1. Jiihóvah éí haʼátʼíí biniyé iiná hólǫ́ǫ doogo áyiilaa?

HOOLZHISHDĘ́Ę́ʼ Jiihóvah éí tʼáá sáhí hólǫ́ǫ́ ńtʼééʼ. Doo éí bił hodikʼą́ą da. Tʼáá ałtsojįʼ doo yídin nilíní da. Áko ayóóʼóʼóʼniʼ nabiiłnáago Jiihóvah éí iiná baa hózhǫ́ǫ doogo hahodiléehgo yaa nídiidzá.—Acts 17:​24, 25; 1 John 4:19.

2. Jesus dóó diyingo ndaalʼaʼí éí Jiihóvah ádayiilaii haitʼéego nidabiisʼnááʼ?

² Áłtsé éí Jiihóvah biYeʼ Jesus áyiilaa. Éí biYeʼ yił “tʼáá ałtsoní haidiilaa,” diyingo ndaalʼaʼí ałdóʼ áyiilaa. (Col. 1:16) Jesus éí Bizhéʼé yił naalnishgo ayóó yaa bił hózhǫ́. (Prov. 8:30) Diyingo ndaalʼaʼí ałdóʼ ayóó yaa bił dahóózhǫǫd. Éí ákweʼé dahólǫ́ǫgo Jiihóvah dóó Naanish Yiyiichįįhii Jesus yáʼąąsh dóó nahasdzáán áyiilaa. Áko diyingo ndaalʼaʼí haadaadzaa? Íídą́ą́ʼ nahasdzáán ályaago ‘diyingo nidaalʼaʼí tʼáá íiyisíí baa bił dahóózhǫǫd.’ Áádóó Jiihóvah tʼáá ałtso bílaʼashdlaʼii áyiilaajįʼ yéígo yaa bił dahózhǫ́. (Job 38:7; Prov. 8:31) Tʼáá ałtso ádayiilaaígíí éí Jiihóvah bibee ayóóʼóʼóʼní dóó bihódząʼ ííshją́ą́ ííłʼı̨́.—Ps. 104:24; Rom. 1:20.

3. 1 Corinthians 15:​21, 22 éí Jesus nááʼádiisʼniiʼgi haitʼéego bohónéedzą́ągo áyiilaa?

³ Jiihóvah éí nahasdzáán tʼáadoo bee honóoshónígo bílaʼashdlaʼii yá áyiilaago éí hoolʼáágóó iiná yee nídaʼdooldįįł yá yinízin. Ndi Ádam dóó Íiv éí Jiihóvah yikʼijįʼ asiih. Áko  hoolʼáágóó iináa dooleeł yę́ę baa náádiilyá. Bí dóó baʼáłchíní bitsʼą́ą́dóó oochíiłii tʼáá ałtso noonééł silı̨́ı̨́ʼ. (Rom. 5:12) Áko Jiihóvah haidzaa? Tʼáá íídą́ą́ʼ éí bílaʼashdlaʼii bee yisdádooʼniłii ádeeshłííł ní. (Gen. 3:15) Jiihóvah éí Ádam dóó Íiv baʼáłchíní bąąhági átʼéii dóó anoonééł bitsʼąą béédidoochiłgo nátʼą́ą́ʼ ninéidiyoołnihgo áyiilaa. Tʼááłáʼí nízinígo éí háíshı̨́ı̨́ bá naalʼaʼ doo nízinígíí éí hoolʼáágóó iiná yeididooʼááł.—John 3:16; Rom. 6:23; 1 Corinthians 15:​21, 22 yíníłtaʼ.

4. Haʼátʼíí baa nídadíitʼįįł?

⁴ Jiihóvah éí nááʼdiijeehgi yee ádee hadoodzíiʼgi tʼóó ahayóígóó bąąh naʼídíkid dahólǫ́. Náádiʼdoojahgi haitʼéego ádoolnííł? Ayóóʼádeíníiʼníinii iiná baa nidahaasyaʼgo bééhodiilzįįłísh? Nááʼdiijeehgi haitʼéego baa hózhǫ́ǫ doo? Jiihóvah bee ayóóʼóʼóʼní, bihódząʼ, dóó haʼólníigi éí nááʼdiijeehgi haitʼéego baa ahééh niidzingo nanihinitin? Díí ndaʼídíkid tʼáá ałkééʼ baa nídadíitʼįįł.

5. Haʼátʼíí biniyé doo tʼáá ałtso tʼáá łahjįʼ iiná baa nídadoolyéeł da?

⁵ Jiihóvah éí biYeʼ choyoołʼı̨́įgo tʼóó ahayói diné ninéididoołjah. Haʼátʼíí biniyé doo tʼáá ałtso tʼáá łahjįʼ iiná baa nídadoolyéeł da? Jó, tʼóó ahayói nihookáaʼgi diné iiná baa nídaasyáago éí doo ééhózin da dooleeł. Jiihóvah éí doo tʼóó dzólníígóó éʼéłʼı̨́į da. Bił bééhózingo éí hazhóʼó éʼélʼı̨́įgo tʼéiyá hashtʼehodítʼé. (1 Cor. 14:40) Jiihóvah éí hóyą́ dóó haʼólníigo biYeʼ Jesus yił naalnishgo bílaʼashdlaʼii nahasdzáán bikááʼ dahiináa doo biniyé ałkééʼ honíʼą́ągo áyiilaa. Jesus ałdóʼ tʼáá ákótʼéego éí 1,000 nááhai  hooʼáałgo Armagédan bitsʼą́ą́dę́ę́ʼ yisdáákaii yił nahasdzáán hashtʼéédeidléehgo éí náábidiʼdooljahígíí yá hashtʼedadiʼnéeh doo.

6. Acts 24:15 bikʼehgo Jiihóvah éí háí ninéididoołjah?

⁶ Íiyisíí éí Armagédan bitsʼą́ą́dę́ę́ʼ yisdájookaiígíí éí náábiʼdiiljéʼígíí Jiihóvah biNahatʼaʼ índa yee hasʼáanii bee nidadínóotı̨́ı̨́ł. Haʼátʼíí biniyé? Jó, náábiʼdiiljéʼígíí ląʼída éí “doo ákwii ádaatʼéii” dajílı̨́ı̨́ ńtʼééʼ. (Acts 24:15 yíníłtaʼ.) Christ nááʼádiisniiʼígíí bíká adoolwołgo éí hontsékees łahgo átʼéego ánídazhdoodlííł. Díí tʼáá íiyisíí yéigo naanish dooleeł áádóó tʼóó ahayói éí Jiihóvah doo yéédahósinígíí bee nidadínóotı̨́ı̨́ł. Dííshjı̨́įdi Diyin Bizaad bee nidaʼniitinígi átʼéego tʼááłáʼí nízinígoósh tʼáá bí nidabidínóotı̨́įł dooleełii bee dahólǫ́ǫ doo? Ániid náábiʼdiiljéʼígíí éísh congregation ałʼąą nahazʼą́ą́góó nidabiʼdiiʼníił doo? Áádóó ániid náábiʼdiiljéʼígíí éí hakééʼdóó nináábiʼdiiljéʼígíísh nidazhʼnitin doo? Díí tʼahádóó bééhózin doo. Ndi bééhózínígo Christ 1,000 nááhai hooʼááł nihoolzhiizhdi éí “nahasdzáán tʼáá níłtéél nítʼééʼ [Jiihóvah] bééhoʼdílzin doo.” (Isa. 11:9) 1000 nááhaijįʼ dooládóʼ naanish baa hózhǫ́ǫ da.

7. Diyin bidineʼé éí náábiʼdiiljéʼígíí haitʼéego baa nitsídajíkees doo?

⁷ Christ 1,000 nááhai hooʼáałgo biiʼ, éí nahasdzáán bikááʼdóó Jiihóvah haʼáłchíní hoł dahóshǫ́ǫ doo biniyé Hó hakʼehgo hashtʼeʼ nináhidookah. Éí łah átʼéego áńdazhʼdilnéehgo éí náábiʼdiiljéʼígíí baa aʼááh dazhnízingo doo yáʼátʼééhgóó nitsáhákees índa adáhonooní yikʼeh dadidlı̨́įgo índa Jiihóvah yikʼehgóó dahináa dooleełgi bee bíká aníjíjah doo. (1 Pet. 3:8) Tʼáá ałtso iiná baa nídahaasyáhígíí éí bééhózínígo Jiihóvah bidineʼé aʼoh ádaʼdólzinígíí yidadínéelnáa doo. Áko tʼáá ádzíłtso “yisdáhizhdookahgi tʼáá hó bindajilnish doo.”—Phil. 2:​12, NW.

8. Ayóóʼádeíníiʼnínę́ę náábiʼdiiljéeʼgo éí bénínáhodiilzįįłgi haitʼéego nihił béédahozin?

⁸ Ayóóʼádeíníiʼnínę́ę náábiʼdiiljéeʼgo éí bénínáhodiilzįįł. Éí nahdę́ę́ʼ tʼáá íídą́ą́ʼ náádabiʼdiiljééʼ yę́ę binahjįʼ baa nitsáhákeesgo Jiihóvah éí diné ádanoolnin, yádaałtiʼ, índa nitsídaakees ńtʼééʼ yę́ęgi tʼáá éí yee háídídoodlííł. Béénílniih, Jesus éí dadzitsaahgo tʼóó ajiłhosh nahalin ní, áádóó iiná haa naalyéego éí ajiłhoshdę́ę́ʼ chʼééjídziʼ nahalin. (Matt. 9:​18, 24; John 11:​11-13) Tʼáá háida iiłhoshgo áádóó chʼénádziʼgo éí tʼah doo iiłhááshgóó ánoolnin yę́ę índa biinééʼ tʼáá ákótʼée łeh áádóó énálniihgi doo yaa yoonéeh da. Lázaras baa haneʼgi baa nitsíníkees. Daaztsą́ągo dı̨́ı̨́ʼ yiską́, áko hatsʼíís bidiʼniiłdzid. Áko Jesus náábidiisáago bilahkéí bééhoosiid. Lázaras ałdóʼ bééhózínígo hwénáhoosįįd.—John 11:​38-44; 12:​1, 2.

9. Daneeznáádę́ę́ʼ náábiʼdiiljéʼígíí éí haʼátʼíí biniinaa doo tʼáá ákǫ́ǫ́ hadaałtʼéego áńdadoolníił da?

⁹ Jiihóvah yee ádee hadoodzíiʼgo Christ hooʼááł biyaa kéédahatʼínígíí éí “doo łaʼ daastsaah didooniił da,” ní. (Isa. 33:24; Rom. 6:7) Tʼáá ałtso daneeznáádę́ę́ʼ náábiʼdiiljéʼígíí éí bitsʼíís dabiinéego ádadoolnííł. Ákondi doo tʼáá ákǫ́ǫ́ hadaałtʼéego áńdadoolníił da. Ákódzaago éí ayóóʼádayóʼnínę́ę doo béédahodoosįįł da. Tʼáá ałtso bílaʼashdlaʼii éí hazhóóʼógo hadaałtʼéejįʼ bił náhoolzhish  doo. 1000 nááhai nihoolzhiizhdi Jesus éí hootʼááł bił hazʼáanii Bizhéʼé yílákʼee néiidoodlééł. Áadi hootʼááł bił hazʼáanii éí naanish ałtso łaʼyiyiilaa doo. Bílaʼashdlaʼii hadaałtʼéego ałdóʼ ánályaa doo.—1 Cor. 15:​25-28; Rev. 20:​1-3.

10. Nááʼdiijeehgi haitʼéego baa nitsíníkees?

¹⁰ Ayóóʼííníʼnínę́ę néiniłtsą́ągo dooládóʼ baa hózhǫ́ǫ da doo. Nichagoósh baa nił hózhǫ́ǫ doo? Jiihóvah sin bee baa haʼniihii éísh bee hótaał doo? Ndi nił bééhózingo Nizhéʼé índa biYeʼ joobaʼii éí tʼáá íiyisíí ayóóʼííníʼníigo baa nitsíníkees doo, háálá nááʼdiijeeh yee naa joozbaʼ.

11. Isaiah 26:19 bikʼehgo God yikʼehgo deíkáhígíí éí haitʼéego bił hazʼą́ą doo?

¹¹ Náábiʼdiiljéʼígíí éí áłtséédą́ą́ʼ ádaatʼénę́ę nahgóó nideideezʼą́ągo God bikʼehgo óʼoolníiłii yee dahináago dooládóʼ yaa bił dahózhǫ́ǫ da doo. Kótʼéego łahgo tsíndadeezkézígíí éí nahasdzáán ayóó ánoolingo ánályaago ákwii hoolʼáágóó dahináa doo. Ndi God yikʼijįʼ nidaasteeʼígíí éí ákwii hodéezyéél yę́ę deidoołchxǫǫłgo biniinaa doo bá hazʼą́ą da doo.—Isaiah 26:19 yíníłtaʼ; Isa. 65:​20, NW.

12. Jiihóvah éí diné tʼáá altso haitʼéego yikʼijidlíi doo?

¹² God biNahatʼaʼ biyaadóó tʼáá altso God bidineʼé éí Proverbs 10:22 ánínígíí tʼáá aaníí deidoołtsééł. Jiihóvah “yee akʼijidlíii atʼı̨́įgo óʼoolííł dóó yínííł doo yíyiiłtsóod da.” Jiihóvah biníłchʼi diyinii áká análwoʼgo bidineʼé éí tʼáá náás Christ nahalingo hadaałtʼéejįʼ bídayééłkáał doo. (John 13:​15-17; Eph. 4:​23, 24) Tʼáá ákwíí jįʼ bitsʼíís bidziil náádleeł doo. Dooládóʼ iiná baa hózhǫ́ǫ da doo! (Job 33:25) Haitʼéego éí nááʼdiijeeh nabikʼítsíilkeesgo níká análwoʼ doo?

13. Psalm 139:​1-4 éí nááʼdiijeehgi Jiihóvah nihaa ákonízingo átʼéegi haitʼéego bééhózingo ííłʼı̨́?

¹³ Jiihóvah éí diné iiná yaa néidoodléełgo bintsékees índa yee átʼéé ńtʼéeʼgi yee háídídoodlíiłgo baa nídasíitʼįįd. Baa nitsíníkees díí haʼátʼíí áhyiłní. Jiihóvah tʼáá íiyisíí ayóóʼánóʼníigo nitsíníkeesgi, ááníiłgi, índa yáníłtiʼgi tʼáá átʼé yee naa ákonízin. Áko iiná naa néidléego éí doo bá nantłʼagóó béénílniih yę́ę índa ánítʼéé ńtʼééʼ yę́ęgi yee háánididoodlííł. Naatʼáanii David éí tʼááłáʼí niidzínígo Jiihóvah nihaa ákonízingi bił bééhózin. (Psalm 139:​1-4 yíníłtaʼ.) Díí haitʼéego baa nitsíníkees?

14. Jiihóvah tsʼídá nihééhósingi nabikʼítsíilkeesgo haʼátʼíí biniinaa tʼáadoo bąą nihíniʼí doo?

¹⁴ Jiihóvah tsʼídá nihééhósingi nabikʼítsíilkeesgo haʼátʼíí biniinaa tʼáadoo bąą nihíniʼí doo? Jiihóvah tʼáá íiyisí nihaa aʼááh nízin. Tʼááłáʼí niidzínígo áʼniidlı̨́įgo nihaa nitsíkees. Iiná íilyaagi bitsʼą́ą́dóó ániitʼéegi yaa ákonízin. Dooládóʼ díí baa aʼááh hasin da! Tʼáá sáhí ashtʼı̨́ tʼáadoo niidziní doo. Jiihóvah tʼáá áłahjįʼ nihił hólǫ́ índa nihíká adeeshwoł nízin.—2 Chron. 16:9.

15. Nááʼdiijeeh bee chohooʼínígíí haitʼéego Jiihóvah bihódząʼ ííshją́ą́ áyósin?

¹⁵ Nidiyeeshxééł hodiʼníigo ayóó bikʼeʼíyéeʼii átʼé. Séítan éí diné neiloʼígíí choyoołʼı̨́įgo akʼis bikʼijįʼ aʼdoodleeł, doodaiiʼ doo yáʼádaatʼéehii ázhdoolííł biniyé díí yee yił yééʼ adaʼósin. Ndi díí doo  nihidééłníi da. Anaʼí nidanihidoołtsił ndi, Jiihóvah iiná nihaa néidoodlééł. (Rev. 2:10) Jiihóvah bikʼis niidlı̨́įgi índa bá neiilʼaʼgi tsʼídá tʼáadoo yitsʼá nihóníłí da. (Rom. 8:​35-39) Nááʼdiijeeh bee chohooʼínígíí binahjįʼ dooládóʼ Jiihóvah bihódząʼ ííshją́ą́ áyósin da! Díí binahjįʼ Séítan bá ndaalʼaʼí doo nihikʼeh ádanohtʼéégóogo éí nidanihidiiltsił daaníi ndi, doo bikʼee daayéeʼ da. Áádóó ałdóʼ yéigo chánah ádanihósingo Jiihóvah bikééʼ nisiidzı̨́.

16. Haʼátʼíí ndaʼídíkidígíí baa nitsíníkees doo, áádóó éí binahjįʼ Jiihóvah baʼíínílíigi haitʼéego ííshjání íinisin?

¹⁶ Jiihóvah deijoołxáhígíí dandiyiilyééł daniłníigoda Jiihóvah yeeʼ iiná shaa néidoodlééł nínízingoósh yidíídląął? Áko tsʼídá ákwiidígi ákóniʼdooʼniidgo Jiihóvaásh baʼíídiiliił? Díí baa nitsíníkees: ‘Tʼáá ákwíí jı̨́ kóníshéhígo binahashʼáhígíí éísh bee bééhózingo Jiihóvah baʼííníshłíigo átʼé?’ (Luke 16:10) Łaʼ ninááʼídíkid éí: ‘Sheʼiinaʼ yishtʼihgi éísh bee bééhózingo Jiihóvah nihaa áháshyą́ą doo nínę́ę yinishdlą́ągo éí biNahatʼaʼ alą́ąjįʼ háshtʼı̨́?’ (Matt. 6:​31-33) Aooʼ ládą́ą́ʼ, Jiihóvah baʼíínílíigi ííshjání íinilaa, áádóó naʼíhontaah biniyé hashtʼeʼ áʼdíínílzin.—Prov. 3:​5, 6.

17. (a) Nááʼdiijeeh haitʼéego Jiihóvah nihił haʼólníigo ííshjání áyósin? (b) Jiihóvah nihił haʼólníigi haitʼéego baa ahééh niidzin doo?

¹⁷ Jiihóvah éí díí doo yáʼáshǫ́ǫ́góó hoogáłígíí íidoołdįįłgi tʼáá íídą́ą́ʼ yee nihoníʼą́. (Matt. 24:36) Jiihóvah éí doo yaa tsı̨́ı̨́ł nízin da. Daneeznáanii náádideeshjah tʼáá íiyisíí nízin. Laanaa nízin góneʼ bikʼi hoolzhiizhgo iiná yaa néidiyoodlééł. (Job 14:​14, 15) Jiihóvah doo tsı̨́ı̨́ł nízingi baa ahééh daniidzin. (John 5:28) Háálá tʼóó ahayói bílaʼashdlaʼii “łahgo átʼéego tsíńdazdookosgo habąąhági átʼéii bitsʼáhizhdookah” nihóʼníigo nihił haʼólní. (2 Pet. 3:9) Jiihóvah éí tʼáá áníiltso hoolʼáágóó hiniiʼnáa doo nihá nízin. Áko doo tsı̨́ı̨́ł nízingi baa ahééh niidzingo ííshjání íʼdiʼdiilnííł. “Iiná doo ninítʼiʼii yíká ádaatʼíinii” hadaniitáago Jiihóvah ayóóʼádayóʼní índa yá ndaalʼaʼ dooleełgi bee bíká anéiilwoʼ doo. (Acts 13:​48, NW) Áko nihígi átʼéego Jiihóvah bił haʼólníi doo.

18. Haʼátʼíí biniyé diné bił haʼíínílníi doo?

¹⁸ 1,000 nááhai nihoolzhiizhdi índa tʼáá ałtsojįʼ hadaałtʼé dadiidleeł. Ndi kʼad éí Jiihóvah nihił haʼólníigo nihibąąhági  ádaatʼéii nihá yóóʼanéidiyiiʼaah. Beʼiilʼı̨́įgo diné yáʼátʼéehii yee sizíinii bee níilʼı̨́į doo índa bił haʼííníilníi doo. Nihisister łaʼ baa chʼíhootʼą́. Éí bahastiin bichʼįʼ nahwiiʼnáago yéigo nitsináltłiʼ áádóó áłah nídaʼadleehgóó doo naagháa da silı̨́ı̨́ʼ. Kójíní: “Tʼáá íiyisí shá nanitłʼah. Niheʼiinaʼ yę́ę tsı̨́įłgo łahgo ádzaa. Tʼáadoo leʼé íilʼínę́ę doo nihá bohónéedzą́ą da silı̨́ı̨́ʼ.” Ákondi díí eʼasdzą́ą́ ayóóʼóʼóʼníinii bahastiin yéigo yił haʼólní. Jiihóvah yaʼólíigo bahastiin yíká análwoʼgi tʼáadoo yikʼi deeyáa da. Jiihóvah nahalingo éí hachʼįʼ anáhóótʼiʼígíí biláahdi jidéezʼı̨́įʼgo hahastiin yáʼátʼéehgo ááníiłii jinéłʼı̨́. Ánáázhdíʼní: “Shahastiin éí diné yáʼátʼéehii nilı̨́. Nitsináltłiʼ yę́ę tʼáá hazhóóʼógo yáʼátʼééh náádleeł.” Nihighan hazʼą́ą́dóó doodaiiʼ congregation łaʼda bichʼįʼ ánáhwiitʼéehgo bił haʼííníilníigo ayóó ílíinii átʼé.

19. Haʼátʼíí íiyisíí yéigo ádadiiʼnííł?

¹⁹ Nahasdzáán tʼóó áłtsé ályaa yę́ędą́ą́ʼ Jesus índa diyingo ndaalʼaʼí ayóó yaa bił dahóózhǫǫd. Nahasdzáán bikááʼ tʼáá ałtsojįʼ bílaʼashdlaʼii hadaałtʼéego éí Jiihóvah ayóóʼádayóʼníigo yá ndaalʼaʼgo dooládóʼ baa hózhǫ́ǫ da doo. Yáʼąąshdi Jesus yił dahwéeʼaah dooleełígíí yindaashnishígíí éí bílaʼashdlaʼii bíká análwoʼgo átʼéegi dooládóʼ yaa bił dahózhǫ́ǫ da doo. (Rev. 4:​4, 9-11; 5:​9, 10) Atínáhodindleeh, naałniih, yínííł, índa anoonééł hoolʼáágóó ásdįįdgo áadi hiniiʼnáago dooládóʼ baa hózhǫ́ǫ da doo! (Rev. 21:4) Kʼad éí Nihizhéʼé ayóóʼóóʼníinii, hóyáanii, índa haʼólníinii yéigo beʼíłʼı̨́. Ákónítʼı̨́įgo éí tʼáá haʼátʼíí shı̨́ı̨́ naʼínítaah ndi, nił hózhǫ́ǫ doo. (Jas. 1:​2-4) ‘Daneeznánę́ę náábidiʼdooljah’ níigo Jiihóvah yee ádee haadzííʼ yę́ę ayóó baa ahééh daniidzin!—Acts 24:15.