Hooghan wódahgo hazʼą́ą́ góneʼ, Jesus dóó bídahoołʼaahii yił naháaztą́ągo ííłní: ‘Díí tłʼééʼ tʼáá ánółtso shitsʼąą taidoojah.’ Peter ání: ‘Łaʼ shı̨́ı̨́ ákódazhdoonííł, ndi shí éí tsʼídá doo nitsʼádeesháał da.ʼ Jesus éí Peter ííłní: ‘Naaʼahóóhai bikąʼí tʼahdoo ániihí, táadi doo hwééhosin da shididííʼniił.’

Siláo éí Kéíyafas bighangóó Jesus adeizlóóz. Daalʼaadii łaʼ yóóʼaheezhjééʼ. Ákondi nidiltʼéego tʼáá hakééʼ yíʼash. Łaʼ éí Peter ájitʼı̨́, éí Kéíyafas bighan bináʼástłʼin góneʼ yah ajííyá. Ákweʼé kǫʼ bee niʼjiidzííł. Asdzání naalʼaʼí nilı̨́įgo adinídíingi Peter yééhoosįįdgo ííłní: ‘Nééhósin! Jesus bił nanikai niʼ!ʼ

Peter ání: ‘Ndagaʼ, baa nanitʼinígíí doo shił bééhozin da.’ Peter éí chʼízhníyá. Nááhodooʼnaʼgo asdzání naalʼaʼí łaʼ hwénáhoosįįd áádóó áháłní: ‘Díí diné ałdóʼ Jesus yił naakai ńtʼééʼ!’ Peter ádííniid: ‘Jesus doo bééhasin da!’ Hastiin náánáłaʼ ánááhodooʼniid: ‘Díí diné ałdóʼ Jesus yił naakai niʼ, Gálilii dineʼé yádaałtiʼígíí átʼéego yáníłtiʼ.’ Peter ánáádíʼní: ‘Éí dinéhígíí doo bééhasin da!’

Áko naaʼahóóhai bikąʼí ádííniid. Peter éí Jesus honéłʼı̨́įgo jiiłtsʼą́. Jesus áhodííniid yę́ę bééjoolniiʼ, áko chʼízhníyáago aníjíchago yínííł jízlı̨́ı̨́ʼ.

Kéíyafas bighan góneʼ Sanhedrin éí Jesus yaa nídaastʼįįd. Tʼáá íídą́ą́ʼ Jesus diyoolyééł daniizı̨́ı̨́ʼ. Bee hakʼi hodootʼáałii chʼééh hadeinitá, éí tʼáá ádin. Kéíyafas éí Jesus nabízhdééłkid: ‘Daʼ niísh Diyin God biYeʼ nílı̨́?’ Jesus áháłní: ‘Aooʼ, éí áshtʼı̨́.’ Kéíyafas ání: ‘Díí bee bikʼi hodootʼááł. Jó, Diyin God baaʼihgo bá hajoodzííʼ.’ Áko aa hwiinítʼįįh góneʼ bił daalą́ągo hodiʼyoolyééł  dadííniid: ‘Dahwiisiiyołhé!’ Jesus yikʼi spit ádaatʼı̨́ áádóó blindfold ádahoolaago nídahoniłtsʼingo ádaaní: “Diyin God yá halneʼii nílı̨́įgo, éí háíshąʼ nándííłtsʼin bee nihił hólneʼ,” dahałní.

Hoosʼįįdgo Jesus Sanhedrin áłah nádleehgóó yił daaskai, áadi nináádahódééłkid: ‘Diyin God biYeʼésh nílı̨́?’ Jesus áháłní: ‘Jó, tʼáá nihí éí hó ájítʼı̨́ dashidohní.’ Diyin God baaʼihgo bá hajoodzííʼ yee hakʼi dahodiiʼą́ągo Rome dineʼé binaatʼáanii Pántiyas Páílat yichʼįʼ dahazlóóz. Ííshją́ą́ shı̨́ı̨́, haa nááhóótʼįįd?