Fílipaigi chʼikę́ę́h léiʼ níłchʼi biʼiiníziinii nabiiłá. Éí náásgóó ádahodooníiłii yaa halneʼgo yinaalteʼ nilíinii ląʼí béeso yá ííłʼı̨́. Díí chʼikę́ę́h Paul dóó Sáílas yikééʼ tádígháahgo ląʼí yiską́. Níłchʼi biʼiiníziinii éí chʼikę́ę́h yiiʼdę́ę́ʼ hadoolghaazhgo ání: ‘Díí diné Diyin God Aláahgo Ayóóʼátʼéii binaalteʼ jílı̨́.ʼ Paul doo bił yáʼíítʼééhgóó níłchʼi biʼiiníziinii ííłní: ‘Jesus bízhiʼ bee ánidishní, Hwiiʼ haninááh!ʼ Tʼáá ákǫ́ǫ́ hayiʼdę́ę́ʼ hahóóleʼ.

Chʼikę́ę́h doo béeso há ííłʼı̨́į da silı̨́įʼgo, binaalteʼ jílínę́ę bádahóóchįįd. Naatʼáaniishchíín bidáahjįʼ Paul dóó Sáílas yił nidaaskaigo ádaaní: ‘Díí hastóí bee hazʼáanii kʼíinítiʼ áádóó kin dah shijaaʼgi hááhoniłchaʼ!ʼ Nídahodínóołhał áádóó awáalya góneʼ yah ahodiʼdooʼnił éí naatʼáaniishchíín yee lą́ asłı̨́ı̨́ʼ. Awáalyahí yaa áhályáanii éí kin biyiʼ ayóó chahałheeł góneʼ yah ahóóníl áádóó tsin bigházdéesʼeezgo áhoolaa.

Awáalyahí daʼíistsʼą́ąʼgo, Paul dóó Sáílas Jiihóvah baa hojiniihgo hojitaał. Tłʼéʼííłníiʼgo niʼ hideesʼnááʼ. Kin hideesʼnáaʼgo dáádílkał ąą ádaadzaa. Awáalyahí bedaʼastłʼǫ́ yę́ę dóó tsin bighádazdéesʼeez yę́ę nahjįʼ aníídeeʼ. Awáalyahí yaa áhályánígíí éí chahałheeł góneʼ naháaztánę́ę yichʼįʼ nídiilwod, áko dáádílkał ąą ádaatʼéego yiyiiłtsą́. Awáalyahí yóóʼííjééʼ jiniizı̨́įʼgo, ádizhdiyoolyééł biniyé diltłish hajíítą́.

Paul hadoolghaazhgo áháłní: ‘Atíʼádóólnééh lágo, Kǫ́ǫ́ naháatą́!ʼ Awáalyahí yaa áhályání yah eelwodgo Paul dóó Sáílas yichʼįʼ nitsidinígoʼgo ání: ‘Haitʼéego yisdádeeshááł?ʼ Tʼáá áłah áháłní: ‘Ni dóó nighan hazʼą́ą́dóó Christ deidoohdląął.ʼ Paul dóó Sáílas Jiihóvah bizaad yee nahoneeztą́ą́ʼ. Tʼáá ałtso baptize ádabiʼdiilyaa.