Psalm 69:1-36
Tʼáá ałtsoní bąąh hániʼgo bikʼee chazhnízin
69 Diyin God nílíinii, yisdáshíłteeh, háálá shiiʼ sizíinii tó bilááh néésʼąąd.
2 Hashtłʼish ditsʼidí doo biiʼ dzoozįįh átʼéegi nahoditsʼǫʼ biiʼ yaadítłizh. Tó ditáanii biih yíyá áádóó tó shikʼi diilkǫʼ.
3 Yishchago bąąh nídínísdzá. Shidáyiʼ náhooltsei. ShiDiyin God bibaʼ áníshtʼéego biniinaa shinááʼ doo hózhǫ́ bee hootʼı̨́į da silı̨́ı̨́ʼ.
4 Tʼáadoo baanígóó shikʼee dadiniihii shitsiiʼ bilááh ánéelą́ą́ʼ. Tʼáadoo biniinaanígóó dahodiyiilyééł dashóʼníinii shiʼanaʼí daazlı̨́įʼgo ayóó ádabóodziil. Tʼáadoo bitsʼą́ą́ʼ nídiiláhí da nidi baa nídeeshdlééł.
5 Diyin God nílíinii, tʼóó ádee naashʼnéhígíí nił bééhózin. Ádił niʼiisíhígíí doo nitsʼąą nízhdółʼı̨́ı̨́ł átʼée da.
6 Tʼáá ałtsoní bee Bóhólníihii Diyin God nílíinii, nee bił chodahooʼíinii shiniinaa tʼááká tʼóó baa yáhásinígi ádabiʼdólneʼ lágo. Ízrel biDiyin God nílíinii, níká ádaatʼíinii shiniinaa tʼááká bąąh nidahókaad lágo.
7 Háálá niniinaa shiʼdéédzííʼ índa tʼóó ádaa yániisdzı̨́ı̨́ʼ.
8 Shikʼisóó danilíinii bichʼįʼ déʼéyóní sélı̨́ı̨́ʼ; shimá baʼáłchíní bichʼįʼ ayóní sélı̨́ı̨́ʼ.
9 Háálá nikin tʼáá íiyisí baa hą́ą́h nisingo bíneeshdlínígíí tʼáá áshidoołdįįłgo shide átʼé, áádóó danéédzíiʼii yee danéédzííʼ yę́ę shikʼijįʼ silı̨́ı̨́ʼ.
10 Yíchago tʼáadoo ashání shiiʼ sizíinii bichʼįʼ nahoyéłnáʼígíí bąą tʼóó bee shá nahaztʼiʼ.
11 Tłʼoh yishbizh shiʼééʼ áshłaago shiʼanaʼí yá nidahałtʼiʼii sélı̨́ı̨́ʼ.
12 Dáńʼdítı̨́įhgi* nidaháaztánígíí shaa yádaałtiʼ áádóó adláanii shídaʼdiłʼaʼ.
13 Nidi, Bóhólníihii nílíinii, shí éí nichʼįʼ sodiszin. Diyin God nílíinii, hwíídéestsʼįįł nínízinjįʼ ahoolzhiizhgo aa aʼááh nínízinii tʼóó ahayóígíí áádóó nibee yisdáʼiildéehii tʼáá aaníiniígíí binahjįʼ shichʼįʼ ééhodíísįįł.
14 Hashtłʼish ditsʼidí biyiʼdę́ę́ʼ hááshíłteeh. Áko doo nahoditsʼǫʼ adeeshtłish da. Shikʼee dadiniihii áádóó tó ditáanii bitsʼą́ąjįʼ yisdáshíłteeh.
15 Tʼáadoo tó shikʼi nídiilkǫǫhí áádóó tó ayóó íídéetą́ą́ʼ góyaa ooshgeeh lágo índa aʼáán góyaa shikʼi hoołdaas lágo.
16 Bóhólníihii nílíinii, shichʼįʼ ééhonísįįh, háálá aa aʼááh nínízinii éí yáʼátʼééh; aa aʼááh nínízinii tʼóó ahayóígíí bikʼehgo shichʼįʼ náhínááh.
17 Ninaalʼaʼí nishłíinii tʼáadoo shitsʼą́ąjįʼ ánítʼéhí, háálá shichʼįʼ nahwiiʼná. Tsxı̨́įłgo shichʼįʼ ééhonísįįh.
18 Shaa nínáahgo shikʼé nináʼnídléego shiiʼ sizíinii yisdáníłteeh! Shiʼanaʼí danilíinii biniinaa doo shihodiitʼiʼgóó áshílééh!
19 Shá nahatʼiʼ áádóó tʼóó baa yáhásinígi áshiʼdiʼní índa diné doo bił nishłı̨́į daígíí nił bééhózin. Shiʼanaʼí danilíinii tʼáá ałtso bééhonísin.
20 Shá nahaztʼiʼígíí bikʼee atídiníshdlı̨́ı̨́ʼ, áko tʼáá íiyisí yínííł naashá. Shikʼédí hodoodleeł niizı̨́ı̨́ʼ, nidi tʼáadoo shikʼédí silı̨́ʼí da. Bee haʼahóníinii biniyé tádííyá, nidi tʼáadoo łaʼ bikʼíníyáa da.
21 Atłʼizh nahalingo díchʼíiʼii yił shadaʼastsood áádóó dibááʼ nishłínígi chʼil naʼatłʼoʼii bitooʼ dókʼǫ́zhígíí shaa deizką́.
22 Hániʼdii bidáahgi biʼádaʼazįįd łoh yileeh. Bił yáʼádahootʼéehgi ákweʼé hániʼdii łoh yileeh.
23 Bíniʼdii doo daʼooʼı̨́į da dooleeł biniyé bił daatłʼéeʼgo ánílééh, áádóó áłahjįʼ bitah dahoditłidgo ánílééh.
24 Tʼáá íiyisí bichʼįʼ hashké niidzįįh áádóó nił halchíiʼgo náháchįʼígíí yikʼee nisinákah leʼ.
25 Bíniʼdii dabighangi doo naagháhí da doo, índa dabiníbaal doo łaʼ yiiʼ kééhatʼíní da doo.
26 Háálá náníníłtsxasígíí atídeiiłʼı̨́; tídadinilaii bąąh yínínígi átʼéego bikʼeʼashchʼíiʼgo yikʼijįʼ yádaałtiʼ.
27 Bíniʼdii doo ákwii átʼéii bá bídahiniidééh, áádóó tʼáá ákogi ánítʼéhígíí doo yiih dadookah da.
28 Bíniʼdii iináájí naaltsoos biyiʼdóó bízhiʼ tʼóó kʼéédaʼíłchxǫǫh. Tʼáá ákogi ádaatʼéii bitahjí tsʼídá tʼáadoo bízhiʼ daasdzohí.
29 Nidi shí éí shahojoobáʼí áádóó yínííł nishłı̨́. Diyin God nílíinii, bíniʼdii nibee yisdáʼiildéehii bee chánah nishłı̨́įgo áshílééh!
30 Diyin God bízhiʼ baa hashniihgo bee hashtaał doo. Hachʼįʼ ahééh nisingo ayóó átʼéego haa hashniih doo.
31 Béégashii, doodaiiʼ dóola bikeeʼ áádóó bideeʼ hólóonii nááhániihii biláahgo Bóhólníihii díí yaa bił hózhǫ́ǫ doo.
32 Aʼohgo ádaa nitsídaakeesii díí dayiiłtsą́ągo bił dahózhǫ́ǫ doo. Nihí Diyin God há daohtʼíinii, nihijéí háádaʼiiłdįįh leʼ.
33 Háálá Bóhólníihii éí hojoobaʼ ádeinízinii yidiitsʼaʼ áádóó bidineʼé awáalyaaí nidahaleehii doo yiʼı̨́į da.
34 Hániʼdii yádiłhił áádóó nahasdzáán baa haʼniih leʼ. Hániʼdii tónteel índa biiʼ naaldeehii nináneelʼą́ąjįʼ tʼáá ałtso Bóhólníihii yaa dahaniih leʼ.
35 Háálá Diyin God éí Záíyangi kin haalʼáhígíí yisdéidoonił, áádóó Júdahgi kin hadaasʼáago ánéidoodlííł. Áko bá nidaalʼaʼí ákwii kéédahatʼı̨́į doo áádóó daabí dooleeł.
36 Bá nidaalʼaʼí náás ahoolchííłgóó daabí dooleeł. Áádóó Diyin God bízhiʼ ayóóʼádayóʼníinii ákwii kéédahatʼı̨́į dooleeł.
Footnotes
^ Dáńʼdítı̨́įhgi éí aa dahwiinítʼı̨́įgi jiníigo óolyé.
