Łaʼda tʼáá yíní átʼéiigi bééhojósįįhgo éí bikʼehgo bił kʼé ahizhdiʼníi doo. Tʼáá ákótʼéego Jiihóvah yíní átʼéiigi nihił bééhoozįįhgo, éí íiyisíí ájítʼéiigi bééhodiilzįįł, áko éí bee bił kʼé ahidiiʼníigi bidziil doo. God éí dı̨́įʼgo hazʼą́ągi aláahdi átʼé: Éí beʼadziil, bihódząʼ, bitʼáá ákogi éʼétʼé, áádóó beʼayóóʼóʼóʼniʼ.

Jiihóvah “Diyin God nílíinii! Haʼátʼíí lá ahayóí lá! Ayóó ánóodziilgo índa kʼídíínílniiʼgo yádiłhił índa nahasdzáán íinilaa.”—JEREMIAH 32:17.

God ayóó ábóodziilii éí tʼáá ałtsoní áyiilaii bee yitʼı̨́. Shı̨́įgo tłʼóóʼgóó jizı̨́įgo jóhonaaʼéí bee honeezílí łeh. Díí éí Jiihóvah ayóó ábóodziilii áyiilaii bitsʼą́ą́dóó bee hoozdoh. Jóhonaaʼéí haa bóodziil? Jóhonaaʼéí tsʼídá ałníiʼgi éí 27,000,000°F daaní. Tʼáá ahą́ą́h míiltsoh ląʼí neeznádiindi ánéelą́ąʼdi nuclear bombs dadildonii bíighahgo adziilii bitsʼá hwiileeh.

Yáhoníkáán biiʼ sǫʼ doo jółtaʼ ádanéelą́ʼígíí éí jóhonaaʼéí yiláahdi ádaníłtsxo. Yótʼááh nideiiłkaahii ádaaníigo éí sǫʼ łaʼ ayóó áníłtsxogo UY Scuti yee dayózhíigo éí jóhonaaʼéí siʼą́ągi niitʼą́ągo éí nahasdzáán ałtso iidoołnah áádóó Jupiter ahééhádááh biláahdi áníłtsxo doo. Áko Jeremiah 32:17 áníigi díí hazhóʼó bee bikʼidiʼdiitı̨́įłgo Jiihóvah beʼadziil yee yótʼááh hiníláii índa nahasdzáán áyiilaa.

 God beʼadziil haitʼéego nihíká análwoʼ? Nahasdzáán bikááʼ índa biyiʼdi dahólóonii, áádóó jóhonaaʼéí God áyiilaago binahjįʼ dahiniiʼná. Beʼadziilii choyoołʼı̨́įgo bílaʼashdlaʼii yee yíká análwoʼ. Haitʼéego yíká análwoʼ? Jesus éí nahasdzáán bikáaʼgi naagháhą́ądą́ą́ʼ God éí adziilii haidiníʼą́. Matthew ání: “Doo daʼ ooʼínígíí daʼooʼı̨́ áńdaalneʼ, áádóó nidaʼniłhodígíí nidaakai áńdaalneʼ, łóód atsʼíís yiyáanii naałdzidii bee bąąh dah nidahazʼánígíí hadaałtʼé áńdaalneʼ, áádóó bijédaakałígíí daʼdiitsʼaʼ áńdaalneʼ, áádóó daneeznánígíí nááhidiiljeeh.” (Matthew 11:5) Kʼadshąʼ? Diyin Bizaad ání: “Chʼééh dadeeskaii éí bee adziilii yeidiiʼaah,” áádóó “Diyin God yibaʼ ádaatʼéii éí biinéí nídaadleełgo dabidziil doo.” (Isaiah 40:​29, 31) God éí “tsʼídá aláahdi átʼéego adziil” nihaidooléełgo éí bee tʼáá ałtsoní bee nihichʼįʼ nidahwiiʼnánígíí bichʼįʼ hadaʼíiniilníi doo. (2 Corinthians 4:7) Kótʼéego God ayóóʼánihóʼníigo beʼadziil doo niitʼéehii yee nihíká análwoʼgiísh naniiłná?

Jiihóvah “éí hódzą́ yee nahasdzáán niiníʼą́; akʼiʼdiitįįhii yee yótʼááh hiníláii bidahoníłdzilgo áyiilaa.”—PROVERBS 3:19.

Tʼáá ałtso God áyiilaii baa íhwiilʼaahgo éí dooládóʼ bihódząʼ ayóó átʼéé lá niidzin łeh. Biomimetics wolyéego ndaʼałkaahii éí God ádayiilaii deinéłʼı̨́įgo áádóó yedaʼałʼı̨́įgo yitsʼą́ą́dóó tʼáadoo leʼé ádeileʼ. Éí bee iʼiilkeedí binááʼ doodaiiʼ chidí naatʼaʼí ádaatʼéii éí God ádayiilaii yee yéédaʼałʼı̨́.

Bílaʼashdlaʼii bitsʼíís hadilyaaígi nélʼı̨́įgo éí God bihódząʼ dooládóʼda hwiindzin. Awééʼ tʼóó átsą́ądi haleehígo baa nitsáhákees. Éí cell tʼááłáʼí bee hahalzhish áádóó éí awééʼ ánoolin dooleełgi díí cells dabiyiʼ. Díí cells tʼáá ahedaałtʼéego tsʼídá tʼóó ahayóígóó ałtsʼáhákah. Ndi bikʼi hoolzhishgo cells yę́ę ałʼąą ádaatʼé yileeh, éí łaʼ tsʼin bicell, dił bicell, áádóó atsʼóóz bicell nidahaleeh. Áádóó atsą́ądi sinilii hodileehgo dadilnish. Díí tʼááłaʼí cell yę́ę náhástʼéí nidiziʼjįʼ awééʼ yileehgo éí billions ánéelą́ąʼgo cells yee hádítʼįįh. Kótʼéego bílaʼashdlaʼii ályaagi ląʼí diné éí Diyin Bizaad yikʼeʼashchínę́ę tʼáá aaníí ání daaní: “Tʼóó bikʼeʼayóigo áshiinilaaígíí bąą naa hashniih doo.”—Psalm 139:14.

God bihódząʼ haitʼéego nihíká análwoʼ? Ánihiilaii éí bee nihił dahózhǫ́ǫ dooígíí bił bééhózin. God bibee akʼiʼdiyiitįįhii índa bił bééhózinii tʼóó ahayóí, áko tʼáá bí Bizaad biiʼdę́ę́ʼ hódzą́ bee naʼnitinii nihichʼįʼ kwííłʼı̨́. Diyin Bizaad ánihiłní: ‘Kʼé nídaʼahidohní.’ (Colossians 3:13) Díísh hódząʼ bee naʼnitinii átʼé? Aooʼ. Ndaʼałkaahii ádaaníigo éí kʼé níʼjołeełgo nizhónígo awosh, áádóó dił naʼałkidgi wóyahgo áyósin. Yínííł áádóó atsʼíís yąą dah hwiidoołʼaałii neʼ áyósin. God éí akʼis hóyáanii nahalin, éí saad nihá yáʼátʼéehii índa nihíká adoolwołii yee nihichʼįʼ yáłtiʼ. (2 Timothy 3:​16, 17) Łaʼda kótʼéhígíísh shikʼis doo laanaa nínízin?

“Jiihóvah éí tʼáá ákogi éʼétʼé ayóóʼáyóʼní.”—PSALM 37:​28, NW.

God éí tʼáá áłahjįʼ tʼáá ákogi áánííł. Díí bee bééhózingo “Diyin God yeeʼ doo yáʼáshóonii tsʼídá doo  ííléeh da, índa Aláahgo Ayóóʼábóodziilii éí doo ákwii éʼétʼéii tsʼídá doo ííléeh da.” (Job 34:10) Yee ánihwiiʼaahii éí tʼáá ákwíí átʼéego yee éʼéłʼı̨́. Psalmist éí Jiihóvah áyidííniidígi átʼéego ání: “Tʼáá ákogi átʼéego á nihoyíʼaah doo.” (Psalm 67:4) Háálá Jiihóvah ‘éí ajéí haisííd,’ áko tʼóó ádahodilʼíinii éí yooʼı̨́įgo yikʼehgo yá nihwiiʼaah. (1 Samuel 16:7) God éí díí tsiʼooldahgo aa hojoobaʼ ádinígi tʼáá ałtso yaa ákonízin, áko ání: “Doo yáʼádajíshóonii éí kéyah bitsʼą́ąjįʼ áhodiʼdooldįįł.”—Proverbs 2:22.

Ákótʼée ndi, God éí áháchįʼ doo yee tsı̨́įłgo ánihwiiʼaah da. Éí aa aʼááh dínéesįįł niizįįhgo éí aa aʼááh niizįįh. Diyin Bizaad áníigo Jiihóvah “éí aa aʼááh nízin áádóó joobaʼ,” éí doo yáʼájíshóonii tʼáá aaníí ájíníigo hashtʼeʼninádeeshdááł jizinígíí éí ndi yaa joobaʼ. Daʼ díísh ánihwiitʼaah bee ajoobaʼii átʼé?—Psalm 103:8; 2 Peter 3:9.

God bitʼáá ákogi éʼétʼéii haitʼéego nihíká análwoʼ? Éí doo ałʼąą ádaniitʼéego nihaa nitsékees da. Yilʼaadii Peter kóní: “Diyin God doo ałʼohgo diné yaa nitsíkees da. Nidi ałʼąą dineʼé bitahdę́ę́ʼ tʼáá háiida hodísin áádóó tʼáá ákogi ááníłígíí tʼéiyá ádeidiitʼaah.” (Acts 10:​34, 35) Haʼátʼíí shı̨́ı̨́ ádóoneʼé ídlı̨́įgi, kéyahdę́ę́ʼ yiidáałgi, haanízahjįʼ íiltaʼgi, doodaiiʼ hootah nihééhoʼdílzingi Jiihóvah éí ádaa nihididooʼááł índa bichʼįʼ hodíníilzin doo.

Tʼáá ákogi éʼétʼéii bikʼidiʼyiitįįh áádóó nihíká adoolwoł biniyé God éí nihintsékees bee ádiníilʼı̨́į doogo nihainílá. Diyin Bizaad kótʼéego yaa halneʼ, bee hazʼáanii nahalingo ‘dabijéí biyiʼdi’ éí ádajooníiłgi yáʼádaatʼééh doodaiiʼ doo yáʼádaatʼéeh dago ‘hoł ííshjání áyósin.’ (Romans 2:15) Díí haitʼéego nihíká adoolwoł? Éí nihintsékees hazhóʼó naniitingo éí doo ákogi ádaatʼéii ádiiʼníił da, índa atínihidoolíiłii bitsʼą́ąjįʼ kónihósin. Asiilziih ndi, nihintsékees bee ádiníilʼínígíí hashtʼeʼninánihidoodlóós. God bitʼáá ákogi éʼétʼéii bikʼiʼdadiitą́ągo ahánígo ahínihółtąʼ doo.

“Diyin God ayóóʼóʼóʼníinii nilı̨́.”—1 JOHN 4:8.

God éí adziil, hódząʼ, índa tʼáá ákogi éʼétʼéii yee naalnishgo ííshjánígo áyósin, ndi Diyin Bizaad éí díí táaʼgo éí jílı̨́, doo níi da. Ayóóʼóʼóʼní éí jílı̨́, ní. Haʼátʼíí biniyé kóní? Jó beʼadziilii éí yee naalnish, áádóó bihódząʼ índa bitʼáá ákogi éʼétʼéii éí hazhóʼó choyoołʼı̨́. Ndi Jiihóvah beʼayóóʼóʼóʼniʼ nabiiłnáago yee tʼáá ałtsojįʼ áánííł.

Azhą́ Jiihóvah tʼáadoo yídin nilíní da ndi, ayóóʼóʼóʼniʼ nabiiłnáago bílaʼashdlaʼii índa diyingo ndaalʼaʼí áyiilaa. Díí éí hweʼayóóʼóʼóʼniʼ dóó hweʼajoobaʼ bee baa áhojilyą́ągo bił dahózhǫ́. Áádóó bił hadleeʼgo bílaʼashdlaʼii áyiilaaígíí éí nahasdzáán dabighan dooleełgo biniyé yá áyiilaago yeidiníʼą́. Diné tʼáá ałtso tʼahdii ayóóʼáyóʼníigo “doo yáʼátʼééh ádaaníiłii índa yáʼátʼééh ádaaníiłii bá hááʼátʼáahgo áyósin, áádóó tʼáá ákogi ádaaníiłii índa doo tʼáá ákogi ádaaníiłii bá nááháltı̨́įhgo áyósin.”—Matthew 5:45.

Áádóó Jiihóvah éí “aa aʼááh nízin” índa “joobaʼ.” (James 5:11) Tʼáá aaníí ádeinízingo God bééhodeesįįłgo áhánígo bił nishłı̨́į doo danízinii éí God ayóóʼábóʼní. Éí kódajítʼéhígíí tʼááłáʼí jinítínígo yáʼátʼéehgo honéłʼı̨́. Áko éí ní naa “áhályą́.”—1 Peter 5:7.

God beʼayóóʼóʼóʼniʼ haitʼéego nihíká análwoʼ? Hózhónígo eʼeʼáahgo baa hózhǫ́ǫ łeh. Awééʼ yázhí anádlohgo baa honeení. Akʼéí ayóóʼáhóʼníigo éí nihił nílı̨́į łeh. Kódaatʼéhígíí éí doo ayóó bídin ídlı̨́į da, ndi éí niheʼiinaʼ bee nihił dahózhǫ́ǫgo ádanihósin.

God beʼayóóʼóʼóʼniʼ éí sodizin ałdóʼ nihá bohónéedzą́ągo áyiilaa. Diyin Bizaad ání: “Tʼáadoo haʼátʼíhída nihidaʼdiiłʼáhí, nidi ahééh danohsingo tʼáá ałtsojįʼ sodizin índa náʼookąąh bee deínóhkeedígíí Diyin God bił béédahonohsin.” Azhéʼé ayóóʼóʼóʼnínígíí nahalingo, God éí tʼáá nihí siidzı̨́įgi nihidaʼdiiłʼáhígíí bee shichʼįʼ sodadołzingo nihíká adeeshwoł nihiłní. Áko Jiihóvah bił hadleeʼgo bí “bitsʼą́ą́dę́ę́ʼ bee achʼįʼ hózhǫ́ náhásdlı̨́įʼii, akʼidiʼyiitįįh tʼáá ałtso yiláahdi átʼéii,” nihichʼįʼ kwíidoolííł.—Philippians 4:​6, 7.

Dı̨́įʼgo God yee átʼéii, éí beʼadziil, bihódząʼ, bitʼáá ákogi éʼétʼéii índa beʼayóóʼóʼóʼniʼ baa nídasíitʼįįd. Ákoósh éí God átʼéiigi hazhóʼó bikʼidiʼnitą́? God baa ahééh nínízingo éí ná áátʼįįdgi índa ná áʼdoolíiłgi baa íhwiidííłʼááł daniidzin.