Revelation 13:1-18
13 Áko tónteel bibąąhgi séítahdóó yiizįʼ. Nítʼééʼ tónteel biyiʼdę́ę́ʼ naaldlooshii naayééʼ nilíinii łaʼ bideeʼ neeznáá áádóó bitsiitsʼiin tsostsʼid naatʼá chʼah bideeʼ tʼáá neeznáá binídaaztʼiʼgo, índa yízhí bee Diyin God íʼdílʼíinii dabitsiitsʼiin tʼááłáʼí níʼánígo bikʼidaasdzohgo, haagháahgo yiiłtsą́.
2 Naaldlooshii naayééʼ nilíinii yiiłtsánígíí náshdóítsoh łikizhígíí nahalin, bikeeʼ shash bikeeʼ nahalin, bizééʼ náshdóítsoh bitsiijįʼ ditłʼooígíí bizééʼ nahalin. Áko naʼashǫ́ʼiitsoh tʼáá bí yee bidziilii áádóó yikááʼdóó nahaʼáii índa bee bóhólnííh ayóó átʼéii naayééʼ nilíinii yeidiníʼą́.
3 Bitsiitsʼiin łaʼ tʼáá bidiyoołhéełgo kʼáákʼeh nítʼééʼ nahalin, nidi tʼáá bidiyoołhéełgo kʼáákʼeh nítʼéeʼii náádzííʼ lá, áko nihokááʼ dineʼé tʼáá átʼéé nítʼééʼ tʼóó bił adahayóigo díí naaldlooshii naayééʼ nilíinii yikééʼ dah diikai.
4 Diné éí naʼashǫ́ʼiitsoh yichʼįʼ nidahasá, háálá bibee óhólníihii éí naayééʼ yeidiníʼą́. Áádóó, Háishąʼ naaldlooshii naayééʼ nilíinii yił aheełtʼé? Háishąʼ yił ahidoogą́ąłgo yíneelʼą́? daaníigo naayééʼ yichʼįʼ nidahasá.
5 Saad bee ádaa haʼniihii índa saad bee daʼódziihii naaldlooshii naayééʼ nilíinii bizaalyáago dízdiindóó baʼaan naaki nídeezidjįʼ bee bóhólníihgo yee ááníił doogo baa deetʼą́.
6 Áko Diyin God yíídóodzihgo házhiʼ áádóó kééhojitʼı̨́įdi índa yáʼąąshdi kéédahatʼíinii ałdóʼ yíídóodzihgo bizééʼ ąą áhoolaa.
7 Áádóó Diyin God bidiyı̨́ı̨́ʼ yichʼįʼ anaaʼ áhodoolííł índa yikʼeh didoodleełgo baa deetʼą́. Ałʼąą dineʼé áádóó nihokááʼ dineʼé danilíinii áádóó bizaad ałʼąą ádaatʼéii índa ałʼąą dineʼé bił dah nidahazʼáanii tʼáá ałtso bee bóhólníih doogo baa deetʼą́.
8 Áko nahasdzáán bikáaʼgi kéédahatʼíinii tʼáá ałtso, nahasdzáán niitʼą́ą́dę́ę́ʼ Dibé Yázhí seesyı̨́ nilíinii iináájí naaltsoos bíhígíí biiʼ tʼáadoo dabízhiʼ ádaalyaii, naayééʼ yichʼįʼ nidahodoołaał.
9 Tʼáá háiida dazʼdiitsʼaʼii hániʼdii ajíistsʼą́ą́ʼ!
10 Tʼáá háiida yisnááh abiʼdidoolníłígíí éí hániʼdii yisnááh jílı̨́į doo; tʼáá háiida diltłish bee ajiisxínígíí hániʼdii diltłish bee hodiʼyoolyééł. Díí biniinaa Diyin God bidiyı̨́ı̨́ʼ dajílíinii tsʼídá hadaʼjólníi doo áádóó aa deijólíi doo.
11 Nítʼééʼ náánáłaʼ naaldlooshii naayééʼ nilíinii nahasdzáán biyiʼdę́ę́ʼ haagháahgo náánéiłtsą́. Dibé yázhí nahalingo bideeʼ naaki, áádóó naʼashǫ́ʼiitsohgi átʼéego haadzííʼ.
12 Naaldlooshii naayééʼ nilíinii átséhígíí bee bóhólníhígíí tʼáá binááł tʼáá ałtso yee ádínááhólníihgo yaa naaghá. Naaldlooshii naayééʼ nilíinii átséhígíí tʼáá bidiyoołhéełgo kʼáákʼeh nítʼéeʼgo náádzíʼígíí nahasdzáán índa bikáaʼgi kéédahatʼíinii bichʼįʼ nidahałáago áyósin.
13 Álílee kʼehgo bee éédahózinii ayóó ádaatʼéii yaa naaghá, azhą́ yádiłhił biyiʼdę́ę́ʼ nidi diné binááł nahasdzáán bikáaʼjįʼ kǫʼ hadah hidinaadgo áyoolííł.
14 Áádóó naaldlooshii naayééʼ nilíinii nihokááʼ dineʼé yideezloʼ, Naayééʼ diltłish bee tʼáá bidiyoołhéełgo kʼáákʼeh nítʼéeʼii nidi hinááh násdlı̨́įʼii beʼelyaago ádaahłééh, yiłníigo, naaldlooshii naayééʼ nilíinii binááł álílee kʼehgo bee éédahózinii yaa naagháa doogo baa deetʼánígíí bee nihokáaʼgi kéédahatʼíinii yinaʼaloʼ.
15 Índa naaldlooshii naayééʼ nilíinii beʼelyaii yee nídídzihii yiih yiyííláago yáłtiʼgo nidi íidoolíiłgo baa deetʼą́ áádóó naaldlooshii naayééʼ nilíinii beʼelyaii doo bichʼįʼ nidahojiłáa daígíí nidahoʼditseed dooleełgo baa deetʼą́.
16 Índída aʼohgo ádaatʼéii índa ayóó ádaatʼéii, áádóó daʼatʼíinii índa badahojoobáʼíii, áádóó doo naalteʼ danilíinii índa naalteʼ danilíinii tʼáá ałtso dabílaʼ nishʼnáájí éí doodaléiʼ dabítáaʼgi bídadiʼdoodliłgo yee hoołʼaʼ.
17 Áko łaʼda doo nizhdiʼyoołnih da áádóó doo haa nidiʼyoonih da, díí naaldlooshii naayééʼ nilíinii bízhiʼ éí doodaléiʼ bízhiʼ beʼééltaʼii bee hóʼdiidlidgo tʼéiyá.
18 Díí hódzą́ átʼé. Ééʼdiʼyiitįįhii bíniʼdii naaldlooshii naayééʼ nilíinii beʼééltaʼii yééʼdeetįįh,* háálá éí nihokááʼ dineʼé beʼééltaʼii átʼé, beʼééltaʼii hastą́ądi neeznádiindóó baʼaan hastą́diindóó baʼaan hastą́ą́h.
Footnotes
^ Íídą́ą́ʼ diné tʼóó ahayóí díí éí Romedi aláahgo naatʼáanii Nííro (Nero) ááhyiłní, danízin nítʼééʼ, háálá bízhiʼígíí éí Rome dineʼé beʼééltaʼii kʼehgo díí ééltaʼii sinilígíí bíighahgo yééltaʼ.
