Numbers 36:1-13
36 Jóseph dineʼé náás ahoolchíiłii bitsʼą́ą́dóó Manáseh biyeʼ Méíkir, éí biyeʼ Gíliyad ahiiʼ hááʼahiyoolchíiłii dabizhéʼé á naazíinii éí Mózes áádóó Ízrel dineʼé dabizhéʼé á naazíinii yaa yíkai,
2 áko ádaaní, Shinanitʼaʼí nílíinii, kéyah ííʼ dooígíí Bóhólníihii nichʼįʼ yee ádee hadoodzíiʼgo yááʼiiltʼeʼ bikʼehgo Ízrel dineʼé kéyah baa hidíʼaah, áádóó bóhonishʼníihii, Bóhólníihii binahjįʼ háínídzíiʼgo kéyah ííʼ dooleełii nihikʼis Ziilófehad bitsiʼké łaʼ baa hidíʼaah.
3 Nidi bitsiʼké éí náánáłaʼ Ízrel dineʼé danilíinii dabiyeʼké łaʼ yił ahá daʼazyehgo danihizhéʼé yę́ę bikédaayah nihitsʼą́ą́ʼ baa dahiditʼaah doo, áádóó yił ahá daʼazyehígíí bikéyah bił ahídeiltsoodgo baa dahiditʼaah doo, áko nihikéyah nihighadahididootʼááł.
4 Áko Ízrel dineʼé bá Júbilii náhááh baa hoolzhiizhgo sáanii dabikéyah diné yił ahá daʼazyehígíí bił baa dahiditʼaah doo, áko danihizhéʼé yę́ę bikédaayah nihighadahididootʼááł.
5 Áko Bóhólníihii bizaakʼehgo Mózes éí Ízrel dineʼé bichʼįʼ hadzoodzíiʼgo ájíní, Jóseph dineʼé badaʼáłchíní náás ahoolchíiłii yáʼátʼéehgo hadaasdzííʼ.
6 Díí Bóhólníihii yee haadzííʼ: Ziilófehad bitsiʼké tʼáá bí bíniʼ bidaałtʼéii yił ahá daʼdooyehgo bídadéétʼiʼ, ákondi dabizhéʼé yę́ę bidineʼé biyeʼké tʼéiyá bił ahá daʼjigéeh doo.
7 Áko Ízrel dineʼé bikédaayahígíí éí náánáłaʼ Ízrel dineʼé danilíinii doo yił ałtah nídeiditʼáah da doo; jó, Ízrel dineʼé tʼáá ádzíłtso dahazhéʼé yę́ę bikéyah tʼáá dajótąʼ doo.
8 Áádóó atsiʼké jílíinii éí kéyah łaʼ hwee hólǫ́ǫgo hazhéʼé yę́ę bidineʼé biyeʼké łaʼ beʼasdzą́ą́ jidooleeł, áko Ízrel dineʼé dajílíinii dahazhéʼé yę́ę bikédaayah tʼáá daahóóʼ doo.
9 Kótʼéego náánáłaʼ Ízrel dineʼé éí kéyah tsʼídá doo ałgháájítʼaah da doo, nidi tʼááłáʼí jinítínígo Ízrel dineʼé dajílíinii tʼáá daahó hakédaayah dajótąʼ doo.
10 Áko Bóhólníihii éí Mózes yichʼįʼ yee haadzíʼígi átʼéego Ziilófehad bitsiʼké ádaadzaa.
11 Jó, Ziilófehad bitsiʼké éí Mála, Térza, Hágla, Mílka índa Nóah; díí dabizhéʼé yę́ę bikʼisóó biyeʼké yił ahá daʼazyeh.
12 Jóseph biyeʼ Manáseh dineʼé baʼáłchíní náás ahoolchíiłii yił ahá daʼazyeh, áádóó dabizhéʼé yę́ę bidineʼé baʼáłchíní bitahgi bikédaayah tʼáá yiiʼ kéédahatʼı̨́.
13 Díí éí bikʼeh óʼooʼníiłii áádóó bee nidahodiitʼaahii éí Bóhólníihii hahadziihgo Mózes binahjįʼ Ízrel dineʼé kótʼée doo yiłníigo Móʼab kéyah nidzisgaigi Jériko binaashiijí Jórdan tooh nílíní haʼaʼaahjigo hazʼánígi yichʼįʼ haadzííʼ.
