Psalm 45:1-17
Aláahgo naatʼáanii iiyehjí sin
45 Shijéí bee yáʼátʼéehii baa hodeeshnihii wóʼą́ą́lı̨́; bee hahasdziihii aláahgo naatʼáanii bee bił hashneʼ; shitsooʼ éí yiyiichįįhgo akʼeʼałchíii nahalin.
2 Diné baʼáłchíní danilíinii bitahdóó ni aláahgo naa dzólní; jiiníbaʼgo tʼéiyá yáníłtiʼ; éí bąą Diyin God hoolʼáágóó nikʼijisdliʼ.
3 Aláahgo naatʼáanii ayóó ábóodziilii nílíinii, nitsʼádiʼnílídígíí áádóó ayóó ánítʼéhígíí bee hadínéehgo nidiltłish nąąh níʼáago ánílééh.
4 Aláahgo naatʼáanii ayóó átʼéii nílı̨́įgo akʼeh dídlı̨́įgo łı̨́ı̨́ʼ nił yildloshgo tʼáá aaníinii áádóó aa aʼááh hasinii índa tʼáá ákogi átʼéii bichʼą́ą́h nahóleʼ. Nílaʼ nishʼnáájíígíí tʼóó bikʼee tsízdólyésígi ádaatʼéii yee naninitin doo.
5 Nikʼaʼ dadeeníigo aláahgo naatʼáanii biʼanaʼí dabijéí baa ahilyeed, áko ałʼąą dineʼé niyaajįʼ naaʼahinidééh.
6 Diyin God nílíinii, bikááʼdóó nahóʼáii bikááʼdóó hóóʼáałgo hoolʼáágóó ahóyéelʼá. Bee nóhólníihgo bił hazʼáanii biyiʼ naatʼá gish éí tsʼídá tʼáá ákogi átʼéii átʼé.
7 Tʼáá ákogi átʼéii ayóóʼííníʼní, índa doo yáʼáshóonii éí jiiníłá. Éí bąą Diyin God, niDiyin God nilíinii akʼah nikʼi yayiiziidgo bił daʼahíínítąʼii biláahgo átʼéego nił hózhǫ́ǫgo ániilaa.
8 Mir áádóó álooz índa káshiya daolyéii łikání dahalchinígíí niʼééʼ bąąh dahalchin; aláahgo naatʼáanii bikin góneʼ áívori* bee naashchʼąąʼii ákóneʼ tsin bąąh tłʼóół daneelzheeʼígíí dadiitsʼaʼgo nił hóóshǫǫd.
9 Asdzání nił danilíinii bitahgi aláahgo naatʼáanii danilíinii dabitsiʼké łaʼ naazı̨́: asdzą́ą́ naatʼááh éí Ófer kéyahdę́ę́ʼ óola bee ééʼ disǫsii ályaaígíí yee hadítʼéego ninishʼnáájí sizı̨́.
10 Chʼikę́ę́h nílíinii, shichʼįʼ dah díníitʼaahgo nitsíníkeesgo shíísíníłtsʼą́ą́ʼ. Nidineʼé áádóó nizhéʼé bighandóóígíí baa yoonééh.
11 Áko aláahgo naatʼáanii ayóó áníínílninígíí yidánoolníi doo. NiBóhólníihii nilínígíí bąą bichʼįʼ hodíínísin.
12 Táir hoolyéii bichʼéʼé,* tʼáá éí agháago daʼatʼíinii nihichʼozhdooniił danízingo deitʼíinii naa deidiyoonił.
13 Aláahgo naatʼáanii bitsiʼ bighan góneʼ ayóó ánóolningo óola yishbizhgo ééʼ ályaii yee hadítʼé.
14 Ééʼ naashchʼąąʼii yee hadítʼéego aláahgo naatʼáanii baa doodlóós. Chʼikéí tʼah doo diné bee dahaleehii yił ałchodaaʼnéego bikééʼ tádíkáhígíí nił yah adootʼish.
15 Baa hózhǫ́ǫgo áádóó baa ił nihoozhǫǫhgo biʼdootʼish doo. Aláahgo naatʼáanii bighan góneʼ yah adookah.
16 Danizhéʼé naazı̨́ı̨́ nítʼééʼ yę́ęgi niyeʼké naazı̨́į dooleeł; nahasdzáán tʼáá náhwiizʼą́ą́ nítʼééʼ bikááʼgóó naatʼáanii danilı̨́įgo ádadííliił.
17 Náás daʼahideeshchíinii tʼáá ałtso bitahgóó nízhiʼ bééhániihgo ádeeshłííł. Éí bąą hoolʼáágóó ahóyéelʼáágóó diné naa dahaniih doo.
Footnotes
^ Áívori (ivory) jiníigo chı̨́ı̨́h yee adilohii biwózhahí bee ályaago óolyé.
^ Táir hoolyéii bichʼéʼé jiníigo éí Táirdóó diné kéédahatʼíinii jiníigo óolyé.
