadzíʼígíí bikʼehgo haʼáłchíní ahiiʼ hááʼahiyoolchíiłii tʼáá ałtso, ashiiké tʼáá ałtso tʼááłáʼí bee nídadeezidóó yówehgo béédááhaii dabiʼdééltaʼgo naadiin naakidi míilgo ánéelą́ą́ʼ.
Líívai dineʼé áádóó alą́ąjįʼ daazhchíinii bikʼé nidoolyéełii
40 Áádóó Bóhólníihii éí Mózes ííłní, Ízrel dineʼé bitahgóó ashiiké alą́ąjįʼ nidahaazhchíinii tʼáá ałtso tʼááłáʼí bee nídadeezidóó yówehgo béédááhaii yíníłtaʼ, áádóó dabízhiʼ ałkééʼ dadíízoh.
41 Áádóó Ízrel dineʼé bitahgóó alą́ąjįʼ nidahaazhchíinii tʼáá ałtso bitsákʼehgi Líívai dineʼé shá nídidíínił (jó, shí Bóhólníihii nishłı̨́) áádóó Ízrel dineʼé dabilı̨́ı̨́ʼ bitahdóó átsé daazhchíinii bitsáskʼehgi Líívai dineʼé dabilı̨́ı̨́ʼ shá nídidíínił.
42 Ákótʼéego Mózes éí Bóhólníihii hachʼįʼ yee haadzíʼígi átʼéego Ízrel dineʼé alą́ąjįʼ nidahaazhchíinii tʼáá ałtso jííłtaʼ.
43 Áko ashiiké alą́ąjįʼ nidahaazhchíinii tʼáá ałtso tʼááłáʼí bee nídadeezidóó yówehgo béédááhaii yééltaʼgo naadiin naakidi mííldóó baʼaan naakidi neeznádiindóó baʼaan tsostsʼidiindóó baʼaan táaʼgo ánéelą́ą́ʼ.
44 Áádóó Bóhólníihii éí Mózes yichʼįʼ haadzíiʼgo ání,
45 Ízrel dineʼé bitahgóó alą́ąjįʼ nidahaazhchíinii tʼáá ałtso bitsáskʼehgi Líívai dineʼé shá nídidíínił, índa dabilı̨́ı̨́ʼ bitsáskʼehgi éí Líívai dineʼé dabilı̨́ı̨́ʼ shá nídidíínił; Líívai dineʼé éí shííʼ dooleeł; jó, shí Bóhólníihii nishłı̨́.
46 Áádóó Ízrel dineʼé alą́ąjįʼ nidahaazhchíinii bikʼé ninádadiʼyoolyeełígíí éí naakidi neeznádiindóó baʼaan tsostsʼidiindóó baʼaan tááʼdóó yówehjįʼ iʼooltaʼígíí bee Líívai dineʼé yilááh ánéelą́ą́ʼ.
47 Éí shékel* wolyéii hodiyingo hazʼą́ą́ góneʼ chooʼíinii bikʼehgo (éí gíírah wolyéii naadiin bíighahgo) ashdlaʼígíí éí bikʼeh níʼą́ągo nídidíínił,
48 áko béeso nídidííniłgo éí bee Líívai dineʼé yilááh ánéelą́ąʼgo dabiʼdééltaʼígíí bikʼé niʼdoolyéełgo Éran áádóó dabiyeʼké baa díínił.
49 Kótʼéego Líívai dineʼé bee Ízrel dineʼé náádabiʼdiizniiʼii baʼaan dzidínéezdeeʼii béeso hakʼé naalyáhígíí Mózes yaa deiznil.
50 Ízrel dineʼé alą́ąjįʼ nidahaazhchíinii bitsʼą́ą́dóó béeso néidiinilígíí éí shékel tʼááłáhídi mííldóó baʼaan táadi neeznádiindóó baʼaan hastą́diindóó baʼaan ashdlaʼgo hodiyingo hazʼą́ą́ góneʼ shékel chooʼíinii néidiinil.
51 Áko Mózes éí béeso bee náádahoʼdiizniiʼígíí néidiinilgo Éran áádóó biyeʼké yeinínil; Bóhólníihii éí Mózes yichʼįʼ saad yee haadzíʼígíí yiʼiilaa.
Footnotes
^ Tádiindóó baʼaan naaki shékel wolyéii éí tʼááłáʼí dah hidiidloh.
