Numbers 6:1-27
6 Áádóó Bóhólníihii éí Mózes yichʼįʼ haadzíiʼgo ání,
2 Ízrel dineʼé bichʼįʼ handziihgo ábidiní, Diné łaʼ, doodaiiʼ asdzání łaʼ Názarait* jidooleeł biniyé atsʼáʼázhdeetʼaahgo ádee hadidoodzihgo éí Bóhólníihii bichʼįʼ ádee hadidoodzihgo atsʼáʼázhdidootʼááł;
3 wáin índa tó tsiʼnidaʼiiłáii doo jidlą́ą́góó ízhdiʼdoolnííł; wáin díkʼǫ́ǫzhii, doodaiiʼ tó tsiʼnaʼiiłáii díkʼǫ́ǫzhii doo jidlą́ą da doo; chʼil naʼatłʼoʼii bineestʼąʼ ániidígíí, doodaiiʼ bisgąʼ doo jiyą́ą da doo índa bitooʼ doo jidlą́ą da doo.
4 Atsʼáʼázhdeeltı̨́įgo hóyoołkááł biyiʼ chʼil naʼatłʼoʼii sikaadii bitsʼą́ą́dóó doodı̨́įłgo ályaii éí bílástsiiʼ índa bikágí nidi doo jiyą́ą da doo.
5 Atsʼáʼázhdeeltı̨́įgo ádee hadzoodzíiʼgo hóyoołkááł biyiʼ doo hatsiiʼ doolzhih da; Bóhólníihii bichʼįʼ tʼáá atsʼáʼázhdeetʼánígíí bíighah azlı̨́įʼjįʼ jidiyin doo, áádóó bíniʼdii hatsiiʼ nineez dooleeł.
6 Bóhólníihii bá atsʼáʼázhdeetʼą́ągo hóyoołkááł biyiʼ atsʼíís daaztsáanii doo bitʼáahjįʼ jidoogáał da.
7 Hazhéʼé, doodaiiʼ hamá, doodaiiʼ hakʼis, doodaiiʼ halah łaʼ daaztsą́ągo bee tʼáá hó doo biʼdidéehii doo ázhdiʼdoolníił da, háálá haDiyin God bá bee hwééhózinii diyingo bitsʼąą hastiʼgo hatsiiʼkáaʼgi hólǫ́.
8 Atsʼáʼázhdeetʼą́ągo hóyoołkááł biyiʼ Bóhólníihii bichʼįʼ jidiyin dooleeł.
9 Áádóó diné łaʼ tʼáadoo hooyání hwíighahgi daaztsą́ągo hatsiiʼ bee hwééhózinii diyingo bitsʼąą dzistiʼígíí yidoołchǫǫł, áko hoʼdidééh bijı̨́ı̨́ hatsiiʼ jidooshihígíí éí tsostsʼid jı̨́ı̨́ góneʼ hatsiiʼ ałtso jidooshih.
10 Áko tseebíí jı̨́ azlı̨́įʼgo hasbídí naakigo, doodaiiʼ hasbídí łigaii biyázhí naakigo níbaal biiʼ dahozdísinii bichʼéédą́ąʼgi nááʼiiłniihii baazhdoojih,
11 áádóó nááʼiiłniihii náádiʼyoołnihgo éí łaʼígíí ádił niʼiidzííhjí nááhániihii áádóó łaʼígíí éí didlidgo nááhániihii átʼéego yee há kʼééhodoołdǫǫł, háálá daaztsáanii bíhizhdééʼnáaʼgo bee ádił adzisiih, áádóó tʼáá éí bijı̨́ jidiyingo ánáhodiʼdoolnííł.
12 Áko diyingo bitsʼąą hastiʼgo hóyoołkáłígíí Bóhólníihii bichʼįʼ atsʼáʼánídizhdootʼááł, áádóó dibé yázhí bikąʼii łaʼ binááhaaí jidoolóosgo doo ákǫ́ǫ́ áhátʼı̨́ı̨́jí nááhániihii átʼéego nááhizhdoołnih, nidi átséédą́ą́ʼ atsʼáʼázhdeetʼą́ągo hwíiníłkánígíí doo íílįįd da, háálá atsʼáʼázhdeetʼáanii yíchxǫʼ.
13 Áádóó Názarait nilíinii bá díí bee hazʼáanii átʼé: atsʼáʼádeetʼą́ągo bíyoołkáłígíí bíighah azlı̨́įʼgo níbaal biiʼ dahozdísinii bichʼéédą́ąʼjįʼ hoł dadookah,
14 índa Bóhólníihii bichʼįʼ nááhizhdoołnihígíí éí dibé yázhí bikąʼii łaʼ binááhaaí hadaałtʼéii didlidgo nááhániihii átʼéego áádóó dibé yázhí biʼáadii łaʼ binááhaaí hadaałtʼéii éí ádił niʼiidzííhjí nááhániihii átʼéego índa deenástsʼaaʼ tʼááłáʼígo hadaałtʼéii hózhǫ́ǫ́jí nááhániihii átʼéego nááhizhdoołnih,
15 áádóó dííkʼǫsh tʼáágééd bááh ályaii tsʼiizis bee yíkánígíí, tłʼoh naadą́ą́ʼ akʼáán éí akʼah bił ałtaa násdziidgo bááh dáʼákaʼí nahalinígíí akʼah bikʼi yadziidii, áádóó akʼáán nááhidoonihii índa yanáadziʼgo nááhániihii nááhizhdoołnih.
16 Áko nááʼiiłniihii éí Bóhólníihii binááł hashtʼeʼniidooniłgo ádił niʼiidzííhjí nááhániihii índa didlidgo nááhániihii néidiyoołnih,
17 áko náádiʼyoołnihgo deenástsʼaaʼ éí hózhǫ́ǫ́jí nááhániihii átʼéego Bóhólníihii yichʼįʼ néidiyoołnih; dííkʼǫsh tʼáágééd bááh ályaii tsʼiizis bee yíkánígíí biłgo nááʼiiłniihii náádiʼyoołnihgo akʼáán nááhániihii áádóó yanáadziʼgo nááhániihii ałdóʼ néidiyoołnih.
18 Áko níbaal biiʼ dahozdísinii bichʼéédą́ąʼgi Názarait nilíinii atsʼáʼádeetʼánígíí bitsiiʼ bee bééhózinígíí yidooshih, áádóó atsʼáʼádeetʼą́ągo bitsiiʼ néididoołjołgo nááhidoonihii hózhǫ́ǫ́jí nááhániihii nááhániihgo biyaa góneʼ tsídzaii doołjoł.
19 Áádóó nááʼiiłniihii éí deenástsʼaaʼ bigaan shibézhígíí néididootı̨́ı̨́ł áádóó dííkʼǫsh tʼáágééd bááh ályaii tʼááłáʼígo índa dííkʼǫsh tʼáágééd bááh dáʼákaʼí ályaii tʼááłáʼígo tsʼiizis biiʼdę́ę́ʼ haidooniłgo Názarait atsʼáʼádeetʼáanii bitsiiʼ bee bééhózin nítʼééʼ yę́ę yiyííshééʼdóó bikʼijįʼ yílákʼee yidoonił,
20 áko nááʼiiłniihii éí hoł náásee hoł yił dideesniiʼgo náásee bił didiilnihgo nááhániihii Bóhólníihii binááł nááhizhdoołnih; éí nááʼiiłniihii bá dílzinii ádaatʼéego ajéítsʼiin náásee bił didilnihgo áádóó ajáád bił dah nídiʼdiilnihgo nááhániihii óóltąʼgo áádóó bikʼijįʼ índa Názarait éí wáin néídlı̨́įhgo bee bá hwiidooʼaał.
21 Díí éí Názarait ádee haadzíʼígíí bá bee hazʼáanii átʼé, áádóó atsʼáʼádeetʼą́ą́jí bá Bóhólníihii yichʼįʼ néidiyoołnihígíí, índa tʼáá haʼátʼíhída tʼáá yíneelʼánígi néidiyoołnihígíí ałdóʼ bá bee hazʼáanii átʼé; ádee hadzoodzíʼígíí bikʼehgo ádee hadzoodzííʼ; ákótʼéego Názarait nilı̨́įgo atsʼáʼádeetʼánígíí bá bee hazʼáanii yikʼehgo éʼéłʼı̨́į doo.
Náádaʼiiłniihii akʼihojidlíi dooleełii biniyé sonídadilzįįh
22 Áádóó Bóhólníihii éí Mózes yichʼįʼ haadzíiʼgo ání,
23 Éran áádóó biyeʼké bichʼįʼ handziihgo ábidiní, Kótʼéego Ízrel dineʼé bikʼidajiidoohdliiłgo kódabididoohniił:
24 Bóhólníihii nihikʼijidlíi doo,áádóó nihaa áhályą́ą doo;
25 Bóhólníihii nihikʼiʼ diiłdíin doo,áádóó nihaa joobaʼ doo;
26 Bóhólníihii nihikʼiníʼı̨́įʼ doo,áádóó bee hashtʼehodítʼéiinihaididooʼááł.
27 Ákótʼéego Ízrel dineʼé shízhiʼ bee dabiʼdójíigo ádeidoolííł, áádóó bikʼijishdlíi doo.
Footnotes
^ Názarait jiníigo éí bee ádee haʼoodzíiʼii jiníigo óolyé.
