HAʼÁTʼÍÍSH tʼááʼaaníníí baa? Jó bílaʼashdlaʼii tsʼídá aláahdi iiná yaa naʼídídóołkiłígíí. Díí átʼéego naʼídíkidígíí shı̨́ı̨́ łahda ni baa ntsísíníkééz:

• Daʼ Godʼísh tʼááʼíiyisíí nihaa aʼááh nízin?

• Anaaʼ dóó tiʼhooʼnííh tʼáásh ndootʼih?

• Haash yiitʼįįh niheeʼiinaʼ niitʼihgo?

• Daneeznánígíísh nídeidiiltsééł?

• Haash yitʼéego éí shisodizin God yididootsʼı̨́ı̨́ł?

• Haash yitʼéego iiná baa hózhóonii bikʼídínéeshtááł?

Niish éí háadi díí naʼídéékidígíí nił bééhodoozįįłgo bikʼídíníítááł? Naaltsoos bá hooghandi yah ííníyáago áadi naaltsoos tʼóóʼahayóí bikʼídíníítááł kojigo díidíígíí lą́ą daaní. Áko ndi, díí naaltsoos łahda ałkʼijįʼ niyáʼáhodiltiʼłi. Áko díí łaʼ tʼóó kónigháníjı̨́ʼ tʼááʼaaníí nihiileeh áádóó łaʼ bee adaʼiiʼaah éí doodaiiʼ hashtʼeʼ ánáálnííł dóó bitséskʼe anááháʼníł.

Áko ndi, tsʼídá tʼááłáʼí tʼéiyá naaltsoos baa ahódlǫ́ǫ bee bééhodoozįįłígíí biiʼ hólǫ́. Éí naaltsoos tʼááʼaaníinii yaa halneʼ. Jesus Christ God yichʼįʼ sodilzingo ání: “Nizaad éí tʼááʼaaníinii átʼé.” (John 17:17) Díí Saadígíí díí jı̨́ Diyin God Bizaad átʼéiigo bééhwiniilzin. Kʼad éí díí naaltsoos kótʼéego nihíkáʼadoolwoł. Diyin Bizaad biiʼdóó díí hastą́ągo naʼídéékidígíí tʼááʼaaníiniiígíí hazhóʼó ííshjáán íidoolííł.

BINIINAA NAʼÍDÍKIDÍGÍÍ ÉÍ DÍÍ: Nihookááʼgóó doo yitsʼíidii dóó doo tʼááʼákogi átʼéii biiʼ hadeezbingo biiʼ kééhwiitʼı̨́. Tʼóóʼahayóí nahaghá ndaʼntingo éí nihichʼįʼ nahwiiʼnánígíí God íinízinígíí átʼé daaní.

DIYIN BIZAAD YEE NAʼNITINÍGÍÍ ÉÍ DÍÍ: God éí nchxǫ́ʼígíí doo achʼįʼ yiʼiiłníih da. Job 34:10 ání: “Diyin God yeeʼ doo yáʼáshóonii tsʼídá doo ííléeh da, índa Áyóóʼátʼéii nilíinii éí doo ákwii éʼétʼéii tsʼídá doo ííléeh da.” God éí bílaʼashdlaʼii yá hodeezʼánígíí áyóóʼíʼóʼniʼ yee nihaʼ átʼı̨́. Áko éí bąą Jesus díí sohodizinígíí yee nanihineeztą́ą́ʼ: “NihiTaaʼ yáʼąąshdi honílóonii . . . Bee nóhólníihii náásgóó kʼeeʼąą yilzhish leʼ, Áádóó bee íinínízinii tʼáá yáʼąąshdi ááníłígi átʼéego Nahasdzáán [Nihookááʼ] bikáaʼgi ááníił leʼ.” (Matthew 6:9, 10) God tsʼídá nihaa aʼááh nízingo éí bąą yéego nihá áátʼįįd áko yee hodeezʼánígíí nihá tʼááʼaaníí dooleeł.—John 3:⁠16.

Díí ałdóʼ Genesis 1:26-28; James 1:13; dóó 1 Peter 5:6, 7.

BINIINAA NAʼÍDÍKIDÍGÍÍ ÉÍ DÍÍ: Doo jóołtaʼ ánéelą́ą anaaʼ bílaʼashdlaʼii yołtsił. Tsʼídá tʼááʼáníiltso tiʼhooʼnííh nihideelchid.

DIYIN BIZAAD YEE NAʼNITINÍGÍÍ ÉÍ DÍÍ: God náasdi yaa halneʼgo éí nihookááʼ tʼáá siʼą́ą́ ńtʼééʼ hodiiyeelgo áhodoolííł. Yáʼąąshdi biNahatʼáʼ biyaadóó, diné éí “anaaʼ ndi doo yínáádahoołʼaah da doo.” Áko ndi, bí éí “dabidiltłishę́ę háádahidootsiłgo beenihwiildlaadí ádadoolnííł.” (Isaiah 2:4) Doo tʼááʼákogi átʼéii dóó tiʼhooʼnííhígíí God niidoołtʼí. Diyin Bizaad biiʼ God díí yee ádeehaadzííʼ: “Dabinákʼeeshtoʼ tʼááʼałtso yá yidootʼoł, aniné ádin doo, áádóó atínáhodindleeh ádin doo, áádóó cha ádin doo índa adiniih ádin doo, háálá áłtséédą́ą́ʼ dahólónę́ę bił yóóʼahóóyá.”​—Revelation 21:3, 4.

Díí ałdóʼ Psalm 37:10, 11; 46:9; dóó Micah 4:1-4.

BINIINAA NAʼÍDÍKIDÍGÍÍ ÉÍ DÍÍ: Nihookááʼgóó nahaghaʼ agháʼánéelą́ą éí díí yee ndaʼntin, diné ádin silı̨́ı̨́ʼ ndi biiʼsizíinii tʼahdii tʼáá náásgóó hináałi daaní. Łaʼ daneeznáanii yę́ę éí tʼahdii dahinánígíí atíde daaníigo dayoodlą́. Ałdóʼ anáádadiʼní God éí doo yáʼádashóonii atíidoolííł. Haitʼéegoshąʼ? Hoolʼáágóó tiʼdahojooníihgo ahodookʼą́ą́ł góneʼ yánihwiiyiiʼaa.

DIYIN BIZAAD YEE NAʼNITINÍGÍÍ ÉÍ DÍÍ: Daneeznáanii dooda hináa da, doodaʼ diitsʼaʼ da, doodaʼ ooʼı̨́į da, doo yádaałtiʼ da doodaiiʼ tʼáadoo leʼé doo yaa nitsídaahkees da. Ecclesiastes 9:5 ání: “Daneeznáanii éí tʼáadoo bił béédahóziní da.” Áko tsʼídá haitʼéego tʼahdii dahináaniiígíí doo atíidoolííł da doodaiiʼ yíkáʼ adoolwoł da.​—Psalm 146:3, 4.

Díí ałdóʼ Genesis 3:19 dóó Ecclesiastes 9:6, 10.

BINIINAA NAʼÍDÍKIDÍGÍÍ ÉÍ DÍÍ: Dahiniiʼnáadoo daniidzin dóó ayóóʼádeiníiʼnínígíí bił iiná baa hózhóonii bił bee ńdaʼdiildįįł daniidzin. Áko lą́ą nihikʼéí ayóóʼádeínííʼnínę́ę nídeidiiltséełgo bídin daniidlı̨́.

DIYIN BIZAAD YEE NAʼNITINÍGÍÍ ÉÍ DÍÍ: Agháago daneeznáanígíí náábiʼdidooljah. Jesus yee ádee haadzííʼígíí éí díí “jishchááʼ góneʼ naazhjéʼígíí tʼááʼałtso . . . háádahidookah.” (John 5:28, 29) God tsʼídá áłtséedi yee hoołʼaʼ yę́ę tʼáá beełtʼéego, náábiʼdiiljeehígíí kéyah tʼáadoo bee hónóshónígi kééhatʼı̨́į dooleełgo bichʼįʼ ąąʼályah. (Isaiah 65:21-25) Díí bee ádee haʼoodzííʼígíí éí díí áhyiłní bílaʼashdlaʼii akʼeh dahołʼínígíí éí díí iiná hadaałtʼé dóó iiná doo nińtʼiʼii yee ńdaʼdoołdı̨́ı̨́ł. Diyin Bizaad ání: “Tʼáá ákogi ádaaníiłii hoolʼáágóó kéyah bííʼ dadooleeł, áádóó ákwii hoolʼáágóó kéédahatʼı̨́į doo.”​—Psalm 37:29.

Díí ałdóʼ Job 14:14, 15; Luke 7:11-17; dóó Acts 24:15.

BINIINAA NAʼÍDÍKIDÍGÍÍ ÉÍ DÍÍ: Tsʼídá kʼasdą́ą́ʼ shı̨́ı̨́ tʼááʼałtso ałąą átʼéego nahaghá biiʼdóó diné sodadilzin. Áko ndi, bisodizin doo bá dadiistsʼą́ą da danízin.

DIYIN BIZAAD YEE NAʼNITINÍGÍÍ ÉÍ DÍÍ: Jesus éí sodizin tʼóó ałʼkéé hááháltʼéhígíí tʼáadoo chodałʼíní níigo yee nanihineeztą́ą́ʼ: “Sodadołzingo . . . saad tʼáadoo biniyéhí daígíí tʼáadoo háádahołtʼéhí.” (Matthew 6:7) God nihisodizin niháididootsʼı̨́ı̨́ł niidzin ládą́ą́ʼ, nihisodizin tʼáá bí íinízinígíí bikʼehgo ádiilnííł. Ákótʼéego íʼiilyaago, nihí éí God íinízinígíí bíhwiidiilʼááł dóó bikʼehgo sodiilzin doo. 1 John 5:14 ákwii yaa halneʼ: “Diyin God tʼáá bí íinízinii bikʼehgo haʼátʼíhída bídayíníikeedgo nihididootsʼı̨́ł.”

Díí ałdóʼ Psalm 65:2; John 14:6, 14; dóó 1 John 3:22.

BINIINAA NAʼÍDÍKIDÍGÍÍ ÉÍ DÍÍ: Tʼóóʼahayóí diné éí béeso dóó ééhoʼdílzin doodaiiʼ ízhóní ił hozhǫ́ǫgo ínhidoolííł danízingo dayoodlą́. Áko éí díí yíkáʼádaatʼı̨́-ndi ił hózhǫ́ bitsʼąą kotʼį.

DIYIN BIZAAD YEE NAʼNITINÍGÍÍ ÉÍ DÍÍ: Jesus éí díí átʼéego ił hózhǫ́ bikʼídiidááł nihiłní: “Diyin God bizaad deidiitsʼaʼgo yikʼeh dahółʼínígíí éí aláahgo bikʼidahojidlí!” (Luke 11:28) Agháadi ił hózhǫ́ niidzin ládą́ą́ʼ tsʼídá tʼááʼaaníinii God átʼéii dóó yee hodeezʼánígíí bíhwiilʼaahgo nihiiʼádiihiilyéego tʼéiyá nihí dooleeł. Díí tʼááʼaaníí ánínígíí Diyin Bizaad biiʼ bikʼídíníitááł. Tsʼídá aláahdi ílínígíí dóó doo ílínígíí haʼátʼíísh bee ałʼąą átʼéhígi bikʼidiʼdiitı̨́ı̨́ł, jó tʼááʼaaníinii tʼéí bee dooleeł. Tʼááʼaaníinii Diyin Bizaad biiʼdóó bee hashtʼeʼ nitsínihiłkees dóó nihee íʼoolʼiiłígíí niheʼiiná ílínígíí yee nihooʼishgo nihá áyósin.​—Matthew 5:3.

Díí ałdóʼ Proverbs 3:5, 6, 13-18 dóó 1 Timothy 6:9, 10.

 Díí hastą́ągo naʼídéékidígíí éí nihił ííshjáán ályaa Diyin Bizaad biiʼdóó, áko tʼóó tsxı̨́įłgo biiʼ hazhdiighal nahalin. Łą́ą́gooísh nił béénááhodoodzįįł nínízin? Tʼáadoo bahatʼáadí God bikʼehgo oodááł bíhwiidííłʼááł nínízin. Náánáłaʼ ninááʼádíkidígíí ałdóʼshı̨́ı̨́ baa ntsínááníkees, díí ádaatʼéhígíí: ‘God tʼáá íiyisíí nihaa aʼááh nízin ládą́ą́ʼ, haʼátʼíísh biniiyé yołkáłídę́ę́ʼ doo tsʼíí áhotʼéii dóó tiʼhooʼnííh tʼóó yáhasʼą́ągo hoolzhiish nahalin? Haash yitʼéego bił dashighanígíí kʼé naaztʼiʼígi hasihgo ááshłííł doo?ʼ Díí ndaʼádéékidígíí dóó náásgóó nináá ídídóokiłígíí tʼááʼałtsojiʼ baa íhwiidiilʼáłígíí Diyin Bizaad biiʼdóó nihił ííshjání ííłʼı̨́.

Áko ndi, diishjı̨́įdi tʼóóʼahayóígo Diyin Bizaad yiiʼdadídóoʼįįłígíí yichʼįʼ daastiʼ. Díí naaltsoos tsoh tʼááʼíiyisíí nanitłʼago doo bikʼizhdiʼdootı̨́ı̨́ł átʼéiigo deeníłʼı̨́. Diyin Bizaad bikʼiʼdiʼdiitı̨́łígi shíkáʼadoolwołísh nínízin? Díidi Jiihóvah Yádahalneʼí da wolyéhígíí éí naaki hazʼą́ągi yee níkáʼadoojahgo átʼé.

Áłtsé éí díí naaltsoos Diyin Bizaad Nanihinitingo Át’é kótʼéego choidooʼįįł. Naʼídíkid bikʼiʼdidootı̨́łígi Diyin Bizaad biiʼdóó nizhónígo ííshjání ííłʼı̨́ díí diné binaanish daa ląʼígíí bá ályaa. Naaki góneʼ éí Diyin Bizaad baa óltaʼgo baa íhooʼahígíí tʼáá haghangi tʼáá jííkʼehgo choidooʼįįł. Díí Jiihóvah Yádahalneʼí danilínígíí doo bikʼéʼasłáágo Diyin Bizaad yee ndaʼntin. Tʼóó hóníshghánjįʼ tʼáá nighangi doodaiiʼ tʼáá ni íinínízinígi damóo náʼoodleeł bikʼeh naanáhdáah doo. Diné mííl biláh ánéelą́ągo nihookááʼ tʼáá siʼą́ą́ ntʼééʼ éí díigi átʼéego naʼntinígíí yéego bee bíkáʼadaʼiiswod. Tʼóóʼahayóí bił dahózhǫ́ǫgo kodadííniid: “Tsʼídá tʼááʼaaníiniiígíí bikʼíníyáh!”

Díidí naalyéhé aláahdi ílínígíí ńdidíílééł. Diyin Bizaad éí díí, iiníziin kʼehgo ntsáhákees dóó yééʼ nihiiʼígíí biiʼdóó nihéédidoochił. Díí bee nihí dooleeł, ił chohooʼı̨́, iiná ílı̨́įgo bee hazʼáanii, dóó ił hózhǫ́. Jesus ání: “Tʼááʼaaníinii nihił béédahodoozįįł, índa tʼááʼaaníinii nihéédeididoochił.”—John 8:32.