Psalm 94:1-23
94 Bóhólníihii Diyin God, kʼéédidííʼníiłii nílíinii, Diyin God kʼéédidííʼníiłii nílíinii, ííshjání íʼdílnééh!
2 Nihokááʼ dineʼé yá nihwiiʼaahii nílíinii, díldzíiłgo diné ádaa dahaʼniihii kʼéédahodídleʼ!
3 Bóhólníihii nílíinii, haa nízahjįʼshąʼ diné doo yáʼádaashóonii bił dahózhǫ́ǫgo ádaa dahaʼniih doo?
4 Áshohódliʼ yee hadahadziih índa diné doo ákwii ádaaníiłii tʼáá ałtso ádaa dahaʼniih.
5 Bóhólníihii nílíinii, éí nidineʼé yikʼi naajeeh áádóó diné nííʼ danilíinii yide ádahósin.
6 Asdzání bąąh áhásdįįdii áádóó déʼéyóní índa áłchíní bizhéʼé ádinii nideiłtseed.
7 Nidi nidaʼałtseedii ádaaní, Bóhólníihii díí doo yizdoołtséeł da; Jéíkab biDiyin God nidi díí doo baa ákozdínóozįįł da.
8 Diné bitahgi doo nitsíkeesii nohłíinii, akʼidaʼdoohtįįh! Doo ádahołyáanii, hahgo lá dahodoosąął?
9 Ajaaʼ adiitsʼaʼgo áyiilaii, éí adiitsʼaʼ. Anááʼ áyiilaii, éí ooʼı̨́.
10 Ałʼąą dineʼé yichʼahashkéego neinitinii kʼéhézdon nináʼiidlóós. Ił ééhózin diné yee neinitinii bił ééhózin.
11 Bóhólníihii éí nihokááʼ dineʼé bintsíkees danilíinii tʼáadoo nánídlínígóó bił bééhózin.
12 Bóhólníihii nílíinii, diné nanítinii áádóó bee hosíníłʼáanii bínabiníłtinii, éí bikʼihojidlí.
13 Áko diné doo yáʼádaashóonii bá hahwiisʼniljįʼ, bikʼijiinídlíii éí achʼįʼ nahwiiʼná yitsʼą́ą́dóó hanályı̨́įhgo ádíílííł.
14 Háálá Bóhólníihii bidineʼé doo yóóʼiidoołkał da áádóó diné hóóʼ danilíinii doo yóóʼazhdidooʼáał da.
15 Jó, bee nihodiitʼaahii tʼáá ákogi átʼé nídoodleeł, áko bijéí yee tʼáá ákogi ádaatʼéii yikʼehgóó ádaaníił doo.
16 Diné ádił daʼílzíihiishąʼ háí shá yichʼįʼ náádiiʼnah? Doo ákwii ádaaníiłiishąʼ háí shá yichʼą́ą́h sizı̨́į doo?
17 Bóhólníihii doo shíká eelwodgóogo shiiʼ sizíinii tʼáadoo hodíínaʼí bił hodiiyeel doo nítʼééʼ.
18 Kodi ałtádiisghaas, dííniidgo, Bóhólníihii nílíinii, aa aʼááh nínízinii bee de áshíínísin.
19 Shijéí biʼdiiłʼáhígíí ląʼí yileehgo nitsʼą́ą́dóó bee hadaʼahóníinii shiiʼ sizíinii tʼáá íiyisí yił náhooshǫǫł.
20 Naatʼáanii doo yáʼáshóonii, éí bee hazʼáanii yee doo yáʼátʼéehii yinahaʼáii, daʼ éísh tʼáá bił ałchʼodííʼniił?
21 Diné tʼáá ákogi átʼéego hináanii yiniyé ałhínéikah, índa diné doo ádihodiiltʼiʼii dadootsaałgo bidił doonahjįʼ yá nídahwiiʼaah.
22 Nidi Bóhólníihii bineʼ nehesdzíihii nilı̨́; shiDiyin God éí tsé bineʼ ahinishchéehii nilı̨́.
23 Tʼáá bí doo ákwii ádáátʼįįdii bikʼijįʼ nídadoodleełgo íidoolííł áádóó tʼáá bí doo yáʼáshónígi ádáátʼįįdii biniinaa ábidiʼdooldįįł. Tʼáá aaníí Bóhólníihii nihiDiyin God ábidoołdįįł.
