Éíbraham dóó Sárah éí ahéskéego ląʼí nááhai. Ergi nizhónígo haghan yę́ędóó dashdiiná, kʼad éí níbaal biyiʼ haghan. Jiihóvah yaʼólíigo Sárah doo saad hółǫ́ǫ da ńtʼééʼ.

Sárah éí sheʼawééʼ hodooleeł nízingo Éíbraham áyidííniid: ‘Héígar, asdzání shá naalʼaʼígíí bił bitsʼánínááh, áko shaʼáłchíní hodooleeł.’ Héígar éí biyáázh hazlı̨́ı̨́ʼ. Éí Íshmeiyel woosyeʼ.

Tʼahádóó, Éíbraham 99 binááhai dóó Sárah éí 89 binááhaigo diné tááltʼéego haa yiikai. Háísh ádaatʼı̨́? Níłchʼigo ndaalʼaʼí ádaatʼı̨́! Tsin sikaad biyaagi háádadoołyįh dóó daʼdiidı̨́ı̨́ł bizhdííniid. Éí Éíbraham kódeidííniid: ‘Nínáánááhaigo tʼáá kweʼé nahalzhiishgo Sárah niyeʼ dooleełígíí ná yidoołchííł.’ Sárah éí níbaal biiʼdę́ę́ʼ ajíistsʼą́ą́ʼ. Tʼáá hayiʼídi joodlohgo ájíní: ‘Hasistih yeeʼ háádą́ą́ʼ lá shígi átʼéii beʼawééʼ hazlı̨́ı̨́ʼ?’

Áko Sárah iʼniiltsąąd, áádóó Éíbraham haastih ndi biyeʼ hazlı̨́ı̨́ʼ. Níłchʼigo ndaalʼaʼí ádahodííniid yę́ęgi átʼéego bohoolyaa. Éíbraham hayeʼ Áízak bee jíízhiʼ, éí “Dloh” jiníigo óolyé.

 Áízak ashdlaʼ binááhaigo, Íshmeiyel éí Áízak yá nahałtʼiʼgo Sárah yaa ákoniizı̨́ı̨́ʼ. Hayáázh bichʼą́ą́h hojishkéego biniinaa Éíbraham ábizhdííniid, Héígar dóó biyáázh Íshmeiyel nahgóó biʼníłnííh. Áłtsé éí Éíbraham doo íinízin da. Ndi Jiihóvah éí Éíbraham áyidííniid: ‘Ashkii índa naalteʼ asdzání biniinaa tʼáadoo yínííł nílíní; Sárah áníłnínígíí tʼáá ałtso yísíníłtsʼą́ą́ʼ, háálá Áízak bitsʼą́ą́dóó naʼáłchíní náás ahoolchíiłii bíká ádahodooʼniid.’