1-2. Haʼátʼíísh baa nídadíitʼįįł?

CHOIDÍÍŁʼĮĮŁII bíká íʼiinilaa yę́ę bibaʼ sínídáago haash nítʼée łeh? Nąąh nááhonikaʼ shı̨́ı̨́ yaʼ? Proverbs 13:12 tʼáá aaníí átʼéego ání “Bíká hoł chohooʼíinii doo hah ánééhgóó hajéí bąą nahodookał.” Nizhónígo áhoodzaa lá, éí biniinaa doo hah naa ílyáa da niʼdooʼniidgo, haa nítʼée doo? Nił bééhoozinígíí binahjįʼ shı̨́ı̨́ doo niʼdiiłʼáa dago abaʼ ánítʼée doo.

² Diyin Bizaad binaʼnitin bitsʼą́ą́dóó éí Jiihóvah ‘bibaʼ ániitʼé’ bíhwiidiilʼááł áádóó éí náásgóó bee ániitʼée doo. (Mic. 7:7) Naakigo Jiihóvah ádooníłígíí bibaʼ ániitʼé dooleełgi áhánígo dadíníilʼįįł. Jiihóvah yibaʼ ádaatʼéii haʼátʼíí bee bikʼihozhdoodliił, éí akéeʼdi dadíníilʼįįł.

3. Proverbs 13:11 haʼátʼíí íiyisíí yaa chʼíhoníʼą́?

³ Proverbs 13:11 haneʼ łaʼ binahjįʼ haʼahóní bikʼidiitįįhgo bikááʼ. Éí kóní: ‘Jitʼíinii tʼáá ákǫ́ǫ́ ábiʼniidįįh, nidi diné tʼáá áłchʼı̨́dígo áłah éʼéléehii éí tʼah yówehgo bá bílááh yileeh.’ Bee naʼnitinígíísh bikʼiʼdinitą́? Tʼáá haʼátʼíhída hazhóóʼógo ájoolíiłgo éí baa hojíyą́ áádóó bichʼįʼ haʼjólní, kótʼéego éí yáʼátʼéehgo ázhʼdoolííł.

4. Proverbs 4:18 haʼátʼíí íiyisíí yaa chʼíhoníʼą́?

⁴ Proverbs 4:18 ání: “Tʼáá ákogi ádaatʼéii deíkáahgo éí hoolʼįįhdóó jı̨́įgo adidiʼáhígíí nidahalin.” Kótʼéego Jiihóvah  nihá nahaʼáii hazhóóʼógo bee chʼídiidlaad. Díí saad dah shijaaʼ ałdóʼ Oodlání diyin kʼehgo náás yigááł beełtʼé ní. Diyin kʼehgo oodááł bíhooʼaah doo tsı̨́ı̨́ł álʼı̨́į da, éí bił nahalzhiishgo átʼé. Diyin Bizaad dóó God biorganization yee nanihinitinígíí bikʼeh honiilʼı̨́įgo éí Christ yee átʼéii bíhwiidiilʼááł dóó bikʼehgo ániitʼée doo. God ałdóʼ áhánígo bééhodiilzįįł. Haneʼ binahjįʼ akʼiʼdiitįįh díí bídéétʼiʼgi Jesus yaa hoolneʼ yę́ę baa nídadíitʼįįł.

5. Hazhóóʼógo noosééł yiłnínígíí Jesus éí haitʼéego yaa hoolneʼ?

⁵ Haneʼ bikʼiʼdiitįįh biniyé Jesus éí álástsiiʼ kóníshéhígo yaa hoolneʼ. Tʼáá ákogi éʼétʼé bił yáʼádaatʼéehii éí God biNahatʼaʼ baa dahwiilneʼígíí kóníshéhí ndi bijéí biiʼ dínísééh. Jesus ání: ‘Álástsiiʼ hadaneesą́ áádóó dadínéesą́, áko hadaʼneesánígíí índa dadínéesánígíí éí [kʼizhdííláhígíí] doo hoł bééhoozin da. Háálá niʼ tʼáá bí aneestʼąʼ yidínísééh, áłtsé yiitsoi áádóó bitʼąąʼ haleeh, nááʼákóneʼ bineestʼąʼ nááhádleeh, áadi índa ałtso nitʼı̨́ı̨́h.’ (Mark 4:27, 28) Jesus éí kótʼéego hoolneʼ chʼil tʼáá hazhóóʼógo nooséłígi átʼéego, Diyin Bizaad baa haneʼ yidiiztsʼą́ʼígíí hazhóóʼógo diyin kʼehgo nooséeł doo. Ídahoołʼaahii éí Jiihóvah yił áhání ádaʼdólzin, éí binahjįʼ beʼiinaʼ yáʼátʼéehgo ádeileʼgo baa ákodaniidzin. (Eph. 4:22-24) Díí béédeilniih doo, Jiihóvah éí álástsiiʼ kóníshéhí ndi yidínísééh.—1 Cor. 3:7.

6-7. Jiihóvah nahasdzáán áyiilaagi haʼátʼíí bitsʼą́ą́dóó bídahwiilʼaah?

⁶ Jiihóvah éí tʼáá ałtso ííłʼínígíí doo yaa tsı̨́ı̨́ł nilı̨́į da, éí biniinaa tʼáá ałtso nizhónígo áyoolííł. Díí éí bízhiʼ bee baa haʼniih índa náánáłaʼ bíká adoolwoł biniyé. Baa ákonínízin, Jiihóvah éí nahasdzáán íílééh yę́ędą́ą́ʼ doo tʼáá łahjįʼ áyiilaa da, ndi íidoolíiłii ałkééʼ yisnilgo nahasdzáán áyiilaa.

⁷ Jiihóvah éí nahasdzáán ííléehgo  “áníłtso dooleełgi . . . yíʼnééłʼąąd,” ‘niłdzilgo siʼą́ągo’ áyiilaa, áádóó “tsé bee naanáʼástłʼinii” niiníʼą́. (Job 38:5, 6) Tʼáá ałtso áyiilaa yę́ę bił yáʼátʼéehgo yinééłʼı̨́ı̨́ʼ. (Gen. 1:10, 12) Diyingo ndaalʼaʼí éí Jiihóvah ádayiilaa yę́ę dayiiłtsą́ągo haitʼéego dabidiisʼnááʼ? Tʼáá íiyisíí ‘bił dahóózhǫǫd.’ (Job 38:7) Haʼátʼíí bídahwiilʼą́ą́ʼ? Jiihóvah éí tʼáá ałtsoní áyiilaii hazhóʼó yinah hazʼą́, áádóó ádeileʼgo thousands nááhai. God éí tʼáá ałtsoní áyiilaaígíí yinéłʼı̨́įgo tʼáá íiyisíí “bił yáʼíítʼééh.”—Gen. 1:31.

8. Kʼad éí haʼátʼíí baa nídadíitʼįįł?

⁸ Diyin Bizaad haʼahóní yee naʼnitinii tʼóó adahayóí. Chʼídaastʼánę́ę binahjįʼ abaʼ éʼétʼé baa ákodíníidzįįł. Kʼad éí naakigo hazʼą́ągi Jiihóvah bibaʼ ániitʼée dooleełgi baa nídadíitʼįįł.

9. Haitʼéego hazʼą́ągi Jiihóvah bibaʼ ániitʼée doo?

⁹ Nihisodizin nihá biʼdoolnííł bibaʼ ániitʼée doo. Nanihíhonitaahgo doodaiiʼ haʼátʼíí shı̨́ı̨́ biʼoh néidleehígíí biniyé sodilzin ndi, doo hah nihikʼi hooldóoh da shı̨́ı̨́ nahalin łeh. Haʼátʼíísh biniinaa bíká sodiilzinígíí Jiihóvah doo tsı̨́įłgo nihichʼįʼ ííshjání ííléeh da?

10. Haʼátʼíí biniyé sodiilzinígíí Jiihóvah nihił ííshjání íidoolííł bibaʼ ániitʼée doo?

¹⁰ Jiihóvah éí nihisodizin hazhóʼó nihá yiyíistsʼą́ą́ʼ. (Ps. 65:2) Niheʼoodląʼ bidziilgo éí tʼáá aaníí ádiiʼníigo sodiilzinígíí nihá yaa ákonízin. (Heb. 11:6) Bíká sodiilzinígíí bikʼehgo íiʼnííł índa Bí íinízinii bikʼeh honiilʼı̨́įgo éí doo niʼ kódiiʼníił daaígíí nihá yaa ákonízin. (1 John 3:22) Doo yáʼátʼéehii baa ninádiniidááh yę́ę Jiihóvah yee nihíká adoolwoł biniyé sodiilzingo, nihisodizin yididootsʼı̨́ı̨́ł éí bibaʼ ániitʼée doo. Jesus éí bíká sodiilzinígíí doo tʼáá ákǫ́ǫ́ bééhodoozįįł da ní, éí baa ákoniidzin doo nihóʼní. Kónihiłní “Deínóhkeedígíí nihaa dadoolyééł; hádaahtʼı̨́, áko hádaahtʼínígíí bikʼídadoohkah; dáádílkał nídanołtsʼin, áko nihá ąą ádadoolnííł. Háálá . . . dajókeedii éí haa dahalyé, hádajitʼínígíí bikʼídajiikááh, índa dáádílkał nídazniłtsʼinígíí há ąą ádaalneʼ.” (Matt. 7:7, 8) Díí ánihidiʼnínígíí bikʼeh honiilʼı̨́įgo áádóó Jiihóvah baʼííníidlíigo “tʼáadoo diniitłóhí” sodadiilzin doo.—Col. 4:2.

11. Jiihóvah doo hah nihisodizin nihił ííshjání íílééhgóó, haʼátʼíísh béédeilniih doo?

¹¹ Azhą́ nihisodizin doo hah bééhoozįįh da ndi, Jiihóvah éí nihíká análwoʼgo [“bikʼi hoolzhiizhgo,” New World Translation] nihisodizin nihił ííshjání íidoolííł. (Hebrews 4:16 yíníłtaʼ.) Nihisodizin doo hah beʼ álnééhgóó éí Jiihóvah doo bee bikʼíhwiitʼáah da doo. God biNahatʼaʼ éí doo yáʼátʼéehgo nihił hoogáłígíí niidoołtʼih biniyé sodadiilzingo ląʼí nááhai. Jesus éí díí ałdóʼ bíká sodadilzin nihiłní. (Matt. 6:10) Nihooghááh nijólí yę́ę doo hah ánééhgóó éí hweʼoodląʼ doo bidziil da yileeh, diné kótʼéego nitsídaakeesígíí éí doo ádahalyą́ą da! (Hab. 2:3; Matt. 24:44) Jiihóvah baʼííníidlíigo bichʼįʼ sodiilzingo éí honiidzą́ągo bibaʼ ániitʼée doo. Nihodoogááł éí tsʼídá bá nihootʼą́ą́ góneʼ áhodoonííł, háálá Jiihóvah tʼáá íídą́ą́ʼ ‘yoołkááł dóó oolkił’ yee nihoníʼą́. Jesus nízaadgóó haʼólnínígíí binahjįʼ yisdádííkah.—Matt. 24:36; 2 Pet. 3:15.

12. Haitʼéego abaʼ éʼétʼé bee nihíhodínóotah?

 ¹² Doo ákótʼéégóó ánihiʼdiilyaago éí hashtʼéédoolnííł bibaʼ ániitʼée doo. Diné łahgo ádanoolninii dóó náánáłahdę́ę́ʼ ndaakai éí doo yáʼátʼéhígíí ádabiʼdilʼı̨́. Łaʼ éí bitsʼíís doodaiiʼ bíniʼ bąąh dah nahazʼą́, éí bąą doo yáʼátʼéhígíí ádabiʼdilʼı̨́. Jiihóvah bidineʼé ałdóʼ beʼoodląʼ biniinaa atídabiʼdilʼı̨́. Doo yáʼátʼééhgóó ánihiʼdilʼı̨́įgo Jesus bizaad béédeilniih. Éí ání: “Tʼáá háiida tʼáá nihoníyáajįʼ haʼólnínígíí éí yisdádooltééł.” (Matt. 24:13) Congregationgi łahda yéigo asiih nił bééhoozingoshąʼ? Elders baa deetʼą́, áko Jiihóvah íinízinii bikʼehgo hashtʼedeidoolííł. Niísh éí bíniʼdii nínízingo bibaʼ ánítʼée doo? Elders éí haitʼéego asihígíí yíká adoojah?

13. Łaʼda yéigo asiihgo, Jiihóvah éí elders haitʼéego hashtʼedeidoolííł yóʼní?

¹³ Congregationgi łaʼda yéigo asiihgo, elders éí “yáʼąąshdę́ę́ʼ bee hódzáanii” Jiihóvah bił ííshjání íidoolííł yiniyé sodadilzįįh. (Jas. 3:17) “Niʼiisíihgo bá honítʼiʼdę́ę́ʼ” tʼą́ą́ʼ kónídooʼnííł éí íiyisíí biniyé elders bíká adoojah. (Jas. 5:19, 20) Elders éí díí áhoodzaaígíí yitsʼąą congregation yaa ádahalyą́ áádóó yikʼee atídaadzaa yę́ę hadaʼólníigo áńdeidleʼ. (2 Cor. 1:3, 4) Díí asziihígíí tʼáá altso bídadéétʼiʼígíí tʼáá bił nahalzhiishgo elders bił béédahoyoozįįh. Sodadilzįįh áádóó Diyin Bizaad biiʼdę́ę́ʼ “ajisihígíí bikʼehgo” saad bidziilii yee hachʼįʼ hadaadzih. (Jer. 30:11, NW) Elders éí díí naanish doo tʼóó nahjįʼ ninádeidiʼáah da, áádóó doo yaa tsı̨́ı̨́ł danilı̨́į da. Elders binaanish hazhóʼó ádeiłʼı̨́įgo éí congregationgi tʼáá ałtso baa áháyą́ągi yaa ákodanízin. Azhą́ elders tʼáá ákogi átʼéego ádaʼiiłʼįįh ndi, łaʼda éí díí asziih yę́ę tʼáá yikʼee yínííł átʼée łeh. Tʼáá aaníí kónítʼéego, haash dííníiłgo doo yínííł nilı̨́į da doo?

14. Bił daʼiiniidlánígíí łaʼ níniʼ yiyiiłʼaʼgo, doodaiiʼ atíniilaago Diyin Bizaad biiʼ baa dahaneʼígíí haitʼéego níká adoolwoł?

¹⁴ Háiidaásh yéigo níniʼ yiyiiłʼaʼ, brother doodaiiʼ sister nilínígíí daatsʼí? Jiihóvah yibaʼ ádaatʼé yę́ę Diyin Bizaad biiʼ baa dahaneʼígíí bitsʼą́ą́dóó éí Jiihóvah bibaʼ ánítʼée dooleeł bíhwiidííłʼááł. Jóseph baa haneʼ yę́ę baa nitsíníkees.  Éí bínaaíké doo ákogi átʼéégóó ádabííłʼįįd ndi, doo bínaaíké yikʼijįʼ yisʼą́ągo ahoolzhiizh da. Ndi Jiihóvah yá naalʼaʼígíí éí alą́ąjįʼ áyósin. Jiihóvah yibaʼ átʼé dóó haʼólní yę́ę binahjįʼ Jiihóvah bikʼijisdliʼ. (Gen. 39:21) Jóseph éí bínaaíké ádabííłʼįįd yę́ę yaa neiidiyiizʼą́ áádóó Jiihóvah bikʼijidlíigo yaa ákoniizı̨́ı̨́ʼ. (Gen. 45:5) Jóseph nahalingo, Jiihóvah hashtʼéidoodlííł bibaʼ ániitʼéego éí Bí hanihiʼiyoołnííh [comfort] doo.—Ps. 7:17; 73:28.

15. Sister doo ákótʼéégóó ábiʼdiilyaa yę́ę haʼátʼíí bíká eelwod?

¹⁵ Doo Jóseph nahalingo áhoʼdilʼįįh da ndi, doo ákótʼéégóó áhoʼdilʼįįhgo tʼáá bikʼee yínííł ídlı̨́įgo átʼé. Atínihiilaaígíí doo Jiihóvah yééhósin da ndi, Diyin Bizaad binaʼnitin bikʼehgo íidzaago éí nihá yáʼátʼééh. (Phil. 2:3, 4) Nihisister łaʼ kóbiʼdiilyaa. Éí yił nidaalnishígíí łaʼ tʼáá ádzaagóó baa nahasneʼ, áko bikʼee hajéí yineesgai. Sister éí Jesus ádzaa yę́ę yaa tsídeezkééz. Jesus éí biʼdéédzííʼ yę́ędą́ą́ʼ tʼáadoo nátʼą́ą́ʼ náʼéédzíiʼ da. (1 Pet. 2:21, 23) Éí binahjįʼ tʼáá ádzaagóó haa haneʼ yę́ę doo baa níjístʼįįd da. Tʼahádóó hoł bééhoozingo éí díí haa nahalneʼ yę́ę bąąh dahazʼą́ągo yéigo biʼdiiłʼáago átʼéé lá, áko tʼáá ádzaagóó yáłtiʼ. Nihisister éí tʼáadoo nátʼą́ą́ʼ haadajiidzaaígíí yáʼátʼééh, áádóó haʼjólní yę́ę binahjįʼ hániʼ déesyéél.

16. Doo ákogi átʼéégóó ániʼdilʼı̨́įgo haʼátʼíísh bee haʼíínílníi doo? (1 Peter 3:12)

¹⁶ Haʼátʼíí shı̨́ı̨́ bee atíniʼdiilyaago bikʼee yínííł nilı̨́į ndi díí béénílniih Jiihóvah éí “yínííł ádajítʼéii” hoł hólǫ́. (Ps. 34:18) Nide ádaatʼéii baa hidíʼaahgo áádóó haʼíínílnínígíí binahjįʼ ayóóʼánóʼní. (Ps. 55:22) Jiihóvah tʼáá ałtsoní yaa ákonízingo nihikʼi déezʼı̨́ı̨́ʼ. (1 Peter 3:12 yíníłtaʼ.) Ná nidanitʼáii hashtʼedíílííł doo bíninilʼą́ą dago, Jiihóvaásh bibaʼ ánítʼée doo?

17. Isaiah 30:18, Jiihóvah éí haʼátʼíí nihá ádeeshnííł nihiłní?

¹⁷ Tʼáadoo hodiinaʼí Jiihóvah biNahatʼaʼ biyaagi ląʼí bee nihikʼihozhdoodliił.  Isaiah 30:18 ání: “Bóhólníihii nihaa jiidoobaał yiniyé nihibaʼ átʼée doo áádóó nihaa aʼááh niizı̨́įʼjįʼ ayóó átʼé ábiʼdidoolnííł, háálá Bóhólníihii éí Diyin God doo haada yitʼéégóó ááníiłii nilı̨́; yibaʼ ádaatʼéii tsʼídá bikʼidahojidlí.” Jiihóvah yibaʼ ádaatʼéii éí kʼad dóó náasdi ląʼí bee bikʼidahojidlíi doo.

18. Haʼátʼíísh bee nihikʼihojidlíi doo?

¹⁸ God bidineʼé nahasdzáán ániidíii yiih yiikaigo, haʼátʼíí shı̨́ı̨́ nihidaʼdiiłʼáii dóó bee nihichʼįʼ anídahaztʼiʼígíí ádin doo. Doo aheełtʼéego aa nitsáhákees dóó bikʼee yínííł ídlı̨́ ádin doo. (Rev. 21:4) Bídin daniidlínígíí doo baa danihíniʼ da doo, háálá tʼáá ałtsoní bee nihaa áháyą́ą doo. (Ps. 72:16; Isa. 54:13) Ayóó átʼéego nihikʼihojidlíi doo!

19. Haʼátʼíísh biniyé hashtʼedidííʼníiłgo Jiihóvah yee nanihinitin?

¹⁹ Tʼáá bítséedi éí doo yáʼátʼééhgóó baa neidáhígíí bikʼeh didiidleeł áádóó diyin kʼehgo oodááł bíhwiidiilʼááł. Díí bíká ánítʼínígíí neʼ kóólééh lágo. Jó, Jiihóvah éí hooʼááł biyaagi kééhwiitʼı̨́į doogo biniyé nanihinitin. Iiná yáʼátʼéehii baa hodoolzhishgo átʼé! Náasdi nizhónígo áhootʼée dooleełígíí bíká dadíníitʼı̨́ı̨́ʼ, áko hadaʼííníilníigo Jiihóvah bibaʼ ádaniitʼéego binaanish ałtso íidoolííł!