Revelation 18:1-24
18 Kódzaadóó bikʼijįʼ náánáłaʼ diyingo naalʼaʼí ayóó átʼéego bóhólníihgo, yáʼąąshdę́ę́ʼ hadah hooleełgo yiiłtsą́. Bee bitsʼádiʼnílíidii nahasdzáán bikáaʼgi bee hoosʼįįd.
2 Áko kóníigo ayóó íitsʼaʼgo hadoolghaazh, Bábilan, ayóó áhootʼéii ahiih náhwiiłdaas, ahiih náhwiiłdaas! Ákwii níłchʼi bidaʼiiníziinii kéédahatʼı̨́ silı̨́ı̨́ʼ; níłchʼi danchxǫ́ʼígíí ákwii ahanináhákááh índa nidaatʼaʼii danchxǫ́ʼógo doo daaldinii tʼáá ałtso ákwii ahanináhákááh silı̨́ı̨́ʼ.
3 Háálá wáin bee tsiʼnaʼadáhígi átʼéego ałʼąą dineʼé bił dah nidahazʼáanii tʼáá ałtso tʼóó báhádzidgo naʼageh yee tsiʼnaagháii bił tsiʼnidziskai. Áádóó nahasdzáán bikááʼgóó aláahgo naatʼáanii danilíinii hoł ahá nidaʼasgeh, índa jitʼíinii tʼóó bee nijinéego binahjįʼ nahasdzáán bikááʼgóó diné baa nidaʼiiniihii daʼatʼı̨́ daazlı̨́ı̨́ʼ.
4 Ákohgo yáʼąąshdę́ę́ʼ náánáłaʼ iinééʼ kóníigo náádisétsʼą́ą́ʼ,
Bibąąhági átʼéii doo bił baa nidaahkai da doo biniyé,índa bee bichʼįʼ nahoʼdiilnáanii doo bił ałtsʼą́ą́ʼ daʼnołkʼiiz da doo biniyé bitsʼą́ąjįʼ chʼíhóhkááh, shidineʼé!
5 Háálá bibąąhági átʼéii yáʼąąsh bíneelʼą́ silı̨́ı̨́ʼ,áádóó Diyin God éí doo ákǫ́ǫ́ ájíítʼįįdígíí yénáálniiʼ.
6 Tʼáá ájíítʼįįdígíí bikʼehgo áádóó ahą́ą́h nániidlá bikʼehgo kʼéédahodohdlééh.Bee adlání biiʼ ałtah azníziidii naakidi ákónánéiltʼeʼgo há ałtah nánóhdzííd.
7 Ádaa hojiʼniih áádóó jitʼíinii tʼóó bee nijizneʼígíí tʼáá éigi áníłtsogo atíńdahohdlééh áádóó atíńdizhnidleehgo ádahohłééh.Háálá tʼáá hayiʼídi kójíní, Asdzą́ą́ naatʼááh nishłı̨́įgo dah sédá!Doo bąąh áhásdįįdii nishłı̨́į da,atínáhodinidleeh éí tsʼídá doo yideestséeł da!
8 Éí bąą bee hachʼįʼ nahodiyoolnaałii łaʼa jı̨́ hakʼi hwiidooleeł, éí aniné, atínáhodinidleeh, índa hodichin,áádóó kǫʼ bee ahodiʼdoolkʼą́ą́ł,háálá Bóhólníihii Diyin God hainítʼíinii ayóó ábóodziilii nilı̨́.
9 Áko nahasdzáán bikááʼgóó aláahgo naatʼáanii danilíinii bił ahá nidaʼdzisgeh áádóó bił tʼóó ádee nidadzisʼneʼígíí éí jidookʼą́ąłgo halid dayiiłtsą́ągo, haa atíńdadinidleeh índa ákʼidadiitʼaah doo.
10 Éí bee atíhoʼdiilyaaígíí yéédaaldzidgo ayóó ánízáádę́ę́ʼ naazı̨́įgo kódaaní, Héiʼ! Héiʼ! Bábilan ayóó átʼéego kin haalʼá nílíinii! Tʼááłáhídi ahééʼílkidjįʼ atíńdiilyaa!
11 Nahasdzáán bikááʼgóó baa nidaʼiiniihii doo łaʼda baa naʼiiłniih da silı̨́įʼgo biniinaa tʼóó haa daachxa áádóó haa atíńdadinidleeh;
12 doo łaʼda óola nayiiłniihí da, béésh łigaii, tsé daʼílíinii áádóó diichiłída, áłtsʼóózígo yisdizígíí bee naʼatʼą́hí łigaii ditsʼidgo ályaii, naakʼąʼ tsídídééh nahalinígíida, naʼatʼą́hí daʼdijihígíí áádóó naakʼąʼ ałchxíiʼda, tsin łikání halchinii áádóó áívori* bee ádaalyaii, tsin daʼílíinii, béésh łitsoiida, béésh índa tsé nitłʼiz nizhóníii bee ádaalyaii tʼáá ałtso,
13 sínaman, spáis, tsin bijeeh dilidgo łikání dahalchinii, tłah ílíinii, tsin bijeeh łikání halchinii fránkinsens wolyéii, wáin, akʼah ílíinii, akʼáán dibahí áádóó tłʼoh naadą́ąʼda, béégashii áádóó dibéda, łı̨́ı̨́ʼ áádóó tsinaabąąs bijáád naakiígíí, índa naalteʼ danilíinii, azhą́ diné biiʼ sizíinii nidi doo łaʼda nayiiłniihí da.
14 Nídantʼı̨́įhii éí niiʼ sizíinii tʼáá íiyisí bił bidááhání yę́ę nitsʼą́ąjįʼ silı̨́ı̨́ʼ, áádóó chʼiyáán ałtaanáskąądí índa bee nił yáʼáhootʼéehgo dah yílééł yę́ę doo shónéidííłtʼeełgóó nitsʼą́ąjįʼ silı̨́ı̨́ʼ!
15 Díí naalyéhé baa nidahaniihii hatsʼą́ą́dóó daʼastʼįįdii, bee atíhoʼdiilyaaígíí yéédaaldzidgo, ayóó ánízáádę́ę́ʼ naazı̨́įgo ayóó íitsʼaʼgo daachxa áádóó atíńdadinidleeh doo,
16 kódaaníigo, Héiʼ! Héiʼ! Ayóó átʼéego kin haalʼáii jílı̨́ı̨́ nítʼééʼ yę́ę áłtsʼóózígo yisdizígíí bee naʼatʼą́hí łigaii ditsʼidgo ályaii, naakʼąʼ tsídídééh nahalingo índa naakʼąʼ ałchxííʼ bee hazhdítʼéii yę́ę, óola, tsé daʼílíinii, índa diichiłí bee nijishchʼąąʼ yę́ę!
17 Éí jitʼínígíí tʼáá ałtso tʼááłáhídi ahééʼílkidjįʼ tʼáá ádzaaí silı̨́ı̨́ʼ! Áádóó bikʼehgo nidaʼaʼeełii áádóó nidaʼałʼeełii binaanish danilíinii, naalnishí danilı̨́įgo bił nidaʼaʼeełii índa táłkááʼgóó naʼiiniʼ yaa nidaakaii, díí tʼáá ałtso nízaadę́ę́ʼ naazı̨́įgo
18 jidookʼą́ąłgo halid dayiiłtsą́ągo, kódaaníigo hadadeeshghaazh, Haʼátʼíí kin haalʼáá shı̨́įshąʼ hógi átʼéego ayóó átʼéego kin haalʼáhígíí yił aheełtʼéé nítʼééʼ?
19 Bitsiiʼ łeezh yikʼídayiighaasgo daachxa índa atíńdadinidleeh; kódaaníigo hadadeeshghaazh, Héiʼ! Héiʼ! Ayóó átʼéego kin haalʼáii jílı̨́ı̨́ nítʼééʼ yę́ę ákwii táłkáaʼdi tsinaaʼeeł neisnilii tʼáá ałtso jitʼínígíí yee daʼastʼįįdii! Éí tʼááłáhídi ahééʼílkidjįʼ tʼáá ádzaaí dzizlı̨́ı̨́ʼ!
20 Yáʼąąshii nílíinii, Diyin God bidiyı̨́ı̨́ʼ danohłíinii, daalʼaadii danohłíinii índa Diyin God bá dahołneʼii baa nihił dahózhǫ́ǫ leʼ! Háálá Diyin God nihá hainístʼįįdgo há nihoníʼą́!
21 Nítʼééʼ diyingo naalʼaʼí ayóó ábóodziilii tsé bee akʼáhí ayóó áníłtsoígíí nahalingo tsé léiʼ néidiiʼą́ągo kóníigo tónteel biyiʼ góneʼ yee adzííłneʼ, Kótʼéego Bábilan ayóó átʼéego kin haalʼáii jílíinii tʼáá naʼníleʼdii nikíhodidooltsxis, áádóó tsʼídá doo hwénáhodoodzįįł da.
22 Tsin bee nidaʼaʼnéii, sin yee nidaanéii, bee íʼdílzoołí yee nidaanéii, índa béésh dilní bee íʼdílzoołí yee nidaanéii nidaanéego nitahgi tsʼídá doo náádidootsʼı̨́įł da; tʼáadoo leʼé dayiichįįhgo ádeiłʼíinii nitahgi tsʼídá doo néidooltséeł da; tsé bee akʼáhí akʼáago nitahgi tsʼídá doo náádidootsʼı̨́įł da!
23 Bee hoolʼiní diltłiʼii nitahgi tsʼídá doo náádiʼníłdíin da doo; iiyehii índa báʼiigehii biinééʼ nitahgi tsʼídá doo náádidootsʼı̨́įł da. Jó, ná nidaʼiiłniihii nahasdzáán bikááʼdóó diné ayóó ádaatʼéii danilı̨́ı̨́ nítʼééʼ, áádóó ninaʼadloʼgo álílee bee nahółáá nítʼééʼ yę́ę bee ałʼąą dineʼé bił dah nidahazʼáanii tʼáá ałtso bidaʼdeesdloʼ.
24 Diyin God yá dahalneʼii áádóó Diyin God bidiyı̨́ı̨́ʼ índa nahasdzáán bikáaʼgi tʼáá ałtso nidaaztseedígíí bidił éí kin haalʼáagi bééhoozin.
Footnotes
^ Áívarii jiníigo chı̨́ı̨́h yee adilohii biwózhahí jiníigo óolyé.
