Psalm 86:1-17
Diyin God náásgóó aa aʼááh nízin dooleełgi biniyé sohodizin
86 Bóhólníihii nílíinii, shichʼįʼ yaa ánínéehgo shichʼįʼ ééhoonísįįh, háálá shaa hojoobáʼí áádóó hojoobaʼ hoséłʼą́.
2 Shiiʼ sizíinii baa áhólyą́, háálá Diyin God bikʼehgóó áníshtʼé; shiDiyin God nílíinii, ná naalʼaʼí naa dzólíii nishłı̨́įgo yisdáshíłteeh.
3 Bóhólníihii, shaa jiiníbaah, háálá shá bíighah nánooshkąąh.
4 Ná naalʼaʼí nishłíinii, shiiʼ sizíinii bił hózhǫ́ǫgo ánílééh, háálá, Bóhólníihii nílíinii, shiiʼ sizíinii naʼólíigo nichʼįʼ déezʼı̨́ı̨́ʼ.
5 Háálá ni, Bóhólníihii nílíinii, yáʼátʼéehii nílı̨́ áádóó ádił oodzííʼ áyóóʼahidíʼaah áádóó nídanookąąhii tʼáá ałtso bichʼįʼ nił hadleeʼgo baa aʼááh nínízin.
6 Bóhólníihii nílíinii, shisodizin shá diitsʼı̨́ı̨́h; chánahgo nánooshkąąhígíí baa ákonínízin.
7 Shichʼįʼ hodiisʼnááʼ bijı̨́įdi nániideeshkąął, háálá shichʼįʼ énáhodíísįįł.
8 Bóhólníihii nílíinii, diyin dabidiʼníinii doo łaʼ nigi átʼée da, índa naanish danilíinii doo łaʼ ninaanishígi ádaatʼée da.
9 Bóhólníihii nílíinii, ałʼąą dineʼé ádeinilaii tʼáá ałtso nidááhdę́ę́ʼ nidahakáahgo nichʼįʼ nidahałáa doo, áádóó nízhiʼ bee niʼdójíigo naa dahaniih doo.
10 Háálá ni ayóó ánítʼé, áádóó tʼóó bikʼedaʼayóii baa naniná; tʼáá ni tʼéí Diyin God nílı̨́.
11 Bóhólníihii nílíinii, nikʼehgo áhootʼéii bínashiníłtin; nitʼáá aaníinii bee hinishnáa doo; nízhiʼ dinisin doo biniyé shijéí biiʼdóó tʼááłáʼí bee nitséskeesgo áshílééh.
12 Bóhólníihii shiDiyin God nílíinii, nichʼįʼ ahééh nisin doo, áádóó shijéí tʼáá átʼé bee nízhiʼ baa hashniihgo ahoolʼáa doo.
13 Háálá ayóó átʼéego shaa aʼááh nínízin, áádóó chʼı̨́įdiitah nihoneelʼą́ą́dę́ę́ʼ shiiʼ sizíinii háíníłtı̨́.
14 Diyin God nílíinii, diné ádaa dahaʼniihii shichʼįʼ nídahidiikai. Áádóó diné doo daatsʼíidii, doo bilą́ąjįʼ honílǫ́ǫ́góó ádanósinii dashidiyoołhééł biniyé hadashineeztą́ą́ʼ.
15 Nidi ni, Bóhólníihii nílíinii, Diyin God tʼáá íiyisí aa aʼááh nízinii áádóó joobaʼii índa nízaadgóó haʼólníinii nílı̨́; aa aʼááh hasinii áádóó tʼáá aaníinii nił dleeʼ.
16 Shichʼįʼ náníyisgo shaa jiiníbaah; shí ná naalʼaʼí nishłı̨́įgo nee shidziilgo áshílééh, áádóó asdzání ná naalʼaʼí biyáázh nishłı̨́įgo yisdáshíłteeh.
17 Shichʼijí nílı̨́įgo bee bééhózinii łaʼ shichʼįʼ bééhonísįįh, áko diné shikʼee dadiniihii éí dayiiłtsą́ągo tʼóó ádaa yádadínóodzįįł, háálá shíká íínílwod áádóó haʼííníshníigo áshiinilaa, Bóhólníihii nílíinii.
