Mózes Dził Sáínai yikááʼ naaghá yę́ędą́ą́ʼ, Jiihóvah bichʼįʼ haadzííʼ. Níbaal biiʼ sohodizinii ádíílííł, áadi Ízrel dineʼé shichʼįʼ náádaʼiiłniih doo. Níbaal biiʼ sohodizinii éí tʼáá tádínéehgo ninádeiʼááh.

Jiihóvah ání: ‘Ízrel dineʼé ábididííniił, bideínóohahígíí bee bíká adoohjah níbaal biiʼ sohodizinii ninátʼaah biniyé.’ Éí óola, béésh łigaii, béésh łitsoii, tsé daʼílíinii dóó yódí yaa deiznil. Aghaaʼ nanoolzheeʼ ályaii, naʼatʼą́hí, naaldlooshii bikágí áádóó ląʼí ałʼąą ádaatʼéhígíí ałdóʼ yaa deiznil. Diné tʼáá íiyisíí bił dahadleeʼgo, Mózes ání: ‘Kʼadí bíighah silı̨́ı̨́ʼ! Tʼáadoo łaʼ nináádahoohjáhí.’

Hastóí dóó sáanii dayiichįįhígíí éí níbaal ádayiilaa. Jiihóvah éí bee hódzáanii yeidiníʼą́. Łaʼ daʼadiz, dóó bee naʼashchʼąąʼgo neełkad. Náánáłaʼ éí tsé daʼílíinii, óola dóó tsin nijikʼáashgo bee nizhdoochʼąh.

Jiihóvah níbaal biiʼ sohodizinii kótʼéego ádadoohłííł dahodooʼniid áko diné bidaʼjiilaa. Dáádiníbaal ályaa, éí naaki nááházʼánígíí biiʼ hólǫ́, éí hodiyingo hazʼą́ dóó tsʼídá aláahgo hodiyingo hazʼą́. Tsʼídá aláahgo hodiyingo hazʼą́ éí tsitsʼaaʼ dílzinii óola dóó akéíshiya tʼáá átʼéé ńtʼééʼ bikʼéstiʼgo ałdóʼ siʼą́. Hodiyingo hazʼą́ ákóneʼ bee hoolʼiní bá yadaaʼá, índa bikááʼ adání, áádóó dilidgo łikání halchinii bikáaʼjįʼ nááʼiiniihí. Bikááʼ nááʼiiniihí binaa hazʼánígíí béésh łitsoii biiʼ táʼádígisí dóó bikááʼ nááʼiiniihí  nitsxaago ádayiilaa. Tsitsʼaaʼ dílzinii Jiihóvah tsʼídá bikʼeh ádajooníiłgo bee bééhániih doo. Bee ahaʼdeetʼáanii haʼátʼíísh óolyé? Ádee haadzíiʼii ílínígíí átʼé.

Éran dóó biyeʼké éí Jiihóvah náábidiiʼnil éí náádaʼiiłniihii danilı̨́į doo. Ákóneʼé baa áhojilyą́, Jiihóvah bichʼįʼ náádaʼiiniih. Aláahgo nááʼiiłniihii Éran tʼéí tsʼídá aláahgo hodiyingo hazʼą́ą́ góneʼ yah anádááh. Tʼááłáʼí nináháháahgo, éí ádá néidiyoołnihii índa diné niʼiisííhígíí yá néidiyoołnihii yah anéíkááh.

Tʼááłaʼí nááhai bikéédóó Ííjipdę́ę́ʼ chʼíjíkai Ízrel dineʼé éí níbaal biiʼ sohodizinii ałtso ádayiilaa. Kʼad, ákweʼé Jiihóvah bichʼįʼ nááʼiiniih.

Jiihóvah bitsʼádiʼnílii yee níbaal biiʼ sohodizinii tʼáá átʼé yiiʼ hólǫ́, kʼos bikʼiildoh. Kʼos éí níbaal biiʼ sohodizinii tʼáá bikáaʼgi dah yilzhołgo, éí Ízrel dineʼé tʼáá ákweʼé hojílǫ́. Áko kʼos dah nídiildohgo, Ízrel dineʼé dah nídiikah. Níbaal biiʼ sohodizinii éí neʼ ninádaaʼnił dóó kʼos yildoh yikééʼ dah nidiikah.