Psalm 33:1-22
33 Tʼáá ákogi ádaahníiłii, Bóhólníihii bee nihił nidahoozhǫǫh! Tʼáá ákogi ádaatʼéii naa dahaniihgo beełtʼé.
2 Tsin tłʼóół naakitsʼáadah bąąh daneelzheeʼgo bee nidaʼaʼnéii bee Bóhólníihii baa dahohniih, tsin tłʼóół neeznáá bąąh daneelzheeʼgo bee bá nidaahnéego dahohtaał!
3 Sin ániidíii bee bichʼįʼ dahohtaał; daohchįįhgo ayóó íitsʼaʼgo bee nidaahné.
4 Háálá Bóhólníihii bizaad éí tʼáá ákogi átʼé, áádóó binaanish tʼáá átʼé yaa naagháhígíí badaʼahódlí.
5 Tʼáá ákogi átʼéii índa doo haada yitʼéii ayóóʼáyóʼní; nahasdzáán éí Bóhólníihii bibee aa aʼááh hasinii bił siʼą́.
6 Bóhólníihii tʼóó haadzíiʼgo yádiłhił hazlı̨́ı̨́ʼ, índa hayol bee hadziidziihgo yádiłhił biyiʼdi dahiníláii tʼáá átʼé dahazlı̨́ı̨́ʼ.
7 Tó ałtʼanehegeehgo ałkʼiditą́ągo áyiilaa; kin biyiʼ hashtʼeʼnaʼaznilígi átʼéego tónteel ayóó íídéetą́ʼígíí beełtʼéego hashtʼéyiilaa.
8 Nahasdzáán bikáaʼgi diné tʼáá ałtso Bóhólníihii deidísin leʼ, nahasdzáán bikáaʼgi kéédahatʼíinii tʼáá ałtso hatsʼąą daastiʼ leʼ!
9 Háálá tʼóó hadzoodzíiʼgo bohoolyaa, áádóó hadzoodzíiʼgo nahasdzáán niiltsʼid.
10 Bóhólníihii éí ałʼąą dineʼé yindahaʼáhígíí tʼáadoo náádleełígóó áyósin; ałʼąą dineʼé nidahagizgo nitsídaakeesii doo idééłníígóó áyósin.
11 Bóhólníihii binahatʼaʼ hoolʼáágóó hólǫ́; tʼáá ałtso oochííłgóó niʼníchı̨́ bijı̨́įjįʼ bijéí biyiʼdóó yee yaa nitsíkeesii hoolʼáágóó hólǫ́.
12 Łaʼ dineʼé éí Bóhólníihii bidiyin ádayósinii éí bikʼidahojidlí, áádóó bííʼ danilı̨́į doo biniyé náyiizláaʼii éí ałdóʼ bikʼidahojidlí!
13 Yáʼąąshdę́ę́ʼ Bóhólníihii déezʼı̨́ı̨́ʼ; diné tʼáá ałtso yinéłʼı̨́;
14 dah sidáádę́ę́ʼ nihokáaʼgi kéédahatʼíinii tʼáá ałtso yinéłʼı̨́,
15 hó lą́ą éí tʼáá ałtso dabijéí ádajileʼ, áádóó yaa nidaakaígíí tʼáá ałtso baa nitsídzíkees.
16 Aláahgo naatʼáanii bisiláo ayóó ánéelą́ʼígíí éí doo yee yisdádoogáał da; diné naabaahii tʼáá bí ayóó ábóodziilígíí doo yee yisdágháah da.
17 Łı̨́ı̨́ʼ bee naʼabaahii bee yisdáhóótʼiʼígíí tʼáadoo nánídlíní da, índa łı̨́ı̨́ʼ ayóo dilwoʼ nidi, doo łaʼ yisdáhodoołtéeł da.
18 Shoo, Bóhólníihii deidísinii índa yee aa aʼááh nízinii bee bił chodahooʼíinii éí Bóhólníihii binéłʼı̨́,
19 áko anoonééł bitsʼąą biiʼ naazíinii yisdéídiyoonił áádóó nídahodichįįhgo dahináago áyósin doo.
20 Nihiiʼ naazíinii Bóhólníihii yibaʼ ádaatʼé; nihíká análwoʼii índa nihinaageʼ nilı̨́.
21 Áko nihijéí bił nidahoozhǫǫh, háálá bízhiʼ diyinii baa dadzííníidlí.
22 Bóhólníihii nílíinii, nee nihił chodahooʼínígíí bikʼehgo nihaa aʼááh nínízinígíí nihikʼigi hólǫ́ǫ leʼ.
