Romans 8:1-39
8 Éí bąą kʼad Christ Jesus bił łáʼí dajílíinii tsʼídá tʼáadoo bee há nidahótʼáłí da. Éí doo tsʼísee kʼehgo áhwiinidzinii bikʼehgo dajíkáah da, nidi Níłchʼi Diyinii bikʼehgo dajíkááh.
2 Háálá Christ Jesus bee Níłchʼi Diyinii bitsʼą́ą́dóó iiná bibee hazʼáanii éí bąąhági átʼéii áádóó anoonééł bibee hazʼáanii bitsʼą́ąjįʼ shéidííchid.
3 Háálá łaʼda bee hazʼáanii Mózes baa deetʼáanii yikʼeh hółʼı̨́į dooleeł yę́ęgi chʼééh ííłʼínígíí bąą bee hazʼáanii doo yíneelʼánígíí Diyin God łaʼyiyiilaa. Díí nahasdzáán bikáaʼjįʼ tʼáá bí biYeʼ yiníłʼaʼdą́ą́ʼ nihí nihitsʼíís bąąhági átʼéego bee neiildeehígíí nahalingo bitsʼíís yee níyá. Áko ádił nidaʼayiilzíhígíí biniinaa daaztsą́ągo ádił niʼiidzííh atsʼíís biiʼ hólóonii yá nihoníʼą́.
4 Nihí atsʼíís íinízinii bikʼehgo doo deíníikáahii, nidi Níłchʼi Diyinii bikʼehgo deíníikáahii, bee hazʼáanii áníinii bikʼehgo tʼáá ákogi ádaniitʼée doo biniyé Diyin God biYeʼ yiníłʼaʼ.
5 Háálá tsʼísee kʼehgo áhwiinidzinii yikʼehgo dahináanii éí tsʼísee kʼehgo áhwiinidzinii bíniʼ danilı̨́, nidi Níłchʼi Diyinii íinízinii yikʼehgo dahináanii éí Níłchʼi Diyinii tʼéiyá bíniʼ danilı̨́.
6 Jó, tsʼísee kʼehgo nidzinii éí aniné nináhádleeh, nidi Níłchʼi kʼehgo nidzinii éí iiná índa achʼįʼ hózhǫ́ nináhádleeh.
7 Háálá tsʼísee kʼehgo nidzinii éí Diyin God yeʼanaʼí nilı̨́; éí Diyin God yee hasʼáanii doo yíhółníih da, tʼáá aaníí doo óoneʼ átʼée da.
8 Áko tsʼísee kʼehgo dajiináanii Diyin God doo bił dahojíshǫ́ǫ leʼ átʼée da.
9 Nidi Diyin God biNíłchʼi Diyinii tʼáá aaníí nihiiʼ dahólǫ́ǫgo, tsʼísee kʼehgo doo dahinohnáa da doo, nidi Níłchʼi Diyinii kʼehgo dahinohnáa doo. Diné łaʼda Christ biNíłchʼi Diyinii hwee ádingo éí doo Christ bííʼ jílı̨́į da.
10 Azhą́ ádił oodzííʼ biniinaa nihitsʼíís daninée nidi, Christ tʼáá aaníí nihiyiʼ hólǫ́ǫgo, tsʼídá tʼáá ákogi ádanohtʼé ádanihiʼdiilyaaígíí bąą Níłchʼi Diyinii nihiiʼ hólǫ́ǫgo dahinohná.
11 Diyin God éí Jesus daaztsą́ą́dę́ę́ʼ náábidiisáhígíí biNíłchʼi Diyinii nihiiʼ hólǫ́ǫgo, tʼáá éí Christ Jesus daaztsą́ą́dę́ę́ʼ náábidiisáhígíí biNíłchʼi Diyinii bee nihitsʼíís dadínóonéełii ałdóʼ iiná yeididooʼááł.
12 Éí bąą shikʼisóó, Níłchʼi Diyinii kʼehgo dahiniiʼnáa dooígíí bee nihąąh hadaazʼá, tsʼísee kʼehgo dahiniiʼnáa dooígíí éí tʼáadoo bee nihąąh haojíłí da.
13 Háálá tsʼísee kʼehgo dahinohnáago tsʼídá dadínóohnééł, nidi tsʼísee kʼehgo naałdeehígíí Níłchʼi Diyinii bee tsʼídá nahjįʼ nidasidooʼą́ągo tʼéiyá dahinohnáa doo.
14 Jó, tʼáá ádzíłtso Diyin God biNíłchʼi Diyinii hooʼishii éí Diyin God baʼáłchíní dajílı̨́.
15 Háálá naalteʼ ídlı̨́ı̨́jí bikʼee ił náánáyéeʼgo nitsáhákeesii doo nídadooláa da, nidi Níłchʼi Diyinii bee nihidiʼneeszánígíí nídadiilyá; éí bee Ába,* shiTaaʼ, dadiiʼní.
16 Nihijéí tłʼáahdi Níłchʼi Diyinii tʼáá bí nihiníłchʼi ííłní, Diyin God baʼáłchíní danohłı̨́.
17 Áko baʼáłchíní daniidlı̨́įgo, baʼáłchíní yá dah yooléełii nihííʼ dadooleeł, éí Christ bił ałtsʼą́ą́ʼ daʼniilkʼiiz doo. Christ bił tiʼdahwiiʼnííh ládą́ą́ʼ yee ayóó átʼéii bił ałtsʼą́ą́ʼ daʼniilkʼiiz doo.
Bee ił náhojǫǫłii ee hodooleełígíí
18 Díí kʼad hoolzhishígíí biyiʼ bikʼee tiʼdahwiiʼníihii Christ yee ayóó átʼéii yee ił hóshóonii nihichʼįʼ yitʼíní íidoolíłígíí tʼóó bił ahąąh nidooʼniłgi nidi doo yą́ą́h nilı̨́į da nisin.
19 Háálá Diyin God ádayiilaii tʼáá ałtso Diyin God baʼáłchíní yitʼíní íidoolíiłgi tʼáá íiyisí nidayólíigo yibaʼ ádaatʼé.
20 Háálá ádaalyaii éí tʼáadoo ninádahadleehígóó bá hooʼaʼ, doo tʼáá bíniikʼehgo ádzaa da, nidi Diyin God tʼáá bí bee bóhólníihgo ákótʼéego áyiilaa. Ákondi bíká chohooʼı̨́,
21 háálá Diyin God baʼáłchíní baa hózhǫ́ǫgo béédahideeshchidígi átʼéego ádaalyaii dadidoołdziłígíí adiłdzid bitsʼą́ą́dóó béédahididoochił.
22 Jó, ádaalyaii tʼáá átʼé díí jı̨́įjįʼ ił hodiniih yikʼee nidadiʼniʼgo nihił béédahózin.
23 Nidi ádaalyaii doo éí tʼéiyá ákódaatʼée da, azhą́ nihí ałdóʼ Níłchʼi Diyinii alą́ąjįʼ bee nihikʼihojisdliʼii nidi nidadiiʼniʼgo, Diyin God tʼáá bí baʼáłchíní ánihidoolíiłgo, nihitsʼíís doo bohodééłníígóó íidoolíłígíí bibaʼ ádaniitʼé.
24 Éí bíká nihił chodahooʼínígíí binahjįʼ yisdánihiʼdooʼnil. Jó, daatʼínígíí bíká nihił chodahooʼı̨́įgo éí doo ił chohooʼı̨́ wolyée da. Háálá tʼáá íídą́ą́ʼ jooʼı̨́įgo haʼátʼíishąʼ biniyé bíká hoł chonááhooʼı̨́į doo?
25 Nidi tʼah doo deiiltséehii bíká nihił chodahooʼı̨́įgo tʼóó bibaʼ hadaʼííníilní.
26 Tʼáá ákótʼéego ałdóʼ doo danihidziilígíí éí Níłchʼi Diyinii nihíká análwoʼ. Háálá átʼéegi sodidiilzįįłígíí áádóó bíká sodidiilzįįłígíí doo nihił béédahózingóó saad bee hadiidzihígíí nihee ádingo Níłchʼi Diyinii tʼáá bí tʼáá íiyisí diʼníigo nihá náʼookąąh.
27 Diyin God éí diné bijéí haisíidii éí Níłchʼi Diyinii íinízinii bił bééhózin, háálá Níłchʼi Diyinii éí Diyin God íinízinii bikʼehgo bidiyı̨́ı̨́ʼ yá náʼookąąh.
28 Diyin God ayóóʼádayóʼníinii tʼáá bí yinahazʼáanii bikʼehgo yíká ádííniidígíí bichʼįʼ áhooníłígíí tʼáá ałtso bá yáʼátʼéeh dooleełgo ahindaalnish áyósingo nihił béédahózin.
29 Háálá Diyin God tʼáá átséedi bił bééhózingo náyiizláaʼii biYeʼ yidanóolnin dooleełgo yinahazʼą́, éí alą́ąjįʼ biYeʼ nilı̨́įgo bikʼisóó danilíinii ląʼí dooleeł biniyé.
30 Áádóó éí binahodzizʼáanii ałdóʼ bíká ázhdííniid, áádóó bíká ázhdííniidii ałdóʼ tsʼídá tʼáá ákogi ádaatʼéego bá hadzoodzííʼ, áádóó tsʼídá tʼáá ákogi ádaatʼéego bá hadzoodzíʼígíí éí ałdóʼ ayóó ádaatʼéego ádajiilaa.
Christ Jesus binahjįʼ Diyin God bibee ayóóʼóʼóʼníinii
31 Kódaatʼéhígíí bąą haʼátʼíishąʼ dadidiiʼniił áko? Diyin God nihichʼijí nilı̨́įgo tʼáadoo nihikʼeshdódleʼí da.
32 Diyin God tʼáá bí biYeʼ doo ánéísįįdgóó tʼáá áníiltso nihá ninéidiníʼą́, daʼ doósh éí tʼáá bił tʼáá ałtsoní tʼáá jííkʼe nihaa yiiníił da doo?
33 Diyin God atah yiyiizláaʼgo baʼáłchíní daazlı̨́įʼii háishąʼ tʼáadoo leʼé yee yikʼi hodidooʼááł? Diyin God yeeʼ tsʼídá tʼáá ákogi átʼéego bá hahadziih!
34 Háishąʼ nihaa nídóotʼįįłgo nihá nihodooʼááł? Christ yeeʼ nihá daaztsą́, áádóó daaztsą́ą́dę́ę́ʼ náábiʼdiilzáago kʼad Diyin God binishʼnáájígo dah sidá! Éí tʼáá aaníí nihá náʼookąąhii nilı̨́.
35 Ákoshąʼ, háí Christ ayóóʼánihóʼnínígíí yitsʼánihidoonił? Daʼ achʼįʼ nahwiiʼnáásh? Daʼ tsístłʼah haztʼiʼísh, daʼ atíʼélʼı̨́ı̨́sh, daʼ dichinísh, daʼ téʼéʼı̨́ı̨́sh, daʼ náhádzidísh, daʼ diltłish bee nihiʼdiisyı̨́įgoósh?
36 Tʼáá Diyin God bizaad bee akʼeʼashchíinii ánínígi átʼéego:
Niniinaa shá bíighah nanihiʼditseed,dibé nidootsiłii nidahoniidlingo nihaa nitsáhákees.
37 Dooda lą́ą! Jó, Christ ayóóʼánihóʼníinii bee akʼeh hididleehii biláahdi ádaniitʼéego átʼé!
38 Háálá tʼáadoo shił naaki nilíní shił bééhoozingo tsʼídá tʼáadoo Diyin God yitsʼá nihóníłí da, aniné nidi doo yíneelʼą́ą da, iiná nidi dooda, diyingo nidaalʼaʼí nidi dooda, bídahólníihii nidi dooda, bee adziilii nidi dooda, kʼad dahólóonii nidi dooda, dahodooleełii nidi dooda,
39 dego ahoolʼáhígíí índa yaago ahoolʼáhígíi nidi dooda, tʼáadoo leʼé ádaalyaii nidi tʼáá ałtso, Diyin God yee ayóóʼánihóʼníinii Christ Jesus nihiBóhólníihii bee hólóonii yitsʼánihidooniłgi doo yídaneelʼą́ą da.
Footnotes
^ Ába, jiníigo éí Hííbrew bizaad kʼehgo, Shizhéʼé nílíinii, jiníigo óolyé. Mk. 14:36; Gal. 4:6.
