Jesus éí Béthanii hoolyéegi bikʼis táaʼgo kéédahatʼı̨́. Díí éí Lázaras dóó bilahkéí Mary dóó Martha. Łah Jesus Jórdan tooh nílínígíí wónaanídi nijigháago, Mary dóó Martha haneʼ hachʼįʼ áyiilaa. ‘Lázaras yéigo bitah honiigai. Tsı̨́įłgo nihaa nínááh.’ Ndi Jesus doo ákǫ́ǫ́ tsı̨́ı̨́ł silı̨́įʼ da. Bił hóoneʼdóó naaki yiską́ągo índa bídahoołʼaahii ííłní: ‘Tįʼ, Béthaniigóó diikah. Lázaras ałhosh, éí chʼéédeesił.’ Daalʼaadii ádaaní: ‘Lázaras ajiłhoshígíí bee yáʼátʼééh nízhdoodleeł.’ Jesus éí Lázaras daaztsą́ níigo hazhóʼó hoł hoolneʼ.

Lázaras yóó ábiʼdiilyaadóó dı̨́ı̨́ʼ yiską́ągo índa Jesus Bethaniidi jiníyá. Martha dóó Mary haʼólní ádabósinígíí tʼóó ahayóí áłah nilı̨́. Martha éí Jesus níyá hoʼdooʼniidgo, bidáahjįʼ chʼíjílwod. Jesus ábijiní: “Bóhólníihii, kweʼé nanináago, shilah doo daaztsą́ą da doo nítʼééʼ.” Jesus áháłní: “Nilah yę́ę náádidoodááł. Daʼ díísh yinídlą́, Martha?” Martha ájíní: “Niiníłką́ądi daʼneeznáádę́ę́ʼ nááʼdiʼyiijeehgo atah hinááh nízhdoodleełgo shił bééhózin.” Jesus áháłní: “Shí nááʼdiʼyiijeeh índa iiná nishłı̨́.”

Jesus nihaa níyá jiníigo Martha éí Mary bił hojoolneʼ. Áłah nilínę́ę hakééʼ yijahgo Mary éí Jesus bichʼįʼ nízhdiilwod áádóó jichago bichʼįʼ nitsizhdinígoʼ. Ájíní: “Bóhólníihii, kweʼé nanináago, shilah doo daaztsą́ą da doo nítʼééʼ!” Mary tʼáá íiyisíí yínííł jílı̨́įgo Jesus haa ákoniizı̨́ı̨́ʼ, áko bí ałdóʼ háácha. Jesus yichago dayiiłtsʼą́ągo ádaaní: ‘Shoo, Lázaras ayóóʼáyóʼníí ńtʼééʼ.’ Łaʼ éí: ‘Haʼátʼíísh biniinaa tʼáadoo níjííłdzíiʼ da?’ danízin. Áko Jesus haazh doonííł?

Lázaras yóó ályaagi jiníyáago Jesus éí tsé dáádiníʼánę́ę nahjįʼ oołmás jidííniid. Ńtʼééʼ Martha ání: ‘Dı̨́ı̨́ʼ yikánídą́ą́ʼ ájídin, kʼad shı̨́ı̨́ jíłchxon dzizlı̨́ı̨́ʼ.’ Ákójíníi ndi, tsé nahjįʼ eelmáz, áádóó Jesus sodoolzin, ‘Shizhéʼé, shidisínítsʼą́ʼígíí nichʼįʼ baa ahééh  nisin. Tʼáá áłahjįʼ shidinitsʼaʼígíí shił bééhózin, kǫ́ǫ́ naazínígíí shííníłʼaʼígíí deidoodląął biniyé binááł ádíshní.’ Hazhdoolghaazhgo ázhdííniid, “Lázaras, wóshdę́ę́ʼ chʼínínááh!” Ayóó áhoodzaa. Lázaras éí tʼahdii hakʼíʼdeesdizgo chʼízhníyá. Jesus éí diné ííłní: “Hakʼi nídaʼoohʼáadgo hodadohchííd.”

Lázaras náábiʼdiilzáago dayiiłtsánęę ląʼí daʼoosdląąd. Łaʼ éí Férisiiz yił dahoolneʼ. Éí bikéédóó Férisiiz éí Lázaras dóó Jesus nideidoołtsił yidahodeezʼą́. Daalʼaadii 12 yiltʼéhígíí łaʼ Júdas Iskáriyat wolyé, éí tʼáá nanitʼingo Férisiiz ííłní: ‘Jesus nihá bikʼínítʼą́ąʼgo, haa néelą́ą́ʼ shichʼįʼ nidadoołééł?’ Béésh łigaii béeso tʼádiingo bee ahadazhdeestʼą́, áádóó Júdas éí Jesus Férisiiz baazhdoolóós há ashjaʼ doonííł bíká jidéezʼı̨́ı̨́ʼ.