Psalm 30:1-12
Aniné bitsʼąą yisdáʼiildéehii baa ahééh hasin
30 Bóhólníihii nílíinii, yéego naa hashniih doo, háálá hááshííníłtı̨́, áádóó shiʼanaʼí danilíinii doo shaa bił dahózhǫ́ǫ́góó íinilaa.
2 Bóhólníihii shiDiyin God nílíinii, nániisiskango nááshidinisá.
3 Bóhólníihii nílíinii, chʼı̨́įdiitah bidááʼdóó shiiʼ sizíinii háíníłtı̨́; aʼáán góyaa deeshłeełígíí bitsʼąą sheʼiinaʼ shá baa áhólyą́ą́ nítʼééʼ.
4 Diyin God bidiyı̨́ı̨́ʼ danohłíinii, Bóhólníihii baa dahohniihgo bichʼįʼ dahohtaał, áádóó bízhiʼ diyinii béédaołniihgo baa ahééh danohsin.
5 Háálá tʼóó kónígháníjįʼ báháchįįh, nidi niʼjiłdįįh bijı̨́įjįʼ bee achʼohaʼníinii yee hakʼijidliih. Tłʼééʼ bíighah níjícha, nidi biiskání hoł hózhǫ́ǫ łeh.
6 Shí éí tʼáá ałtsoní shoosánígo ádííniid, Tsʼídá doo nahjįʼ kóshidoolíłí da.
7 Bóhólníihii nílíinii, shichʼijí nílínígíí bee dził niłdzilgo siʼánígíí nahalingo áshiinilaa; doo shiníníłʼı̨́ı̨́góó shichʼįʼ nahwiiʼnáá nítʼééʼ.
8 Bóhólníihii nílíinii, haleebee nániisiskan; Bóhólníihii néisiskan.
9 Dasétsą́ągo aʼáán góyaa yishłeehgo shidił haʼátʼíísh nídoodleeł? Shitsʼíís łeezh násdlı̨́įʼgoósh naa haniih doo? Nitʼáá aaníiniísh ná yaa halneʼ doo?
10 Bóhólníihii nílíinii, shidiitsʼı̨́įhgo shaa jiiníbaah! Bóhólníihii nílíinii, shíká anánílwoʼ!
11 Atínídinishdleeh yę́ę bitsáskʼehgi shił hózhǫ́ǫgo ashzhishgo áshiinilaa; tłʼoh yishbizh shiʼéʼígíí shaa nídiniłtsoozgo bee ił hózhóonii bee áká shííníłzaaz,
12 áko shiiʼ sizíinii naa haniihgo nichʼįʼ hataał doo, índa doo tʼóó déesxéel da doo. Bóhólníihii shiDiyin God nílíinii, ahóyéelʼáágóó nichʼįʼ ahééh nisin dooleeł.
