Psalm 106:1-48
106 Bóhólníihii baa dahohniih! Haaʼíshąʼ Bóhólníihii bichʼįʼ ahééh danohsin, háálá bí éí yáʼátʼééh. Bóhólníihii aa aʼááh nízingo ahóyéelʼá!
2 Łaʼdaásh Bóhólníihii ayóó átʼéii yaa naayáhígíí yee hadoodzihgo yíneelʼą́, índa łaʼdaásh bee baa haʼniihii tʼáá ałtso yee yaa haniihgo yíneelʼą́?
3 Doo haada yitʼéégóó dahináanii, tʼáá áłahjįʼ tʼáá ákogi ádaaníiłii éí bikʼidahojidlí!
4 Bóhólníihii nílíinii, nidineʼé bee bichʼoniʼnínígíí bee shéénílniihgo shí ałdóʼ yisdáshíłteeh.
5 Áko bitsʼéínínilii náásgóó yáʼátʼéehgo dahináago yideestsééł. Áko nidineʼé bił dahózhǫ́ǫgo baa shił nihoozhǫǫh doo, índa nííʼ danilíinii bitahdóó naa hashniih doo.
6 Danihizhéʼé yę́ęgi átʼéego nihí ałdóʼ ádił nidaʼayeelzííʼ. Doo ákǫ́ǫ́ ádeiitʼįįd da. Doo yáʼáshónígi ádeiitʼįįd.
7 Ííjip kéyahdi danihizhéʼé yę́ę kéédahatʼı̨́ yę́ędą́ą́ʼ tʼóó bikʼedaʼayóigo íʼiinilaaígíí tʼáadoo yikʼidaʼdiitą́ą da. Aa aʼááh nínízinii tʼóó ahayóígíí tʼáadoo yéédáálniiʼ da. Nidi Tónteel Łichííʼ wolyéego siyínígi Diyin God yichʼįʼ nidaasteeʼ.
8 Azhą́ ákódzaa nidi, bee bidziilii ayóó átʼéii bééhózínígo áyósin doo biniyé bízhiʼ binahjįʼ yisdáyíínil.
9 Tónteel Łichííʼ wolyéego siyínígíí yideeztehgo nááltsei. Áádóó halgaigóó hojooʼish nahalingo cháshkʼeh haʼnaa nihoníʼeezh.
10 Áko hakʼee dadiniihii bitsʼą́ąjįʼ yisdáhóónil índa anaʼí bílákʼeedę́ę́ʼ nááhwiisniiʼ.
11 Áádóó bidaʼanaʼí tó bikʼi diilkǫʼ; tʼááłáʼí nidi tʼáadoo łaʼ yidzíiʼ da.
12 Áko índa hazaad dayoosdląądgo haa dahaniihgo hachʼįʼ dahóótáál.
13 Nidi tʼáadoo hodíínaʼí hanaanish yaa dayooznah. Kótʼéego náábididooʼniiłígíí doo yibaʼ ádaatʼée da nítʼééʼ.
14 Honoojíidi tʼáá íiyisí adádanoosnííʼ, áádóó halgaidi Diyin God nayídaneeztą́ą́ʼ.
15 Hódayííkeedígíí baazhdiníʼą́, nidi biiʼ naazíinii tʼóó dabíítsʼiiní.
16 Ákohgo dah oonéłígíí Mózes dayoołchʼı̨́ı̨́d nítʼééʼ áádóó Bóhólníihii bidiyı̨́ı̨́ʼ Éran wolyéii ałdóʼ dayoołchʼı̨́ı̨́d nítʼééʼ.
17 Niʼ ąą ádzaago Déíthan ayííłnaʼ, Abáíram áádóó yił yinééł yę́ę ałdóʼ ałtso bikʼi dahoozhoozh.
18 Áko dah joonéłígi kǫʼ hadadíínóodgo doo yáʼádajíshóonii yę́ę adahizdeezkʼą́ą́ʼ.
19 Dził Hórebgi óola doolyı̨́įʼgo béégashii yáázh yéédaʼiidlaago yichʼįʼ nidahasá.
20 Áko biDiyin God ayóó átʼéii éí béégashii ałchozhii beʼalyaago yił ałnádeiiznil.
21 Diyin God yisdábíínilii, éí Ííjip kéyahdi ayóó ádaatʼéii yaa naayáii yaa dayooznah,
22 Ham bikéyahgi tʼóó bikʼedaʼayóigo íʼiilaii índa Tónteel Łichííʼ hoolyéegi bikʼedaʼíyéʼígi átʼéego íʼiilaii yaa dayooznah.
23 Éí bąą, Áhodeeshdįįł, dííniid; doo ázhdoołdįįłígíí áádóó tʼóó báhádzidgo bee atíjíłʼíinii nahjįʼ kózhdoolíłígíí biniyé Mózes hachʼą́ą́h ííyá.
24 Ákohgo kéyah hózhónígíí dayííʼįįdgo hazaad doo dayoodlą́ą da nítʼééʼ.
25 Dabiníbaal góneʼ saad dahalʼı̨́įgo Bóhólníihii áníinii doo dayíistsʼą́ąʼ da nítʼééʼ.
26 Éí bąą hachʼįʼ yadidiilniiʼgo hwee ádee hadoodzíiʼgo áhodííniid, Honoojíidi dadínóohnééł,
27 áádóó nihaʼáłchíní náás ahoolchíiłii ałʼąą dineʼé bitahgóó kéyah ałʼąą naaznilgóó tahodínéeshkał.
28 Ákohgo Píyordóó eʼelyaii Béíyal wolyéii yichʼįʼ nidahasáago daneeznáanii bichʼįʼ náádahaazniiʼii dayííyą́ą́ʼ.
29 Yaa naaskaígíí biniinaa Bóhólníihii yádahóółchįįd, áko naałniih bitah níłniiʼ.
30 Ákohgo Fíniyas yiizįʼgo yá nihwiizʼą́ągo naałniih áhodiilzeeʼ.
31 Ákohgo éí oochííłgóó áádóó hoolʼáágóó tʼáá ákogi ádziidzaago há bił ééltaʼ.
32 Nááʼákóneʼé tó bíká saad hólǫ́ǫgi ánááhóótʼįįdígíí biniinaa Bóhólníihii hachʼįʼ báhóóchįįd; éí ákóhóótʼįįdígíí Mózes bá nantłʼa silı̨́ı̨́ʼ,
33 háálá Mózes yikʼee bił niiłchʼiihgo ádayiilaa, áko tʼáá naʼníleʼdii saad yee hahaasdzííʼ.
34 Ałʼąą dineʼé hanaagóó kéédahatʼínígíí tʼáá ałtso nidadoołtsxił, Bóhólníihii áhodííniidii éí tʼáadoo ádadziidzaa da.
35 Nidi ałʼąą dineʼé bił ałtaa dajildeehgo éí yaa nidaakaígíí baa nidajikaigo bídahojiiłʼą́ą́ʼ.
36 Eʼelyaii yichʼįʼ nidahałáhígíí bichʼįʼ nidahojiłáago éí biniinaa łoh biih jííyá nahalingo azajookai.
37 Tʼáá aaníí, biyeʼké índa bitsiʼké níłchʼi bidaʼiiníziinii yichʼįʼ náádayiisniiʼ.
38 Biyeʼké áádóó bitsiʼké nideistseedígíí tʼáadoo yee ádidahodiiltʼiʼí da nidi, dabidił danílı̨́įgo ádayiilaa; éí Kéínan kéyahdi edaʼalyaii yichʼįʼ náádayiisniiʼ. Áko diłígíí bee kéyah tʼóó baaʼih silı̨́ı̨́ʼ.
39 Kótʼéego yaa nidaakaígíí bee tʼóó baaʼih daazlı̨́ı̨́ʼ. Ákódaatʼı̨́įgo ałjiłniigi ádaadzaa.
40 Áko índa Bóhólníihii bidineʼé yichʼįʼ báhóóchįįd. Bííʼ danilíinii tʼóó yaaʼih niizı̨́ı̨́ʼ.
41 Ałʼąą dineʼé yaa hodiníʼą́, áko hakʼee dadiniihígíí hondantʼáá nítʼééʼ.
42 Hodaʼanaʼí ałdóʼ hade ádahósingo biyaa jizhjaaʼgo áhoʼdiilyaa.
43 Ląʼídi yisdáhóónil, nidi nidahojiʼáhígíí bee bichʼįʼ nidajilteeh nítʼééʼ, áko doo ákwii ádajíítʼįįdii bee hadahojoobáʼígo ádahoʼdiilyaa.
44 Azhą́ ákódzaa lá nidi, nídahookąąhgo jidiiztsʼą́ąʼgo bichʼįʼ nidahwiiʼnánígíí baa ákozniizı̨́ı̨́ʼ.
45 Áádóó bibee ahaʼdeetʼáanii há yénáálniiʼgo aa aʼááh nízinii tʼóó ahayóígíí bikʼehgo łahgo átʼéego haa tsíńdeezkééz.
46 Dahasnáanii tʼáá ałtso haa aʼááh danízingo áyiilaa.
47 Bóhólníihii nihiDiyin God nílíinii, yisdánihínííł. Ałʼąą dineʼé bitahdę́ę́ʼ áłah ánánihídlééh, áko nízhiʼ diyinii bee danííníijíigo nichʼįʼ ahééh daniidzin doo áádóó nihił dahózhǫ́ǫgo naa dahwiiʼniih doo.
48 Hoolʼáádę́ę́ʼ áádóó ahóyéelʼáágóó Bóhólníihii, Ízrel dineʼé biDiyin God nilíinii baa haʼniih leʼ! Áádóó diné tʼáá ałtso, Tʼáá ákótʼée doo, daaníi leʼ! Bóhólníihii baa dahohniih!
