Atisʼadeesdzá ályaa bikéédóó Jesus hódahoołʼaahii bił Gáliliigóó níjookahgo Samériya góneʼ chʼíjíkai. Sáíkar bíighahgi Jacobʼs well bee hójíigi jíkai. Ákwii háájílyı̨́įhgo hódahoołʼaahii éí chʼiyáán nídeidiyoołnih yiniyé dah diikai.

Asdzání łaʼ tó hahadleehgi níyá. Jesus díí asdzání ííłní: “Tó łaʼ shaa níkaah.” Asdzání ání: ‘Haʼátʼíísh biniyé shichʼįʼ yáníłtiʼ? Shí yeeʼ Samériya dineʼé nishłı̨́. Jew dineʼé dóó Samériya dineʼé doo ałchʼįʼ yádaałtiʼ da.’ Jesus áháłní: ‘Tʼáá íídą́ą́ʼ shééhonísingo éí tó shaa níkaah shidíníniidgo, tó hináanii naadeeshkááł ńtʼééʼ.’ Asdzání ánáádíʼní: ‘Haʼátʼíísh ááłdiní? Ni yeeʼ tʼáadoo tó bee haóleehí da.’ Jesus áháłní: ‘Tʼáá háiida díí tó baa níkánígíí éí doo dibááʼ náázhdoodleeł da.’ Áko asdzání ání: ‘Kwáʼásiní, tó łaʼ shaa níkaah.’

Jesus ánááhodiʼní: ‘Nahastiin kweʼé bił nánítʼaash.’ Asdzání ájíní: ‘Shahastiin ádin.’ Jesus áháłní: ‘Tʼáá aaníí ádíní. Ashdladi nahastiin náhásdlı̨́įʼ ndi, kʼad diné bił nighanígíí éí doo nahastiin átʼée da.’ Asdzání ánáádiʼní ‘Shoo, Diyin God yá halneʼii nílı̨́ı̨́ lá. Shidineʼé éí tʼáá díí dził bighą́ąʼgi nidahwiidláago deiniidlą́. Ákondi Jew dineʼé éí Jerúsalemgi tʼéiyá nidahwiidláago bá hazʼą́ dadohní. Mesáíyah níyáago shı̨́ı̨́ nahadlá hazhóʼó yee nanihidínóotı̨́ı̨́ł.’ Jesus ání: ‘Shí éí Mesáíyah ashtʼı̨́.’ Díí éí tʼahdoo háiida bee bił hojilneʼ da ńtʼééʼ.

 ‘Mesáíyah bikʼíninítą́ą́ʼ jiníigo tsxı̨́įłgo haghandi náhojoolneʼ. Ááshtʼįįdii tʼáá átʼé bił bééhózin, tįʼ deidoołtsééł!’ Tó hahadleehgóó jiníjééʼ, áadi Jesus naʼnitingo deidiiztsʼą́ą́ʼ.

Samériya dineʼé éí Jesus tʼáá kǫ́ǫ́ sínídá deidííniid. Nazhʼnitingo naaki hwiiską́ áádóó tʼóó ahayóí daʼoosdląąd. Asdzání ádeiłní: ‘Díí diné tʼáá nihí dasidiitsʼą́ąʼgo tʼáá aaníí nihookááʼ dineʼé yisdáyiiníiłii átʼı̨́ı̨́ lágo nihił béédahoozin.’