Athaláíyah éí bimá Jézebel nahalingo, asdzání doo yáʼáshóonii nilı̨́. Júdahgi naatʼáanii beʼasdzą́ą́ jílı̨́. Hahastiin daaztsą́ągo hayáázh łaʼ naatʼáanii silı̨́ı̨́ʼ. Éí daaztsą́ągo, Athaláíyah tʼáá hó naatʼáanii ázhʼdiilyaa. Hakʼéí łaʼ naatʼáanii dadooleeł yę́ę nijistseed, áko tʼáá hó tʼéí hootʼááł ádaazhdeetʼą́. Hatsóí ndi hootʼááł bąąh jííʼįįd. Tʼáá ałtso diné hwéédaaldzid.

Nááʼiiłniihii Jiihóíyada dóó beʼasdzą́ą́ Jiihósheba éí Athaláíyah doo yáʼátʼééhgóó ááníłígíí bił bééhózin. Azhą́ Athaláíyah ádééhooldzíid ndi, Athaláíyah bitsóí awééʼ Jóʼash wolyé, éí nízhdínéesʼı̨́ı̨́ʼ áádóó kin biiʼ sohodizingi jineesą́.

Jóʼash tsostsʼid binááhaigo, Jiihóíyada éí Ízrel binantʼaʼí dóó Líívai dineʼé áłah áyiilaago ííłní: ‘Kin biiʼ sohodizin bidáádílkał bichʼą́ą́h nisoozı̨́, łahda yah ooghááh lágo.’ Tsı̨́įłgo Jiihóíyada éí Jóʼash naatʼáanii ájiilaa, áádóó crown bitsiiʼkáaʼgi dah yizʼą́. Tʼáá ałtso diné bił dahóózhǫǫdgo dadilwoshgo kódaaní: ‘Naatʼáanii nízaadgóó hináa leʼ!’

Athaláíyah éí hahóóʼáago yidiiztsʼą́ąʼgo ákǫ́ǫ́ nídiilwod. Áadi naatʼáanii ániid ályaii yiyiiłtsą́ągo hadoolghaazh. ‘Shiʼdeesdloʼgo shigha hodeetʼą́,’ jiní. Athaláíyah, doo yáʼáshóonii, nahjįʼ adeizlóozgo dayiisxı̨́. Doo yáʼátʼééhgóó diné ájííłʼįįd yę́ę shąʼ?

Jiihóíyada háká eelwodgo Ízrel dineʼé Jiihóvah béédajoolniiʼ. Jiihóvah tʼéí dadííníilzin doo dazhdííniid. Jiihóíyada bikʼehgo Béíyal bichʼįʼ nahadlá biniyé kin siʼánígíí dóó edaʼalyaii nidayiiztiʼ.  Kin biiʼ sohodizingi éí nááʼiiłniihii dóó Líívai dineʼé dadeeshnish. Łaʼda chin bąąhgo éí kin biiʼ sohodizingi doo yah adoogáał da, áko chʼéʼétiin baa áháyą́ągo ályaa. Jiihóíyada dóó Ízrel binantʼaʼí éí Jóʼash palacegóó bił jíkaigo bikááʼ dah asdáhí bikááʼdóó nahatʼáii yikááʼ dah neezdá. Diné tʼáá ałtso bił dahóózhǫǫd. Béíyal bichʼįʼ nahadlá dóó asdzání doo yáʼátʼéehii Athaláíyah tʼáágéedgo, Jiihóvah yá ndaalʼaʼ dóó deidósingo hahoolzhiizh. Jiihóíyada doo bił yééʼgóó ląʼí diné yíká eelwod. Díísh baa ákoninizı̨́ı̨́ʼ?