Psalm 109:1-31
Kʼééhodiʼnééh biniyé náʼookąąh
109 Diyin God naa hashniihii, tʼáadoo tʼóó áhodínílzéʼí!
2 Háálá tʼáá íiyisí doo yáʼádaashóonii índa bindaʼadloʼii shide ádeinízingo woochʼííd yee shaa nidahalneʼ.
3 Akʼeʼdiniih saad yił shináshzhiizh, áádóó tʼáadoo biniinaanígóó shikʼiijééʼ.
4 Ayóóʼóóshʼnínígíí bidiníná tʼóó shikʼi dahodiiʼą́, nidi bá sodiszin.
5 Áko yáʼátʼéehii bidiníná doo yáʼátʼéehii yee kʼéédashidiidlaa, índa ayóóʼóóshʼnínígíí bidiníná shikʼee dadeeznih.
6 Diné doo yáʼáshóonii honiyé niníłteeh. Akʼi hodiiʼaahii bíniʼdii honishʼnáájí sizı̨́į leʼ.
7 Haa hwiinístʼįįdgo hániʼdii há nihootʼaah; hániʼdii hasodizin ádił niʼiidzííh yileeh!
8 Tʼáá díkwíí yiską́ąjįʼ nijigháa leʼ. Áádóó bee hóhólníhígi náánáłaʼ hatsáskʼehjįʼ anáádoodááł!
9 Haʼáłchíní bizhéʼé ádinii danilı̨́į leʼ! Hweʼasdzą́ą́ éí bąąh áhásdįįdii nilı̨́į leʼ!
10 Haʼáłchíní daʼdókeedgo naʼałjidí danilı̨́į leʼ! Dabikintsʼiil dah naazhjaaʼdóó nízaadi nidaakaigo daʼdókeed leʼ!
11 Hániʼdii hwee hólóonii tʼáá ałtso hąąh hayííłʼáhígíí hagha yóʼnííł. Binjishnishii déʼéyóní hagha dayóʼnííł!
12 Hániʼdii doo łaʼ haa aʼááh nízin da doo índa hániʼdii haʼáłchíní bąąh ájísdįįdígíí doo łaʼda joobaʼ da doo!
13 Haʼáłchíní dooleeł nítʼééʼ yę́ę bíniʼdii áldįįh; bíniʼdii akéédę́ę́ʼ hanínáánootʼáanii bízhiʼ kʼééʼélchxǫǫh!
14 Hániʼdii Bóhólníihii éí hazhéʼé doo ákwii ádáátʼįįdii yénálniih, áádóó hamá ádił niʼiisíiʼii doo kʼééʼdoolchxǫǫł da!
15 Éí tʼáá áłahjįʼ Bóhólníihii bidáahgi hólǫ́ǫ leʼ! Áko nahasdzáán bikááʼdóó doo hwéédahaniih da doo biniyé doo hwéédahaniihgóó áyósin doo!
16 Háálá éí diné aa aʼááh hasin doo yee énálniih da nítʼééʼ, nidi diné bahojoobáʼíii áádóó hojoobaʼ hasʼáanii índa bijéí yínííł danilíinii nizdoołtsiłgo atíjíłʼı̨́ı̨́ nítʼééʼ.
17 Ódziih bił ayóó áhootʼéé nítʼééʼ, áko nábiʼdódziih! Łaʼda yikʼiizhdoodliiłígíí doo yaa bił hózhǫ́ǫ́góó doo łaʼda hakʼi néizhdoodliił da!
18 Ódziih éí ééʼ nahalingo yee hadítʼéé nítʼééʼ, áko tó nahalingo bitsʼíístah shidoogish, áádóó akʼah nahalingo bitsʼin biih shidoogish!
19 Ééʼ ákʼínéíltihígíí nahalin leʼ, áádóó tʼáá áłahjįʼ sis nahalingo bináztʼiʼ leʼ!
20 Shikʼi dahodiiʼaahii áádóó nichǫ́ʼígo shaa yádaałtiʼii bíniʼdii ákótʼéego Bóhólníihii díí yee kʼééhodidoodlííł!
21 Diyin God Bóhólníihii nílíinii, nízhiʼ binahjįʼ shaa atínítʼı̨́. Yisdáshíłteeh, háálá aa aʼááh nínízinii éí yáʼátʼééh!
22 Háálá shahojoobáʼí áádóó hojoobaʼ hoséłʼą́, índa shijéí tídiilyaa.
23 Iʼííʼą́ągo chahaʼoh iildóhígíí nahonishłingo ááshdįįł; nahachagiitsoh níyol yáábiiłhą́hígíí nahonishłin.
24 Doo ashą́ą́góó bąą shigodtaʼ gónaa doo niłdzil da. Áádóó shíítsʼiinígo shikʼah yę́ę ásdįįd.
25 Tʼóó bá nahatʼiʼii nishłı̨́. Nídashinílʼįįhgo bitsiitsʼiin deiłneʼ.
26 Bóhólníihii shiDiyin God nílíinii, shíká anilyeed! Aa aʼááh nínízinii bikʼehgo yisdáshíłteeh!
27 Díí nigaan bee baa nisíníyáhígíí bił béédahodoozįįł; ni Bóhólníihii éí ákónítʼı̨́!
28 Daʼódziih nidi bíniʼdii ni éí akʼijiinídliih! Dashóbáahgo tʼóó baa yáhásinígi ádabiʼdólneʼ, nidi ná naalʼaʼí nishłíinii tʼáá íiyisí shił nihoozhǫǫh leʼ!
29 Shikʼi dahodiiʼaahii doo ił ídlı̨́ı̨́jí ééʼígíí yiiʼ naazhjéeʼ leʼ! Beeldléí nahalingo baa yádahasinii ákʼínídeiltih leʼ!
30 Bóhólníihii bichʼįʼ chánahgo ahééh nisin doo; tʼáá aaníí, diné tʼóó ahayóí bitahgóó baa hashniih doo.
31 Háálá diné bahojoobáʼíii bidiʼyoolyéełjįʼ bee haʼoodzíiʼii bitsʼą́ą́dóó yisdéidoołtééł biniyé yinishʼnáájí sizı̨́.
