Revelation 3:1-22
3 Sárdisgi daʼoodlání áłah nádleehii bidiyingo naalʼaʼí kótʼéego bichʼįʼ akʼeʼíłchí: Diyin God biNíłchʼi tsostsʼidgoígíí índa sǫʼ tsostsʼid dah yoojihii kóní:
Baa nidaahkaii shił bééhózin; dahinohnáago danihiʼdójíi nidi dasinoonáago átʼé.
2 Chʼéédanohdzííd, daadziihii kʼadę́ę daninée nidi dabidziilgo áńdaahdleʼ, háálá baa nidaahkaii shiDiyin God binááł tʼah doo hadaałtʼéego yiistséeh da.
3 Áko naʼnitin nihee dahazlı̨́ʼígíí áádóó dasidootsʼą́ʼígíí béédaałniihgo dayínóhtąʼ, índa łahgo átʼéego tsínáhodiikees bidaʼohłééh. Doo chʼéédanohdzíídgóogo aniʼįįhiigi átʼéego deeshááł, áko hoolzhishgi nihaa deesháłígíí tsʼídá doo nihił béédahózin da doo.
4 Nidi Sárdisgi nihitahgóó tʼah doo biʼééʼ deiłchǫǫhii tʼáá díkwíí dabízhiʼ tʼahdii béédahózin; éí algaigo hadadítʼéego* shił yikah doo, háálá éí yą́ą́h danilı̨́.
5 Tʼáá akʼeh deesdlı̨́ʼígíí algaigo hadadítʼée doo, áádóó iináájí naaltsoos* biyiʼdóó házhiʼ tsʼídá doo kʼééʼdeeshchǫǫł da. ShiTaaʼ índa bidiyingo nidaalʼaʼí dabinááł házhiʼ bee ádee hadideesdzih.
6 Tʼáá háiida dazʼdiitsʼaʼii Níłchʼi Diyinii éí daʼoodlání áłah nídaadleehii kwííłníigo yee yił halneʼígíí hániʼdii dajíistsʼą́ą́ʼ.
Filadélfiyagi daʼoodlání áłah nádleehii bichʼįʼ haneʼ ályaa
7 Filadélfiyagi daʼoodlání áłah nádleehii bidiyingo naalʼaʼí kótʼéego bichʼįʼ akʼeʼíłchí: Diyin nilíinii, tʼáá aaníinii nilíinii, David bibee ąą ńdítı̨́hí neitinii, ąą yidinítą́ągo łaʼda doo dáńʼdiʼdoołkałii índa dádiʼníłkaalgo łaʼda doo ąą néididootı̨́įłii* kóní:
8 Baa nidaahkaii shił bééhózin. Jóʼakon, nihidáahgi dáádílkał ąą átʼéego áshłaa, éí łaʼda doo dáʼdółkaał átʼée da; bee adziilii tʼáá áłtsʼíísígo nihee hólónígíí shił bééhózin, nidi shizaad bikʼeh dahonołʼı̨́įgo, Házhiʼ doo bééhasin da, tʼáadoo dashidooniid da.
9 Jóʼakon éí, Jew dineʼé daniidlı̨́, daaníigo nidi doo éí danilı̨́ı̨́góó dabiyoochʼíidii níłchʼi bidaʼiiníziinii binanitʼaʼí yaa áłah nádleehii danilíinii, éí nihaa dookahgo nihiyaajįʼ nitsidadidoogohgo ayóóʼádanihííníshʼnínígíí bił béédahózingo ádeeshłííł.
10 Nízaadgóó hadaʼíínółní, nihidishnínígíí bikʼeh dahonołʼı̨́įgo bąą shí ałdóʼ nahasdzáán tʼáá siʼą́ą́ nítʼééʼ achʼįʼ nahwiiʼná bee bichʼįʼ hoolzhishígíí, éí nihokááʼ dineʼé bee bóhontááh átʼéii, bitsʼą́ąjįʼ nihííníshtąʼ doo.
11 Jóʼakon, tsı̨́įłgo deeshááł. Diyin God kʼehgo nihee dahólónígíí yéego dayínóhtąʼ, áko nihinaatʼá chʼah łaʼda doo nihighaidootʼáał da.
12 Tʼáá akʼeh deesdlı̨́ʼígíí shiDiyin God bikin biiʼ sohodizin biyiʼ áyah niiʼáii nahojílingo áhodeeshłííł, áko áádóó doo chʼínáázhdoodáał da, áádóó shiDiyin God bízhiʼ, índa shiDiyin God bikin haalʼáii bízhiʼ, éí Jerúsalem ániidíii yáʼąąshdę́ę́ʼ shiDiyin God bitsʼą́ą́dóó hadahodooleełii, índa tʼáá shí shízhiʼ ániidíígíí hakáaʼgi bee bikʼeʼdeeshchííł.
13 Tʼáá háiida dazʼdiitsʼaʼii Níłchʼi Diyinii éí daʼoodlání áłah nídaadleehii kwííłníigo yee yił halneʼígíí hániʼdii dajíistsʼą́ą́ʼ.
Leiyodisíyagi daʼoodlání áłah nádleehii bichʼįʼ haneʼ ályaa
14 Leiyodisíyagi daʼoodlání áłah nádleehii bidiyingo naalʼaʼí kótʼéego bichʼįʼ akʼeʼíłchí: Tʼáá Ákótʼée Dooleeł nilíinii,* éí baʼahódlíigo tʼáá aaníí halneʼii, tʼáá éí Diyin God ádayiilaii bee deeztʼiʼii kóní:
15 Baa nidaahkaii shił bééhózin; doo dasinoohkʼaz da índa doo dasinoohdoh da. Dasinoohkʼaz, doodaiiʼ dasinoohdoh dooleeł yę́ę nisin!
16 Áko doo dasinoohkʼazgóó, doodaiiʼ doo dasinoohdohgóó, nidi tʼóó dasoozílígo tʼóó nihídideeshkoh.
17 Háálá, Ashtʼı̨́, asistʼįįd, tʼáadoo bídin nishłíní da, dadohní, nidi hojoobaʼ ádanohtʼéego, áádóó nihaa dayíníigo, áádóó téʼéʼı̨́ danohłı̨́įgo, áádóó doo daʼohʼı̨́ı̨́góó índa tʼáá łichíʼígo nidaahkaígíí doo nihił béédahózin da.
18 Éí bąą kónihidishní, daʼdoohtʼįįł biniyé kǫʼ bee óola ániidí ánályaii shaa nidahołniih, tʼóó baa yáhásingo tʼáá łichíʼígo nidaahkaígíí doo yitʼı̨́į da ádoolníłígíí biniyé ééłgaii bee hadadidoohníiłii ałdóʼ shaa nidahołniih, áádóó daʼohʼı̨́į dooleeł biniyé tłah anááʼ bąąh álʼíinii ałdóʼ shaa nidahołniih.
19 Ayóóʼádaóshʼníinii nídadishteh índa atídaashłeʼgo nidanishtin; éí bąą yéego ádaahtʼı̨́ índa łahgo átʼéego tsíńdahidohkeesgo yéego bídanoohdlı̨́.
20 Jóʼakon, chʼéʼétiindę́ę́ʼ sézı̨́įgo dáádílkał nánístsʼin; tʼáá háiida shidiiztsʼą́ʼígíí índa ąą yidinítánígíí bił yah adeesháałgo bił adeeshı̨́ı̨́ł índa shił adooyı̨́ı̨́ł.
21 Tʼáá akʼeh deesdlı̨́ʼígíí shí akʼeh déshdlı̨́įʼgo shiTaaʼ bibikááʼdóó nahatʼáii bikáaʼgi bił dah níkéhígi átʼéego, shibikááʼdóó nahatʼáii bikááʼdóó shił dah dínóokeełgo baa dideeshʼááł.
22 Tʼáá háiida dazʼdiitsʼaʼii Níłchʼi Diyinii éí daʼoodlání áłah nídaadleehii kwííłníigo yee yił halneʼígíí hániʼdii dajíistsʼą́ą́ʼ.
Footnotes
^ Łigaigo hadadítʼé, nínígíí éí akʼeh hodeesdlı̨́ı̨́ʼ áádóó ił hózhǫ́ índa chin bąąh ádinii yaa halneʼ.
^ Iináájí naaltsoos yiłnínígíí éí Diyin God tʼáá ałtso baʼáłchíní dabízhiʼ bikʼidaasdzohgo yisʼą́. Rev. 13:8; 20:12, 15.
^ Mesáíyah éí David bitsʼą́ą́dóó yizhchíinii óhólnííh bąąh siláii éí Diyin God yee haadzíiʼii bidineʼé yinootʼáał doo, níigo ání. Is. 22:22; Job 12:14.
^ Tʼáá Ákótʼée Dooleeł nilíinii jiníigo éí Christ biníkááʼ góneʼ Diyin God yee hahaasdzíiʼii tʼáá átʼé yiʼdoolííł.
