Revelation 8:1-13
8 Dibé Yázhí nilíinii bee ídaʼdiiljeehí naaltsoos bee bidádaʼdeeshjéeʼii tsostsʼid góneʼígíí ąą yidinízǫ́ǫzgo, yáʼąąshdi tádiin dahalzhinjįʼ daatsʼí hodiiyeel.
2 Nítʼééʼ diyingo naalʼaʼí tsostsʼidgo Diyin God yidááhdę́ę́ʼ naazı̨́įgo, índa béésh łitsoii dilní tsostsʼidgo bitaasʼniiʼgo yiiłtsą́.
3 Náánáłaʼ diyingo naalʼaʼí óola łeetsʼaaʼ biyiʼdóó tsin bijeeh dilidgo łikání halchinii dilidii dah yooʼáałgo, bikááʼ nááʼiiniihí yíighahjįʼ niníyáago yiizįʼ. Éí óola bikááʼ nááʼiiniihí bikááʼdóó nahatʼáii bidáahgi siʼánígíí bikáaʼgi tsin bijeeh dilidgo łikání halchinígíí Diyin God bidiyı̨́ı̨́ʼ tʼáá ałtso bisodizin yił ałtaanéidooził biniyé ląʼí baa yíjaaʼ.
4 Áádóó diyingo naalʼaʼí bílákʼeedóó éí tsin bijeeh dilidgo łikání halchinii bilid Diyin God bidiyı̨́ı̨́ʼ bisodizin bił, Diyin God bidáahjįʼ iʼiijooł.
5 Diyingo naalʼaʼí éí bikááʼ nááʼiiniihí bikááʼdóó éí łeetsʼaaʼ kǫʼ yiiʼ haidééłbįįdgo, nahasdzáán bikááʼgóó ayííłkaad, áko daʼdiʼní, áádóó iinééʼ dadiistsʼą́ą́ʼ, áádóó atsiniltłʼish anídahataʼ índa niʼ nahaʼná.
Dilní bee ádahodooʼniid
6 Nítʼééʼ diyingo nidaalʼaʼí tsostsʼidgo dilní tsostsʼid bikʼeh nítą́ągo dah dayíjáhígíí yee ádadidooniiłgo hashtʼeʼádadiilyaa.
7 Diyingo naalʼaʼí átséhígíí bidilní yee ádííniidgo, bikééʼdę́ę́ʼ níló índa kǫʼ, dił bił ałtahgo, nahasdzáán bikáaʼjįʼ nááłtą́. Áko nahasdzáán tááʼgóó ałtsʼáádzooígíí tʼááłáhígo haadzo ałtso díílid, áádóó tsin tááʼgóó ałtsʼáádzooígíí tʼááłáhígo haadzo adííkʼą́ą́ʼ, índa tłʼoh dayítsoii ałtso adahideezkʼą́ą́ʼ.
8 Diyingo naalʼaʼí naaki góneʼígíí bidilní yee ádííniidgo, haʼátʼíí shı̨́ı̨́ dził ayóó áníłtsogo dookʼą́ą́ł nahalingo tónteel biyiʼ góneʼ ahoolghan, áko tónteel tááʼgóó ałtsʼáádzooígíí tʼááłáhígo haadzo dił silı̨́ı̨́ʼ,
9 tónteel biyiʼdi dahináanii tááʼgóó ałtsʼááʼnilii tʼááłáhígo sinil bíighahgo daneezná, índa tsinaaʼeeł tááʼgóó ałtsʼááʼnilii tʼááłáhígo sinil ásdįįd.
10 Diyingo naalʼaʼí tááʼ góneʼígíí bidilní yee ádííniidgo, yáʼąąshdę́ę́ʼ sǫʼ ayóó áníłtso léiʼ, honooyééł dookʼą́łígi átʼéego dookʼą́ąłgo naaltsʼid, éí tooh tááʼgóó ałtsʼáádzooígíí tʼááłáhígo haadzo áádóó tó hadaazlíinii bikʼijįʼ naaltsʼid.
11 Sǫʼ éí Díchʼíiʼii wolyé. Áko tóhígíí tááʼgóó ałtsʼáádzooígíí tʼááłáhígo haadzo díchʼííʼ silı̨́ı̨́ʼ, éí díchʼííʼ silı̨́ʼígíí biniinaa diné ląʼí daneezná.
12 Diyingo naalʼaʼí dı̨́ı̨́ʼ góneʼígíí bidilní yee ádííniidgo, jı̨́honaaʼéí áádóó tłʼéhonaaʼéí índa sǫʼ tááʼgóó ałtsʼáádzooígíí tʼááłáhígo haadzo haa shı̨́ı̨́ daadzaago bił chadahasxéél; jı̨́įgo adinídínígíí tááʼgóó ałtsʼáádzooígíí tʼááłáhígo haadzo bíighahgo doo adinídíin da silı̨́ı̨́ʼ, tłʼéeʼgoígíí ałdóʼ tʼáá ákódzaa.
13 Ákohgo dééʼı̨́ı̨́ʼ nítʼééʼ diyingo naalʼaʼí* léiʼ yá ałníiʼgi yitʼahgo ayóó íitsʼaʼgo áníigo disétsʼą́ą́ʼ, nahasdzáán bikáaʼgi kéédahatʼínígíí bichʼįʼ, Doo hojoobaʼ ájíníi da! doo hojoobaʼ ájíníi da! doo hojoobaʼ ájíníi da! níigo, háálá diyingo nidaalʼaʼí táaʼgo kʼadę́ę dilní yee ádaaniih.
Footnotes
^ Diyin God bizaad tʼáá ałkʼidą́ą́ʼ bee akʼedaʼashchínígíí łaʼ kótʼéego dabikááʼ, atsá.
