Jériko hoolyéé léiʼgi neiitʼaash lá jiní. Díí kin haalʼáhígíí éí Kéínan, diné ákweʼé Jiihóvah doo dayoodlą́ą da. Asdzání léiʼ Réíhab wolyéego ákweʼé bighan.

Réíhab atʼééd yázhí nilı̨́įgo éí Mózes haitʼéego Tónteel Łichííʼ ałtsʼąą kóyiilaaígíí, dóó Ízrel dineʼé Ííjipdę́ę́ʼ chʼíiníʼeezhígíí yaa hodiiztsʼą́ą́ʼ. Jiihóvah éí Ízrel dineʼé yíká elwodgo, bidaʼanaʼí yá yikʼeh deesdlı̨́ʼígíí ałdóʼ yaa hodiiztsʼą́ą́ʼ. Ńtʼééʼ Réíhab, Ízrel dineʼé Jériko áhą́dídę́ę́ʼ yichʼįʼ dah yinéełgo yaa hodiiztsʼą́ą́ʼ!

Kʼadę́ę eʼeʼaahgo, naakigo Ízrel dineʼé Jérikogóó dah diiʼáázh. Éí tʼáá nahontʼinee ákweʼé haʼdoosił biniyé. Díí éí naalchiʼí wolyé. Réíhab bighangi níʼáázh. Wóshdę́ę́ʼ yah oohʼaashgo tʼáá kǫ́ǫ́ sookéii doo hodííniid. Ńtʼééʼ tłʼééʼgo Jériko binaatʼáanii, éí tʼáá nahontʼinee łaʼ haʼdoosił biniyé Réíhab bighangi niʼázhígíí bił bééhoozįįd. Áko díí naatʼáanii łáʼ bá ndaalʼaʼígíí, díí hastóí nídoohʼéésh yił níigo ákǫ́ǫ́ ayííłʼaʼ. Kin bighą́ąʼdi kʼíhoneezláago, Réíhab éí díí hastóí naalchiʼí ákweʼé néiidínéesʼı̨́ı̨́ʼ. Áádóó Réíhab naatʼáanii bá ndaalʼaʼí łaʼ ayiisʼaʼ yę́ę kwííłní: ‘Tʼáá lá aaníí díí hastóí shaa níʼáázh ndi tʼáá íídą́ą́ʼ dah nídiitʼáázh. Tsxı̨́įłgo ádaahtʼı̨́įgo bikééʼ dohjeehgo bił dadohdeeł!’ Haʼátʼíísh biniyé Réíhab díí hastóí naalchiʼí yíká eelwod nínízin?— Jó Réíhab éí Jiihóvah yaʼólíigo yoodlą́, dóó Jiihóvah éí Ízrel dineʼé kéyah Kéínan yee didooʼáałgo bił bééhózin.

Hastóí, Réíhab yaa níʼáázh yę́ę díí Réíhab yichʼįʼ yee ádee haadzííʼ, Jériko ábidiʼniildįįdgo ni dóó nikʼéí doo atídadooníił da. Áádóó dah nízhdiitʼáázh. Ákoshąʼ Réíhab haa díínííł yidííniid?— Kóbidííniid: ‘Díí tłʼóół łichxíʼígíí tsésǫʼ góyaa náátʼiʼgo ádíílííł. Ákwíí nidzaago tʼéiyá, tʼáá ałtso bił danighanígíí doo atídadooníił da.’ Réíhab éí díí hastóí kótʼéego ádíínííł bidííniidígíí tʼáá ákótʼéego yeʼiilaa. Áádóósh haa hóótʼįįd nínízin?—

Tʼáadoo ląʼí yiłkaahí, Ízrel dineʼé kin haalʼáhígíí tʼáadoo íitsaʼí binídzískai. Kin haalʼáhígíí binaa tʼáá łáhídi ahénínájíkahgo hastą́ą́h yiską́. Tsostsʼid jı̨́ góneʼ, tsostsʼidi binaa ahééjískai. Áádóó tʼáá ájíłtso ayóó átʼéego hadaazhdeeshghaazh. Jiihóvah éí  kin haalʼáhígíí binaa ditą́ągo ahééʼítłʼinígíí ahiih náyííłdááz. Ndi hooghan tłʼóół łichxíiʼgo tsésǫʼdę́ę́ʼ tłʼóóʼ góneʼ náátʼiʼígíí tʼéiyá sizı̨́! Naʼashchʼąąʼígíísh biiʼ yííníʼı̨́?— Réíhab dóó bikʼéí yił yisdáákai!

Haʼátʼíísh Réíhab bitsʼą́ą́dóó baa íhwidííłʼááł?— Réíhab éí tʼáá ałtso yáʼádaatʼéehii Jiihóvah yitsʼą́ą́dę́ę́ʼ yíhoołʼą́ą́ʼígíí biniinaa Jiihóvah yaʼólíigo yoosdląąd. Ni ałdóʼ ląʼígo yáʼádaatʼéehii Jiihóvah bitsʼą́ą́dóó bíhoołʼaah. Niísh ałdóʼ Réíhab nahalingo Jiihóvah baʼíínílı̨́įgo yiinídlą́?— Bééhózínígo éí ákónítʼé!