Proverbs 23:1-35
23 Naatʼáanii bił adííyı̨́ı̨́ł biniyé bił dah níkeehgo nidááhgóó naazkáanii hanisíidgo hazhóʼó baa nitsíníkees doo.
2 Ayóogo íyą́ągo nizágí bichʼįʼ béésh dah yíʼáałgo íyánígíí tʼą́ą́ʼ kwíínísin.
3 Chʼiyáán yee niʼdileehígíí bąą bichʼiyąʼ ałtaaskąądí tʼáadoo bídin nílíní.
4 Adíítʼįįłígíí tʼáadoo baa naanish niiłhéhí; tʼáadoo tʼáá éí tʼéí baa nanináhí.
5 Tʼáadoo nánídlíiniísh hadínííltsééł? Háálá yótʼáahdi atsá naatʼaʼígíí nahalingo dajitʼíinii bitʼaʼ ádayiiłʼįįhgo yóóʼadahatʼah.
6 Bił hatsxohii bibááh tʼáadoo niyání, áádóó ałtaaskąądii yiyánígíí tʼáadoo bídin nílíní.
7 Háálá tʼáá ádíyiʼídi nitsíkeesígi átʼéego tʼáá ákótʼéego hiná. Íyą́ áádóó ídlą́, niłní, nidi bijéí biyiʼdóó doo hánígo naa nitsíkees da.
8 Chʼiyáán yíníyą́ą́ʼ yę́ę béédíílkoh áádóó nizaad daalkanii tʼáadoo biniyéhí da doo.
9 Doo áhályáanii tʼáadoo bichʼįʼ yáníłtiʼí, háálá saad bee hódzáanii bee yáníłtiʼígíí yidooʼįįł.
10 Tʼáá náshiinídą́ʼídi kéyah bee bééhózin biniyé tsé adaastsih yę́ę doo nahjįʼ kódadíílíił da. Áłchíní bizhéʼé ádaadinii dabikéyah tʼáadoo bee ádíhwíínílníhí,
11 háálá Náádabidiyoołnihii tsʼídá tʼáadoo bee bóodziilí da; ádéíníłʼįįdii biniinaa naa nídóotʼįįł.
12 Bí naʼniltinii nijéí baa diníʼaah áádóó saad bee ił ééhózinii yísíníłtsʼą́ą́ʼ.
13 Áłchíní bee hashtʼeʼnehedlóosii tʼáadoo bitsʼąą síníłtání, háálá náníníłhaalgo doo dadootsaał da.
14 Tʼáá bí tsin bee nídínííłhał, áko hoolʼáágóó tiʼhooʼnííh bił hazʼą́ bitsʼą́ąjįʼ biiʼ sizíinii yisdádííłtééł.
15 Shiyeʼ nílíinii, nijéí hóyą́ągo shijéí bił hózhǫ́ǫ dooleeł, tʼáá shí shijéí bił nihoozhǫǫh doo.
16 Jó, tʼáá ákogi átʼéego yáníłtiʼgo shijéí bił nihoozhǫǫh doo.
17 Ádił nidaʼiilzíihii tʼáadoo nijéí bee yiníłchʼı̨́dí, nidi tʼáá áłahjįʼ Bóhólníihii díínísin.
18 Háálá tʼáá aaníí náás ná honítʼiʼ doo, áádóó nił chohooʼíinii doo nitsʼą́ą́ʼ kʼééʼdoolchǫǫł da.
19 Íísíníłtsʼą́ąʼgo honíyą́, shiyeʼ, áádóó yínááłgóó nijéí baa áhólyą́.
20 Tʼáá áłahjįʼ wáin adeisłíinii tʼáadoo bitahgi nanináhí, áádóó ayóogo daʼalghałii tʼáadoo bitahgi nanináhí.
21 Háálá daʼadláanii áádóó ayóogo daʼalghałii téʼéʼı̨́ bidiʼnóoghą́ą́ł, índa bił tʼéí yaa naagháii biʼééʼ anilí tʼéí dooleeł.
22 Nizhéʼé nishchíinii yísíníłtsʼą́ą́ʼ, áádóó nimá haastihgo tʼáadoo niʼíní.
23 Tʼáá aaníinii nahíłniih; tʼááká éí naa nahóniih lágo; hódzą́ áádóó bínaʼniltinii índa bee akʼidiʼyiitįįh ałdóʼ nahíłniih.
24 Diné tʼáá ákogi ááníiłii bizhéʼé baa bił nihoozhǫǫh doo, áádóó hayeʼ há yizhchíinii hóyą́ągo nooséełii baa hoł hózhǫ́ǫ doo.
25 Hániʼdii nizhéʼé áádóó nimá bił hózhǫ́, áádóó nishchínígíí hániʼdii naa bił nihoozhǫǫh.
26 Shiyeʼ nílíinii, nijéí shaa diníʼaah áádóó áníshtʼéii hazhóʼó hanisíid leʼ.
27 Háálá kin yąąh sizíní éí wóyahgo tó bá ígeedígíí nahalin índa adiléii éí ahoodzą́ągo bidáaʼjįʼ heetsʼózígíí nahalin.
28 Aghaʼiiʼníiłii nahalingo aa háasdáa łeh, áádóó diné bidaʼasdzą́ą́ yindaʼaloʼgo ádeileʼgo kʼeeʼąą yilzhish.
29 Háísh yíiyá ní? Háísh yínííł nilı̨́? Háísh saad hółǫ́? Háísh saad biiłhé? Háísh tʼáadoo biniinaanígóó tídááná? Háísh binááʼ łichxííʼ?
30 Nízaadgóó daʼadláanii lą́ą; wáin ałtaa nínádeidziʼii haintáii lą́ą.
31 Wáin bighá jíchiiʼgo tʼáadoo baa nánítʼíní; bee adlání bee siką́ągo bizhééʼ haʼniłhoshgo ayiʼ góyaa ahidinaadgo tʼáadoo baa nánítʼíní.
32 Bílátah dahalzhishgo tłʼiish nahalingo adiłhash, áádóó tłʼiish ánínígíí nahalingo adiłhash.
33 Doo béédahózinii nił átʼı̨́į doo, áádóó nijéí biyiʼdóó nahagizgo ádaatʼéii bee yáníłtiʼ doo.
34 Tʼáá aaníí tónteel biyiʼdi dah naniʼeeł nahonílin doo, doodaiiʼ tsinaaʼeeł ałníiʼgi tsin dego yaaʼáa łeígíí bílátahgi binahizhdíłtı̨́ nahonílin doo.
35 Nídashideestsʼin, nidi tʼáadoo haada yisdzaa da, diníi dooleeł. Nídashineesxaal, nidi tʼáadoo baa ákoniizı̨́įʼ da. Hahgo lá chʼéédeesdził lá? Łaʼ hanáádínéeshtaał, diníi dooleeł.
