Psalm 40:1-17
Éédoochidgo baa haʼniih (Ps. 70:1-5)
40 Tʼáadoo ákʼíhoditéhí Bóhólníihii bibaʼ áníshtʼéé nítʼééʼ; shichʼįʼ dah díníitʼą́ áádóó náoshkąąhgo shidiiztsʼą́ą́ʼ.
2 Hashtłʼish ditsʼidí biyiʼdóó aʼáán báhádzidę́ę́ʼ hááshííłtı̨́; tséʼéłkáaʼgi dah shiisįʼ áádóó yishááłgóó hashtʼeyiilaa.
3 NihiDiyin God éí sin bee baa haʼniihii, sin ániidíii shizaiyíílá. Ląʼí deidoołtséełgo dahodísin doo, áádóó Bóhólníihii yaa dadzólíi doo.
4 Diné ádaa dahaʼniihii áádóó dabiyoochʼíidii yichʼįʼ yóóʼádahakáhígíí éí doo hoł nilíinii índa Bóhólníihii beijólíii éí hakʼihojidlí.
5 Bóhólníihii shiDiyin God nílíinii, dooládóʼ ayóó ádaatʼéii tʼóó ahayóí łaʼ yinilaa da lá, áádóó bee nihaa nitsíníkeesígíí tʼóó ahayóí lá, áko éí baa hashneʼii doo bee nił ahozhʼnoolnííh átʼée da, áádóó baa ahoʼniishneʼgo doo jóołtaʼ ánéelą́ąʼ da doo.
6 Naaztseedgo nááhániihii índa tʼáadoo leʼé náádahaniihii doo nił hóshǫ́ǫ da; shijaaʼ bee adiistsʼaʼgo áshiinilaa. Didlidgo náádahaniihii índa ádił niʼiidzííhjí náádahaniihii ałdóʼ doo yíníkeed da.
7 Áko ádíshní, Jóʼakon, níyá; naaltsoos biyiʼ shee bee akʼeʼashchı̨́įgo bee siʼą́.
8 ShiDiyin God nílíinii, íinínízinii baa nideeshaałgo baa shił nihoozhǫǫh. Nibee hazʼáanii shijéí biiʼ hólǫ́.
9 Diné tʼóó ahayóí áłah nilı̨́įgi tʼáá ákogi ádaatʼéii baa hweeshneʼ; jó, doo tʼóó bił áhodííníszéeʼ da nítʼééʼ; Bóhólníihii nílíinii, éí nił bééhózin.
10 Nitʼáá ákogi átʼéii doo tʼáá shijéí biyiʼídi bił áníshtʼée da nítʼééʼ; naʼahódlíhígíí áádóó yisdáʼayíníiłii baa hweeshneʼ; diné tʼóó ahayóí áłah nilı̨́įgi éí aa aʼááh nínízinii índa nitʼáá aaníinii tʼáadoo łaʼ bitsʼąą nídíłʼı̨́įʼ da.
11 Bóhólníihii nílíinii, aa aʼááh nínízinii tʼáadoo shitsʼą́ąjįʼ kwíínísiní; aa aʼááh nínízinii índa nitʼáá aaníinii éí áłahjįʼ shaa áhályą́ą leʼ!
12 Háálá daashíínéelą́ą́ʼ doo yáʼádaashóonii shináshzhiizh. Doo ákwii áátʼįįdii shide ádzaago biniinaa doo haoshxaał átʼée da sélı̨́ı̨́ʼ; éí shitsiiʼ bilááh ánéelą́ą́ʼ; éí bąą chʼééh áshtʼı̨́.
13 Bóhólníihii nílíinii, íinínízinii bee yisdáshíłteeh! Bóhólníihii nílíinii, tsxı̨́įłgo shíká anilyeed!
14 Hweʼiinaʼ ádadiildįįł danízingo nahjįʼ kódashiléhígíí tʼóó bił dahodííłkéełgo baa yáhásingo ádadííliił, índa atídashiłʼíinii tʼą́ą́ʼ anáhodííʼniłgo doo daʼjílı̨́ı̨́góó ádahodííliił!
15 Tsʼíigo, tsʼíigo lą́ą, dashiłníinii, tʼóó baa yáhásinígi ádaatʼíinii biniinaa hániʼdii yóóʼadootʼáanii dajileeh.
16 Nidi níká ádaatʼíinii tʼáá ałtso tʼáá íiyisí naa bił nidahoozhǫǫh leʼ áádóó tʼáá íiyisí bił dahózhǫ́ǫ leʼ! Bee yisdáʼiyíníiłii ayóóʼádayóʼníinii, tʼáá áłahjįʼ, Bóhólníihii éí ayóó átʼé, daaníi leʼ!
17 Shí shahojoobáʼí áádóó hojoobaʼ hoséłʼą́ągo Bóhólníihii shaa nitsíkees. Shíká análwoʼii nílı̨́ áádóó hááshiiłteehii nílı̨́; shiDiyin God nílíinii, tʼáadoo tʼah níníziní!
