1. (a) Jéfthah dóó Hánnah éí haʼátʼíí bee hwééhoʼdílzin? (Áłtsé naashchʼąąʼígíí níníłʼı̨́.) (b) Haʼátʼíí naʼídíkid baa nídadíitʼįįł?

JÉFTHAH éí doo náhinílyéésgóó á sizı̨́ dóó naabaahii nilı̨́ı̨́ ńtʼééʼ. Hánnah éí asdzání doo ayóigo ádaa nitsíkeesii nílı̨́įgo bahastiin dóó bighan hazʼą́ągi yaa áhályą́ą́ ńtʼééʼ. Jéfthah dóó Hánnah éí Jiihóvah jidósin ńtʼééʼ. Tʼáá ájíłah Jiihóvah bichʼįʼ ádee hajoodzííʼ áádóó beʼjiilaa. Dííshjı̨́įdi tʼáá ałtso diné, Jiihóvah yichʼįʼ ádee hadadeesdzíiʼii bá nizhónígo áʼjiilaa. Táaʼgo naʼídíkid baa nídadíitʼįįł: Haʼátʼíí óolyé ádee haʼoodzííʼ? God bichʼįʼ ádee haʼoodzíiʼgo haʼátʼíí biniyé baa hastiʼgo baa nitsáhákees? Jéfthah dóó Hánnah haʼátʼíí bitsʼą́ą́dóó bíhooʼaah?

2, 3. (a) Ádee hajoodzíiʼgo haʼátʼíí óolyé? (b) God bichʼįʼ ádee hajoodzíiʼgo Diyin Bizaad haitʼéego yaa halneʼ?

² Diyin Bizaad éí ádee haʼoodzíiʼgo éí tʼáá aaníí ádeeshnííł jiníigo God bichʼįʼ háázhdoodzihgo óolyé. Diné łaʼda kóníigo Jiihóvah yichʼįʼ ádee hadidoodzih, ná kóshtʼı̨́į doo, niʼiishłée doo, kótʼéego ná naashnish doo, doodaiiʼ díí bitsʼąą áníshtʼée doo. Ádee hadzoodzíiʼgo éí tʼáá hó íizhnízingo ázhdoonííł, bíhodiʼnilchéehgo éí ndagaʼ. Ádee hadzoodzíiʼgo éí hoł nílı̨́įgo bikʼehgóó ázhdooníiłgo  Jiihóvah há yaa nitsíkees. Diyin Bizaad éí ádee hajoodzíiʼgo éí tʼáá aaníí ádíshníigo ádeeshnííł doodaiiʼ díí bitsʼąą áníshtʼée doo níigo yee haadzih. (Genesis 14:22, 23; Hebrews 6:16, 17) God bichʼįʼ ádee haʼoodzíiʼgo haʼátʼíí biniyé baa hastiʼgo baa nitsáhákees doo, ní Diyin Bizaad?

³ Mózes bibee hazʼáanii áníigo łaʼda Jiihóvah yichʼįʼ ádee hadoodzíiʼgo, “bizaad doo ałtah ánáyoodlíił da; yee haadzíʼígíí tʼáá átʼé bikʼehgo yeʼełʼı̨́į doo.” (Numbers 30:2) Tʼahádóó Sálaman ání, “Diyin God bichʼįʼ ádee hahidídziihgo tʼáadoo átʼah índa nideeshłééł níníziní, háálá diné doo áhályáanii doo bił hóshǫ́ǫ da; bee ádee hadíínídzíiʼii bikʼehgo nidíílééł!” (Ecclesiastes 5:4) Jesus ání, God bichʼįʼ ádee hajoodzíiʼgo éí ílíinii átʼé: “Ałkʼidą́ą́ʼ diné kódabidiʼníí nítʼéeʼgo dasidootsʼą́ą́ʼ, Tʼáadoo tʼóó ádíníigo ádee hahídziihí, nidi bee ádee hahídziihii éí [Jiihóvah] binááł biʼdíílííł.”—Matthew 5:33.

4. (a) Jiihóvah bichʼįʼ ádee hadiidzíiʼgo haʼátʼíí biniyé baa hastiʼgo baa nitsáhákees? (b) Jéfthah dóó Hánnah haʼátʼíí bitsʼą́ą́dóó baa ídahwiidiilʼááł?

⁴ Jiihóvah bichʼįʼ ádee hadiidzíiʼgo ayóó ílı̨́įgo baa nitsáhákees, doo nihił nílı̨́ı̨́góó éí bił kʼé ahidiiʼníigi yidínóołtłʼah. David tʼáadoo bahatʼaadí áyiilaa: “Háíyeeʼ [Jiihóvah] bidah yiskʼidgóó hadoogáałgo yíneelʼą́? Doodaléiʼ háíyeeʼ bihodiyingo hazʼą́ągi yidoozįįłgo yíneelʼą́?” Áádóó David tʼáá bí ánídooʼniid, “Doo binaʼadloʼgóó ádee hadoodzíiʼii lą́ą.” (Psalm 24:3, 4) Jéfthah dóó Hánnah éí haʼátʼíí yee ádee hadoodzííʼ? Ákoósh bá nanitłʼah?

5. Jéfthah haʼátʼíí yee ádee hadoodzííʼ? Áádóó haa hóótʼįįd?

⁵ Jéfthah éí God bidineʼé biʼanaʼí Áman dineʼé bikʼi jiijeehgo Jiihóvah yichʼįʼ ádee hadoodzííʼ. ( Judges 10:7-9) Jéfthah éí Áman dineʼé shílákʼee didííʼááł níigo Jiihóvah náyookąąhgo ádee hadoodzííʼ: ‘Áman dineʼé shílákʼedííníʼą́ągo, áádóó hooghanjįʼ nááshdáałgo shighan bichʼéʼétiindóó tʼáá háiida shaa níyáhígíí éí Jiihóvah bííʼ átʼé.’ God éí Jéfthah bisodizin yidiiztsʼą́ąʼgo bił daʼahijigánígíí bikʼeh jideesdlı̨́ı̨́ʼ. Jéfthah bighanjįʼ náádáałgo hatsiʼ ayóóʼájóʼnínígíí hadááh níyá. Díí hatsiʼ éí Jiihóvah bííʼ dooleeł. (Judges 11:30-34) Atsiʼ jílínígíí éí haitʼéego hódéétʼiʼ?

6. (a) Jéfthah dóó bitsiʼ God yichʼįʼ ádee hadoodzíiʼgi haitʼéego bá nanitłʼah ńtʼééʼ? (b) Deuteronomy 23:21, 23 dóó Psalm 15:4 bitsʼą́ą́dóó, ádee haʼoodzíiʼgi haitʼéego baa íhooʼaah?

⁶ Hazhéʼé yee ádee hadoodzíʼígíí yeʼdoolííł biniyé, Jiihóvah bikin biiʼ sohodizin siʼą́ądi nijilnish doo. Jéfthah ádee hadoodzíʼígi tʼáadoósh hazhóʼó baa tsízdeezkéez da? Ndagaʼ. Tʼáá shı̨́ı̨́ íídą́ą́ʼ hoł bééhózin, tʼóó níjídzáhígo hatsiʼ áłtsé  hachʼįʼ chʼídoolwoł. Áko hoł bééhózin doodaiiʼ doo hoł bééhózin da ndi, Jiihóvah bichʼįʼ ádee hazhdoodzíʼígíí bizhdoolíiłgi hó dóó hatsiʼ há nanitłʼah. Jéfthah hatsiʼ hachʼįʼ chʼélwodgo hajéí bichʼįʼ hodiiznááʼ. Áko hatsiʼ jílínígíí éí “bizháán nijigháhígíí bikʼédí jílı̨́įgo” dziłghą́ą́ʼgóó ajííyá. Éí haʼátʼíí biniyé? Jéfthah éí hayeʼ doo hólǫ́ǫ da, áko díí tʼéiyá hatsiʼgo doo adooyeh da índa áłchíní doo bee hodooleeł da. Áko éí ázhiʼ bee náás oochíiłii yę́ę áajįʼ bee nihodootʼih. Ákondi Jéfthah dóó hatsiʼ éí ádee hazhdoodzíiʼgi tʼáá hó ádaa nitsíjíkees yę́ę biláahdi átʼéego baa ákozhniizı̨́ı̨́ʼ. Jéfthah ájíní: “[Jiihóvah] bichʼįʼ ádee hadeesdzíiʼgo kʼad doo łahgo ánáoshdleʼ átʼée da.” Hatsiʼ ání: “Ádee hadíínídzíiʼgo shí ałdóʼ bikʼehgo háínídzíʼígíí shichʼįʼ ádoonííł.” (Judges 11:35-39) Jéfthah dóó bitsiʼ doo biyoochʼíid da, azhą́ há nanitłʼah ndi God yichʼįʼ ádee hadoodzíiʼgi bikʼeh ádiiʼnííł jinízin.—Deuteronomy 23:21, 23; Psalm 15:4 yíníłtaʼ.

7. (a) Hánnah haʼátʼíí yee ádee hadoodzííʼ, éí haʼátʼíí biniyé? Haitʼéego bá áhoodzaa? (b) Hánnah ádee hadoodzííʼ yę́ę, Sámuel haitʼéego hódéétʼiʼ? (Footnote níníłʼı̨́.)

⁷ Hánnah ayóó átʼéego hachʼįʼ nahwiiʼnáago Jiihóvah bichʼįʼ ádee hajoodzííʼ. Doo ajiłchíígóó biniinaa yínííł jílı̨́, áko biniinaa łahdę́ę́ʼ hódaʼatsʼih. (1 Samuel 1:4-7, 10, 16) Ájítʼéegi Jiihóvah bee bił hojoolneʼgo díí bichʼįʼ ádee hajoodzííʼ: “Tʼáá ałtsoní bee Bóhólníihii nílíinii, íinínízingo shí ná naalʼaʼí nishłíinii shichʼįʼ nahwiiʼnánígíí baa ákonínízingo shéénílniih áádóó tʼááká shaa yóónééh, nidi íinínízingo shiyáázh hodooleełgo beʼiinaʼ ninítʼiʼ bijı̨́įjįʼ tʼáá átʼé nííʼ dooleeł; bitsiiʼ tsʼídá doo kʼídoogish da.” * (Footnote níníłʼı̨́.) (1 Samuel 1:11) Jiihóvah éí Hánnah bisodizin yidiiztsʼą́ąʼgo łaʼ nínáánááhaigo ashkii jishchı̨́, Sámuel woosyeʼ. Hánnah ayóó átʼéego baa hoł hóozhǫǫd! Áko God yichʼįʼ ádee hadoodzííʼ yę́ę tʼáadoo yaa yooznah da. Hayáázh jishchı̨́įgo ájíní: “Eii Bóhólníihii bííníshkeed nítʼééʼ.”—1 Samuel 1:20.

8. (a) Hánnah ádee hadoodzíiʼgi yeʼdoolíiłgiísh bá nanitłʼah? (b) Psalm 61 éí haitʼéego Hánnah áátʼįįdgi bee baa nitsíníkees?

⁸ Sámuel tááʼ daatsʼí binááhaigo, Hánnah éí Jiihóvah yichʼįʼ ádee haadzííʼ yę́ę yiʼiilaa. Éí hayáázh Sámuel, Sháílohdi God bikin biiʼ hodílzingóó Aláahgo Nááʼiiłniihii Íílai bichʼįʼ bił jiníʼáázh, áádóó ájíní: “Díí ashkii bíká sodiszin nítʼééʼ, áko [Jiihóvah] baa náoshkąąhgo bííníshkeedígíí éí sheidiníʼą́. Éí bąą [Jiihóvah] baa náhodiníʼą́; tsʼídá tʼáá hweʼiinaʼ ninítʼiʼjįʼ [Jiihóvah] baa náhodiníʼą́ągo bííʼ jílı̨́į dooleeł.” (1 Samuel 1:24-28) Éí bijı̨́ı̨́dóó  Sámuel ákwii haghan. Diyin Bizaad ání, “[Jiihóvah] binááł ashkii Sámuel noosééł.” (1 Samuel 2:21) Hánnah kótʼéego ádee hajoodzíiʼgo ayóó há nanitłʼah. Háálá hayáázh ayóóʼájóʼnínígíí éí doo bił hojílǫ́ǫ́góó doo hanááł dínóoyéeł da. Ndi Hánnah éí Jiihóvah bichʼįʼ ádee hajoodzíiʼgi ílı̨́įgo baa nitsíjíkees. Hoł nílı̨́įgo baa nitsíjíkeesígíí ninázhdidooʼáałgo binahjįʼ ádee hajoodzíiʼii bizhdoolííł jinízin.—1 Samuel 2:1, 2; Psalm 61:1, 5, 8 yíníłtaʼ.

9. Kʼad éí haʼátʼíí baa nídadíitʼįįł?

⁹ Jiihóvah bichʼįʼ ádee haʼoodzíiʼgi ílíinii átʼéego bikʼidaʼdiitą́, kʼad díí naʼídíkid baa nídadíitʼįįł: Nihísh éí haʼátʼíí bee ádee hadidíídzih? Áádóó haitʼéego bidiilkaalgo beʼdiilnííł?

10. Oodlání jílı̨́įgo, haʼátʼíí íiyisíí ílı̨́įgo bee ádee hazhdidoodzih? Díísh éí haʼátʼíí bił danítʼiʼ?

¹⁰ Oodlání jílı̨́įgo, hweʼiinaʼ Jiihóvah baazhdiníʼą́ągo éí íiyisíí ílı̨́įgo ádee hadoodzíiʼii átʼé. Tʼáá sáhí Jiihóvah bichʼįʼ sodizin bee, ná naashʼaʼ doo bijiníigo baa ázhditʼaah, azhą́ shı̨́ı̨́ bíighahí achʼįʼ ádahooníił dooleeł ndi. Jesus ání, “ádeizhdiyooʼnah,” díí áníigo Jiihóvah  áłtsé ííníilzin doo, nihí akééʼdóó íʼdíínílzin doo. (Matthew 16:24) Jiihóvah baa ádaʼdeetʼą́ bijı̨́ı̨́dóó, “[Jiihóvah] bííʼ daniidlı̨́.” (Romans 14:8) Jiihóvah baa ádaʼdeetʼą́ągi baa hastiʼgo baa nitsáhákees. Psalm yikʼeʼashchínę́ę ánínígi: “[Jiihóvah] tʼáá ałtsoní shaa yiiznilii haʼátʼíishąʼ bee bichʼįʼ kʼéédideeshʼnííł?” Éí “bidineʼé tʼáá ałtso binááł . . . bichʼįʼ ádee hadeesdzíiʼii kʼad biʼdeeshłííł.”—Psalm 116:12, 14.

11. Baptize áníʼdiilyaa yę́ę bijı̨́ haʼátʼíí béénílniih?

¹¹ Tʼáásh íídą́ą́ʼ Jiihóvah bichʼįʼ ádee hadíínídzíiʼgo baptize áníʼdiilyaa? Ákwii nidzaago baa hózhǫ́! Baptize ániʼdilnéehgo ákwii brother yááłtiʼ yę́ę, tʼáásh íídą́ą́ʼ Jiihóvah bichʼįʼ ádee hadíínídzííʼ níigo naʼídéełkid yę́ęísh béénílniih? Áádóó “Jiihóvah baa ádíínítʼą́ągi dóó baptize áníʼdiilyaagi éí kʼad Jiihóvah Yá Halneʼé nilı̨́įgo bee nééhoʼdílzin” dooleełgiísh bikʼiʼdinitą́? Díí bichʼįʼ aooʼ dííníniidgo, tʼáá ałtso diné ákwii binááł éí Jiihóvah tʼáá íídą́ą́ʼ bichʼįʼ ádee hadíínídzíiʼgo átʼé. Áádóó baptize ániʼdidoolníiłgo ná bee lą́, kʼad éí Jiihóvah yá nahalneʼé nílı̨́įgo áníʼdiilyaa. Jiihóvah yéigo bił hózhǫ́ǫgo íinilaa!

12. (a) Haʼátʼíí naʼídíkid baa nitsíikees doo? (b) Peter éí haʼátʼíí bee ádanohtʼée doo nihiłní?

¹² Baptize ániʼdilyaago éí neʼiinaʼ bee Jiihóvah ná naashʼaʼ doo, áádóó ní bikʼehgo óʼoolʼįįłii bikʼeh áníshtʼée doo bidííníniidgo bichʼįʼ ádee hadíínídzííʼ. Ndi baptize áhoʼdilʼįįhgo éí bee hahóótʼiʼ. Náás hoolzhishgóó, tʼáá áníiltso tʼáá nihí díí bee nináʼádíilkaah doo. ‘Baptize áshiʼdiilyaadóó Jiihóvah bił kʼé ahidishníigi haitʼéego bidziilgo íishłaa? Tʼáá awołí beésh bá naashʼaʼ? (Colossians 3:23) Tʼáásh ahą́ą́h sodiszin? Diyin Bizaadísh tʼáá ákwii jı̨́ yíníshtaʼ? Jiihóvah Yá Dahalneʼé áłah nádleehgiísh áłahjįʼ náshdááh? Tʼáásh ahą́ą́h nahaneʼgi bee anishtah? Doodaiiʼ díísh łaʼ doo bíneeshdlı̨́į da sélı̨́ı̨́ʼ?’ Yilʼaadii Peter tʼáá íídą́ą́ʼ kónihidííniid, Jiihóvah bá naʼalʼaʼgi bitsʼádíníidáałgoda átʼé. Niheʼoodląʼ bidziilgo ííníilzingo, íhwiilʼaahgo, hadaʼííníilníigo, dóó yéigo God bikééʼ siidzı̨́įgo éí doo ákódiiʼníił da.—2 Peter 1:5-8 yíníłtaʼ.

13. Jiihóvah baa ázhdeetʼą́ągo baptize áhoʼdilyaago, haʼátʼíí baa ákozhnízin doo?

¹³ Tʼáá íídą́ą́ʼ Jiihóvah bichʼįʼ ádee hadiidzíiʼgi nátʼą́ą́ʼ kónídíídlíiłgo doo bohónéedzą́ą da. Jiihóvah bá naashʼaʼgi doodaiiʼ Oodlání ídlı̨́įgi ádadéshłááʼ niidzı̨́įʼgo, tʼahádóó doo kójíníi da doo, God yeeʼ tʼáadoo baa ádinishtʼą́ą da índa baptize áshiʼdiilyaagi doo ílı̨́į da. * (Footnote níníłʼı̨́.) Łaʼda Jiihóvah yaa ádeetʼą́ą́ ńtʼéeʼgo, doo ákǫ́ǫ́ áátʼįįdgóogo éí Jiihóvah dóó congregation bichʼįʼ ádihozhdidooltʼih. (Romans 14:12) Jesus éí łaʼ kódaatʼé níigo yaa haadzííʼ yę́ęgi doo ádaniitʼée da doo: “Átséédą́ą́ʼ nihiʼayóóʼóʼóʼniʼ yę́ę bitsʼáhisoohkai.” Ndi Jesus éí kónihiłníi doo daniidzin: “Baa nidaahkaii shił bééhózin. Niheʼayóóʼóʼóʼniʼ áádóó niheʼoodląʼ áádóó chodaahʼínígíí áádóó nízaadgóó nihihaʼahóní, índa átsé baa nisoohkaii yę́ę tʼah biláhídi átʼéii baa naahkaigo shił bééhózin.” (Revelation 2:4, 19)  Jiihóvah baa ádaʼdeetʼą́ągi wołí bee bedaʼiilʼı̨́įgo bił hózhǫ́ǫgo ádeiyíníilzin doo.

14. Haʼátʼíí éí naaki góneʼ ílı̨́įgo bee ádee hazhdoodzih? Éí haʼátʼíí biniyé?

¹⁴ Naaki góneʼ íiyisíí ílı̨́įgo bee ádee hazhdoodzihii éí iigehgi ádee haʼoodzíiʼii. Ahéʼéskéegi dólzinii átʼé. Jiihóvah éí iigehgi ádee haʼoodzíiʼii baa hastiʼgo yaa nitsíkees. Ahastiin dóó eʼasdzą́ą́ jidooleełígíí éí Jiihóvah dóó diné ákwii binááł ádee hazhdoodzih. Éí ayóóʼáhííníiʼníi doo, ałhaa áhwiilyą́ą doo, índa ałhił niidlı̨́į doo ahizhdiʼníigo ádee hazhdoodzih. Áádóó God bibee ahéʼéské bikʼehgóó ájooníiłgo nahasdzáán bikááʼ ałhił jiináa doo. Łahgóó díí átʼéego saadígíí doo chodaoʼı̨́į da, ndi God yidááhdóó tʼáá ádee hadahididziih. Kótʼéego ádee hazdidzihgo éí ahastiin dóó eʼasdzą́ą́ jileeh. Ajizyehgo éí hweʼiinaʼ ninítʼiʼjįʼ ahíjískée doo. (Genesis 2:24; 1 Corinthians 7:39) Jesus ání: “God ahainínilii éí diné doo łaʼ ałtsʼázhdoonił da.” Łaʼda ahíjiiyehgo éí hatsʼą́ą́ʼ diikʼąądgo tʼóó ałtsʼádiitʼash, doo jinízin da doo.—Mark 10:9.

15. Oodlání éí ahéʼáskéegi haitʼéego yaa nitsékees doo? Éí haʼátʼíí biniyé?

¹⁵ Tʼáá altso diné nidaʼiisííh, áko ahéʼéskéegi ałdóʼ niʼiidzííh hólǫ́ǫ doo. Éí bąą Diyin Bizaad ání, ahéʼéskéegi áchʼįʼ nidahwiiʼná dahólǫ́ǫ dooleełgo átʼé. (1 Corinthians 7:28) Dííshjı̨́įdi tʼóó ahayóí diné éí ahéʼéskéegi doo bił danilı̨́į da. Ahéʼéskéegi diikʼąądgo éí tʼóó ałtsʼáʼdootʼash hwiiniidzįįh. Ákondi Jiihóvah Yá Dahalneʼé éí ahéʼéskéegi doo kótʼéego yaa nitsídaakees da. Ajizyehgo God bidááhdóó ádee haʼoodzíiʼii átʼéego yaa nitsídaakees. Bee ádee hajoodzííʼ yę́ę kʼízhnítiʼgo éí God bichʼįʼ yoochʼííd ájiilaa doo, God éí yoochʼííd yijoołxá. (Leviticus 19:12; Proverbs 6:16-19) Jiihóvah Yá Halneʼé bichʼooní hólǫ́ǫgo éí yilʼaadii Paul ánínę́ę bééjílniih doo: “Neʼasdzą́ą́ hólǫ́ǫgo yóóʼadideeshʼááł tʼáadoo níníziní.” (1 Corinthians 7:27) Paul kóní háálá bił bééhózingo Jiihóvah éí ałtsʼáʼítʼaash yijoołxá.—Malachi 2:13-16.

16. Ałtsʼázhdootʼashgi dóó tʼóó kónígháníjįʼ hachʼooní bitsʼá doodáałgi, Diyin Bizaad haitʼéego yee naʼnitin?

¹⁶ Jesus áníigo éí tsʼídá tʼáá łáʼígo biniinaa bee hazʼáanii binahjįʼ ałtsʼázhdootʼash. Éí háiidígíída ahastiin doodaiiʼ eʼasdzą́ą́, doo hachʼoonígóó ił eshtéézh bił ájíítʼįįdgo áádóó doo kʼé náhádleehgóó éí ałtsʼáʼítʼaash bohónéedzą́ą doo. (Matthew 19:9; Hebrews 13:4) Tʼóó kónígháníjįʼ hachʼooní bitsʼá doodáałgi shąʼ? Díí ałdóʼ Diyin Bizaad ííshjánígo ííłʼı̨́. (1 Corinthians 7:10, 11 yíníłtaʼ.) Tʼóó kónígháníjįʼ hachʼooní bitsʼá doodáałgi éí Diyin Bizaad doo yee haadzíiʼ da. Ákondi doo yáʼátʼééhgóó hoł hooʼaʼgo, éí hachʼooní tʼáá yéigo atíshidoolííł doodaiiʼ Jiihóvah bił kʼé hwiindzin yę́ęgi shitsʼą́ą́ʼ bihodidootʼih jinízingo biniinaa tʼóó kónígháníjįʼda hachʼooní bitsʼázhdoogááł. * (Footnote níníłʼı̨́.)

17. Ahéʼáskéegi haitʼéego bidziil ájósin doo?

 ¹⁷ Łaʼ ahídzískéii éí haitʼéego hazhóʼó ahéʼáské dooleełgi bee nihíká aʼdoowoł nízingo elders yaa níʼáázh. Elders éí áhodidooniił, What Is True Love? wolyéhígíísh nóółʼı̨́ı̨́ʼ, áádóó Nighan Hazʼą́ągi Bił Dahózhǫ́ǫ Doogo Átʼé wolyéhígíísh yínóołtaʼ? Díí éí Diyin Bizaad binahjįʼ naʼnitin ádaatʼéii éí ahéʼáskéegi bidziilgo áyiiłʼįįh. Ahídzískéii łaʼ ájíní: “Díí naaltsoos hazhóʼó baa íhwiilʼaahgo, ahísiilkéegi baa hózhǫ́ǫgo nihá áyiilaa.” Nihisister nilı̨́įgo 22 nááhai ajiyéehgo, áko hatsʼą́ą́ʼ diikʼąądgo biniinaa kʼadę́ę niitʼééh jiniizı̨́ı̨́ʼ ńtʼééʼ. Áko díí naalkidígíí jinééłʼı̨́įʼgo ájíní: “Tʼáá áníidlah éí baptize ánihiʼdiilyaa, ndi áłʼąą átʼéego nitsíikees. Díí naalkidígíí nizhónígo nihíká eelwod! Kʼad éí yáʼátʼéehgo ahísiilké.” Áko, ahastiin dóó eʼasdzą́ą́ tʼáá ájíłah ahéʼáskéegi Jiihóvah bikʼehgóó ájooníiłgo éí ahídzískéego hoł hózhǫ́ǫgo ałhee dzíłdzil doo.

18, 19. (a) Jiihóvah Yá Dahalneʼé amá dóó azhéʼé, baʼáłchíní haʼátʼíí yá yídaneedlı̨́? (b) Full-time deílníshígíí haʼátʼíí dabidiʼníi doo?

¹⁸ Jéfthah dóó Hánnah ádee hadoodzííʼ yę́ę baa nídasíitʼįįd. Kótʼéego ádee hazhdoodzihgo binahjįʼ hatsiʼ dóó hayáázh tʼáá sahdii átʼéego Jiihóvah yá naalʼaʼgo beʼiinaʼ áyiilaa. Dííshjı̨́įdi ląʼí amá dóó azhéʼé baʼáłchíní kótʼéego full-time naʼanishgi dóó God bá naʼalʼaʼgi yá yídaneedlı̨́. Nihí ałdóʼ tʼáá ákótʼéego full-time naʼanishgi, díí ániid nidaakaiígíí bá bídaniidlı̨́įgo ádeiyíníilzin doo.—Judges 11:40; Psalm 110:3.

¹⁹ Dííshjı̨́įdi tsʼídá daatsʼí 67,000 ánéelą́ągo Jiihóvah Yá Dahalneʼé Worldwide Order of Special Full-Time Servants wolyéhígíí daʼatah. Łaʼ éí Béthelgi doodaiiʼ kin ádaalʼı̨́ı̨́góó, índa circuit biʼoonishgóó nidaalnish. Łaʼ daʼníłtsʼą́ą́ʼgóó nidaʼnitinii danilı̨́, special pioneers, missionaries, Assembly Hallgi ndaalʼaʼ, doodaiiʼ Bible school facilitygóó nidaalnish. Díí éí tʼáá ałtso “Vow of Obedience and Poverty” wolyéego yee ádaa dadeestʼą́. Jiihóvah binaanish siláagi biʼoonish yéigo binaashnish doo, tʼóó bikiinígo sheʼiinaʼ yishtʼih doo, dóó béeso biniyé naʼanishgi éí lą́ haʼniihgo tʼéiyá naashnish doo jiníigo bee ádaa ázhditʼaah. Bidaʼíníshígíí éí ílı̨́, éí biniinaa special full-time biʼoonish wolyé. Yee ádaa dadeestʼą́ągo yedaʼałʼı̨́įgo special full-time wołí bee binaanish ádayósingo ayáhígo ádaʼdólzin.

20. God bichʼįʼ ádee hadiidzíiʼgi haitʼéego baa nitsíikees doo? Éí haʼátʼíí biniyé?

²⁰ Tááʼ ałʼąą átʼéego ádee hadidoodzihgi baa nídasíitʼįįd. Díí shı̨́ı̨́ łaʼ bee ádee hadíínídzííʼ. Ádee hadiidzíiʼgo baa hastiʼii átʼéego nihił bééhózin, áko wołí bee íitʼı̨́įgo beʼiilʼı̨́į doo. (Proverbs 20:25) Jiihóvah bichʼįʼ ádee hadiidzíiʼgi doo beʼiilʼı̨́ı̨́góó biniinaa bá ninádíítłish. (Ecclesiastes 5:6) Éí bąą Psalm yikʼeʼashchínę́ę Jiihóvah íidííniid yę́ęgi ániitʼée doo: “Tʼáá ákwíí jı̨́ ádee hahidisdziihígíí beʼeshʼı̨́įgo hoolʼáágóó nízhiʼ baa hashniihgo hashtaał doo.”—Psalm 61:8.