1, 2. Tʼááłáʼí niitínígo haʼátʼíí tʼáá aaníí niidzin doo? (Áłtsé naashchʼąąʼígíí níníłʼı̨́.)

DÍÍ bídahwiilʼą́ą́ʼ niʼ, Devil kóní, Jiihóvah éí bílaʼashdlaʼii bikʼi hojooʼááł dooígi doo há bohónéedzą́ą da. Jiihóvah éí doo aheełtʼéégóó nahojiʼá dóó bílaʼashdlaʼii tʼáá bí akʼi dahwéeʼaahgo bił dahózhǫ́ǫ doo, ní Séítan. Díísh tʼáá aaníí ákótʼé? Bílaʼashdlaʼii akʼi dahwéeʼaahgoósh hoolʼáágóó dahiináa doogo átʼé? Doodaiiʼ God bá hooʼáałgoósh bił dahózhǫ́ǫ doo? Hoolʼáágóó hiniiʼnáago áádóó tʼáá ałtsojįʼ God tʼáágééd yiidáałgo, nił hózhǫ́ǫ́sh doo?

² Díí átʼéego ndaʼídíkidígíí tʼááłaʼí niitínígo hazhóʼó baa nitsídeiikees doo. Áádóó Jiihóvah bikʼehgo nahatʼá tsʼídá yáʼátʼééh índa tʼáá átʼé bee bikééʼ siidzı̨́į dooleełgi baa ákodíníidzįįł. Díí tʼáá aaníí niidzin doo háálá Diyin Bizaad ákóní. Nahatʼáagi tʼáá ałtsojįʼ Jiihóvah bee bóhólníihgi Diyin Bizaad ánínígíí dadíníilʼįįł.

3. Haʼátʼíí biniyé Jiihóvah éí tʼáá ałtsoní bee Bóhólníihii nilı̨́?

³ Jiihóvah tʼáá bí tʼéiyá tʼáá ałtsoní bee Bóhólníihii nilı̨́  háálá bí éí Diyin aláahdi ayóó ábóodziilii dóó Íʼiilaii nilı̨́. (1 Chronicles 29:11; Acts 4:24) 144,000 yáʼąąshdi Christ yił dahodeezʼánígíí ádaaní: “Diyin God [Jiihóvah], ayóó éʼétʼé áádóó ił ídlı̨́ índa óhólnííh bą́ą́h nílı̨́, háálá tʼáá ałtsoní íinilaa, éí íinínízinii bee ádaalyaago dahólǫ́.” (Revelation 4:11) Jiihóvah éí tʼáá ałtsoní áyiilaa, áko nahasdzáán dóó yáʼąąshdi dahojílóonii tʼáá ałtso bikʼi hojooʼáał doogi bee hóhólnííh.

4. Ádá nitsáhákeesgi God bikʼijįʼ bee nisiilteeʼgo haʼátʼíí biniyé doo bee nihíhólníih da?

⁴ Séítan doo ájiilaaí da. Áko tʼáá ałtsojįʼ nahatʼáagi doo bee hóhólníih da. Séítan dóó Ádam dóó Íiv, Jiihóvah nahaʼáago bóhólníihgi bikʼijįʼ nidajílteeʼ. (Jeremiah 10:23) Ádá nitsídadzizkééz bee Jiihóvah nahaʼáagi bikʼijįʼ nidazhdooltihgoósh bee hódahólnííh? Ndagaʼ. Ádá nitsídzíkees bee nahojiʼáa doo, ndi Ánihiilaii Jiihóvah bikʼijįʼ nidiiltihgi doo bee nihíhólníih da. Áko God bikʼijįʼ nijílteeʼgo éí ádá nitsáhákeesgi doo hazhóʼó chooʼı̨́į da doo. Jiihóvah binahatʼaʼ índa bikʼehgo oodááł niidzin.

5. God nahaʼáagi, haʼátʼíí biniinaa áłahjįʼ tʼáá ákogi átʼé?

⁵ Náánáłahgo biniinaanii Jiihóvah hooʼáałgi bóhólnííh éí tsʼídá nizhónígo doo niʼiidzííhgóó nahaʼá. Bí ání: “Shí [Jiihóvah] nihokáaʼgi aa aʼááh hasin áádóó doo haa deitʼéii índa tʼáá ákogi átʼéii ááshłííł, háálá kódaatʼéii bąą shił hózhǫ́.” (Jeremiah 9:24) Jiihóvah éí bílaʼashdlaʼii bibee hazʼáanii binahjįʼ doo yee nahaʼáa da. Tʼáá Bí tʼáá ákogi átʼéii yee nahaʼá. Áko tsʼídá doo asdzihgóó yee nahaʼáii binahjįʼ bee hazʼáanii bílaʼashdlaʼii yeinílá. Psalm ání: “Tʼáá ákogi átʼéii áádóó doo haada yitʼéii nibikááʼdóó nahatʼáii bee niłdzil.” Tʼáá ałtso bee hazʼáanii, bikʼehgo naʼnitinii, dóó nahatʼáagi éí Jiihóvah bitsʼą́ą́dę́ę́ʼ tʼáá ákódaatʼéii átʼé. (Psalm 89:14; 119:128) Séítan éí Jiihóvah doo aheełtʼéégóó nahojiʼá, hałní. Ákójiníi ndi, Séítan éí bílaʼashdlaʼii bikʼi nahatʼáagi doo hashtʼejiléeh da.

6. Haʼátʼíí łaʼ binahjįʼ Jiihóvah éí nahatʼáagi bee bóhólnííh?

⁶ Áádóó náánáłahgo Jiihóvah nahaʼáago bóhólníihgi éí bił ééhózin dóó hódzą́ bee hólǫ́ǫgo tʼáá ałtsoní yee yaa áhályą́. Éí naałniih ádaatʼéii azeeʼííłʼíní doo néidoołzihii, biYeʼ éí niʼdoołdzihgo yeinílá. (Matthew 4:23, 24; Mark 5:25-29) Nihí éí niʼdiildzihgi doo bíniilʼą́ą da, ndi Jiihóvah éí nihitsʼíís naalnishgi bił bééhózin áádóó atídzaago néidoołzihgo yíneelʼą́. Ádaadinę́ę iiná yaa néidiyoodlééł áádóó ayóó ádahooníiłii doo ádahoonííłgóó íidoolííł.

7. Jiihóvah haitʼéego doo łaʼda haláahdi hódzą́ bee hólǫ́ǫ da?

⁷ Kʼad Séítan hooʼáałgo kédaayahgóó  kʼé ádaadin. Jiihóvah tʼéiyá hódzą́ yee nahasdzáán bikááʼ hashtʼehodítʼéego íidoolííł. (Isaiah 2:3, 4; 54:13) Yilʼaadii Paul nitsíkees yę́ęgi átʼéego nihí ałdóʼ kódaniitʼé: “Dooládóʼ Diyin God hóyą́ągo tʼáá ałtsoní bił bééhózin da! Dooládóʼ yee nihwiiʼaahii doo bikʼizhʼdootą́ą́ʼ átʼée da! Dooládóʼ bihonítʼiʼii doo bééjółkaah átʼée da!”—Romans 11:33.

8. Jiihóvah nahaʼáagi haitʼéego baa nitsíníkees?

⁸ Nihił ííshjání ályaa, Diyin Bizaad áníigo nahatʼáagi Jiihóvah bee bóhólnííh dóó tsʼídá yáʼátʼéehgo nahaʼáii jílı̨́. Éí ayóóʼóʼóʼní yee nahaʼá. Áhánígo bił honiidlǫ́ǫ doo niidzin, háálá “aa aʼááh nízinii áádóó joobaʼii áádóó nízaadgóó haʼólníinii áádóó tsʼídá łą́ągo bibee ajoobaʼ índa bitʼáá aaníinii” bee hólǫ́. (Exodus 34:6) God éí daʼniidlı̨́ dóó ił ídlı̨́ yee nihaa nitsíkees. Tʼáá nihí ádaa áhwiilyą́ągi Bí biláahdi nihaa áhályą́. Séítan ání, Jiihóvah bá ndaalʼaʼí yáʼádaatʼéehii yitsʼą́ąjįʼ kóyósin, ndi díí yoochʼííd átʼé. God éí biYeʼ ayóóʼáyóʼnínígíí nihá ninéidiníʼą́, áko hoolʼáágóó ííná bohónéedzą́ągo nihá ályaa.—Psalm 84:11; Romans 8:32 yíníłtaʼ.

9. God éí tʼááłaʼí niitínígo nihaa nitsíkeesgi haitʼéego nihił bééhózin?

⁹ Jiihóvah éí bidineʼé tʼááłaʼ dah yiikahgo ayóóʼáyóʼní. Ndi tʼááłaʼí nítínígo yaa nitsíkees. Ałkʼidą́ą́ʼ ádahóótʼįįd yę́ę łaʼ baa nitsíníkees. 300 daatsʼí nááhai, Jiihóvah éí ándahwiiʼaahii choyoołʼı̨́įgo bidineʼé yiníʼeezh dóó bidaʼanaʼí yikʼeh dadidlı̨́ı̨́ ńtʼééʼ. Áko kóhootʼéego hazʼą́ągo bidineʼé tʼááłaʼí nítínígo yaa nitsíkees ńtʼééʼ. Łaʼ éí Ruth joolyé. Doo Ízrel dineʼé jílı̨́į da, tsʼídá tʼóó ahayóí ninázhdiníʼą́ągo Jiihóvah bikééʼ nizhníyá. Ahastiin dóó ayáázh Jiihóvah yee hakʼihasdliʼ. Ndi tsʼídá aláahdi bee hakʼihasdliʼígíí éí hayáázh bitsʼą́ą́dóó oochíłígíí Mesáíyah biʼdizhchı̨́. Áádóó Diyin Bizaad biiʼ naaltsoosígíí łaʼ házhiʼ bee yééjiʼ, díí biiʼ hąą haneʼgo siʼą́ągo Jiihóvah áyiilaa. Ruth náábiʼdiilzáago áádóó díí tʼáá átʼé hoł bééhoozingo, haʼátʼíí nízin doo, nínízin?—Ruth 4:13; Matthew 1:​5, 16.

10. Jiihóvah éí doo ade áhósingo nahaʼáa da, haʼátʼíí biniyé kóháʼní?

¹⁰ Jiihóvah éí doo ade áhósingo nahaʼáa da. Bikʼeh dahółʼínígíí éí doo bide ádahootʼée da, ndi bił dahózhǫ́. (1 John 5:3) David kótʼéego Jiihóvah yaa haadzííʼ: “Ił ídlı̨́ áádóó ayóó éʼétʼé bináhaazlá. Bisodizin bá hooghan biiʼ dziil índa ił hózhóonii hólǫ́.” (1 Chronicles 16:7, 27) Ííthan éí Psalm łaʼ áyiilaago ání: “Haneʼ baa hózhóonii bił béédahózinii bikʼidahojidlí. Bóhólníihii [Jiihóvah] nílíinii, éí niniiʼ bee iʼdíídííngóó hoolʼingo deíkááh. Shá bíighah nízhiʼ baa bił nidahoozhǫǫh; nitsʼą́ą́dóó tʼáá ákogi átʼéii yee ayóó ádaatʼéego ádabiʼdoolniił.”—Psalm 89:15, 16.

11. Haitʼéego éí Jiihóvah nahaʼáagi tsʼídá yáʼátʼéehgo átʼée lá díníidzįįł?

¹¹ Jiihóvah yee yáʼátʼéehii, yéigo baa  nitsíikeesgo éí bí nahaʼáagi tsʼídá yáʼátʼéehgo átʼée lá díníidzįįł. Psalm łaʼ áyiilaago God ííłní: “Tʼáá háadida tʼááłáhídi míildi hwee iʼííʼą́ biláhídi átʼéego nikin biiʼ sohodizingi hwee iʼííʼą́ą́jí agháago yáʼátʼééh.” (Psalm 84:10) Jiihóvah éí nizhónígo hanihidiilaa, áko yee nihił hóshǫ́ǫ dooleełii bił bééhózin. Bídin daniidlínígíí biláahdi yee nihaa joobaʼ. Díí ánílééh nihił níigi, nihá yáʼátʼééh. Azhą́ haʼátʼíí shı̨́ı̨́ ninádadidiitʼáał ndi, Jiihóvah bikʼeh ániitʼéego nihił dahózhǫ́ǫ doo.—Isaiah 48:17 yíníłtaʼ.

12. Jiihóvah nahaʼáago bóhólníihgi haʼátʼíí íiyisíí biniyé bikééʼ siidzı̨́į doo?

¹² Diyin Bizaad áníigo éí tʼááłáhídi mííl nááhaigo Christ nahaʼáago bikééʼdóó diné łaʼ Jiihóvah nahaʼáago bóhólníihgi yikʼijįʼ nidadooltih. (Revelation 20:​7, 8) Haʼátʼíí biniinaa ákódazhdoonííł? Éí Séítan béédoochidgo diné łaʼ tʼáá bí tʼéiyá ádaa nitsídaakeesgo íidoolííł. Éí tʼáá ákójítʼı̨́. Áádóó diné kwííłníida doo, God tʼáadoo bikʼeh dahonołʼínígo hoolʼáágóó dahinohnáa doo. Díí yoochʼííd átʼé. Ndi baa nitsíníkees, ‘Kótʼéego yoochʼídígíísh yinishdlą́ą doo?’ Jiihóvah ayóóʼííníiʼníigo índa yáʼájítʼééh áádóó Bí tʼáá ałtsoní bee bóhólnííh diiʼníigo yiniidlą́ągo díí yoochʼííd baaʼih niidzin doo. Jiihóvah ayóóʼóʼóʼní yee nahaʼáago bóhólníihgi kééhwiitʼı̨́į doo niidzin.

13. Jiihóvah beʼiilʼı̨́įgo, Bí nahaʼáagi haitʼéego bikééʼ siidzı̨́?

¹³ Baa ídahwiilʼą́ąʼgo nahatʼáagi Jiihóvah bóhólnííh, áádóó bí nahaʼáago tsʼídá yáʼátʼééh. Áko yéigo bikééʼ siidzı̨́į doo. Jiihóvah baʼííníidlíigo dóó bedaʼiilʼı̨́įgo Bí nahaʼáagi éí bikééʼ siidzı̨́į doo. Wołí bee Jiihóvah beʼiilʼı̨́įgo éí binahatʼá ayóóʼííníiʼní dóó bikééʼ siidzı̨́į doo.—Ephesians 5:1, 2 yíníłtaʼ.

14. Hooghangi á naazíinii dóó elders haitʼéego Jiihóvah bedaʼjiłʼı̨́į doo?

¹⁴ Diyin Bizaad biiʼdę́ę́ʼ bídahwiilʼą́ąʼgo éí Jiihóvah tʼáá áłahájįʼ ayóóʼóʼóʼní yee nahaʼá. Hooghangi á naazíinii dóó elders éí Jiihóvah nahaʼáago bóhólníihgi ayóóʼádayóʼníigo Jiihóvah yedaʼałʼı̨́. Éí doo ade ádahojósin da doodaiiʼ doo ádidahojólníih da doo. Yilʼaadii Paul éí God dóó Jesus yeʼełʼı̨́įgo wołí bee áátʼįįd. (1 Corinthians 11:1) Éí doo łaʼda yaa yádínóozįįł dago doodaiiʼ doo ádiholnííhgóó yaa náʼookąąhgo yáʼádaatʼéehii yił ííshjání ííłʼı̨́ı̨́ ńtʼééʼ. (Romans 12:1; Ephesians 4:1; Philemon 8-10) Paul kótʼéego ájítʼéé ńtʼéeʼgo Jiihóvah beʼjiilaa. Diné ayóóʼííníiʼníigo éí Jiihóvah nahaʼáago bóhólníihgi bikééʼ siidzı̨́į doo.

15. Óhólnííh bąą niilyáhígíí nihił danilı̨́įgo, Jiihóvah nahaʼáagi haitʼéego bikééʼ siidzı̨́į doo?

¹⁵ Jiihóvah nahaʼáagi bikééʼ siidzı̨́įgo éí óhólnííh yaa niiníláhígíí nihił danilı̨́įgo bídahwííníilníih doo. Azhą́ yee lą́ nidaʼiiłeehii doo bikʼiʼdiitįįh da doodaiiʼ doo nihił ákótʼée ndi, bee bikééʼ siidzı̨́į doo. Séítan binahatʼaʼ biyaa éí doo kótʼéego ádaʼałʼı̨́į da, ndi nihí ákóniitʼéego éí Jiihóvah nihá Nahaʼáii nilı̨́įgo ííníilzin doo. (Ephesians 5:22, 23; 6:1-3; Hebrews 13:17) Áádóó nihił hózhǫ́ǫ doo, háálá God éí yáʼádaatʼéehii nihá yinízin.

16. Ádá nahwiitʼáagi, God nahaʼáago bóhólníihgi haitʼéego bikééʼ siidzı̨́į doo?

 ¹⁶ Náánáłahgo God nahaʼáago bóhólníihgi bikééʼ siidzı̨́į dooígi éí ádá nahatʼá. Tʼááłáʼí nítínígo ałʼąą ádaatʼéii bee ádá nahwiitʼáagi, Jiihóvah éí kótʼéego ádíílííł doo nihiłníi da. Ndi, yaa nitsíkeesígi átʼéego yee nihił halneʼ, áko binahjįʼ hazhóʼó ádá hodidiitʼááł. Łahgo éí bá neiilʼaʼí niidlı̨́įgi kótʼéego ééʼ bee háádadootʼįįh, doo nihiłníi da. Ndi, éí ádaa ádahwiilyą́ągo dahoniidzą́ągo ééʼ bee háádadiitʼįįh doo. (1 Timothy 2:9, 10) Náánáłahdę́ę́ʼ yee danihiníłʼı̨́į dooleełígi baa nitsídeiikees doo nízin. (1 Corinthians 10:​31-33) Jiihóvah yaa nitsíkeesígi átʼéego bee ádá nihodiyiitʼaahgo éí Bí nahaʼáagi ayóóʼííníiʼníigo bikééʼ siidzı̨́į doo.

17, 18. Oodlání bichʼooní dahólónígíí haitʼéego Jiihóvah nahaʼáago bóhólníihgi bikééʼ dzizı̨́į doo?

¹⁷ Oodlání bichʼooní hólónígíí Jiihóvah nahaʼáago bóhólníihgi yikééʼ sizı̨́į dooígi baa nídadíitʼįįł. Nizhónígo ahísiilkée doo, shı̨́ı̨́ hwiindzin. Ahéʼéskéegi shı̨́ı̨́ yéigo bichʼįʼ anáhóótʼiʼgo átʼé. Ákótʼéego hazʼą́ągo éí ałkʼidą́ą́ʼ Ízrel dineʼé Jiihóvah haa nitsíkees ńtʼéeʼgi baa nitsíjíkees doo. Jiihóvah éí bidineʼé bahastiin jílı̨́ nahalingo yee ádee haadzííʼ. (Isaiah 54:5; 62:4) Ízrel dineʼé ląʼídi Jiihóvah doo bił hózhǫ́ǫ́góó ádajiilaa.  Áko ałchʼooʼní ídlínę́ęgi diikʼąąd nahalin silı̨́ı̨́ʼ. Azhą́ ákótʼée ndi, Jiihóvah tʼáadoo hakʼi deeyáa da. Tʼóó há yóóʼánéidiiyiiʼaahgóó áátʼįįd dóó yee ádee hadoodzííʼ yę́ę yeʼiilaa.—Psalm 106:43-45 yíníłtaʼ.

¹⁸ Oodlání bichʼooní dahólónígíí Jiihóvah ayóóʼádayóʼníigo yedaalʼı̨́. Azhą́ ahéʼéskéegi bichʼįʼ anáhóótʼiʼ yileeh ndi, ahéʼéskéegi Jiihóvah yaa nitsíkeesígi átʼéego hó ałdóʼ ákótʼéego baa nitsíjíkees. Hoł bééhózingo éí ahéʼéskéegi bee ałchʼįʼ ádee hazhdoodzííʼ yę́ęgi Jiihóvah ílı̨́įgo yaa nitsíkees índa doo ałtsʼázhdootʼash da nízin. Doo hachʼoonígóó bił ashtéézh ájiilaago éí Diyin Bizaad binahjįʼ tʼéiyá achʼooní doo adííláhígíí éí ałtsʼáʼátʼash dóó níʼdoogehgo bá bohónéedzą́. (Matthew 19:5, 6, 9) Oodlání éí bichʼooní yił ahéʼéskéegi yéigo yaa áhályą́ągo éí Jiihóvah nahaʼáago bóhólníihgi bikééʼ dzizı̨́.

19. Nidaʼiyiilzíihgo haitʼéego hashtʼediilnííł?

¹⁹ Tʼáá áníiltso nidaʼiyiilzííh, dóó łahda doo ákǫ́ǫ́ íitʼįįhgóó biniinaa Jiihóvah doo bił hózhǫ́ǫ́góó ánídeilʼįįh. Díí Jiihóvah bił bééhózingo biniinaa Christ nihá ninéidiníʼą́. Áko nidaʼiilzíihgo, Jiihóvah shá yóóʼánídíʼaah, bidiiʼníi doo. (1 John 2:1, 2) Niʼiyiilzíihgi tʼáadoo tʼóó bąą nihíniʼí, bitsʼą́ą́dóó íhooʼaahii átʼé. Jiihóvah áhánígo bił niidlı̨́į doo, Bí éí niʼiyiilzíihgi nihá yóóʼidiyiiʼaahgo baa nihił hózhǫ́ áádóó bá neiilʼaʼgi yee nihíká análwoʼ.—Psalm 103:3.

20. Haʼátʼíí biniyé Jiihóvah nahaʼáago bóhólníihgi bikééʼ nisiidzı̨́į doo?

²⁰ Ániid náhodeesdzáago, Jiihóvah éí diné tʼáá ałtso yikʼi hooʼáał doo áádóó Bí bikʼehgo yáʼádaatʼéehii yídahwiidoołʼááł. (Isaiah 11:9) Ndi kʼad éí Jiihóvah nitsíkeesgi dóó hazhóʼó ádá nahatʼáagi ląʼígóó baa ídahwiidiilʼáałgo átʼé. Bichʼįʼ hoolzhish, God nahaʼáago bóhólníihgi doo łaʼda biniinaa yíninááhodíłkid da doo. Áko Jiihóvah bikʼeh dahoniilʼı̨́įgo, bá nideilʼaʼgo, dóó bedaʼiilʼı̨́įgo, Jiihóvah nahaʼáago bóhólníihgi wołí bee ádeitʼı̨́įgo bikééʼ nisiidzı̨́į doo.