1, 2. Jesus yáʼąąshgóó anáádzáago, ídahoołʼaahii haʼátʼíish danízin ńtʼééʼ?

JESUS bídahoołʼaahii Dził Álivz bikáaʼgi naazı̨́įgo dabiníłʼı̨́, bikʼis naatʼáanii nilı̨́ yę́ę dego dah biʼdiiltı̨́ áádóó kʼos biyaa eeldogo bee doo yitʼı̨́į da silı̨́ı̨́ʼ. (Acts 1:9, 10) Jesus éí bídahoołʼaahii neinitin, bił dahojílǫ́ dóó nijiʼeeshgo naaki nááhai. Ndi kʼad doo ákweʼé da. Áko haash dajidoonííł?

² Tʼahdoo yáʼąąshgóó dah jidiighááhgóó, Jesus bikééʼ nidaakai yę́ę kóyidííniid: “nahasdzáán nidaneesʼą́ą́góó shá dahołneʼ dooleeł.” (Acts 1:8) Éí naanishígíishąʼ haitʼéego ádajidoolííł? Jesus éí God biníłchʼi nihíká adoolwoł yidííniidgo yee yichʼįʼ ádee haadzííʼ. (Acts 1:5) Ákondi, daʼníłtsʼą́ą́ʼgóó nahodoonihígíí háishąʼ éí dayéełyeed doo? Jiihóvah bidineʼé hastóí léiʼ dabéeʼéésh doo biniyé choyoosʼįįd. Éí ídahoołʼaahii bił béédahózin. Áko hooʼish dooígíí daatsʼí łaʼ nínáájidiiłtı̨́ danízin ńtʼééʼ.

3. (a) Jesus yáʼąąshgóó ííyáago, ídahoołʼaahii haʼátʼíí yaa ádahoniizı̨́ı̨́ʼ? (b) Haʼátʼíí bíndaʼídéíkidígíí baa nídadíitʼįįł?

 ³ Jesus yáʼąąshgóó anáádzáago, bídahoołʼaahii éí Diyin Bizaad dóó sodizin chodayoosʼįįdgo, Júdas Iskáriyat éí Matháíyas bitsáskʼeh góneʼ adoogááł biniyé nídahodiiłtı̨́. (Acts 1:15-26) Haʼátʼíísh biniinaa díí, Jiihóvah dóó ídahoołʼaahii ayóó bił daʼílı̨́? Ídahoołʼaahii éí naakitsʼáadah jiltʼéii doogo yaa ádahoniizı̨́ı̨́ʼ. * (Footnote níníłʼı̨́.) Jesus éí ídahoołʼaahii God bidineʼé yaa ádaholyą́ą doo biniyé néidiinil dóó neineeztą́ą́ʼ. Éí naanishígíí haitʼéego Jiihóvah dóó Jesus yá hashtʼebiilaa? Dííshjı̨́įdi éí naanishígíísh łaʼ bináłtʼé? Háásh yitʼéego “diné nihá naazı̨́ı̨́ nítʼéeʼii”, dóó “baʼahódlíigo índa hóyą́ągo naalʼaʼí” béédeilniih doo?—Hebrews 13:7; Matthew 24:45.

4. Jerúsalemgi, daalʼaadii dóó łaʼ hastóí haʼátʼíí naanish shı̨́ı̨́ hwee dahazlı̨́ı̨́ʼ?

⁴ Ídahoołʼaahii éí Péntekast beiníłką́ągo 33 yihah góneʼ Oodlání yaa ádaholyą́ągo yaa haakai. Diyin Bizaad ání: “Peter, ídahoołʼaahii łaʼtsʼáadahígíí bił nidzizı̨́įgo” saad bee yisdá iildéehii bee ląʼí najineeztą́ą́ʼ. (Acts 2:14, 15) Ákweʼé tʼóó ahayóí Oodlání daazlı̨́ı̨́ʼ, éí “tʼáadoo ádahozdiilzéhí daalʼaadii yee nidaʼnitinígíí” bikʼehgóó ádajiidzaa. (Acts 2:42) Díí daalʼaadii éí béeso nanideehgi yaa ádaholyą́ą́ ńtʼééʼ. (Acts 4:34, 35) “Nidi nihí tʼéiyá tʼáadoo hodiniitłóhí sodizin índa Diyin God bizaad bee nidaʼniitinígíí doo bikʼi didiikah da” daaníigo God bidineʼé yá sodadoolzin. (Acts 6:4) Áádóó Oodlání nahaneʼ ayóó dayiichįįhígíí, daa kéyahgóó adayiisʼaʼ. (Acts 8:14, 15) Tʼahádóó, hastóí yáʼąąshgóó bá chodahooʼínígíí éí daalʼaadii yił daʼéeʼéésh doo biniyé yił ahidiikai. Éí bindaanishígíí binahjįʼ tʼáá ałtso Oodlání danilíinii bee dajéeʼéésh ńtʼééʼ.—Acts 15:2.

5, 6. Haash yitʼéego hastóí alą́ąjįʼ daʼéeʼéshígíí (a) níłchʼi diyinii bíká eelwod? (Áłtsé naashchʼąąʼígíí níníłʼı̨́.) (b) diyingo nidaalʼaʼí bíká ííjééʼ? (c) God Bizaad chodayoosʼįįd?

⁵ Jiihóvah éí Jesus choyoołʼı̨́įgo hastóí alą́ąjįʼ daʼéeʼéshígíí yíká eelwod. Éí níléídę́ę́ʼ Christ yikʼeh deiyíkááh yę́ę haitʼéego bił béédahózin? Áłtséhígíí éí níłchʼi diyinii bíká eelwod. (John 16:13) Hastóí yáʼąąshgóó bá chodahooʼínígíí éí níłchʼi diyinii baa dadeestʼą́, daalʼaadii dóó hastóí Jerúsalemgi akʼidaʼdéezʼı̨́ʼígíí éí íiyisíí. Éí 49 yihahgo  hastóí alą́ąjįʼ daʼéeʼéshígíí níłchʼi diyinii binahjįʼ ąąh náhinilgish baa nídajistʼįįd. Éí binahjįʼ oodlání danilíinii yikʼeh ádaadzaa. Áko “naʼnitin woodláanii bee bidziil ádaalyaa, áádóó tʼáá ákwíí jı̨́ ląʼí ihidiikáahgo kʼeeʼąą” deeshzhiizh. (Acts 16:4, 5) Ąąh náhinilgish baa nídajistʼįįdígíí éí áłah nídaʼadleehígíí naaltsoos bá bikááʼ ádaalyaa. Éí binahjįʼ díí hastóí alą́ąjįʼ daʼéeʼéshígíí bééhózínígo God biníłchʼi diyinii bee dahólǫ́, dóó bedaʼoodląʼ daniłdzilgo ayóóʼádaʼóʼní.—Acts 15:11, 25-29; Galatians 5:22, 23.

⁶ Nááʼákóneʼ díí hastóí alą́ąjįʼ daʼéeʼéshígíí éí diyingo nidaalʼaʼí bíká ííjééʼ. Díí átʼé nahalingo, diyingo naalʼaʼí łaʼ Korníílyas yilʼaadii Peter hadíníitaał yidííniid. Peter éí Korníílyas dóó bikʼéí tʼáadoo ąąh náhinilgish ádabiʼdilyaa da ndi, níłchʼi diyinii bikʼi dahazlı̨́ı̨́ʼ. Éí áłtsé Doo Jew Dineʼé, hąąh náhinilgish tʼáadoo áhoʼdilyaa da ndi, Oodlání jizlı̨́ı̨́ʼ. Áko daalʼaadii dóó hastóí éí yaa dahodiiztsʼą́ąʼgo, ákótʼéego idadiikaígíí éí God bikʼeh lágo yikʼidaʼdiitą́. (Acts 11:13-18) Éí binahjįʼ hastóí alą́ąjįʼ daʼéeʼéshígíí éí nahaneʼ yikʼidadéezʼı̨́įʼgi, diyingo nidaalʼaʼí bikééʼ nidaazínígíí bééhoozin. (Acts 5:19, 20) Tááʼ góneʼ éí God Bizaad chodayoołʼı̨́įgo oodląʼ ádaatʼéii, dóó Oodlání danilíinii yee yikʼidadéezʼı̨́ı̨́ʼ ńtʼééʼ.—Acts 1:20-22; 15 :15-20.

7. Jesus níléídę́ę́ʼ Jiihóvah biDineʼé yooʼish ńtʼę́ʼígíí haash yitʼéego nihił bééhózin?

⁷ Azhą́ shı̨́ı̨́ hastóí alą́ąjįʼ daʼéeʼéshígíí oodlání yikʼidadéezʼı̨́įʼ ndi, éí Jesus íiyisíí booʼishgo bił béédahózin. Éísh haitʼéego nihił bééhózin? Christ éí hastóí “łaʼ daalʼaadii dadooleeł” biniyé néidiinil, ní Paul. Áádóó ałdóʼ Christ éí oodlání yá “atsiiʼ” nilı̨́, ní. (Ephesians 4:11, 15) Doo éí daalʼaadii bízhiʼ bee dabiʼdéejiʼ da, ndi éí “ídahoołʼaahii tsʼídá áłtsé Christian dabidooʼniid.” (Acts 11:26) Paul éí daalʼaadii dóó łaʼ hastóí Diyin Bizaad yee nidaʼneeztą́ą́ʼ yę́ę bikʼeh ádazhdooníiłgo bił ílı̨́ı̨́ ńtʼééʼ. “Jó, éí diné tʼááłáʼí nítínígo bitsijįʼ sizíinii éí Christ,” ní Paul. Éí hastóí alą́ąjįʼ daʼéeʼéshígíí ałdóʼ bił yééltaʼ. Áádóó Paul ánáádíʼní “Christ bitsijįʼ hólóonii éí Diyin God.” (1 Corinthians 11:2, 3) Jiihóvah bidineʼé yooʼish doo biniyé, biYeʼ Jesus Christ néidiiłtínígíí éí tʼáá bééhózíní yeeʼ.

8, 9. C.T. Russell éí haʼátʼíí naanish ílínígíí ájiilaa?

⁸ Charles Taze Russell dóó łaʼ dabikʼis yił 1870 biiʼ yihah góneʼ, Diyin Bizaad kʼehgo nidajilʼaʼ doo biniyé áłká anídajijah ńtʼééʼ. Bílaʼashdlaʼii bizaad ałʼąą ádaatʼéii ndi, ałdóʼ yíká ííjééʼ. Áko 1884 yihah góneʼ Zion’s Watchtower Tract Society bee hazʼáanii bikʼehgo bee nahootʼą́. Éí C.T. Russell yinanitʼaʼí silı̨́ı̨́ʼ. * (Footnote níníłʼı̨́.) Diyin Bizaad éí hazhóʼó neiskáaʼgo doo náldzidgóó Trinity wolyéii, dóó diné daneeznánę́ę tʼah dahiná haʼnínígíí éí doo Diyin Bizaad biiʼ da, níigo naʼneeztą́ą́ʼ. Christ éí níłchʼi nilı̨́įgo nídoodááł, dóó 1914 yihahgo  “doo Jew dineʼé danilíinii bił hoolzhishígíí bíighah” azlı̨́įʼ doogo yikʼiʼdiitą́. (Luke 21:24) C.T. Russell éí yéigo átʼı̨́įgo, dóó bibéeso choyoołʼı̨́įgo diné tʼáá aaníinii yee neineeztą́ą́ʼ. Ákótʼéego Jiihóvah dóó Jesus, choboosʼįįdígíí éí tʼáá bééhózíní yeeʼ.

⁹ C.T. Russell éí doo shaa haʼniih da doo nízin ńtʼééʼ. Éí biniinaa 1896 yihah góneʼ kójidííniid: díí naanish ádeilʼínígíí biniinaa doo nihaa hodooʼnih daniidzin da. Yízhí atsʼáátʼánígíí doo ádá deinízin da, áádóó dabízhiʼígíí nááná háiida choideidoołʼįįłígíí ałdóʼ doo deinízin da. Áko tʼahádóó ájíní: “Díí doo bílaʼashdlaʼii binaanish átʼéii da.”

10. (a) Hahgoshąʼ Jesus, “baʼahódlíigo índa hóyą́ągo naalʼaʼí” néiidiinil? (b) Watch Tower Society dóó Hastóí Alą́ąjįʼ Daʼéeʼéshígíí, tʼáá ííshjání ałʼąą átʼéhígíishąʼ haitʼéego bééhoozin?

¹⁰ C.T. Russell éí 1916 yihah góneʼ ádin. Áádóó 1919 yihahgo Jesus éí “baʼahódlíigo índa hóyą́ągo naalʼaʼí” néidiinil. Éí haʼátʼíí biniyé? Jó, bikééʼ “nidaakaígíí tʼáá ałtso tʼáá áajįʼ anáhwiilzhíishgo yanáʼáltsoʼ doo biniyé.” (Matthew 24:45) Íídą́ą́ʼ, Brooklyn New Yorkdi tʼáá díkwííhígo hastóí yáʼąąshgóó bá chodahooʼínígíí éí Jesus yikʼeh deiyíkáhígíí, diyin kʼehgo yanídaʼałtsoʼ ńtʼééʼ. Áádóó 1940 yihah góneʼ naaltsoos “hastóí alą́ąjįʼ daʼéeʼéshígíí” dabikáaʼgo bee hahóóyá. Éí Watch Tower Bible and Tract Society dayéełyeedígíí áhą́dígo yił nidaalnish ńtʼééʼ. Ákondi, 1971 yihahgo Hastóí Alą́ąjįʼ Daʼéeʼéshígíí dóó Watch Tower Society, doo tʼááłáʼígíí átʼée dago bééhoozin, éí bee hazʼáanii kʼehgo ádaʼdoolníiłgi tʼéiyá bee bídahólnííh ńtʼééʼ. Áádóó éí yáʼąąshgóó bá chodahooʼínígíí éí Hastóí Alą́ąjįʼ Daʼéeʼéeshii dadooleełgo bá ąą ádzaa, azhą́ shı̨́ı̨́ Society directors doo atah danilı̨́į da ndi. Kʼad éí “dibé náánáłaʼ” dabidiʼnínígíí éí Society directors dóó corporations, God bidineʼé chodayoołʼínígíí łaʼ atah danilı̨́. Áko Hastóí Alą́ąjįʼ Daʼéeʼéshígíí Diyin Bizaad binaʼnitin íiyisíí bindaanishgo ádayósin. (John 10:16; Acts 6:4) Watchtower July 15, 2013, “baʼahódlíigo índa hóyą́ągo naalʼaʼí” éí Hastóí Alą́ąjįʼ Daʼéeʼéeshii dah yikahígíí ádaatʼı̨́ ní.

11. Haitʼéego Hastóí Alą́ąjįʼ Daʼéeʼéeshii, yaa nídaatʼínígíí yee ahadaʼdiitʼaah?

¹¹ Hastóí Alą́ąjįʼ Daʼéeʼéshígíí éí tʼáá damóo náʼoodleeł bikʼeh áłah nídaadleeh. Ákweʼé yaa nídaatʼínígíí yee ahadaʼdiitʼaah. Éí binahjįʼ hazhóʼó ałhiijįʼ nidaalnish dóó łáʼí danilı̨́įgo dah yikah. (Proverbs 20:18) Áko Hastóí Alą́ąjįʼ Daʼéeʼéshígíí éí doo łaʼ aláahgo baa nitsáhákees da, éí ałnááhookahgo łaʼ nááhaijįʼ áłah nídaadleehígíí łaʼ yá sidáa łeh. (1 Peter 5:1) Hastóí Alą́ąjįʼ  Daʼéeʼéshígíí, éí náánáłaʼ hastóí hazhóʼó yił nidahaʼáago yił nidaalnish. Łaʼ éí doo tʼáá ałtsojįʼ bee shíhólnííh nízin da. Díí hastóí tʼááłáʼí nítínígo éí “baʼahódlíigo . . . naalʼaʼí” ałdóʼ baa nídaʼałtsoʼgo yikʼeh ádaanííł.

12. Haʼátʼíí bíndaʼídéékidígíí kʼad baa nídadíitʼįįł?

¹² Díí Hastóí Alą́ąjįʼ Daʼéeʼéshígíí éí doo God bił dahalneʼ da, doodaiiʼ doo hadaałtʼéii da. Áko Diyin Bizaad yaa nidaʼnitingi, dóó daʼéeʼéeshgi daʼdoosihgo átʼé. Watch Tower Publications Index biiʼ “Beliefs Clarified” wolyéí góneʼ díí łaʼ baa chʼídahwiistʼą́. Éí 1870 yihahdóó wóshdę́ę́ʼ Diyin Bizaad łahgóó ninádaaskáaʼgo hazhóʼó ánídaalyaa. Jesus éí díí hazhóʼó diyin kʼehgo nihanídaʼałtsoʼ doo ní. Áko Jesus: “Háí baʼahódlíigo índa hóyą́ągo naalʼaʼí nilı̨́” níigo naʼádééłkid yę́ę, haitʼéego nihił bééhodoozįįł? (Matthew  24:45) Hastóí Alą́ąjįʼ Daʼéeʼéshígíí éí “baʼahódlíigo naalʼaʼí nilı̨́.” Éí haʼátʼíí bee bééhózin? Níléídę́ę́ʼ hastóí alą́ąjįʼ daʼéeʼéeshii bee bíká aʼoolwodígíí táaʼgo baa nídadíitʼįįł.

13. Hastóí Alą́ąjįʼ Daʼéeʼéshígíí haash yitʼéego níłchʼi diyinii bíká análwoʼ ńtʼééʼ?

¹³ Díí Hastóí Alą́ąjįʼ Daʼéeʼéshígíí éí níłchʼi diyinii bíká análwoʼ. Éí bee Diyin Bizaad biiʼdóó tʼáá aaníinii doo hazhóʼó béédahózin yę́ę, yikʼidaʼdiyiitįįh. Shą́ą́ʼ beliefs clarified baa chʼíhootʼánę́ę łaʼ daabiiʼ. “Diyin God yinahazʼáanii doo bééhózin da yę́ę nidi bił bééhózin,” éí níłchʼi diyinii tʼáágéedgo diné tʼáá bí doo yikʼidaʼdidootı̨́įł da! (1 Corinthians 2:10 yíníłtaʼ.) Hastóí Alą́ąjįʼ Daʼéeʼéshígíí éí yilʼaadii Paul nahalingo kódadííniid: “Níłchʼi diyinii yínanihiniłtinígíí bee naʼnitin, diyin kʼehgo ádaatʼéii níłchʼi diyinii bikʼehgo bínaʼniiltin.” (1 Corinthians 2:13) Doo tʼáá aaníígóó naʼnitin dóó daʼéeʼéeshii ádingo ląʼí nááhai. Áko haash yitʼéego 1919 yihahdóó wóshdę́ę́ʼ Diyin Bizaad hazhóʼó bikʼidazhdiitʼįįhgo hahoolzhiizh? Jó, bééhózínígo God biníłchʼi diyinii bíká análwoʼgo hoolzhiizh!

14. Revelation 14:6, 7 éí haitʼéego diyingo nidaalʼaʼí, Hastóí Alą́ąjįʼ Daʼéeʼéeshii dóó God bidineʼé yíká anájah ní?

¹⁴ Diyingo nidaalʼaʼí éí Hastóí Alą́ąjįʼ Daʼéeʼéshígíí yíká anídaajah. Díí Hastóí, God bidineʼé 8 million bilááh ánéelą́ąʼgo daʼníłtsʼą́ą́góó nidahalneʼii yikʼidadéezʼı̨́ı̨́ʼ. Haʼátʼíísh biniinaa éí naanish nizhónígo łaʼ yinííł? Diyingo nidaalʼaʼí bíká anídaajahígíí biniinaa. (Revelation 14:6, 7 yíníłtaʼ.) God shíká anilyeed daaníigo sodadilzinígíí, tʼáá áko nahalneʼii łaʼ bikʼíghááh, éí diyingo nidaalʼaʼí aneʼdę́ę́ʼ chodaoʼínígíí biniinaa! * (Footnote níníłʼı̨́.) Azhą́ shı̨́ı̨́ nidahalneʼii łaʼ atídabiʼdilʼı̨́į ndi, nahaneʼígíí tʼóó kʼeeʼąą nootʼı̨́ı̨́ł. Éí diyingo nidaalʼaʼii biniinaa.

15. Hastóí Alą́ąjįʼ Daʼéeʼéeshii, éí haitʼéego náánáłaʼ Oodląʼ yá naazíinii, yił ałʼąą ádaatʼé? Łaʼ baa chʼíhoníʼaah.

¹⁵ God Bizaad éí Hastóí Alą́ąjįʼ Daʼéeʼéshígíí yíká análwoʼ. (John 17:17 yíníłtaʼ.) Níléí June 1, 1973 yihah góneʼ, The Watchtower díí yínaʼádééłkid: ‘Diné tʼahdii nídaʼałtʼohgoósh baptize ádabiʼdidoolníiłgo átʼé?’ Éí Diyin Bizaad biyiʼdóó saad łaʼ chʼídaastʼánígíí binahjįʼ dooda hodooʼniid. Tʼáá éí The Watchtower biiʼ, diné nátʼoh doo niʼ kwííléhígíí éí Jiihóvah Yá Dahalneʼé bitsʼá bidiʼdooltééł ní. Éí Diyin Bizaad binahjįʼ ííshjání ályaa. (1 Corinthians 5:7; 2 Corinthians 7:1) Díí bee hazʼáanii éí doo bílaʼashdlaʼii bitsʼą́ą́dę́ę́ʼ da ndi, “God bitsʼą́ą́dę́ę́ʼ, jó, bí Bizaad biiʼdę́ę́ʼ nihił halneʼ.” Jiihóvah Yá Dahalneʼé éí Diyin Bizaad kʼehgo iináanii tʼáá ałtsojįʼ yikʼeh dahółʼı̨́, azhą́ shı̨́ı̨́ łahgóó bá ndanitłʼa ndi. Díí éí naaltsoos łaʼ bikááʼ ályaa: ‘Náánáłaʼ Oodląʼ yá naazíinii éí, yił áłah nídaadleehii ádeinízinjígo yikʼehgo yá ádaʼałʼı̨́.’ Ákondi, Hastóí Alą́ąjįʼ Daʼéeʼéshígíí éí Diyin Bizaad yinahjįʼ daʼéeʼéésh. Díí bee dííshjı̨́įdi tʼáá bééhózínígo Jiihóvah bidineʼé yooʼish.

16. Hastóí Alą́ąjįʼ Daʼéeʼéshígíí haʼátʼíí bee béédeilniih doo?

¹⁶ Hebrews 13:7 yíníłtaʼ. Diyin Bizaad ání: “Diné nihá naazı̨́ı̨́ nítʼéeʼii béédaałniih.” Hastóí Alą́ąjįʼ Daʼéeʼéshígíí bá sodadiilzingo béédeilniih doo. (Ephesians 6:18) Bindaanish tʼóó adahayóí: diyin kʼehgo anáʼáltsoʼ hashtʼeilʼínígi, God biNahatʼaʼ baa nahaneʼgi, dóó béeso nanideehgi yikʼidadéezʼı̨́ı̨́ʼ. Áko tʼáá áłahájįʼ bá sodadiilzin doo!

17, 18. (a) Haitʼéego éí Hastóí Alą́ąjįʼ Daʼéeʼéshígíí bikʼeh dahoniilʼı̨́į doo? (b) Nidahwiilneʼgi, éí haitʼéego Hastóí Alą́ąjįʼ Daʼéeʼéshígíí dóó Jesus bee bíká anídeijah?

¹⁷ Áádóó Hastóí Alą́ąjįʼ Daʼéeʼéshígíí, yee nidahodiiʼaahígíí bikʼeh dahoniilʼı̨́į doo. Éí diyin kʼehgo naaltsoos, áłah nídeidleehgi, Circuit Assembly, dóó tágí jı̨́ nitsaago áłah nídeidleehígíí binahjįʼ nidanihinitin. Háí circuit overseers dadooleełígíí yikʼidadiilnih, áádóó éidí hastóí oodlání yá naazíinii dadooleełígíí yikʼidadiilnih. Circuit overseers dóó hastóí oodlání yá naazíinii éí díí Hastóí hazhóʼó yikʼeh ádaʼałʼı̨́. NihiNaatʼáanii Jesus nihił nilı̨́įgo éí diné nihá naazíinii choyoołʼínígíí bikʼeh dahoniilʼı̨́į doo.—Hebrews 13:17.

¹⁸ Díí átʼéego ałdóʼ Hastóí Alą́ąjįʼ Daʼéeʼéshígíí béédeilniih doo, yéigo ádeitʼı̨́įgo nidaʼniitin doo. Hebrews 13:7 éí alą́ąjįʼ daʼéeʼéshígíí bedaʼoodląʼ bidaʼołʼı̨́, ní. Hastóí Alą́ąjįʼ Daʼéeʼéshígíí éí bedaʼoodląʼ binahjįʼ haneʼ yáʼátʼéehii yídaneedlı̨́įgo yaa nidahalneʼ. Áko díí binaanish ádeiłʼı̨́įgi, nihíísh ałdóʼ bíká anídeijah? Ákótʼéé ládą́ąʼgo éí Jesus kódííniid yę́ę baa nihił dahózhǫ́ǫ doo: “Díí shikʼis łaʼ tsʼídá hojoobaʼ ádaatʼéii bá baa nidasoohkaígíí, éí shí shá baa nidasoohkai.”—Matthew 25:34-40.

19. Haʼátʼíísh biniinaa nihiNaatʼáanii Jesus tʼéiyá, bikééʼ yiidáał doo?

¹⁹ Jesus yáʼąąshgóó anáádzáago bikʼehgo deiyíkááh yę́ę tʼahdii yił hólǫ́. (Matthew 28:20) Nahasdzáán bikáaʼgi naʼnitin bá jizínę́ędą́ą́ʼ éí níłchʼi diyinii, diyingo nidaalʼaʼí, dóó God Bizaad bíká eelwod. Dííshjı̨́įdi baʼahódlíigo naalʼaʼí tʼáá ákótʼéego yíká análwoʼ. Hastóí Alą́ąjįʼ Daʼéeʼéshígíí éí tʼahdii “Dibé Yázhí nilíinii tʼáá naagháágóó yikééʼ nidaakai.” (Revelation 14:4) Hastóí Alą́ąjįʼ Daʼéeʼéshígíí bikʼeh dahoniilʼı̨́įgo éí Jesus nihiNaatʼáanii bikʼehgo deiyíníikááh. Éí iiná doo ninítʼiʼii yichʼįʼ nihooʼish. (Revelation 7:14-17) Áko dííshjı̨́įdi naatʼáanii dajílínígíí, éí tsʼídá doo łaʼ béédajiʼdoodlíił da!